BIN 15

Ngan Dag Nrib Mich u Wan’uy

1 Thessalonika 1:5

N’EN NI NGAN RIN’: Mu dag nrib mich u wan’um e tin ni ga be weliy ma kub ga’ fan.

Mu fal’eg rogom nib fel’ rogon. Mu fal’eg i fil e n’en ni ngam weliy nge taw ko ngiyal’ ni kari tamilang u wan’um ma kam nang rogon ni be micheg e Bible nib riyul’ e pi n’em. Mu guy rogon ni ngam weliy e tin nib ga’ fan ko welthin rom ni ga be fanay in bug e thin nib mom ni ngan nang fan. Mu lemnag angin nra yib ngak e piin be motoyil, mag yibilay gelngin Got nib thothup.

Mu fil e welthin rom nib ga’ lamam ya nge yag ni mit ngom e pi n’en ni bay riy miki yag ni ngam weliy nib fel’ rogon.
Mog boch e thin nra dag nib mich u wan’um e n’en ni ga be weliy. Mu weliy ko thin rom ko bin ni ngam beeg e n’en ni kan yoloy ko babyor rodad. Mu non u reb e kanawo’ nra m’ug riy nib mich u wan’um e n’en ni ga be yog.
Mu dag nrib mich u wan’um e n’en ni ga be weliy. Mu non nib ga’ lamam. Faanra de kireb ni ngam rin’, mag sap nga owchen e piin be motoyil.

Ba thil e bin ni ngam dag nib mich ban’en u wan’um ko bin ni ngam non nib gel merin, ara nga mog e n’en ni nge rin’ e girdi’, ara ngam towasariyrad. Mu non ko girdi’ u fithik’ e t’ufeg ni yugu aram rogon ni ga be dag nrib mich u wan’um e n’en ni ga be weliy.