GURUY NI 16
Mang e Rin’ Jesus u Nap’an ni Immoy u Fayleng?
Boor e girdi’ ni yad ma lemnag ni Jesus e bochi tir ni kafin ni gargeleg, ara ba profet ni boor ban’en ni manang, ara be’ nib pumoon ni be yan ni nge yim’. Machane faan gad ra fil murung’agen e pi n’en ni i rin’ u fayleng, ma gur, rayog ni ngkud nanged boch ban’en u murung’agen, fa? Gad ra weliy ko re guruy ney boch e tin th’abi ga’ fan ban’en ni i rin’ Jesus nge rogon nra ayuwegem.
1. Mang e bin th’abi ga’ fan e maruwel ni i rin’ Jesus?
Re maruwel nth’abi ga’ fan ni i rin’ Jesus e aram e i machibnag “fare Thin Nib Fel’ ni murung’agen e gagiyeg rok Got.” (Mu beeg e Luke 4:43.) I machibnag nra sunmiy Got reb e am ngak ara gil’ilungun nra pithig urngin e magawon ko girdi’.a Ba gel e maruwel ni i tay Jesus u lan dalip nge baley e duw ni be machibnag e re n’ey ko girdi’.—Matthew 9:35.
2. Mang fan ni i ngongliy Jesus e maang’ang?
Be weliy e Bible murung’agen boor e “maang’ang, nge pi n’en nni ngat ngay, nge pi pow ni ngongliy Got u pa’ [Jesus].” (Acts 2:22) I pi’ Got gelngin Jesus ni nge gagiyegnag e yafang, me duruw’iy bokum biyu’ e girdi’, me golnag e m’ar, me faseg e yam’. (Matthew 8:23-27; 14:15-21; Mark 6:56; Luke 7:11-17) Pi maang’ang ni i ngongliy Jesus e be tamilangnag ni Got e ir e ke l’og ke yib. Ku be tamilangnag ni bay gelngin Jehovah ni nge pithig urngin e magawon rodad.
3. Mang e rayog ni ngad filed ko n’en ni i rin’ Jesus?
Gubin ngiyal’ ni i fol Jesus rok Jehovah. (Mu beeg e John 8:29.) Yugu aram rogon ni un togopuluw ngak, machane me par nib yul’yul’ nge rin’ urngin ban’en ni yog e Chitamangin ngak nge mada’ ko ngiyal’ ni yim’ riy. I micheg nrayog ko girdi’ ni ngar pigpiggad ngak Got ngki mada’ ko ngiyal’ ni kar mada’naged boch e magawon nrib gel e mo’maw’ riy. Ere ke dag Jesus ‘ngodad rogon ni ngad folwokgad rok, ni aram e nguud leked luwan ay.’—1 Peter 2:21.
KUM FIL BOCH BAN’EN U MURUNG’AGEN
Mu fil rogon ni i machibnag Jesus fare thin nib fel’ ma be ngongliy e maang’ang.
4. I machibnag Jesus fare thin nib fel’
I yan Jesus u but’ u lan bokum miriay e mayel u daken yu pa’ i kanawo’ ni boor e fiyath riy ni be machibnag fare thin nib fel’ ngak urngin e girdi’ nrayog. Mu beegew e Luke 8:1, mi gimew weliy e fulweg ko gal deer ni baaray:
Gur, kemus ni yigoo piin ur muulunggad ngaur motoyilgad ngak Jesus e aram e piin ni i machibnagrad, fa?
Mang e i rin’ Jesus ya nge yag ni pirieg e girdi’ ni nge machibnagrad?
I yiiynag Got nra i machibnag fare Messiah fare thin nib fel’. Mu beegew e Isaiah 61:1, 2, mi gimew weliy e fulweg ko gal deer ni baaray:
Uw rogon ni lebguy Jesus e re yiiy ney?
Ga be lemnag nib t’uf ni nge rung’ag e girdi’ e re thin nib fel’ ney e ngiyal’ ney, fa?
5. I machibnag Jesus boch ban’en nib ga’ fan ni yira fil ban’en riy
Gathi kemus ni i machibnag Jesus fare thin nib fel’ ni murung’agen Gil’ilungun Got, ya ku i machibnag boch ban’en ni yira fil ban’en riy. Am lemnag in ko pi n’ey ni weliy ko fare Welthin rok u Daken e Burey. Mu beegew e Matthew 6:14, 34 nge 7:12, mi gimew weliy e fulweg ko gal deer ni baaray:
Mang boch e fonow ni weliy Jesus ni bay ko pi verse ney?
Ga be lemnag ni ka rayog ni nge ayuwegdad e pi fonow ney, fa?
6. I ngongliy Jesus e maang’ang
I pi’ Jehovah gelngin Jesus ni nge ngongliy boor e maang’ang. Mu beegew e Mark 5:25-34 ara mu yaliyew e re VIDEO ney ni be weliy murung’agen reb ko pi maang’ang nem. Tomuren mi gimew weliy e fulweg ko gal deer ni baaray.
Mang e ba mich u wan’ fare pin nib m’ar ni kan dag yaan ko fare video?
Mang e ga baadag u rarogon e re maang’ang ney?
Mu beegew e John 5:36, mi gimew weliy e fulweg ko re deer ni baaray:
Mang e ‘be micheg’ e pi maang’ang ni i ngongliy Jesus u murung’agen?
Baaray murung’agen ban’en
Yooren e tin gad manang u murung’agen Jesus e kan fek ko fa aningeg i babyor ko Bible ni Matthew, Mark, Luke, nge John. Ra bagayad e pi cha’ney ma bay ban’en nib thil ni weliy u murung’agen Jesus. Machane faan gad ra beeg e re aningeg i Gospel ney, ma rayog ni ngad nanged murung’agen e yafos rok Jesus.
MATTHEW
e ir e som’on ni yoloy e ke rok e babyor. Be weliy boor ban’en ni i machibnag Jesus, nib ga’ ni pi n’en ni i machibnag u murung’agen Gil’ilungun Got.
MARK
e th’abi ngoch e birok e Gospel, machane boor ban’en ni i weliy murung’agen.
LUKE
e weliy feni ga’ fan e meybil u wan’ Jesus nge rogon e ngongol rok ko piin nib pin.
JOHN
e be ayuwegdad ni ngad nanged rarogon Jesus, ni aram e i sul u daken boor ban’en ni i weliy Jesus nge pi fager rok nrib chugur thilrad nge yugu boch e girdi’.
MA GAAR BOCH E GIRDI’: “I yib Jesus nga fayleng ni nge pi’ e yafos rok ni fan ko girdi’.”
Ga be lemnag ni kemus fan ni yib Jesus nga fayleng, fa?
N’EN KAN FIL
I machibnag Jesus murung’agen Gil’ilungun Got, ma i ngongliy e maang’ang, ma gubin ngiyal’ ni i fol rok Jehovah.
Ngan Sul u Daken
Mang e bin th’abi ga’ fan e maruwel ni i rin’ Jesus?
Mang e be micheg e pi maang’ang ni i ngongliy Jesus?
Mang boch ban’en ni i machibnag Jesus ni yira fil ban’en riy?
MU GAY MURUNG’AGEN
Mang e n’en nib ga’ ni i machibnag Jesus murung’agen?
“Fan nib Ga’ Fan Gil’ilungun Got u Wan’ Jesus” (Fare Wulyang ko Damit, October 1, 2014)
Mu beeg fan nrayog ni nge mich u wan’dad nriyul’ e pi maang’ang ni i ngongliy Jesus.
Mu beeg rogon ni thilyeg be’ nib pumoon rogon e par rok u tomuren ni fil murung’agen rogon ni i ayuweg Jesus yugu boch e girdi’.
“My Life Was All About Me” (The Watchtower, October 1, 2014)
Mu guy boch ban’en nib ga’ fan ni i rin’ Jesus ni kan weliy murung’agen ni be yan u rogon e ngiyal’ ni buch reb e pi n’ey riy nge reb.
a Guruy ni 31-33 e ra weliy boch ban’en u murung’agen Gil’ilungun Got.