GURUY NI 47
Ke Bung Rogom ni Ngam Un ko Taufe, Fa?
Boor ban’en ni kam fil u murung’agen Jehovah u nap’an e fol Bible ni kam un ngay. Ere dabisiy ni kam thilyeg boch ban’en u rarogom ya nge yag nim fol ko n’en kam fil. Machane sana ka bay ban’en ni be talegem ndamur ognagem ngak Jehovah ngam un ko taufe. Gad ra weliy boch ban’en ko re guruy ney ni ma taleg boch e girdi’ ndab ra uned ko taufe nge rogon ni ngam gel ngay.
1. Uw urngin ban’en nib t’uf ni ngam nang u m’on ni ngam un ko taufe?
Ra ngam un ko taufe, mab t’uf ni ngam nang e “tin nib riyul’.” (1 Timothy 2:4) Re n’ey e der yip’ fan nib t’uf ni ngam nang e fulweg u gubin e deer u murung’agen e Bible u m’on ni ngam un ko taufe. Mus ko pi Kristiano ni ke n’uw nap’an ni kar uned ko taufe ni ka yad be fil boch ban’en. (Kolose 1:9, 10) Machane ba t’uf ni nge tamilang u wan’um e pi kenggin e machib u Bible. Ra ayuwegem e piin piilal ni ngam nang ko ke gaman e tin ke tamilang u wan’um fa dawor.
2. Mang e ba t’uf ni ngam rin’ u m’on ni ngam un ko taufe?
U m’on ni ngam un ko taufe ma thingar mu ‘kolngan’um mag pi’ keruum ko denen’ rom. (Mu beeg e Acts 3:19.) Re n’ey e be yip’ fan ni kari kireban’um ni bochan e pi denen ni um rin’ ma ka mog ngak Jehovah ni nge n’ag fan rom. Kum dugliy u wan’um ni ngam siyeg e ngongol nib kireb mag rin’ e n’en nib m’agan’ Got ngay, mu kum tabab ni ngam un ko muulung nge machib.
3. Mang fan nsusun e dab mu pag e marus ni nge talegem?
Bay boch e girdi’ ni yad be magar nri chey ma de yag ni ngar rin’ed e n’en kar micheged ngak Jehovah. Riyul’ ni bay yu ngiyal’ nra um oloboch ni bod e n’en ni buch rok boch e pumoon nge ppin ni bay murung’agrad u Bible. Machane der lemnag Jehovah ni nge rin’ e pi tapigpig rok urngin ban’en nib fel’ rogon ndab kur olobochgad. (Mu beeg e Psalm 103:13, 14.) Ma felfelan’ u nap’an ni ga ra rin’ e tin nrayog rom ni fan ngak, ma ra ayuwegem. Bin riyul’ riy e, ke micheg ndariy ban’en “nrayog rok ni nge daregdad u rogon ni gadad ba t’uf rok.”—Mu beeg e Roma 8:38, 39.
KUM FIL BOCH BAN’EN U MURUNG’AGEN
Mu guy rogon nrayog ni ngam gel nga boch e magawon ni be talegem ndamur un ko taufe ni faan ga ra nang Jehovah nib fel’ rogon me m’agan’um ngay ni nge ayuwegem.
4. Ngam nang Jehovah nib fel’ rogon
Uw urngin ban’en nib t’uf ni ngam nang u murung’agen Jehovah u m’on ni ngam un ko taufe? Ba t’uf ni ngarim nang u reb e kanawo’ nra k’aringem ni ngam t’ufeg mag adag ni ngam felfelan’nag. Mu yaliyew e re VIDEO ney ni be weliy rogon ni ke rin’ boch e girdi’ ni yad ma fil e Bible u ga’ngin yang e fayleng e re n’ey. Tomuren mi gimew weliy e fulweg ko re deer ni baaray.
Mang e ayuweg fapi girdi’ ni kan dag yaarad ko fare video ni ngar fal’eged rogorad ni fan ko taufe?
Mu beegew e Acts 17:11, mi gimew weliy e fulweg ko pi deer ni baaray:
Bay boch ban’en ni be fil e Bible ni ka be maruwar u wan’um, fa? Ka be maruwar u wan’um ko be fil e Pi Mich Rok Jehovah e tin riyul’ fa danga’?
Faanra ka bay boch ban’en ni be maruwar u wan’um, ma mang e rayog ni ngam rin’ ngay?
5. Mu gel nga boch e magawon ni be talegem ndamur un ko taufe
Nap’an ni gad ra dugliy ni ngad ognaged gadad ngak Jehovah ngad uned ko taufe, ma gad ra mada’nag boch e magawon. Mu yaliyew e re VIDEO ney ni be weliy murung’agen be’ ni buch e re n’ey rok, mi gimew weliy e fulweg ko gal deer ni baaray.
Mang boch e magawon nib t’uf ni nge gel Narangerel ngay ya nge yag ni pigpig ngak Jehovah?
Uw rogon ni ayuweg e t’ufeg rok ngak Jehovah ni nge gel ko pi magawon nem?
Mu beegew e Proverbs 29:25 nge 2 Timothy 1:7, mi gimew weliy e fulweg ko re deer ni baaray:
Mang e ra ayuwegdad ni ngad gelgad nga boch e magawon?
6. Nge pagan’um nra ayuwegem Jehovah
Ra ayuwegem Jehovah ni ngam rin’ e n’en nib m’agan’ ngay. Mu yaliyew e re VIDEO ney, mi gimew weliy e fulweg ko gal deer ni baaray.
Mang e i taleg fare pumoon ni be fil e Bible nda kaa un ko taufe?
Mang e n’en ni fil ni ayuweg ni nge gelnag e pagan’ rok ngak Jehovah?
Mu beegew e Isaiah 41:10, 13, mi gimew weliy e fulweg ko re deer ni baaray:
Mang fan ni nge pagan’um ngay nrayog ni ngam tay u gil’ e n’en ga ra micheg u nap’an ni ga ra ognagem ngak Got?
7. Ngari ga’ fan u wan’um e t’ufeg rok Jehovah
Ra um par ni ga be lemnag gelngin nri gab t’uf rok Jehovah, ma aram e ra um pining e magar ngak mu kum adag ni ngam pigpig ngak ndariy n’umngin nap’an. Mu beegew e Psalm 40:5, mi gimew weliy e fulweg ko re deer ni baaray:
Mang boch e tow’ath ni ke yib rok Jehovah nri ga be pining e magar riy?
Ba t’uf Jehovah rok Jeremiah ni profet, ma kub ga’ fan e thin rok u wan’ nge tow’ath ni bay rok ni ir reb e tapigpig rok Jehovah. I gaar: “Mu non ngog, mu gu rung’ag urngin bug e thin ni mog. Somol ni Got . . . , i gur e mmil suwog ngom, ere thin rom e be fal’eg lanin’ug ma be pi’ e felfelan’ ngog.” (Jeremiah 15:16) Mu weliyew e fulweg ko pi deer ni baaray:
Mang fan ni gad ba tow’ath ni ngad manged reb e Pi Mich Rok Jehovah?
Ga baadag ni ngam un ko taufe ngam mang reb e Pi Mich Rok Jehovah, fa?
Bay ban’en ni ka be talegem ndamur un ko taufe, fa?
Mang e ga be lemnag nib t’uf ni ngam rin’ ya nge yag nim un ko taufe?
MA GAAR BOCH E GIRDI’: “Da gur lemnag nrayog rog ni nggu rin’ e n’en kug micheg u nap’an nug ra un ko taufe.”
Aray rogon e lem rom, fa?
N’EN KAN FIL
Rayog ni nge ayuwegem Jehovah ni ngam gel nga boch e magawon ni be talegem ndamur un ko taufe.
Ngan Sul u Daken
Uw urngin ban’en nib t’uf ni ngam nang u Bible u m’on ni ngam un ko taufe?
Mang boch ban’en nrayog nib t’uf ni ngam thilyeg u rarogom u m’on ni ngam un ko taufe?
Mang fan nsusun e dab mu pag e marus ni nge talegem?
MU GAY MURUNG’AGEN
Mu beeg murung’agen e n’en nsusun e ra k’aringem ni ngam dugliy ni ngam un ko taufe.
“Ke Bung Rogom Nrayog ni Ngam Un ko Taufe, Fa?” (Fare Wulyang ko Damit, March 2020)
Mu fil rogon ni ngam gel nga boch e magawon nrayog ni nge talegem.
“Mang Ndab Ntaufenigeg?” (Fare Wulyang ko Damit, March 2019)
Mu guy rogon ni gel reb e pumoon nga boch e magawon ya nge yag ni un ko taufe.
Som’on e i magagawon be’ nib pumoon ni ka nog Ataa ngak ni nge un ko taufe. Mu guy e n’en ni ayuweg ni nge rin’ e re n’ey.