Mu Chuchugur Ngak Got

En ni Baadag e Tin nib Mat’aw

Hebrews 10:26-31

GUR bay be’ ni ke rin’ e tin nib kireb ngom, ndan gechignag ma de kalngan’? Mo’maw’ e re n’ey, ni ba ga’ ni girdi’ ni ke magawonnagem e susun yad e piin ni ngar t’ufeged mar ayuweged gur. Sana ga ra lemnag, ‘Mang fan ni ma pag Got ni nge buch e pi n’ey?’a Ya bin riyul’ riy e ma fanenikay Jehovah urngin e tin nde mat’aw. Thin rok ni aram fare Bible, e be micheg ngodad ni piin tadenen ni dabra kalgadngan’rad e ba mudugil nra gechignagrad Got. Ngad guyed e thin rok apostal Paul ni bay ko Hebrews 10:26-31.

Yoloy Paul ni gaar: “Dakuriy reb e maligach nra chuweg e denen ni faanra da lemniged ni nguud denengad i yan u tomuren ni kan weliy ngodad e tin riyul’ kad nanged.” (Verse 26) Girdi’ ni yugu ma rin’ e tin nib kireb ni lem rorad e rib kireb. Mang fan? Bin som’on, kar rin’ed e tin nib kireb ni gathi bochan e yad ba meewar, ni aram e kireb ni gad ma rin’ yu ngiyal’ ya bochan e daworda flontgad. Yugu yad ma rin’ e kireb. Bin l’agruw, yad ma rin’ e tin nib kireb ni lem rorad. Ni bod ni yog fare The Bible in Basic English, ni “kar rin’ed e tin nib kireb ni lem rorad.” Kar machamgad i rin’e kireb. Bin dalip, yad be rin’ e kireb ni gathi dar nanged. Ya kar nanged e “tin riyul’” u murung’agen e tin m’agan’ Got ngay nge kanawoen.

Uw rogon u wan’ Got e piin tadenen ndabra kalgadngan’rad? Yog Paul ni gaar, “dakuriy reb e maligach nra chuweg e denen ni faanra da lemniged ni nguud denengad i yan.” Fare maligach rok Kristus ni tow’ath rok Got ko girdi’ e ma upunguy e denen ni gad ma rin’ ya bochan e daworda flontgad. (1 John 2:1, 2) Machane piin ni yugu yad ma rin’ e tin kireb ni dabra kalgadngan’rad e dariy fan u wan’rad e re tow’ath ney nib tolang puluwon. U wan’ Got, e yad “be darifannag e en ni Fak Got ni be dag ko ngongol rok ndariy fan u wan’” rachaen Jesus. (Verse 29) Be m’ug ko ngongol rorad ni dariy fan Jesus u wan’rad ma yad be ta’ ni “dariy fan” rachaen, ni bod rachaen e girdi’ ni de flont. (Today’s English Version) Girdi’ ni aram rogon e dabi yib angin ngorad e maligach ni pi’ Kristus.

Mang e ra buch ko piin nib kireb? Fare Got nib mat’aw e ke micheg ni gaar: “Bay gu fulweg taban e kireb, bay gu sulweg puluwon.” (Verse 30) Urngin e girdi’ ni yad be denen i yan e susun ni ngar nanged ni: Urngin e girdi’ ni ma th’ab e motochiyel rok Got ni lem rorad e yira gechignagrad. Ba ga’ ni ma yib wenegen e denen rorad ngorad. (Galatia 6:7) Yugu aram nde yib wenegen e denen rorad e chiney, ma ra gechignagrad Got boch nga m’on u nap’an ni ra yib ni nge chuweg urngin e tin nde mat’aw. (Proverbs 2:21, 22) I ginangey Paul ni gaar: “Rib gel e gafgow nra tay e piin nra gechignagrad Got, ni Got ni be par nib fos.”​—Verse 31.

Ra felfelan’ e piin ni yibe gafgownagrad ya kar nanged nra gechignag Got e en dabi kalngan’ ko kireb ni be rin’. Rayog ni nge pagan’dad nra gechignag Jehovah e piin nib kireb, ya ir fare Got ni ma fanenikay urngin e tin nde mat’aw.

[Footnote]