GURUY NI 43
Susun Nge Uw Rogon e Alkul u Wan’ e Piin Kristiano?
Ba thilthil rogon ni ma lemnag e girdi’ u ga’ngin yang e fayleng e alkul. Bay boch e girdi’ ni bay yu ngiyal’ ni yad baadag ni ngar unumed e pi fager rorad e alkul u taabang. Ma boch e kar dugliyed ndab ra uned ko unum. Ma boch e girdi’ e yad ma unum e alkul ni boor ngar chingawgad. Ere mang e be yog e Bible u murung’agen e alkul?
1. Ba kireb ni ngan unum e alkul, fa?
Der yog e Bible nib kireb ni ngan unum e alkul. Bin riyul’ riy e, nap’an nra weliy e Bible murung’agen e pi tow’ath ni ke pi’ Got ngodad, maku ma weliy murung’agen e wain ni ma “pi’ e felfelan’ ngak” e girdi’. (Psalm 104:14, 15) Bay boch e pumoon nge ppin ni yad ba yul’yul’ ni bay murung’agrad u Bible ni ur unumed e alkul.—1 Timothy 5:23.
2. Mang fonow e be pi’ e Bible ngak e piin kar mel’eged ni ngaur unumed e alkul?
Dabun Jehovah e unum nib pag rogon nge chingaw. (Galatia 5:21) Be gaar e Thin rok: “Dab um chag ngak e girdi’ ni tamuun rrum.” (Proverbs 23:20) Ere faanra kad mel’eged ni ngad unumed e alkul ndemtrug ko yigoo gadad ara gadad boch e girdi’, ma susun e dab da unumed nge pag rogon ndabkiyog ni ngad lemgad nib fel’ rogon, ara da gagiyegnaged e thin nge ngongol rodad, ara da gafgownaged fithik’ i dowdad. Faanra dabiyog ni ngad gagiyegnaged rogon e unum rodad, ma susun e nge m’agan’dad ngay ni ngad talgad ko unum.
3. Uw rogon ni ngad ted fan e n’en ke dugliy yugu boch e girdi’ u murung’agen e alkul?
Ra be’ ma ir rok e nge dugliy ko nge unum e alkul fa danga’. Susun e dab da turguyed rarogon be’ u wan’dad ni ke mel’eg ni nge unum buchuuw e alkul, maku susun e dab da towasariyed be’ ni nge unum ni faanra dabun. (Roma 14:10) Gad ma mel’eg ndab da unumed e alkul ni faanra gad manang nra magawonnag yugu boch e girdi’. (Mu beeg e Roma 14:21.) Gathi yigoo gadad e ngad ‘tafinaynaged e tin nib fel’ ngodad, ya ngkud tafinaynaged e tin nib fel’ ngak boch e girdi’.’—Mu beeg e 1 Korinth 10:23, 24.
KUM FIL BOCH BAN’EN U MURUNG’AGEN
Mu fil boch i kenggin e motochiyel u Bible nra ayuwegem ni ngam dugliy ko ngam unum e alkul fa danga’, nge urngin e alkul ni ngam unum ni faanra kam dugliy ni ngam unum, nge n’en nrayog ni ngam rin’ ni faanra bay e magawon rom ko unum.
4. Mu dugliy ko ga ra unum fa danga’
Uw rogon e muun alkul u wan’ Jesus? Ra ngam nang e fulweg riy, mag beeg murung’agen e bin som’on e maang’ang ni ngongliy. Mu beegew e John 2:1-11, mi gimew weliy e fulweg ko gal deer ni baaray:
Mang e be fil e re maang’ang ney ngodad u murung’agen rogon e alkul u wan’ Jesus nge piin yad ma unum?
Bochan nde yog Jesus nib kireb e muun alkul, ma susun e nge uw rogon u wan’ reb e Kristiano be’ ni ke dugliy ni nge unum?
Yugu aram rogon nib puf rogon reb e Kristiano ni nge unum e alkul, machane gathi gubin ngiyal’ nib fel’ ni nge rin’ e re n’ey. Mu beegew e Proverbs 22:3, mi gimew weliy rogon nra k’aringem e pi n’en baaray ni ngam dugliy ko ga ra unum fa danga’:
Ngam kol e yap’ ko karrow ara ngam maruwel ko masin.
Gab diyen.
Ke yog e togta ngom ndab mu unum e alkul.
Ba mo’maw’ ni ngam gagiyegnag urngin e alkul ni ga ma unum.
Ba togopuluw ko motochiyel ni ngam unum e alkul.
Gimew be’ ni ke mel’eg ndabi unum e alkul ni bochan e immoy e magawon rok ko unum kafram.
Ga ra pi’ e alkul ni ngan unum u nap’an e madnom ko m’agpa’ ara yugu boch e abich ni kan tay fa danga’? Mu yaliyew e re VIDEO ney ni be weliy e n’en nra ayuwegem ni ngam dugliy e n’en ngam rin’.
Mu beegew e Roma 13:13 nge 1 Korinth 10:31, 32. Tomuren ni kam beegew reb ko gal thin nu Bible ney, mi gimew weliy e fulweg ko re deer ni baaray:
Faan ga ra fol ko re kenggin e motochiyel ney, ma uw rogon nra ayuwegem ni ngam dugliy ban’en nib m’agan’ Jehovah ngay?
Ra reb e Kristiano ma ir rok e nge dugliy ko nge unum e alkul fa danga’. Yugu aram rogon nrayog ni bay yu ngiyal’ nra mel’eg ni nge unum e alkul, machane bay yu ngiyal’ nra mel’eg ndabi unum
5. Mu dugliy urngin ni ngam unum
Faanra kam mel’eg ni ngam unum e alkul, ma dab mu pagtalin e re n’ey: Dawori yog Jehovah nib kireb ni ngan unum e alkul, machane be yog nib kireb e unum nib pag rogon. Mang fan? Mu beegew e Hosea 4:11, 18, mi gimew weliy e fulweg ko re deer ni baaray:
Mang e rayog ni nge buch ni faanra unum be’ nib pag rogon?
Mang e ra ayuwegdad ndab da unumed nib pag rogon? Ba t’uf ni ngad nanged e gin ngad musgad riy. Mu beegew e Proverbs 11:2,a mi gimew weliy e fulweg ko re deer ni baaray:
Mang fan nib fel’ ni ngam dugliy e gin ngam mus riy u rogon e unum ni ga ma tay?
6. Mu tal ko unum nib pag rogon
Mu guy e n’en ni ayuweg be’ nib pumoon ni nge tal ko unum nib pag rogon. Mu yaliyew e re VIDEO ney, mi gimew weliy e fulweg ko pi deer ni baaray.
Uw rogon e ngongol rok Dmitry u nap’an nra unum e alkul?
I yag rok ni nge tal ko unum nib papey fa danga’?
Mang e rin’ me yag ni nge tal ko unum nib pag rogon?
Mu beegew e 1 Korinth 6:10, 11, mi gimew weliy e fulweg ko gal deer ni baaray:
Uw feni kireb e chingaw?
Uw rogon ni be dag e re thin ney nrayog ni nge tal be’ ko unum nib pag rogon?
Mu beegew e Matthew 5:30, mi gimew weliy e fulweg ko re deer ni baaray:
Re n’ey ni nge th’ab be’ barba’ i pa’ nge n’ag e be yip’ fan ni nge pag fan boch ban’en ya nge yag ni rin’ e n’en nib m’agan’ Jehovah ngay. Mang e rayog ni ngam rin’ ni faanra ba mo’maw’ ni ngam tal ko unum nib pag rogon?b
Mu beegew e 1 Korinth 15:33, mi gimew weliy e fulweg ko re deer ni baaray:
Mang wenegan nra yib riy ni faanra um chag ko piin yad baadag e unum nib pag rogon?
RAYOG NI NGE GAAR BE’: “Gur, ba kireb ni ngaun unum?”
Uw rogon ni ga ra fulweg?
N’EN KAN FIL
Alkul e ban’en ni ke pi’ Jehovah ni nge yibnag e felfelan’ ngodad, machane dabun e unum nib pag rogon nge chingaw.
Ngan Sul u Daken
Mang e be yog e Bible u murung’agen e alkul?
Mang boch i riy’en e unum nib pag rogon?
Uw rogon ni ngad ted fan e n’en ke dugliy yugu boch e girdi’ u murung’agen e muun alkul?
MU GAY MURUNG’AGEN
Uw rogon ni nge dugliy e piin fel’ yangaren e n’en nib fel’ ni ngar rin’ed u murung’agen e unum?
Mu beeg murung’agen boch ban’en nrayog ni ngam rin’ ya nge yag nim tal ko unum nib pag rogon.
“Mu Gagiyegnag Rogon e Unum ni Ga Ma Tay” (Fare Wulyang Ntagil’ E Damit, February 1, 2010)
Rayog ni nge un reb e Kristiano ko toasting, fa?
“Questions From Readers” (The Watchtower, February 15, 2007)
Mu beeg rogon ni yag rok be’ nib pumoon ni nge taleg e unum nib pag rogon.
a Proverbs 11:2 (NW): “Piin yad ba tolangan’ e rib pay nra m’ing k’owrad. Machane kab gonop e piin yad manang e gin ngar musgad riy.”
b Piin bay e magawon rorad ko unum e rayog nib t’uf ni nge ayuwegrad e togta ya nge yag nra talgad ko unum. Boor e togta ni ka rogned ni piin ka immoy e magawon rorad ko unum e kab fel’ ndab ra unumed buchuuw e alkul.