Be Fal’eg i Yaliy Jehovah Gubin Ban’en

“Be yaliy [Jehovah] e girdi’ u gubin yang.”​—PS. 11:4.

1. Ba miti mang girdi’ e gad baadag ni ngad m’aged fager ngorad?

UW ROGON u wan’um e piin ni yad ma dag nriyul’ ni yad be lemnagem? Gara fith ban’en ngorad ma yad ma yog ngom e n’en yad be lemnag. Ma nap’an nra t’uf e ayuw rom ma yad ma ayuwegem. Ma faanra ke t’uf ni ngan fonownigem, ma yad ma rin’ u fithik’ e t’ufeg. (Ps. 141:5; Gal. 6:1) Gathi ireray e re miti girdi’ ni ga baadag ni ngam m’ag fager ngorad? Jehovah nge Fak e ri aram rogorow. Riyul’ riy, e ri yow ma lemnagem nri kab pag feni gel nga rogon ni ma lemnagem boch e girdi’, machane gathi lem ni fel’ ngak e ir be k’aringrow ni ngar rin’ew e re n’ey, ya yow baadag ni ngar ayuwegew gur nge yog ngom e “yafos ni ir e bin riyul’ e yafos.”​—1 Tim. 6:19; Rev. 3:19.

2. Uw feni gel nri ma lemnag Jehovah e pi tapigpig rok?

² Fare psalmist e weliy rogon feni ma lemnagdad Jehovah u nap’an ni gaar: “Be yaliy [Jehovah] e girdi’ u gubin yang ma manang e n’en ni yad be rin’.” (Ps. 11:4) Arrogon, gathi kemus ni ma sap Got ngodad; ya ma fal’eg i yaliydad. Ki yoloy David ni gaar: ‘Ga manang lanin’ug. Ka mub ngog nnep’, . . . ma dam pirieg ba ar’ar ni kireb u fithik’ag.’ (Ps. 17:3) Ba tamilang ni manang David gelngin ni ma lemnag Jehovah. Manang nra kirebnag laniyan’ Jehovah ma dabki par nib fel’ u wan’ nfaanra dabi chuweg e lem nib kireb ara lem nib siin u laniyan’. Ba riyul’ Jehovah u wan’um ni bod rogon David, fa?

Ma Guy Jehovah e N’en Bay u Gum’irchaey

3. Uw rogon nib thabthabel rogon e ngongol rok Jehovah ngodad u thibngidad?

³ N’en nri ma lemnag Jehovah e rarogon fithik’ i lanin’dad. (Ps. 19:14; 26:2) Bochan e t’ufeg ma der fal’eg i yaliy nochi oloboch nib achig ni kad ngongliyed. Bod Sarah ni leengin Abraham nde yog e thin riyul’ ngak ba engel ni m’ug ni ke bod yaan be’, machane guy fare engel ni ke rus ma ke tamra’, ere fonownag nde gel. (Gen. 18:12-15) Nap’an ni yog Job ni patriarch ni ‘ir e kab fel’ ngak Got,’ miki ulul Jehovah nga i tow’athnag ya manang ni Satan e ke k’aring e gafgow ngak Job. (Job 32:2; 42:12) Ku taareb rogon ngak fare pin nu Zarefath ni kem’ figirngin. De aw nga laniyan’ Jehovah fapi thin nib gel ni yog ngak Elijah ni profet. Manang Got ni ke kireban’ ni bochan e kem’ fak ni kari mus rok.​—1 Ki. 17:8-24.

4, 5. Uw rogon ni dag Jehovah nib gol ko n’en ni rin’ ngak Abimelek?

⁴ Ke dag Jehovah ni mus ngak e piin de michan’rad ma ma lemnagrad ni bochan e ma fal’eg i yaliy gum’irchaey. Mu lemnag e n’en ni buch ku Abimelek, ni pilung nu Gerar nreb e mach u Filistia. I fek Abimelek Sarah ni nge leengiy ni bochan e de nang ni yow ba mabgol Abraham. Machane, dawori yan Abimelek nga charen Sarah me non Jehovah ngak u ma lik’ay ni gaar: “Gu manang ni mu rin nriyul’ ndam mu nang nib kireb, arfan nda gu pagem ngam denen nib togopluw ngog ma aram mug tem u orel ko re pin nir. Ere chiney, e ngam fulweg e re pin nir ko pumoon rok. Ya re pumoon nir e ba profet ma bayi yibiliyem ndab mum’.”​—Gen. 20:1-7, NW.

⁵ Riyul’ nrayog ni nge ngongol Jehovah ngak Abimelek u fithik’ e maangach ni bochan e ma liyor nga boch e got ni googsur. Machane ngiyal’ ney e ke guy Got ni ke ngongol u fithik’ e yul’yul’. I lemnag Jehovah ere n’ey, ma aram me yog ngak fare pilung rogon min n’ag fan e kireb rok me par ‘ndabi yim’.’ Gathi aram ere miti Got ni ga baadag ni ngam liyor ngak?

6. Mang boch e kanawo’ ni i folwok Jesus ko Chitamangin riy?

⁶ I folwok Jesus ko Chitamangin nga i sap ko tin nib fel’ ni i rin’ pi gachalpen ma be n’ag fan e oloboch rorad. (Mark 10:35-45; 14:66-72; Luke 22:31, 32; John 15:15) Ngongol rok Jesus e ba puluw ko thin rok ni bay ko John 3:17 ni gaar: “Got e de pi’ Fak nge yib ngaray nga fayleng ni nge turguy e gechig ko girdi’, machane ir e nge thapeg e girdi’ ngak Got.” Arrogon, rib gel ma dabi m’ay e t’ufeg rok Jehovah nge Jesus ngodad. Yira guy ko n’en ni yow be athapeg ni aram e nge yog e yafas ngodad. (Job 14:15) Re t’ufeg ney nib gel ma dabi m’ay e be dag fan ni ma fal’eg i yaliydad Jehovah, nge rogon ni ma sap ngodad, nge rogon e ngongol rok ko tin ni ma guy ban’en.​—Mu beeg e 1 John 4:8, 19.

Ma Fal’eg i Yaliy Ban’en u Fithik’ e T’ufeg

7. Mange ma k’aring Jehovah ni nge fal’eg i yaliydad?

⁷ Ere, ba kireb ni ngan lemnag ni Jehovah e bod ba polis ni be par u tharmiy be sap nga fayleng ya nge yog ni koldad ni gad be denen! Satan e aram e cha’ ni ma yog ni gad ma ngongol u fithik’ e fel’ ngak. (Rev. 12:10) Ku ra dawori lemnag be’ ni nge rin’ ban’en nib kireb ma be yog ni be lemnag! (Job 1:9-11; 2:4, 5) I yoloy fare psalmist murung’agen Got ni gaar: “Faan mange mu tay ngan’um e kireb ni gamad be rin’, me mini’ e rayog rok ni nge thay ndab ni gechignag?” (Ps. 130:3) Fulweg ko re deer nem e, Dariy be’! (Ekl. 7:20) Ya Jehovah e ma yaliydad u fithik’ e runguy ni bod ba gallabthir ni baadag ni nge ayuweg pi fak nib t’uf rok ndabi buch ban’en rorad. Ba ga’ ni ma ginangdad ko pi meewar rodad ya nge yog ni nge dabda gafgowniged gadad.​—Ps. 103:10-14; Matt. 26:41.

8. Uw rogon ni ma skulnag ma be fonownag Jehovah e pi tapigpig rok?

⁸ T’ufeg rok Got e ma m’ug u daken e fonow nge kanawo’ ni ma dag ngodad u lan e Bible ngu daken e pi babyor nge muulung ni ke fal’eg fare “tapigpig nib yul’yul’ ma ba gonop.” (Matt. 24:45; Heb. 12:5, 6) Ku ma pi’ Jehovah e ayuw ngodad u daken e ulung ko Kristiano nge pi ‘tow’ath ni girdi’’ riy. (Efe. 4:8) Ma yaliy Jehovah rogon ni gad ma fol ko skul ni ma pi’ ngodad ni bod ba matam, maku ma gay rogon ni ngki ga’nag boch e ayuw ni nge pi’ ngodad. Be gaar e Psalm 32:8: “Bay gog ngom e tin ni ngam rin’ ma bay gu fonownigem.” Ere, rib ga’ fan ni ngaud motoyilgad ngak Jehovah ni gubin ngiyal’! Ba t’uf ni ngad sobut’niged gadad, ma gad nang ni ir e Sensey rodad nge Chitamangidad ni ma t’ufegey.​—Mu beeg e Matthew 18:4.

9. Mang boch ban’en nib kireb susuna ngad siyeged, ma mang fan?

⁹ Manga yigi dab da awgad nga pa’ e kireb ni bochan e tolangan’ rodad, ara michan’ rodad ni ke war, ara bochan e ke ‘bannagdad e denen.’ (Heb. 3:13; Jas. 4:6) Ba ga’ ni ma sum e pi n’ey u nap’an nra suguy be’ e lem nge ar’ar nib kireb nga laniyan’. Ra munmun ma rayog ni nge pag e fonow u Bible nib fel’ ngak. Ma n’en rib kireb riy e rayog ni nge par ni yigoo tin nib kireb e be ngongliy me ni aw ni ir reb e toogor rok Got! (Prov. 1:22-31) Mu lemnag e n’en ni rin’ Kain ni bin nganni u fak Adam nge Efa.

Ma Guy Jehovah Gubin Ban’en Me Ngongol nib Puluw Ngay

10. Mang fan de fel’ e maligach rok Kain u wan’ Jehovah, ma mang e rin’ Kain?

¹⁰ Nap’an ni pi’ Kain nge Abel e maligach ngak Jehovah, ma gathi kemus e n’en ni i Sap ngay ya ki sap ko n’en ni k’aringrow ngar piew e maligach. Angin e dag Got nib fel’ u wan’ e maligach rok Abel ni ke pi’ u fithik’ e michan’ rok ngak, ma de m’agan’ ko maligach rok Kain ni bochan e dag ndariy e michan’ rok. (Gen. 4:4, 5; Heb. 11:4) Dani fal’eg Kain i lemnag e kireb ni ke rin’ nge thilyeg e ngongol rok, ya n’en ni rin’ e gel e damumuw rok ngak walagen.​—Gen. 4:6.

11. Uw rogon ni dag Kain nib sasalap gum’irchaen, ma mange rayog ni ngad filed ko re n’ey?

¹¹ I guy Jehovah ni bay e riya’ ko ngongol rok Kain, ma aram me non ngak u fithik’ e runguy, nge yog ngak nfaanra rin’ e tin nib fel’ ma rayog ni nge pirieg e felfelan’. Ma ba gel e kireban’ riy ya de motoyil Kain ko fonow rok e en Ta Sunmiy me li’ walagen ngem’. Ki m’ug nib kireb laniyan’ Kain u nap’an ni fith Got ngak ni gaar: “Ba uw Abel ni walagem?” Me fulweg u fithik’ e damumuw ni gaar: “Da gu nang. I gag e matanag rok walageg?” (Gen. 4:7-9) Riyul’ nrib sasalap gum’irchaey, nrayog ni nge k’aringey ngan pag e fonow rok Got! (Jer. 17:9) Ere manga yugu da filed ban’en ko pi n’ey muud gurgad i siyeg e lem nge ar’ar ni kireb. (Mu beeg e James 1:14, 15.) Faanra kan fonownagdad ko fonow nu Bible, ma nge fel’ u wan’dad ma gad sap ngay ni aram e mich riy ni gad ba t’uf rok Jehovah.

Dariy e Denen nib Mith

12. Mange ma rin’ Jehovah ko ngongol nib kireb ni kan rin’?

¹² Rayog ni nge lemnag boch e girdi’ nfaan yad ra rin’ e kireb nde guyrad be’, ma rayog ni ngar thaygad ko gechig riy. (Ps. 19:12) Machane dariy e denen nib mith. “Urngin ban’en ni ke m’ay i sunumeg rok e be par u p’eowchen ndariy e upong u daken; mi ir e ri gadad ra weliy e pi n’en ni ud rin’ed ngak.” (Heb. 4:13) Jehovah e ba Ta Pufthin ni ma fal’eg i yaliy fan ni gad ma rin’ ban’en, ma rogon e ngongol rok nga ban’en ni kan rin’ nib kireb e be dag gelngin feni ba mat’aw. Ir ba “Got nri ma runguy e girdi’ ma ma kireban’ ngorad.” Machane, “dabi n’ag fan” e kireb rok e piin ni yad be ‘lemnag ni nguur denengad i yan’ ara be m’ug nib sasalap e ngongol rorad. (Ex. 34:6, 7; Heb. 10:26) Ke m’ug nib riyul’ e re n’ey ko n’en ni rin’ Jehovah ngak Akan nge Ananias nge Safira.

13. Uw rogon ni lem rok Akan nib kireb e munmun me k’aring nge ngongol nib kireb?

¹³ I th’ab Akan e motochiyel rok Got ni bochan e fek boch ban’en ko fare mach nu Jeriko nge mithag nga lan e tento rok, nsana kub muun girdien e tabinaw rok ngay. Nap’an ni m’ug e denen ni ke rin’, me dag Akan ni manang feni gel e kireb ko n’en ni ke rin’ ni bochan e gaar: ‘Kug denen nib togopluw ngak Somol.’ (Josh. 7:20) Bod Kain, Akan e ke kirebnag gum’irchaen. N’en ni buch rok Akan e chogow e ir e k’aring, ma aram me k’aring e sasalap. Bochan ni chugum nu Jeriko e ba milfan ngak Jehovah, ma aram e ke iring Akan e chugum rok Got, ma bochan e re n’ey me yim’ nge chon e tabinaw rok.​—Josh. 7:25.

14, 15. Mang fan nib puluw ni nge gechignag Got Ananias nge Safira, ma mange gad ra fil ko re n’ey?

¹⁴ Ananias nge Safira ni leengin e yow girdien e ulung ko Kristiano u Jerusalem. Nap’an e Pentekost ko 33 C.E., min kunuy e salpiy ni fan e ngan ayuweg e piin ni ka fini michan’rad u boch e binaw nib palog nib t’uf e ayuw rorad ma ka yad bay u Jerusalem. Pi salpiy nem nni kunuy, e pi’ e girdi’ ni yad e lem rorad. Ere pi’ Ananias ni chuway’ bangi binaw rok, ni manang e ppin rok murung’agen, me pi’ bang e salpiy riy ni ayuw ko fapi salpiy ni kan kunuy. Machane, me ban nge yog ni ke pi’ gubin e salpiy ko fagi binaw ni ayuw. Dariy e maruwar riy ni baadag e re wu’ i mabgol ney ni nga nog e sorok ngorow u lan e ulung. Machane ba sasalap e ngongol rorow. Ere dag Jehovah e n’en ni kar rin’ew ngak apostal Peter u daken e maang’ang, ma aram me ni fith ngak Ananias fan ni ke rin’ ban’en ni aram rogon. Ka chingiyal’ nem me thig nga but’ ni kem’. Ma de n’uw nap’an nga tomren miki yim’ Safira.​—Acts 5:1-11.

¹⁵ Meewar ku Ananias nge Safira e gathi yugu ban’en ni ka fini tabab. Mar liyebgow mi yow ban ni bochan e yow be gay rogon ni ngar bannagew e pi apostal. Ma kub gel e kireb riy ni bochan e ra ‘lifithew l’igin’row ko fare kan ni thothup nge Got.’ N’en ni rin’ Jehovah e ri be dag nib tamilang ni ke ayuweg e ulung rok ko ngongol nib sasalap. Riyul’ ya, “rib gel e gafgow nra tay e piin nra gechignagrad Got, ni Got ni be par nib fos”!​—Heb. 10:31.

Mu Par ni Gab Yul’yul’ ni Gubin Ngiyal’

16. (a) Uw rogon ni be gay Satan rogon ni nge kirebnag e girdi’ rok Got? (b) Mang boch ban’en ni ma fanay Moonyan’ ko binaw rom ni nge kirebnag e girdi’ ngay?

¹⁶ Be rin’ Satan gubin ban’en nrayog rok ni nge kirebnagdad nge dab kud fel’gad u wan’ Jehovah. (Rev. 12:12, 17) Pi n’en nib kireb ni be lemnag Moonyan’ ni nge rin’ e be m’ug ni ke sug ko re fayleng ney ni ngongol ndarngal nge cham. Yaan e ngongol ni puwlag nge ngongol ndarngal e ke mom nrayog ni ngan guy u computer nge ku boch ban’en. Manga yugu dab da awgad ko pi wup ney ni ma fanay Satan. Ya ngad boded fare psalmist i David ni faani yoloy ni gaar: ‘Bayi fel’ pangig. . . . Bay gu par ni gub machalbog u naun rog.’​—Ps. 101:2.

17. (a) Mang fan nra taw nga nap’an ma ra dag Jehovah e denen ni yibe ngongliy nib mith? (b) Mange ngad dugliyed u wan’dad ni ngad rin’ed?

¹⁷ Ngiyal’ ney e dakir ma dag Jehovah e denen nib kireb ara ngongol nib sasalap ni ke rin’ be’ ni bod ni i rin’ kakrom. Machane, gubin ban’en ni be guy, ma bayi taw nga nap’an me dag nga tamilang e tin nib mith. I gaar Paul: “Denen ni be ngongliy boch e girdi’ e mmom ni ngan guy, ni ir e be waliyrad i yan ko gechig; machane denen ni be ngongliy boch e girdi’ e bay fini m’ug ko tomur.” (1 Tim. 5:24) N’en ni ma k’aring Jehovah ni nge dag e ngongol nib kireb nga tamilang e t’ufeg. Rib t’uf fare ulung rok ma ba adag ni nge par nib machalbog. Maku, ma dag e runguy ngak e piin ni kar denengad ma kar kalgadngan’rad. (Prov. 28:13) Ere ngad athamgilgad ngad pigpiggad ngak Got u polo’ i gum’irchadad ma gad siyeg e tin ra kirebnagdad.

Mu Par nib Fel’ Gum’irchaem

18. Uw rogon ni baadag David ni Pilung fak ni nge lemnag Got?

¹⁸ I yog David ni Pilung ngak Solomon ni fak ni gaar: “Fakag, gu be yog ngom ni ngam nang e Got rok e chitamam mag pigpig ngak u polo’ i gum’irchaem ngu lanin’um, ni bod ni ug rin’.” (1 Kron. 28:9) Baadag David ni gathi kemus ni nge mich Got u wan’ Solomon ni fak. Ya ku baadag ni nge fel’ u wan’ gelngin rogon ni ma lemnag Jehovah e pi tapigpig Rok. Ga ma pining e magar ngak Jehovah ni bochan gelngin ni ma lemnag e pi tapigpig rok, fa?

19, 20. Rogon ni bay ko Psalm 19:7-11, mange ayuweg David ni nge par nib chugur ngak Got, ma uw rogon ni ngad folwokgad rok David?

¹⁹ Manang Jehovah ni piin ni yad baadag ni nge fel’ e tha’ u thilrad e yad ra yan ngak ma pi fel’ngin nib fel’ e ra k’aringrad ni ngar chugurgad ngak. Ere, baadag Jehovah ni ngad nanged murung’agen nge rarogon. Uw rogon ni ngad rin’ed e re n’ey? Gad ra rin’ u daken e Thin rok ni gad ma fil nge rogon ni ma tow’athnagdad.​—Prov. 10:22; John 14:9.

²⁰ Ga ma beeg e Bible ni gubin e rran ma ga ma sap ngay ni ban’en ni yib rok Got, ma ga ma meybil ni nge ayuwegem nge yog ni mu fol riy, fa? Ga ma guy feni ga’ fan ni nge puluw e par rom ko pi kenggin e motochiyel nu Bible, fa? (Mu beeg e Psalm 19:7-11.) Faanra arrogon, ma michan’ nge t’ufeg rom ngak Jehovah e ra i gel i yan. Ma aram e rra par nib chugur ngom. (Jas. 4:8) Arrogon, ra micheg Jehovah e t’ufeg rok ngom ni aram e ra tow’athnigem me ayuwegem ko tirok ban’en u nap’an ni ga be yan ko fare kanawo’ nib mo’maw’ ni yan ko yafas.​—Ps. 91:1, 2; Matt. 7:13, 14.

Uw Rogon ni Ga Ra Fulweg?

• Mang fan ni ma fal’eg i yaliydad Jehovah?

• Mange ke k’aring boch e girdi’ kar manged toogor rok Got?

• Uw rogon ni ngad daged nib riyul’ Jehovah u wan’dad?

• Uw rogon ni ngad pigpiggad ngak Got u polo’ i gum’irchadad?

[Picture on page 8]

Uw rogon ni ma sap Jehovah ngodad ni bod rogon ba matam ni ma lemnag pi fak?

[Picture on page 9]

Mang e be fil e n’en ni buch ku Ananias ngodad?

[Picture on page 10]

Mang e ra ayuwegdad ni ngad ululgad ko pigpig ngak Jehovah u polo’ i gum’irchadad?