GURUY NI 41
Mang e Be Yog e Bible u Murung’agen e Par ko Pumoon nge Ppin?
Boor e girdi’ ni yad ma magagawon ni ngaur weliyed murung’agen e par ko pumoon nge ppin. Machane ba tamilang rogon ni ma weliy e Bible murung’agen e re n’ey, maku ma rin’ u reb e kanawo’ ni be m’ug riy ni yibe tay fadad. Ra yib angin ngodad e n’en be yog. Mab puluw e re n’ey ni bochan e Bible e ke yib rok Jehovah ni Ir e Ke Sunmiydad. Ere manang e n’en th’abi fel’ ni fan ngodad. Ma yog ngodad e n’en nsusun e ngad rin’ed nra felfelan’ ngay, nge n’en nra ayuwegdad ni ngad pared ni gad ba felfelan’ ndariy n’umngin nap’an.
1. Uw rogon e par ko pumoon nge ppin u wan’ Jehovah?
Par ko pumoon nge ppin e aram reb e tow’ath ni ke yib rok Jehovah. Baadag ni nge yibnag e re n’ey e felfelan’ nga thilin reb e pumoon nge ppin ni yow ba mabgol. Re tow’ath ney e gathi kemus ni ma bing e kanawo’ ngak ba wu’ e mabgol ni ngar fakayew e bitir, ya ku aram rogon nrayog ni nge bagayow me dag e t’ufeg ngak bagayow. Aram fan ni be gaar e Thin rok Got: “[Nge] par e felfelan’ rom ko re ppin ni kam leay.” (Proverbs 5:18, 19, BT) Baadag Jehovah ni nge par e piin Kristiano ni yad ba yul’yul’ ko en mabgol rorad, ere aram fan ndab ra uned ngak be’ ni gathi mabgol rorad.—Mu beeg e Hebrews 13:4.
2. Mang e ngongol ndarngal?
Be yog e Bible ni “girdi’ ni ma ngongliy e ngongol ko darngal . . . [e] dariy bagayad . . . nrayog ngorad e gin nsuwon Got.” (1 Korinth 6:9, 10) Piin ur yoloyed e Bible ko thin ni Greek e ur fanayed fare bugithin ni por·neiʹa ni nge yip’ fan e ngongol ndarngal. Re bugithin ney e ku be yip’ fan ni (1) nge para l’agruw ni’ ndar mabgolgow, (2) par ko pumoon nge pumoon nge ppin nge ppin, nge (3) girdi’ nge gamanman. Faanra ‘dab ud darngalgad,’ ma aram e gad ra fel’ u wan’ Jehovah maku ra yib angin ngodad.—1 Thessalonika 4:3.
KUM FIL BOCH BAN’EN U MURUNG’AGEN
Mu fil rogon nrayog ni ngam siyeg e ngongol ndarngal nge angin nra yib ngom ni faan ga ra par nib beech e ngongol rom.
3. Dab mu un ko ngongol ndarngal
Bay be’ nib pumoon ni ka nog Josef ngak ni mada’nag reb e magawon ni mo’maw’nag ngak ni nge par nib beech e ngongol rok. Mu beegew e Genesis 39:1-12, mi gimew weliy e fulweg ko pi deer ni baaray:
Mang e k’aring Josef ni nge mil nge chuw?—Mu guy e verse 9.
Ga be lemnag nib fel’ e n’en ni dugliy Josef ni nge rin’ fa danga’? Mang fan?
Uw rogon nrayog ni nge folwok e piin fel’ yangaren rok Josef e ngiyal’ ney ndab ra uned ko ngongol ndarngal? Mu yaliyew e re VIDEO ney.
Baadag Jehovah ni ngad siyeged e ngongol ndarngal. Mu beegew e 1 Korinth 6:18, mi gimew weliy e fulweg ko gal deer ni baaray:
Mang boch ban’en nrayog ni nge waliy be’ ni nge un ko ngongol ndarngal?
Uw rogon ni nge dab mu un ko ngongol ndarngal?
4. Rayog ni ngam siyeg e lumel ni ma yib ngom
Mang e rayog ni nge mo’maw’nag ngom ni ngam siyeg ndab mu un ko ngongol ndarngal? Mu yaliyew e re VIDEO ney, mi gimew weliy e fulweg ko re deer ni baaray.
Mang e rin’ fare walag ni pumoon u nap’an ni nang nrogon e lem nge ngongol rok e rayog ni nge k’aring ni nge dabki yul’yul’ ngak leengin?
Mus ngak e pi Kristiano ni yad ba yul’yul’ ni bay yu ngiyal’ nib mo’maw’ ni nge par e lem rorad nib machalbog. Uw rogon nrayog ni ngam tal ndab kum lemnag boch ban’en nib kireb? Mu beegew e Filippi 4:8, mi gimew weliy e fulweg ko gal deer ni baaray:
Mang e pi n’en nsusun e ngaud lemnaged?
Faanra ud beeged e Bible rodad ma gad be fanay e tayim rodad ni fan ko pigpig rodad ngak Jehovah, ma uw rogon nra ayuwegdad ndab da denengad?
5. Pi motochiyel rok Jehovah e ma yib angin ngodad
Manang Jehovah e n’en th’abi fel’ ni fan ngodad. Ma yog ngodad rogon ni nge par e ngongol rodad nib beech nge angin nra yib ngodad. Mu beegew e Proverbs 7:7-27 ara mu yaliyew e re VIDEO ney, ngemu’ mi gimew weliy e fulweg ko pi deer ni baaray.
Uw rogon ni mada’nag fare pagel ban’en nrayog ni nge waliy ni nge denen? —Mu guy e Proverbs 7:8, 9.
Rayog ni nge yib wenegan e ngongol ndarngal nrogon ni be yog e Proverbs 7:23, 26. Faan gad ra par nib beech e ngongol rodad, ma mang boch e magawon nrayog ni ngad siyeged?
Faanra bbeech e ngongol rodad, ma uw rogon nra ayuwegdad ni ngad pared ndariy n’umngin nap’an ni gad ba felfelan’?
Bay boch e girdi’ ni yad ma lemnag ndariy e t’ufeg ko n’en be yog e Bible u murung’agen e pumoon ni ma darngalnag e pumoon nge ppin ni ma darngalnag e ppin. Machane Jehovah ni ir e Got ko t’ufeg e baadag ni nge par urngin e girdi’ ndariy n’umngin nap’an ni yad ba felfelan’. Ere faanra nge yag e re athap ney ngodad, ma thingar da folgad ko pi motochiyel rok. Mu beegew e 1 Korinth 6:9-11, mi gimew weliy e fulweg ko re deer ni baaray:
Gur, ar’ar ko par ko pumoon nge pumoon nge ppin nge ppin e kemus e pi n’en yima ar’arnag nde puluw u wan’ Got fa danga’?
Gad gubin nib t’uf ni ngad thilyeged e ngongol rodad ni faanra ngad felfelan’naged Got. Bay fan e athamgil ni gad ra tay, fa? Mu beegew e Psalm 19:8, 11, mi gimew weliy e fulweg ko gal deer ni baaray:
Ga be lemnag nib puluw e pi motochiyel rok Jehovah u murung’agen e ngongol nsusun e ngaud rin’ed fa danga’? Mang fan ni ka mog ni arrogon?
Boor e girdi’ ni ke ayuwegrad Jehovah ni ngar folgad ko pi motochiyel rok u murung’agen rogon e ngongol nsusun e ngaud rin’ed. Ku rayog ni nge ayuwegem
MA GAAR BOCH E GIRDI’: “Dariy ban’en nib kireb riy ni nge par l’agruw ni’ ni faanra yow baadagew yow.”
Mang e ga ra yog?
N’EN KAN FIL
Par ko pumoon nge ppin e aram reb e tow’ath ni ke yib rok Jehovah ni nge yibnag e felfelan’ nga thilin ba wu’ e mabgol.
Ngan Sul u Daken
Mang e ba muun ko ngongol ndarngal?
Mang e ra ayuwegdad ni ngad siyeged e ngongol ndarngal?
Faan gad ra fol ko pi motochiyel rok Jehovah u murung’agen e ngongol nsusun e ngaud rin’ed, ma uw rogon nra yib angin ngodad?
MU GAY MURUNG’AGEN
Mu beeg fan ni baadag Got ni nge mabgol reb e pumoon nge reb e ppin ni faanra yow baadag ni ngar parew u taabang.
“What Does the Bible Say About Living Together Without Marriage?” (Article ni bay ko website)
Mu fil fan nsusun e dab ud fanenikayed e pumoon ni yad ma par e pumoon ara ppin ni yad ma par e ppin ni yugu aram rogon ni be yog e Bible nib kireb e re ngongol ney.
Mu beeg rogon ni ma ayuwegdad e pi motochiyel rok Got u murung’agen e par ko pumoon nge ppin.
Mu beeg e n’en ni k’aring be’ nib pumoon ni yad ma par e pumoon ni nge thilyeg e ngongol rok ya nge yag ni fel’ u wan’ Got.
a Re n’ey e ba muun ngay ni nge par be’ nib pumoon nge be’ nib pin, nge boch e ngongol ni yima rin’ ni bay rogon ko par ko pumoon nge ppin ni yibe fanay l’uguney, ara chigiyey, ara nge rin’ be’ boch ban’en ko yungin nib mith u dow be’ ni nge pug e ar’ar rok.