Kan Dag Rogon Ngak e Pi Kristiano ni Ma Ginang e Yug Girdi’
“MANG ni kam damumuw? Mang ni kam tagannag owchem?” I fil Jehovah munguyan’ Kain u fithik’ e gol ko pi deer nem. De towasariy Got ni nge thiliyeg Kain e lem rok, ya sor fan ngak Kain ni nge dugliy. Machane i tamilangnag Jehovah wenegan nra yib ngak nfaanra dugliy ni dabi rin’. I ginang Kain ni gaar: “Faan mang e mu ngongliy e tin nib fel’, ma dabi m’ug u owchem ni gab falfalan’ fa? Machane bochan e kam ngongliy e tin nib kireb, ma aram e ke par e denen ni bod ba gamanman ni maloboch ni be sonnigem ni nge gel ngom.”—Genesis 4:6, 7.
Yugu aram rogon ni ba gel e ginang nni nog ngak Kain, machane de lemnag Got ni Kain e ir be’ ni ‘dabiyog ni ngan ayuweg.’ Ya i yog ngak Kain u murung’agen e flaab nra yib ngak ni faanra thiliyeg e lem rok, me dag nrayog ni nge pithig Kain e re magawon ney ni faanra dugliy u wan’ ni nge rin’. Yog Jehovah ni gaar: “Faan mang e mu ngongliy e tin nib fel’, ma dabi m’ug u owchem ni gab falfalan’ fa?” Maku i fith ngak Kain u murung’agen e damumuw rok ni gaar: “Ga ra gel ngay fa danga’?”
Ngiyal’ ney, piin ni piilal ko ulung rok Kristus e susun ni ngar folwokgad rok Jehovah. Be yog e thin ko 2 Timothy 4:2 ni thingara “faled owcherad ko kireb ni yad be rin’,” ngar tamilangnaged wenegan nra yib ngak be’ ni dabi fol rok Got. Maku u taab ngiyal’ ma piin ni piilal e susun ni ngar “filed e thin rok Got ngorad.” Fre thin nu Greece ni pa·ra·ka·leʹo e ma sor fan ko “pi’ e athamgil nga laniyan’uy.” Be yog e thin ko Theological Dictionary of the New Testement ni gaar: “Fonow riy e dabi k’aring e damumuw, ma dabi togopuluw, ara gathibthibnag.” “Maku re bugithin nem e ku rayog ni nge sor fan ko fl’eg laniyan’uy ma biney e be micheg ni bpuluw ko ngan pi’ e athamgil nga lanin’uy.
Ku reb e thin nu Greece ni bpuluw ngay e pa·raʹkle·tos ma ma sor fan ku be’ nra pi’ e ayuw ara be’ ni ma ayuweg e magawon nib legal. Ere, mus ko ngiyal’ nra pi’ e piin ni piilal e ginang nib gel e thin riy, machane susun ndabra paged talin ni yad e piin ni ma pi’ e ayuw—ma gathi piin ni toogor—ko fa en ni ba t’uf ni ngan ginang. Bod Jehovah, susun ni nge par e piin ni piilal nib puluw lanin’rad, ngar daged nib mugugil u wan’rad ni fa en ni ba t’uf e ginang e rayog ni nge gel ko magawon rok.—Mu taarebnag ko Galatia 6:1.
Machane mmil fan ngak fa en nib t’uf e ayuw rok ni nge fol ko ginang ni kan nog ngak. (Galatia 6:5; Filippi 2:12) Piin ni yad ma ginang e girdi’ e yad ra guy ni dabi fol gubin e girdi’ ko fonow rorad, ni bod rogon ni dugliy Kain ni dabi fol rok e Ani Sunmiy gubin ban’en. Machane, faan ra folwok e piin ni piilal rok Jehovah, ni ir Fa En ni dag rogon ngak e pi Kristiano ni ngar ginanged e girdi’, ma rayog ni nge mudugilan’rad ngay ni kar rin’ed e n’en ni susun ni ngar rin’ed.