Ngam Puged Paamed Nga Lang Ngam Meybilgad U Fithik’ E Yul’yul’
“Gubin yang ni yira muulung ngay ma gub adag ni pumoon e nge meybil riy, ni pumooon ni kar pied yad nga pa’ Got ma rayog ni ngar puged pa’rad nga lang ngar meybilgad u fithik’ e yul’yul’ ndarir damumuwgad ara yad be tugthin.”—1 TIMOTHY 2:8, New World Translation.
1, 2. (a) Uw rogon nib sor fan e thin ko 1 Timothy 2:8 ko meybil ni ma tay e girdi’ rok Jehovah? (b) Mang e gad ra weliy e chiney?
BA T’UF rok Jehovah ni nge par e girdi’ rok nib yul’yul’ ngak ma ngar yul’yul’gad ngorad. I puthuy apostal Paul e yul’yul’ nge meybil faani yoloy ni gaar: “Gubin yang ni yira muulung ngay ma gub adag ni pumoon e nge meybil riy, ni pumooon ni kar pied yad nga pa’ Got ma rayog ni ngar puged pa’rad nga lang ngar meybilgad u fithik’ e yul’yul’ ndarir damumuwgad ara yad be tugthin.” (1 Timothy 2:8) N’en ni be yog Paul e ba sor fan ko meybil ni fan ko yoor u “gubin yang ni yira muulung ngay” u nap’an ni ma muulung e Kristiano u taabang. Mini’ e ra fek e meybil ko girdi’ rok Got u lan e pi muulung ko ulung? Kari mus ni pi pumoon nib mat’aw ni yad ma fol ko urngin ban’en nib mil fan ni ngar rin’ed ni fan ku Got. (Eklesiastes 12:13, 14) Ba t’uf rorad ni ngar pired nib machalbog ko tirok Got ban’en nge gafarig rorad ma ngar pired nib yul’yul’ ku Jehovah Got.
2 Ma piin piilal ko ulung e thingara ‘puged pa’rad nga lang ngar meybilgad u fithik’ e yul’yul’.’ Meybil ni yad ma ta’ u daken Jesus Kristus e be dag ni yad ba yul’yul’ ku Got ma ra ayuwegrad ndabra damumuwgad ara tugthingad. Ma riyul’ ni urngin e pumoon ni ba taw’ath ya rayog ni nge fek e meybil ko ulung ko Kristiano ma susun ni nge siy i damumuw, dabi lem nib kireb ngak e girdi’, nge lem nde yul’yul’ ku Jehovah nge ulung rok. (James 1:19, 20) Ku mang boch e thin ko Bible ni fan ko piin ni ma fek e meybil ni fen e yoor? Ma mang boch e thin ko Bible ni susun ni ngad folgad riy ko meybil ni gad ma tay ni goo gadad nge meybil ni fan ko tabinaw rodad?
Ngam Lemnag Rogon e Meybil u M’on Riy
3, 4. (a) Mang fan nib fel’ ni ngam tafinaynag u m’on riy ko mang e ga ra weliy ko meybil ni ngam fek ni fen e yoor? (b) Mang e be tamilangnag e Bible u murung’agen uw n’umngin nap’an e meybil?
3 Faanra kan fith ngodad ni ngad feked e meybil ma dabi siy ni gad ra lemnag u m’on riy ko mang e gad ra yog. Ya aram e rayog ni ngad yibilayed boch ban’en nib baga’ fan me siy e non nib n’uw nap’an. Maku rayog ni ngad meybilgad ni goo gadad ni baga’ lamdad. Ma demtrug ko uw n’umngin nap’an. I meybil Jesus u polo’ reb e nep’ u m’on ni ke mel’eg fa 12 e apostal rok. Machane nap’an ni ke tababnag fre Puguran ko yam’ nra tay, ma ba ngoch nap’an e pi meybil ni tay ni fan ko fre flowa nge fre wain. (Mark 14:22-24; Luke 6:12-16) Ma goo gad manang ni mus ni pi meybil rok Jesus nib ngoch e ke felan’ Got ngay.
4 Faanra kan nog ngodad ni ngad feked e meybil ni fan ko tabinaw rodad u m’on ni ngan abich. Pi meybil nem e susun nib ngoch—machane yugu demtrug ko mang e kan yibilay ma susun nib muun ngay e magar ni ngan pining ni fan ko ggan. Faanra gad be fek e meybil ni fen e yoor u m’on fa tomren reb e muulung ko Kristiano, ma de t’uf ni ngan pi’ e meybil nib n’uw nap’an ni boor ban’en ni be weliy riy. I puwan’ Jesus ko pi tamachib ko motochiyel ya ‘yad be fek e meybil nib n’uw, ni yad be guy rogon ni nguun guyrad.’ (Luke 20:46, 47) Be’ nib gel ko tirok Got ban’en e dabi yodor. Machane yu ngiyal’ mab puluw ni ngan pi’ e meybil nib n’uw boch. Susun, be’ ni piilal ni kan nog ngak ni nge fek e bin tomur e meybil ko reb e assembly e susun ni nge lemnag u m’on riy ko mang e ra yibilay me weliy boch ban’en. Machane mus ni re meybil nem e susun ndabi pag nap’an.
Ngan Non ku Got u Fithik’ e Tay Fan
5. (a) Mang e susun e ngad lemnaged u nap’an ni gad be fek e meybil ni fen e yoor? (b) Mang fan ni ngan meybil u rogon ni ga be dag ni ga be tay fan Got ma ga non ngak nib fel’ rogon?
5 Nap’an ni gad be meybil ni fen e yoor ma susun ndabda paged talin ni gathi gad be non ko girdi’. Ya gad ba tadenen ma gad be meybil ku Jehovah ni Somol Nth’abi Ga’. (Psalm 8:3-5, 9; 73:28) Ere susun ni ngad daged ni kad rusgad ni nge dabi felan’ Got ngodad ni bochan e n’en ni gad ra yog nge rogon ni gad ra yog ko meybil. (Proverbs 1:7) I yon’ David e tang ni be gaar: “Gab gol ma gab wurengan’ ma gu ra yib nga tafenam, ma gu ra ragbug nga but’ ni gu be sap nga tempel rom nib thothup ni bay madgum u wan’ug.” (Psalm 5:7) Faanra aram rogon e lem rodad, ma uw rogon ni gad ra non u nap’an ni kan nog ngodad ni ngad feked e meybil ni fen e yoor u nap’an e muulung ko Pi Mich Rok Jehovah? Faanra gad be non ku be’ nib pilung nib girdi’ ma gad ra rin’ u rogon nib manigil mu fithik’ e tay fan. Ere gathi susun ni kab fel’ e meybil ni gad ma tay ngak Jehovah ya gad be meybil ngak fre “Pilung ni manemus”? (Revelation 15:3) Ere nap’an ni gad be meybil ma susun ngad siyeged i yog boch e thin ni baaray: “Manigil e kadabul, Jehovah,” ara “Gamad ma pi’ e t’ufeg romad ngom,” ara, “Ka fel’.” Thin ko Bible e be dag ni Jesus Kristus ni Fak ni maagirag rok Got e dariy biyay ni ke non ku Chitamangin nu tharmiy ni aram rogon.
6. Mang e susun ni ngad lemnaged u nap’an ni gad ra yan nga ‘tagil’ Got, ko gin ni bay e ayuw riy’ u fithik’ e meybil?
6 I gaar Paul: “Nge dab kud tamdaggad ngad bad nga tagil’ Got, ko gin ni bay e ayuw riy.” (Hebrews 4:16) Rayog ni ngad meybilgad ngak Jehovah ni “dab kud tamdaggad” ni yugu aram rogon ni gad e tadenen ya ke michan’dad ko fre maligach ni biyul’ ni pi’ Jesus Kristus. (Acts 10:42, 43; 20:20, 21) Machane yugu demtrug ni “dab kud tamdaggad” ma gathi aram e bod ni gad be sabethinnag Got; ma susun ndab dogned boch e thin ni gathi be tay fan. Ra nge felan’ Jehovah ko meybil ni gad ma tay ni fen e yoor, ma thingarni rin’ u fithik’ e tay fan, ma de puluw ni ngan fanay e meybil ni ngan announcenag ban’en, ara ngan pi’ e fonow ko girdi’, ara ngan pi’ e welthin ko girdi’.
Ngan Meybil u Fithik’ e Sobut’an’uy
7. Uw rogon ni dag Solomon ni ba sobut’an’ u nap’an ni ke fek e meybil ko ngiyal’ ni kan ognag fre tempel rok Jehovah?
7 Demtrug ko gad be meybil ni fen e yoor fa goo gadad, ma ban’en nib baga’ fan ni dabda paged talin ni bay ko Bible ni susun ngad meybilgad u fithik’ e sobut’an’uy. (2 Kronicles 7:13, 14) I dag Solomon ni Pilung ni ke sobut’an’ ko meybil ni tay ni fen e yoor u nap’an ni kan ognag fre tempel rok Jehovah u Jerusalem. Ke toy Solomon e bin th’abi fel’ e naun ni kan toy u fayleng biid. Machane me sobut’an’ me meybil ni gaar: “Machane gur, rayog ni nge par Got u fayleng? Tharmiy ni ga’ngin e dab mu taw nga lan, ere dabiyog ni ngam taw nga lan e re tempel ney ni kug toy!”—1 Kings 8:27.
8. Mang boch e kanawo’ ni ran meybil u fithik’ e sobut’an’uy u nap’an ni yibe meybil ni fen e yoor?
8 Bod Solomon, ma susun ni ngad meybilgad u fithik’ e sobut’an’uy u nap’an ni gad be fek e meybil ni fen e yoor. Ngad siyeged i yog boch e thin nib tolang mab pag rogon, ma ngad daged e sobut’an’uy u lamdad. Meybil ni kan pi’ u fithik’ e sobut’an’uy e gathi bombastic ara ba uf. Ma gathi ngan n’igin nge tiyan’ e girdi’ ku facha’ ni be fek e meybil ya be girngiy e girdi’ ngak fa An ni yibe meybil ngak. (Matthew 6:5) Ku thin ni gad ma yog e ma dag e sobut’an’uy. Faan gad ra meybil u fithik’ e sobut’an’ ma dab dogned ku Got ni nge rin’ boch ban’en u rogon ni gad ba adag. Ya gad ra wenig ngak Jehovah ni nge ngongol u rogon nib puluw ko tin m’agan’ ngay. Bpuluw e lem ko fa en ni yoloy e Psalm faani wenig ni gaar: “Mu ayuwegmad, Jehovah, mu ayweg e pogofan romad! Jehovah, mu aywegmad nge yan i aw nib fel’ e tin ni nggu rin’ed!”—Psalm 118:25; Luke 18:9-14.
Mu Meybil u Fithik’ I Gum’erchaem
9. Mang fonow ni pi’ Jesus u Matthew 6:7, ma uw rogon nrayog ni ngan fol riy?
9 Ra nge felan’ Jehovah ko meybil ni gad ma tay ni fen e yoor fa goo gadad, ma thingari yib u gum’erchadad. Ere gathi ke mus ni ngad sulod nga daken taareb e thin biyay nge biyay ma dabda lemnaged e n’en ni gad be yog. Nap’an ni pi’ Jesus fre Welthin u daken e Burey me gaar: “Faanra mmeybilgad ma dab um sulod u daken taab bugithin ni pire’ yay ni bod ni ma rin’ e piin ni yad ma meybil ngak yugu boch e kan, ni yad be finey ni yira rung’ag e tin ni yad be yog ni bochan e ba n’uw e meybil ni yad be pi’.” N’en ni be yog Jesus e ba dake be gaar: “Dab mog e thin ni yugu ga be yog; ma dab mu sul nga daken taareb e thin ni yugu dariy fan.”—Matthew 6:7; footnote.
10. Mang fan nib puluw ni ngan yibilay taab ban’en ni boor ko taab biyay?
10 Machane yu ngiyal’ ma ba t’uf ni ngad yibilayed taab ban’en ni boor yay. Ma gathi ba kireb ni ngan rin’ ni aram rogon ya ke yog Jesus ni gaar: “Mu ninged, me yog ngomed; mu gayed mi gimed pirieg; mu tugtuguyed e mab, min bing e mab ngomed.” (Matthew 7:7) Sana ba t’uf reb e Kingdom Hall nib biech ya be flaabnag Jehovah e maruwel ko machib u reb e binaw. (Isaiah 60:22) Ba puluw ni nguun yibilay e re n’em u nap’an ni ga be meybil ni goo gur fa nap’an ni ga be fek e meybil ni fen e yoor ko pi muulung ko girdi’ rok Jehovah. Ya faanra gad ra yodor ma gathi gad be ‘sul nga daken taareb e thin ni yugu dariy fan.’
Damu Pag Talin ni Ngam Pining e Magar nge Sorok ku Got
11. Uw rogon ni be sor fan e thin ko Filippi 4:6, 7 ko meybil ni goo gadad nge meybil ni fen e yoor?
11 Boor e girdi’ e ke mus ni yad ma meybil ni fan ni ngar ninged ban’en, machane rogon nib t’uf Jehovah Got rodad e susun nge k’aringdad ngad pininged e magar ngak ma nga dogned e sorok ngak u nap’an ni gad ma meybil ni goo gadad nge fen e yoor. I yoloy Paul ni gaar: “Ma dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med. Ma gapas rok Got ndabi chuchugur ni nge nang e girdi’ fan e ra yororiy gum’ircha’med nge tafinay romed ngi i par rok Kristus Jesus.” (Filippi 4:6, 7) Arrogon, gathi ke mus ni ngad ninged ban’en ku Jehovah ya susun ni ngad pininged e magar ngak ni fan ko tin nib spiritual nge ayuw ni ma pi’ ngodad. (Proverbs 10:22) Kan nin’ e tang ko Psalm ni be gaar: “Ngam pining e magar ku Got ni aram e maligach rom, ma ga pi’ puluwon e n’en ni kam micheg ngak e An Nth’abi Ga’.” (Psalm 50:14) Maku reb e tang ni yin’ David u fithik’ e meybil e be gaar: “Bay gu tang ni gu be pining e sorok ngak Got; bay ug pining e magar ngak ni aram e gu be weliy murung’agen nga feni sorok.” (Psalm 69:30) Susun ni ngad yodoromgad u nap’an ni gad be meybil ni goo gadad nge fen e yoor?
12. Uw rogon ni be lebug e thin ko Psalm 100:4, 5 ko ngiyal’ ney, ma ko mang e ngad pininged e magar nge sorok riy ku Got?
12 Bay e tang ko Psalm u murung’agen Got ni be gaar: “Marod nga lan e tempel rok ni gimed be pining e magar ngak, marod nga lan e naun rok nib thothup ni gimed be pining e sorok ngak! Mu pininged e magar ngak mi gimed pining e sorok ngak! I [Jehovah] e ba fel’; rogon ni gadad ba t’uf rok e bay i par ndariy n’umngin nap’an, ma yul’yul’ rok ngodad e bay i par nrogon ni gubin ngiyal’.” (Psalm 100:4, 5) Ngiyal’ ney ma girdi’ u gubin e nam e be yib nga lan e garog ko naun rok Jehovah, ma rayog ni ngad pininged e sorok nge magar ngak ni bochan. Ga ma pining e magar ku Got ni fan ko Kingdom Hall u lan e binaw rom, ma ga ma dag ni ga be tay fan ya ga ma un ko pi muulung u gubin ngiyal’ u taabang ko piin nib t’uf Got rorad fa? Ma ga ma yin’ e tang nga lang ni be pining e sorok nge magar ku Chitamangidad nu tharmiy fa?
Dabmu Tamra’ ni Ngam Meybil
13. Mang boch e thin ko Bible ni be dag ni susun ni ngad meybilgad ku Jehovah ni mus ni kad rin’ed ban’en me methan’dad ngay?
13 Mus ni gad be lemnag ni dariy fadad ni bochan ni kad rin’ed ban’en, machane susun ngad meybilgad ku Got u fithik’ e yul’yul’. Nap’an ni denen piyu Jew ya kar mabgolgad ko ppin nu bang, me ragbug Ezra nga but’ ni ke pug pa’ nga lang ku Got, me meybil ni gaar: “O Got rog, kug tamra’ ni nggu sap ngom, ni gur e Got rog, ya ke yoor e denen romad ke tun nga tharmiy. Ka nap’an e ngiyal’ ko pi chitamangimad kakrom nge mada’ ko rofen ney ma ke yoor e denen ni ug ngongliyed . . . Ma tomren ni ke af macham ni bochan urngin ban’en nib kireb ni kug ngongliyed—ma gur O Got romad, e dam tay u puluwmad urngin e denen ni kug rin’ed, ma kam pag ni nggu thaygad—ma aram ma kug th’abed e pi motochiyel rom biyay ya kug mabgolgad ko girdi’ ni ma un ko ngongol nib kireb? Gathi ga ra damumuw ngomad nib elmirin ni aram e dakuriy be’ nra magay ma dariy be’ nra thay? O Jehovah ni Got nu Israel, gab mat’aw, ya kug magaygad ni gamad e girdi’ ni kug thaygad ke mada’ ko chiney. Ma gamad be par u m’on rom, ni kug denengad, ma dabiyog ni nggu sak’iygad u p’eowchem ni bochan e re n’ey ni kug rin’ed.”—Ezra 9:1-15, NW; Deuteronomy 7:3, 4.
14. Bod rogon nap’an Ezra ma mang e ba t’uf ni fan e nge n’ag Got fan e kireb rodad?
14 Ra nge n’ag Got fan e kireb rodad, ma thingarda weliyed ngak e n’en ni kad rin’ed ma susun ni nge kireban’dad ngay ma ngad ‘rin’ed e ngongol ni nge dag ni kad pied keru’dad ko denen ni gad be rin’.” (Luke 3:8; Job 42:1-6; Isaiah 66:2) Nap’an Ezra ma ke dag e girdi’ ni ke kalngan’rad ya kar paged e pi ppin rorad nu bang ka ranod. (Ezra 10:44; mu taarebnag ko 2 Korinthi 7:8-13.) Faanra gad ba adag ni nge n’ag Got fan e denen rodad ni ban’en nib ubchiya ma ngad meybilgad ngak u fithik’ e sobut’an’ ma ngad daged ko ngongol rodad ni kad pied keru’dad ngay. Ma faanra rriyul’ ni ke kalngan’dad ma gad ba adag ni ngad yaluweged fre magawon, ma aram e ra k’aringdad ngad gayed e ayuw nib spiritual ko pi piilal ko Kristiano.—James 5:13-15.
Meybil e ra Fl’eg Lanin’um
15. Uw rogon ni dag Hannah ni rayog ni nge gapasnag e meybil lanin’dad?
15 Nap’an ni ke amith gum’erchadad ni bochan ban’en, ma meybil e ra fl’eg lanin’dad. (Psalm 51:17; Proverbs 15:13) Aram rogon Hannah ni be’ nib yul’yul’. I par ko ngiyal’ ni ba yalen ko yu Israel’ ni nge yoor e girdi’ ko tabinaw, machane ir e dariy e bitir ni ke diyennag. Elkanah ni figirngin e boor pi fak ni pumoon nge ppin ya ka bay reb e leengin ni Peninnah fithingan, ni ke moningnag Hannah ya dawori diyen. I meybil Hannah nib elmirin me micheg ku Jehovah ni faanra ra flaabnag me pi’ reb e pagal ngak, ma ‘bayi i pi’ ngak Jehovah u n’umngin nap’an e yafos rok.’ Re meybil nem e ke fl’eg laniyan’ Hannah nge ku pi thin ni yog Eli ni Prist nib Tolang ma aram e “ke chuw e kireban’ rok.” I gargelnag bochi pagal me tunguy fithingan ni Samuel. Ma munmun me pag nge pigpig u lan e tempel rok Jehovah. (1 Samuel 1:9-28) Ke pining e magar ku Got ya ke runguy, ma aram me meybil ngak ni be pining e magar—me yog nib sorok Jehovah ma dariy be’ ni bod ir. (1 Samuel 2:1-10) Bod Hannah, ma rayog ni nge fel’ lanin’dad ko meybil, ma rayog ni nge pagan’dad ni ra fulweg Got urngin e meybil ni ba puluw ko tin nib m’agan’ ngay. Nap’an ni gad ma yog e n’en ni bay u gum’erchadad ngak, ma ngad pared ni “ke chuw e kireban’ rodad,” ya ra chuweg e n’en ni be tomalnag lanin’dad ara ra aywegdad ngad k’adan’dad riy.—Psalm 55:22.
16. Bod rogon Jakob, ma mang fan nsusun ni ngad meybilgad u nap’an ni kad rusgad nga ban’en?
16 Ma ngad meybilgad ngak Got ni nge fl’eg lanin’dad nfaanra ke yib e marus ngodad, ara ke kireban’dad, ara ke magafan’dad u ban’en. (Psalm 55:1-4) I rus Jakob u nap’an ni be bibiy Esau ni walagen ya ke n’uw nap’an ndar nonow. Me ere i meybil Jakob ni gaar: “Got rok e tutuw rog i Abraham ma Got rok e chitamag i Isak, mu rung’ag lamag! [Jehovah], i lungum ngog, Mu sul ko nam rom nge girdi’ rom, ma bay gu ayuwegnem nge yal’uw urngin u puluwom. I gag e tapigpig rom ni dariy rogog nga urngin e runguy nge yul’yul’ rom ni kam dag ngog. Gu th’ab e lul’ ni Jordan nga baraba’ ndariy taa ban’en rog, ya ke mus ni sog rog e bay u paag, ma chiney e kug sul ni l’agruw ulung e girdi’ nge gamanman ni ke un ngog. Wenig ngom, mu ayuwegneg rok Esau ni walageg. Kug rus ngak ya richey nge yib i li’mad ni gamad gubin, nib muun e ppin nge bitir ngay. Mu tafinaynag fapi thin ni mog ngog ni lungum, Bay gu yal’uweg urngin ban’en u puluwom ma bay gu pi’ ngom owchem ni pire’ ndabiyog i theegrad. Bay ra pire’gad ni bod feni pire’ e yan’ u dap’e l’ay.’” (Genesis 32:9-12) Ma de cham Esau ngak Jakob nge fa piin ni yad. Ere ke “yal’uweg [Jehovah] urngin ban’en u puluwon” Jakob ko ngiyal’ nem.
17. Rogon ni be yog ko Psalm 119:52, ma uw rogon nrayog ni nge gapas lanin’dad nfaanra gad ra meybil ko ngiyal’ ni ke maga’fan’dad?
17 Nap’an ni gad be meyil ma rayog ni nge gapas lanin’dad nfaanra gad ra sul nga daken boch ban’en ni bay ko Thin Rok Got. Bin th’abi n’uw e Psalm—e reb e meybil ni yima yin’ ko tang—ma sana Hezekiah ni fak e pilung e yin’ ni gaar: “O Jehovah, gu ma lemnag e pi n’en ni kam rin’ kafram iyib ngaray, ma aram me fl’eg lanin’ug.” (Psalm 119:52) Nap’an ni yib e skeng ngodad ma gad be meybil u fithik’ e sobut’an’ ma rayog ni ngad lemnaged e thin ko Bible ni ra ayuwegdad ngad leked e kanawo’ ni ra felan’nag e Chitamangidad nu tharmiy.
Piin nib Yul’Yul’ e ma Meybil u Gubin Ngiyal’
18. Mang fan nrayog ni ngan nog ni ‘urngin e girdi’ rom nib yul’yul’ ngom e susun e ngar yibilgad’ ngak Got?
18 Urngin e piin nib yul’yul’ ku Jehovah Got e yad ra “meybil u gubin ngiyal’.” (Roma 12:12) U lan e bin 32 e Psalm, ni kan fl’eg u tomren ni ke denen David nge Bath-Sheba, me weliy ni ke maga’fan ya de wenig ku Got ni nge n’ag fan e kireb rok ko som’on miki weliy ni ke baud laniyan’ u nap’an ni ke kalngan’ ngay me wenig ku Got. Ma aram me yin’ David e tang ni gaar: “Ere urngin e girdi’ rom nib yul’yul’ ngom e susun e ngar yibilgad ngom ko yu ngiyal’ i n’en ni nge yog e ayuw ngorad. [Ya ra n’ag Jehovah fan e kireb ni rin’ urngin e piin ni kar kalgadngan’rad].”—Psalm 32:6.
19. Mang fan nsusun ni ngad puged pa’dad nga lang u fithik’ e meybil?
19 Faanra gad ma chaariy rogon thildad Jehovah Got, ma gad ra yibilay ni nge runguydad u daken fre maligach ni biyul’ ni pi’ Jesus. Mu fithik’ e michan’uy ma rayog ni ngad bad nga tagil’ Got, ko gin ni bay e ayuw riy. (Hebrews 4:16) Machane bay boor fan ni ngan meybil! Ere ngad meybilgad u “gubin ngiyal’”—ma gad pining e magar nge sorok ku Got ko thin ni yib u gum’erchadad. (1 Thessalonika 5:17) Ran nge nep’ e ngad puged pa’dad nga lang ko meybil u fithik’ e yul’yul’.
Uw Rogon ni Ga Ra Fulweg?
◻ Mang fan nib fel’ ni ngan tafinaynag ko mang e ngam mog u m’on ni ngam fek e meybil ni fen e yoor?
◻ Mang fan nsusun ni ngad meybilgad u fithik’ e tay fan mab fel’ e thin rodad?
◻ Susun uw rogon e lem rodad u nap’an ni gad be meybil?
◻ Nap’an ni gad be meybil mang fan nsusun ni ngad pininged e magar nge sorok ku Got?
◻ Mang boch e thin ko Bible ni be dag ni rayog ni nge gapas lanin’dad nfaanra gad ra meybil?
[Sasing ko page 15]
I sobut’an’ Solomon ni Pilung u nap’an ni ke fek e meybil ni fen e yoor ko ngiyal’ nkan ognag fre tempel rok Jehovah
[Sasing ko page 16]
Bod Hannah, ma rayog ni nge gapas lanin’um nfaanra ngam meybil