Uw Rogon Nrayog ni Nge Felfelan’ e Tabinaw Rom?​—Guruy ni 1

Piin ka fin ra uned ko mabgol e yad ma athapeg ni ngar pared ni yad ba felfelan’ ndariy n’umngin nap’an ni bod e rofen nra uned ko mabgol. Ma rayog e re n’ey. Pi Kristiano ni ke n’uw nap’an ni kar uned ko mabgol ma kar athamgilgad ni ngar folgad ko pi fonow u Bible e yad manang nrayog ni nge felfelan’ e mabgol ni aray rogon.

1. Mang fonow e be pi’ e Bible ngak e piin figirngiy?

Ke tay Jehovah ni en figirngiy e ir lolugen e tabinaw. (Mu beeg e Efesus 5:23.) Baadag Jehovah ni nge dugliy e en figirngiy boch ban’en nra yib angin ko tabinaw rok. Be gaar e Bible ngak e piin figirngiy: “Ngari t’uf e piin nleengimed romed.” (Efesus 5:25) Mang e be yip’ fan e re n’ey? Be’ ni figirngiy ni ma t’ufeg leengin e ma dag e sumunguy ngak u tabinaw ngu nap’an ni yow bay u fithik’ e girdi’. Ma guy rogon ndabi buch ban’en rok, me par nib felfelan’, miki pi’ e tin nib t’uf rok. (1 Timothy 5:8) Ma bin th’abi ga’ fan riy e ma ayuweg leengin ni nge par nib chugur thilrow Jehovah. (Matthew 4:4) Bod nrayog ni ngaur meybilgow ma yow be beeg e Bible u taabang. Faanra ayuweg reb i figirngiy leengin u fithik’ e t’ufeg, ma aram e ra par nib fel’ e tha’ u thilrow Jehovah.​—Mu beeg e 1 Peter 3:7.

2. Mang fonow e be pi’ e Bible ngak e piin leengiy?

Be yog e Thin rok Got ni en leengiy e “thingari ta’ fan figirngin.” (Efesus 5:33) Uw rogon nrayog ni nge rin’ e re n’ey? Rayog ni nge lemnag fel’ngin figirngin nge rogon ni be athamgil ni nge ayuwegrad pi fakrow. Ku rayog ni nge dag ni be tayfan ni aram e nga i ayuweg ya nge yag ni yib angin e pi n’en be dugliy, ma be non ngak u fithik’ e sumunguy, ma be yog boch ban’en nib fel’ u murung’agen ni mus ni faanra gathi ir reb e tapigpig rok Jehovah.

3. Uw rogon nrayog ni nge gelnag ba wu’ e mabgol e tha’ u thilrow?

Be weliy e Bible murung’agen e piin mabgol ni be gaar: “Yow [ra] par ni kar taab girdi’gow.” (Matthew 19:5) Re n’ey e be yip’ fan nthingar ra guyew rogon ni ngar gelgow nga boch ban’en nrayog ni nge warnag e t’ufeg u thilrow. Rogon ni yow ma rin’ e re n’ey e aram e gubin ngiyal’ ni yow ma rin’ boch ban’en u taabang, ma yow ma weliy lanin’row ngorow u fithik’ e yul’yul’ nge t’ufeg. Darur pagew ban’en ara be’ ni nge m’on u lan e mabgol rorow, ya kemus ni yigoo Jehovah. Ri yow ma kol ayuw ndariy bagayow ni nge chugur thilrow yugu be’ u wuru’ e mabgol rorow u reb e kanawo’ nde fel’.

KUM FIL BOCH BAN’EN U MURUNG’AGEN

4. Piin figirngiy​—mu t’ufeged mi gimed ayuweg e piin leengimed

VIDEO: Husbands, Love Your Wife as Yourself (9:53)

• Mang boch e kanawo’ nrayog ni nge dag reb i figirngiy riy nib t’uf leengin rok ma ma ayuweg?

Mu beegew e Kolose 3:12, mi gimew weliy e fulweg ko re deer ni baaray:

• Uw rogon nrayog ni nge dag reb i figirngiy e pi fel’ngin ney u lan e mabgol rok?

5. Piin leengiy​—mu t’ufeged mi gimed tayfan e piin figirngimed

Be pi’ e Bible e athamgil nga laniyan’ e en leengiy ni nge tayfan figirngin ni yugu demtrug ko ma pigpig ngak Jehovah fa danga’. Mu beegew e 1 Peter 3:1, 2, mi gimew weliy e fulweg ko gal deer ni baaray:

• Faanra de nang figirngim e tin riyul’, ma dariy e maruwar riy ni ga baadag ni nge mang reb e tapigpig rok Jehovah. Machane bin ngan e ga be lemnag nra yib angin​—ngaum par ma ga be machibnag ara ngaum dag e ngongol nib fel’ ma ga be tayfan? Mang fan?

Piin figirngiy nge piin leengiy e rayog ni ngaur dugliyed boch ban’en nib fel’ rogon u taabang. Machane bay yu ngiyal’ nsana dabi m’agan’ e en leengiy ko n’en ke yog figirngin. Faanra buch e re n’ey ma rayog ni nge weliy laniyan’ u fithik’ e gapas nge tayfan, machane thingari nang ni Jehovah e ir e ke pi’ mat’awun figirngin ni nge dugliy e n’en nib fel’ ni fan ko tabinaw. Ere susun e nge rin’ e tin nrayog rok ni nge ayuweg ya nge yag ni yib angin e pi n’en ke dugliy. Ra rin’ e re n’ey, ma aram e rayog ni nge par e tabinaw rorow ni bay e felfelan’ riy. Mu beegew e 1 Peter 3:3-5, mi gimew weliy e fulweg ko re deer ni baaray:

• Uw rogon u wan’ Jehovah ni faanra i tay e en leengiy fan figirngin?

6. Rayog ni ngam pithigew e magawon u lan e mabgol romew

VIDEO: How to Strengthen the Marriage Bond (5:44)

• Mang e be dag ni ke tabab ni nge palog e tha’ u thilin fa wu’ i mabgol ni kan dag yaarow ko fare video?

• Mang e rrin’ew ya nge yag nra gelnagew e tha’ u thilrow?

Mu beegew e 1 Korinth 10:24 nge Kolose 3:13. Tomuren ni kam beegew reb ko gal thin nu Bible ney, mi gimew weliy e fulweg ko re deer ni baaray:

• Faanra fol ba wu’ e mabgol ko re fonow ney, ma uw rogon nra gel e tha’ u thilrow?

Be yog e Bible nsusun e nge bagadad me tayfan bagadad. Re n’ey e ba muun ngay ni ngad daged e sumunguy nge tayfan ngak be’. Mu beegew e Roma 12:10, mi gimew weliy e fulweg ko gal deer ni baaray:

• Gur, susun e nge sonnag e en figirngiy ara en leengiy e en mabgol rok ni nge dag e tayfan ngak, fa? Mang fan ni ka mog ni arrogon?

N’EN KAN FIL

Faanra i t’ufeg ba wu’ e mabgol yow, ma yow be tay farow, ma yow be fol ko pi kenggin e motochiyel u Bible, ma aram e rayog ni ngar parew ni yow ba felfelan’.

Ngan Sul u Daken

• Uw rogon nrayog ni nge ayuweg e en figirngiy e mabgol rok ni nge par ni bay e felfelan’ riy?

• Uw rogon nrayog ni nge ayuweg e en leengiy e mabgol rok ni nge par ni bay e felfelan’ riy?

• Faanra gab mabgol, ma mang kenggin e motochiyel u Bible e rayog ni nge gelnag e tha’ u thilmew e en mabgol rom?

MU GAY MURUNG’AGEN

Mu fil boch e fonow nrayog ni nge yibnag e felfelan’ nga lan e tabinaw rom.

Rayog ni Nge Felfelan’ e Tabinaw Rom (brochure)

Mu yaliy reb e music video ni be weliy murung’agen boch e tow’ath nra yib nga lan e mabgol rom ni faan ga ra fol ko pi fonow rok Got.

Truly in Love (4:26)

Mu beeg e n’en be yip’ fan ni ngan tayfan e en figirngiy ni ir lolugen e tabinaw.

“Piin ni Ppin, Mang Fan ni Ngam Folgad ko En Lolugmed?” (Fare Wulyang Ntagil’ E Damit, May 1, 2010)

Uw rogon ni gel ba wuʼ e mabgol nga boch e magawon nib gel nra madaʼnagew nib muun ngay e mabgol rorow ni dar?

We Rebuilt Our Marriage With God’s Help (5:14)