Mingiyal’ nge Mang Fan ni Ngan Upunguy Lolugey?

Mingiyal’ nge mang fan ni susun e nge upunguy reb e ppin ni Kristiano lolugen ni fan ko liyor ngak Got? Ngad weliyed e n’en nni thagthagnag nga laniyan’ apostal Paul nge yoloy u murung’agen e re n’ey. Ke pi’ e fonow nra ayuwegdad ni ngad dugliyed ban’en nib fel’ rogon ni yira pining e sorok riy ngak Got. (1 Korinth 11:3-16) Dalip ban’en ni weliy Paul ni ngan lemnag: (1) pi n’en nra rin’ reb e ppin ma nge upunguy lolugen, (2) gin ni nge rin’ riy, nge (3) fan ni nge rin’.

Pi n’en nra rin’. I weliy Paul l’agruw ban’en, ni aram e: meybil nge ngan machibnag e thin rok Got ngak e girdi’ u fithik’ girdien Kristus ni ke muulung. (Verse 4 nge 5) Meybil e aram e ngan non ngak Jehovah. Ngiyal’ ney e ra ngan machibnag e thin rok Got u fithik’ e girdi’ ni ke muulung mab muun ngay kanawoen e machib ni ma tay gubin e Kristiano. Ere, n’en ni be yip’ Paul fan e gubin ngiyal’ ni nge meybil reb e ppin fa nge weliy e thin nu Bible ko girdi’, ma nge upunguy lolugen, fa? Danga’, ya ba thilthil e gin ni ma rin’ reb e ppin ni Kristiano e pi n’ey riy.

Gin ni nge rin’ riy. I weliy Paul l’agruw ban’en ni aram e tabinaw nge ulung. I gaar: “Pumoon e ir lolugen leengin, . . . Re pin nra meybil ara machibnag e thin rok Got ngak girdien Kristus ni ke muulung ndariy ban’en ni ke upunguy nga lolugen e be n’ag fan figirngin.” (Verse 3 nge 5) U lan e tabinaw e, en figirngiy e ir e ke tay Jehovah ni nge mang lolugen leengin. Ere, faanra de tayfan e en leengiy mat’awun figirngin, me rin’ e maruwel rok ni ke pi’ Jehovah, ma aram e be darifannag figirngin. Bod ni faanra bay e pumoon rok u tabinaw ma ke pining be’ ni ngar filew e Bible, ma ra upunguy lolugen ya nge dabi darifannag e pumoon rok. Ra rin’ e re n’ey ndemtrug ko ke taufe e pumoon rok fa danga’, ya ir lolugen e tabinaw.a Ma faanra nge meybil ara nge weliy e thin nu Bible u tabinaw ni bay reb e pagel ni fak ni kab bitir ni kan taufenag, maku ra upunguy lolugen ni gathi bochan ni fare pagel e ir lolugen e tabinaw, ya bochan mat’awun ni kan pi’ ngak u lan e ulung ni Kristiano.

I weliy Paul murung’agen e ulung ni gaar: “Faanra der fel’ u wan’ be’ ni ba adag ni ngan luag murung’agen, ma tin ni nggog e gamow nge pi galesiya rok Got i yan e dakuriy yugu reb e yalen nga bayang ni ma rin’ ulungen girdien Kristus ko ngiyal’ ni yibe meybil ngak Got.” (Verse 16) U lan e ulung ni Kristiano e kemus ni yigoo piin pumoon ni kan taufenagrad e rayog ni nga rogned e thin u lan e ulung. (1 Timothy 2:11-14; Hebrews 13:17) Kemus ni yigoo piin pumoon e rayog ni ngar manged piilal nge ministerial servant ni ngaur ayuweged e ulung rok Got. (Acts 20:28) Machane, bay yu ngiyal’ ni kub t’uf ni nge rin’ reb e ppin ni Kristiano reb e maruwel ko walag ni pumoon u lan e ulung. Bod ni sana ba t’uf ni nge yarmiy e muulung ni fan ko machib ni bochan e de moy reb e walag ni pumoon ni nge yarmiy. Fa reb e be fil e Bible ngak be’ ni bay reb e walag ni pumoon.b Bochan ni pi n’ey e ku bang ko maruwel u lan e ulung, ma aram fan ni nge upunguy reb e ppin lolugen ni bochan e nge m’ug ni be rin’ e maruwel ko pumoon u lan e ulung.

Machane, bay boch ban’en ko liyor nde t’uf ni nge upunguy reb e walag nib pin lolugen riy. Bod nde t’uf ni nge upunguy lolugen u nap’an ni nge pi’ e fulweg u nap’an e muulung, ara nap’an ni yow be machib figirngin ara reb e walag ni pumoon u mit e tabinaw, ara u nap’an ni nge fek e meybil rorad pi fak ndawor ni taufenagrad ara nge fil e Bible ngorad. Riyul’ nrayog ni nge sum boch e deer u murung’agen e re n’ey. Machane, faanra be maruwaran’ reb e walag nib pin, ma rayog ni ngki gay boch ban’en u murung’agen.c Ma faanra ke gay maku dawori tamilang u wan’ ma be yog e nangan’ rok ngak ni nge upunguy lolugen, ma dariy ban’en nib kireb riy nrogon ni ke m’ug ko sasing.

Fan ni nge rin’. Verse 10 e be weliy l’agruw i fan ni nge upunguy reb e ppin ni Kristiano lolugen ni gaar: “Bochan e pi engel ma aram fan ni nge reb e ppin me upunguy lolugen nge dag ni ba’ u tan pa’ figirngin.” Som’on e mu tay fanam i yan ko fare bugithin ni “ba’ u tan pa’.” Ra upunguy reb e ppin lolugen ma aram e be dag ni be tayfan mat’awun e piin pumoon u lan e ulung ni ke pi’ Jehovah. Maku reb e be m’ug nib t’uf Jehovah Got rok mab yul’yul’ ngak. Bin l’agruw i fan e yira pirieg ko fapi thin ni be gaar, “bochan e pi engel.” Mang angin ngak e pi engel ni faanra upunguy reb e ppin lolugen?

Ma yib angin ngak e pi engel ni faan yad ra guy ni yibe tayfan e piin lolugen e ulung rok Jehovah u tharmiy ngu fayleng. Ku ma yib angin ngorad e ngongol nib fel’ ni ma rin’ e girdi’ ndawor ra flontgad. Bin riyul’ riy, e mus ngorad maku thingar ra folgad ko yaram rok Jehovah ni aram reb e skeng ni boor e engel nde yag ni ngar gelgad ngay kakrom. (Jude 6) Ere, rayog ni nge guy e pi engel reb e ppin ni Kristiano ni boor ban’en ni manang ngak reb e walag ni pumoon u lan e ulung ni kan taufenag; machane ma tayfan ni ir lolugen. Maku bay e ppin ni Kristiano ni kan dugliy nra un ngak Kristus ko gagiyeg u tharmiy. Pi walag ni Kristiano ney e ra boch e ngaram ma yad ra par nga reb e liw ni kab tolang ko pi engel mi yad un ngak Kristus ko gagiyeg u tharmiy. Ireray reb e kanawo’ nrayog ni nge folwok e pi engel riy e ngiyal’ ney! Riyul’ nrib tow’ath e pi walag ni ppin ni ngar daged ni yad ba yul’yul’ ni bochan e yad ma fol ma yad ma tayfan e piin lolugrad u p’eowchen bokum milyon e engel!