GURUY NI 22
Uw Rogon Nrayog ni Ngam Weliy Fare Thin nib Fel’?
Nap’an ni ga be fil e tin riyul’ u Bible, ma sana ra lungum u wan’um, ‘Ba t’uf ni nge nang gubin e girdi’ murung’agen e re n’ey!’ Arrogon, gubin e girdi’ nib t’uf ni ngar nanged! Machane rayog ni ga be rus ni ngam weliy ko girdi’ e n’en kam fil. Ere ngad weliyed rogon ni nge dab kum rus me yag nim tabab i weliy fare thin nib fel’ ni bay u Bible ko girdi’.
1. Uw rogon ni ngam weliy e tin kam fil ko piin ga manangrad?
I gaar pi gachalpen Jesus: ‘Dabiyog ni nge dab kug weliyed e n’en ni kug guyed nge n’en ni kug rung’aged.’ (Acts 4:20) Bochan nrib ga’ fan e tin riyul’ u wan’rad, ma aram fan ni yad baadag ni ngar weliyed ko girdi’ ni gubin. Aray rogon e lem rom, fa? Faanra aray rogon, me ere mu gay boch e kanawo’ nrayog ni ngam weliy e tin kam fil riy ngak chon e tabinaw rom nge pi fager rom u fithik’ e tayfan.—Mu beeg e Kolose 4:6.
Rogon ni ngam rin’
Nap’an ni gimew be non reb e girdi’ rom, mag weliy ban’en ni bay u Bible. Rayog ni nge lungum: “Baaray ban’en nib manigil ni kug fil ko re wik ney.”
Mu beeg reb e thin nu Bible ngak reb e fager rom ni ke m’ar ara be magafan’ nra pi’ e athamgil nga laniyan’.
Ra ke fith e girdi’ u tabon e maruwel rom ko ke uw rogom, ma gog ngorad ban’en ni kam fil u nap’an e fol Bible ara reb e muulung ni kam un ngay.
Mu dag ngak e pi fager rom fare website ni jw.org.
Mu pining boch e girdi’ ni ngar uned ko fol Bible ni yibe tay ngom, ara mu dag ngorad rogon ni nga rogned ni nge yib i fil be’ e Bible ngorad ni yad be fanay e jw.org.
2. Mang fan nra yib angin ngom ni faan ga ra nameg ni ngam un ko ulung ko machib?
Pi gachalpen Jesus e gathi kemus ni ur weliyed fare thin nib fel’ ngak e piin yad manang, ya ki “l’ograd [Jesus] nga ranod ni yad lal’agruw, ni ngar m’onod rok nga ranod nga lan urngin e binaw” ni ngar machibgad. (Luke 10:1) Re maruwel nem ni ur rin’ed nib yaram e ki bing e kanawo’ ngak boor e girdi’ ni ngar rung’aged fare thin nib fel’. Kub gel e felfelan’ ni i tay pi gachalpen Jesus ni bochan e ur machibgad u taabang. (Luke 10:17) Ere gur, rayog ni ngkum nameg ni ngam un ko ulung ko machib, fa?
KUM FIL BOCH BAN’EN U MURUNG’AGEN
Mu fil rogon ni nge war e marus rom, mu kum nang rogon e felfelan’ ni ga ra tay ni faan ga ra un i machibnag fare thin nib fel’.
3. Ra ayuwegem Jehovah
Bay boch e girdi’ ni yad baadag ni ngar uned ko machib, machane rayog ni yad be rus ni bochan e dar nanged ko mang e ra lemnag e girdi’ u murung’agrad ara n’en nra yog e girdi’ ngorad u nap’an e machib.
Ga be rus ni ngam weliy ko girdi’ e n’en kam fil fa danga’? Mang fan ni ka mog ni arrogon?
Mu yaliyew e re VIDEO ney, mi gimew weliy e fulweg ko re deer ni baaray.
Mang e rin’ e pi fel’ yangaren ney ni yad boch e Pi Mich ya nge dab kur rusgad?
Mu beegew e Isaiah 41:10, mi gimew weliy e fulweg ko re deer ni baaray:
Uw rogon nra ayuwegem e meybil u nap’an ni ga be rus ni ngam machib?
Baaray murung’agen ban’en
Boor e Pi Mich Rok Jehovah ni ur lemnaged ndabiyog ni ngar machibnaged fare thin nib fel’ ko girdi’. Bay be’ ni ka nog Sergey ngak ni i lemnag ni ir be’ ndariy fan ma kub mo’maw’ ngak ni ma non ko girdi’. Machane nap’an ni tabab i fil e Bible, me yog ni gaar: “Yugu aram rogon nug be rus, machane mug tabab i weliy ko girdi’ murung’agen e n’en nug be fil. Rug gin ngay ni bochan e nap’an nug weliy murung’agen e Bible ko girdi’, ma aram me yag ni nge pagan’ug ngog miki gel e michan’ rog.”
4. Ngaum tayfan e girdi’
Ra ngam weliy fare thin nib fel’, ma gathi kemus ni ngam lemnag e n’en nga mog ya ngkum lemnag rogon ni nga mog. Mu beegew e 2 Timothy 2:24 nge 1 Peter 3:15, 16, mi gimew weliy e fulweg ko pi deer ni baaray:
Uw rogon nrayog ni ngam fol ko pi thin ney u nap’an ni ga be weliy murung’agen e Bible ko girdi’?
Bay boch i girdien e tabinaw rom ara pi fager rom nsana dabi m’agan’rad ko n’en ga be weliy ngorad. Ere mang e rayog ni ngam rin’? Ma mang e susun e dab mu rin’?
Mang fan ni kab fel’ ni ngam fith boch e deer ko girdi’ u fithik’ e gonop ko bin nga mog ngorad e n’en nsusun e nge mich u wan’rad?
5. Ga ra weliy fare thin nib fel’ ko girdi’ ma ga ra felfelan’
I pi’ Jehovah e maruwel ni nge rin’ Jesus ni aram e nge weliy fare thin nib fel’ ko girdi’. Uw rogon u wan’ Jesus e re maruwel nem? Mu beegew e John 4:34, mi gimew weliy e fulweg ko gal deer ni baaray:
Ra ud ked e ggan nib fel’ ngodad ma ra ayuweg fithik’ i dowdad mu kud pared ni gad ba felfelan’. Mang fan ni taarebrogonnag Jesus e n’en nib m’agan’ Got ngay ni gad ma rin’ nib muun ngay e machib, ko ggan ni gad ma kay?
Mang boch ban’en ni ga be lemnag ni ga ra felfelan’ ngay ni faan ga ra weliy fare thin nib fel’ ko girdi’?
Boch ban’en nra ayuwegem
Nap’an e muulung ni yima tay u lan e wik, mag tiyan’um nga boch ban’en ni yibe weliy nra ayuwegem u rogon ni ngam tababnag e numon ngak be’.
Mu weliyew e en ma fil e Bible ngom rogon nrayog ni ngam un i pi’ e welthin u nap’an e muulung ni yima tay u lan e wik. Pi welthin ney e rayog ni nge ayuwegem ni nge bung rogom ni ngam weliy ko girdi’ murung’agen e n’en ga be fil.
Mu fanay e n’en bay ko fare thin ni “Ma Gaar Boch e Girdi’” ara “Rayog ni Nge Gaar Be’” ni bay ko re ke babyor ney ni ngam fil rogon ni ngam pi’ e fulweg u boch e deer nib ga’ ni ma fith e girdi’ nge boch ban’en ni yad ma yog nib togopuluw ko n’en ga be fil.
RAYOG NI NGE GAAR BE’: “Ke uw rogom boch?”
Uw rogon nrayog ni ngam fanay e biney e kanawo’ ni ke mab ngom ni ngam weliy ngak facha’ murung’agen e n’en kam fil ko fol Bible ni ga be un ngay?
N’EN KAN FIL
Ga ra weliy fare thin nib fel’ ko girdi’ ma ga ra felfelan’, ma rayog nde mo’maw’ e re n’ey ni bod ni ga be lemnag.
Ngan Sul u Daken
Mang fan ni ngam weliy fare thin nib fel’ ko girdi’?
Uw rogon ni ngam rin’ e re n’ey u fithik’ e tayfan?
Uw rogon ni nge dab kum rus ya nge yag nim machib?
MU GAY MURUNG’AGEN
Mu guy aningeg e kanawo’ nrayog ni ngam weliy fare thin nib fel’ riy ni ga be fanay fare jw.org contact card.
Mu beeg murung’agen aningeg e fel’ngin nra ayuwegem ni ngam weliy fare thin nib fel’ ko girdi’.
“Ke Bung Rogom Nrayog ni Ngam Un i Yognag e Girdi’, Fa?” (Fare Wulyang ko Damit, September 2020)
Mu guy rogon nra ayuwegdad murung’agen ban’en ni bay u Bible ndab kud rusgad ni ngad machibnaged fare thin nib fel’ ni yugu aram rogon ni ka gad bbitir.
Mu beeg rogon nrayog ni ngam weliy murung’agen e Bible ngak girdien e tabinaw rom ndawor ra nanged murung’agen Jehovah.
“Reaching the Heart of Unbelieving Relatives” (The Watchtower, March 15, 2014)