GURUY NI 52
Fan nib Ga’ Fan Rogon e Munmad Rodad nge Rogon ni Gad Ma Fal’eg Yaadad
Ra bagadad ma rogon e re miti mad ni baadag ni ma chuw ngay nge rogon ni baadag ni ma fal’eg yaan. Bay in i kenggin e motochiyel u Bible ni gad ra fol riy, ma aram e rayog ni ngad mel’eged e re miti mad ni gad baadag ni ngad chuwgad ngay ma ka gad be felfelan’nag Jehovah. Ngad weliyed in ko pi n’ey.
1. Mang boch i kenggin e motochiyel nsusun e nge gagiyegnag rogon e re miti mad ni ngad mel’eged ni ngad chuwgad ngay nge rogon ni ngad fal’ eged yaadad?
Susun e ngaud munmadgad nib “fel’ rogon” me beech yaadad ya nge m’ug riy ni gadad “girdien Got.” (1 Timothy 2:9, 10) Am lemnag e re aningeg i n’ey: (1) Susun e nge par e mad rodad nib “fel’ rogon.” Kam guy u nap’an e muulung ni girdi’ rok Jehovah e ra bagayad ma rogon e mad ni baadag ni ma chuw ngay, machane ma m’ug u rogon e munmad rorad nge rogon ni yad ma fal’eg piyan lolugrad ni yad be tayfan fare Got ni gad be liyor ngak. (2) Susun e nge yalen e munmad rodad ni be yip’ fan nsusun e dab ud chuwgad ko mad nra k’aring boch e girdi’ ni ngar ar’arnaged boch ban’en nib kireb, ara da faled mit e girdi’ ngodad. (3) Susun e ngad daged nib puluw rogon e lem ni gad be tay ni aram e gathi nga yigi tabab e girdi’ ni ngar chuwgad ngab mit e mad ara ra fal’eged yaarad u reb e kanawo’ ma gad folwok riy. (4) Gubin ngiyal’ nsusun e nge m’ug u yaadad ni gadad “girdien Got,” me dag ko girdi’ ni gad ma liyor ko bin riyul’ e Got.—1 Korinth 10:31.
2. Mang fan nsusun e ngaud lemnaged laniyan’ e pi walag u nap’an ni gad be mel’eg e re miti mad ni ngad chuwgad ngay?
Yugu aram rogon nib puf rogodad ni ngad mel’eged e re miti mad ni gad baadag ni ngad chuwgad ngay, machane susun e ngad lemnaged ko ra magawonnag laniyan’ yugu boch e girdi’ fa danga’. Gad ma athamgil u rogon nrayog rodad ndabi magawonnag bagadad laniyan’ be’, ya nge bagadad me “yan nga laniyan’ walagen ni girdien Kristus ni fan ngak faanem, ya nge ayuweg nge gel e michan’ rok ngak Somol.”—Mu beeg e Roma 15:1, 2.
3. Uw rogon nrayog ni ngad k’aringed e girdi’ ni ngar adaged e bin riyul’ e liyor ni bochan rogon yaadad?
Yugu aram rogon ni gad ma guy rogon ni ngad munmadgad nib fel’ rogon ni gubin ngiyal’, machane rib ga’ ni gad ma tedan’dad nga rogon e munmad rodad u nap’an e muulung nge machib. Dubdad ni ngad k’aringed e girdi’ ni nge dab kur motoyilgad ko fare thin nib fel’ ni gad ma machibnag, ya gad baadag ni ngad k’aringed e girdi’ ni ngar adaged ni ngkur filed boch ban’en u murung’agen fare Got ni gad ma pigpig ngak ni bochan rogon yaadad, ma gad ‘girngiy e fel’ ko machib ni murung’agen Got ni ir e ma thapegdad ngak.’—Titus 2:10.
KUM FIL BOCH BAN’EN U MURUNG’AGEN
Mu fil rogon nrayog ni nge nang e girdi’ ni gadad boch e Kristiano u daken e munmad ni gad ma tay nge rogon ni gad ma fal’eg yaadad.
Rayog ni nge m’ug u rogon yaadad ko gad be tayfan e piin yad ma yog e thin fa danga’. Yugu aram rogon ni ma guy Jehovah e n’en bay u gum’ircha’dad, machane susun e nge m’ug u rogon yaadad ni gad be tayfan
4. Ra bbeech yaadad ma aram e gad be tayfan Jehovah
Mang e bin th’abi ga’ i fan ni ngad guyed rogon ni nge beech yaadad? Mu beegew e Psalm 47:2, mi gimew weliy e fulweg ko pi deer ni baaray:
Bochan ni gad ma fek fithingan Jehovah, ma uw rogon nsusun e nge m’ug e re n’ey ko munmad ni gad ma tay?
Ga be lemnag nrib t’uf ni nge ga’ fan u wan’dad rogon yaadad u nap’an ni gad ra un ko muulung nge machib fa danga’? Mang fan ni ka mog ni arrogon?
5. Rogon ni ngad mel’eged e mad ni ngad chuwgad ngay nge rogon ni ngad fal’eged yaadad
Demtrug ko ba tolang puluwon e mad ni gad be chuw ngay fa danga’, ma susun e nge beech me m’ag ko n’en gad be rin’. Mu beegew e 1 Korinth 10:24 nge 1 Timothy 2:9, 10. Tomuren mi gimew weliy fan ndab ud . . .
munmadgad ndariy yaramen.
chuwgad ko mad nib k’ad nga dowdad, fa ra gagiyelnag yu yang u dowdad, ara k’aring be’ ni nge ar’arnag boch ban’en nib kireb.
Yugu aram rogon nda kud moyed u tan e Motochiyel rok Moses, machane ka boor ban’en nrayog ni ngad filed riy u murung’agen rogon e lem rok Jehovah. Mu beegew e Deuteronomy 22:5, mi gimew weliy e fulweg ko re deer ni baaray:
Mang fan nsusun e dab ud munmadgad ara ud fal’eged yaadad u reb e kanawo’ nra mo’maw’ ni ngan nang riy ko gadad reb e pumoon ara gadad reb e ppin?
Mu beegew e 1 Korinth 10:32, 33 nge 1 John 2:15, 16, mi gimew weliy e fulweg ko pi deer ni baaray:
Mang fan nsusun e nge ga’ fan u wan’dad ko ra magawon laniyan’ e girdi’ u lan binaw ara lan e ulung ni bochan rogon e munmad rodad fa danga’?
Uw rogon e munmad ko girdi’ ko gin ga ma par riy nge rogon ni yad ma fal’eg yaarad?
Ga be lemnag ni bay boch e pi n’ey nde m’ag ko Kristiano, fa? Mang fan ni ka mog ni arrogon?
Boor e mad nrayog ni ngad chuwgad ngay nge rogon kanawoen ni ngad fal’eged yaadad ma ka gad be felfelan’nag Jehovah
MA GAAR BOCH E GIRDI’: “Bay mat’awug ni nggu chuw ko re miti mad ni gu baadag ni nggu chuw ngay.”
Ba puluw e re n’ey u wan’um, fa? Mang fan ni ka mog ni arrogon?
N’EN KAN FIL
Faanra ud munmadgad nib fel’ rogon mab beech yaadad, ma aram e gad be tayfan Jehovah nge yugu boch e girdi’.
Ngan Sul u Daken
Mang nib ga’ fan u wan’ Jehovah rogon e munmad ni gad ma tay nge rogon ni gad ma fal’eg yaadad?
Mang boch i kenggin e motochiyel nsusun e nge pow’iy rogon e re miti mad ni gad ma dugliy ni ngad chuwgad ngay nge rogon ni gad ma fal’eg yaadad?
Mang e ra rin’ yaadad nga rogon ni ma lemnag e girdi’ e bin riyul’ e liyor?
MU GAY MURUNG’AGEN
Mu guy e n’en ma lemnag e girdi’ u nap’an ni yad ra guy e mad ni kam chuw ngay.
Mu fil fan nib fel’ ni ngam lem u m’on ni ngan an e gachow nga dowam.
“What Does the Bible Say About Tattoos?” (Article ni bay ko website)
Kum beeg boch i kenggin e motochiyel nrayog ni nge pow’iy e pi n’en gad ma dugliy.
Uw rogon ni fil be’ nib pin ni baadag ni nge felfelan’nag Got rogon ni nge m’agan’ nga rogon ni ke dugliy boch e girdi’ ni ngaur munmadgad?
“Dress and Grooming Was My Stumbling Block” (Awake!, December 22, 2003)