4 Dabki Maruwaran’um

“Rib achig e michan’ rom ngak Got. Mang fan ni be maruwar Got u wan’um?”​—Matthew 14:31.

MANG FAN NI BE MARUWARAN’UM? Mus ngak e pi gachalpen Jesus ma i maruwaran’rad. (Matthew 14:30; Luke 24:36-39; John 20:24, 25) Be tamilangnag e Bible ni ra dariy e michan’ rodad ma aram e denen nib mom ni nge “m’agdad.” (Hebrews 12:1) Be gaar Paul: “Gathi urngin e girdi ma ma mich u wunrad e re thin rok Somol ney.” (2 Thessalonika 3:2) Gathi bochan e dabiyog ni nge dag boch e girdi’ e michan’, ya bochan e darur guyed rogon ni nge yog e michan’ ngorad. Ra tow’athnag Got e girdi’ ni be guy rogon ni nge yog e michan’ ngorad.

UW ROGON NI NGE DABKI MARUWARAN’UM? Mu lemnag e pi n’en ni ma k’aringem ni nge maruwaran’um. Ke maruwaran’ Thomas ni kan faseg Jesus, ni yugu aram rogon ni ke yog fapi gachalpen Jesus ngak ni kar guyed Jesus. Ere baadag Thomas ni nge guy e mich riy. Mang e buch? Ke dag Jesus e mich riy ngak ni ra ayuweg ni nge gel e michan’ rok.​—John 20:24-29.

Ke pi’ Jehovah Got e Bible ngodad ya nge tamilangan’dad ko pi n’en ni be maruwaran’dad ngay. Boor e girdi’ e daki michan’rad ngak Got ni bochan e ma yog boch e girdi’ fa lemnag boch e girdi’ ni Got e ir tapgin e mahl, nge cham, nge gafgow. Machane mang e be yog e Bible?

Der ma fanay Got e pi am nu fayleng ni nge gagiyegnag e girdi’. Ke yog Jesus ni fare kan ni danir guy ni Satan e ir e “en ni be gagiyegnag e girdi’ nu roy u fayleng.” (John 14:30) Ke yog Satan ngak Jesus ni ra pi’ e pi nam nu fayleng ngak ni faanra liyor ngak ni gaar: “Gu ra pi’ mat’awun ni nguum gagiyegnag e pi nam ney nge urngin e pi flaab ney. Ya ni pi’ ngog ni gubin nrayog ni gu pi’ ngak e en ni gub adag ni nggu pi’ ngak.” Ma de yog Jesus ni de mil fan e pi nam nem ngak Satan. Ya gaar: “Fare babyor nib thothup e be gaar, Mu siro’ ma ga meybil ngak Somol ni Got rom ma yigoo ir e ngam pigpig ngak!” (Luke 4:5-8) Ere Satan nge am ko girdi’ e yad be k’aring e gafgow nge mahl nga fayleng, ma gathi Got.​—Revelation 12:9, 12.

Dabki n’uw nap’an ma ra chuweg Got e pi n’en ni ma k’aring e gafgow. Ke yarmiy rogon reb e am ke tay ni Jesus e pilung riy ni ra gagiyegnag e girdi’ nu fayleng. (Matthew 6:9, 10; 1 Korinth 15:20-28) Ma aram e ke riyul’ fare thin ko profet u Bible ni fare thin nib fel’ ni murung’agen Gil’ilungun Got e yibe machibnag u ga’ngin yang u fayleng. (Matthew 24:14) Dabki n’uw nap’an ma Gil’ilungun Got fa am rok e ra thang mit e piin ni be togopuluw ko am rok ma ra chuweg gubin mit ban’en ni be k’aring e gafgow ko girdi’.​—Daniel 2:44; Matthew 25:31-33, 46; Revelation 21:3, 4.

UW ROGON NI RA FEL’ ROGOM RIY? Ere piin ni ma maruwaran’rad e yad bod e n’ew ni be fekrad e “nifeng i yan ni gubin yay nra n’ag e nifeng gil’ni aram e machib rok e girdi’ ni yad be bannag e girdi’.” (Efesus 4:14; 2 Peter 2:1) Machane, piin ni ke tamilang u wan’rad e thin nu Bible e rayog ni ngar pired ni “ba gel.”​—1 Korinth 16:13.

Pi Mich Rok Jehovah e kar yoloyed e re babyor ney, ma yad baadag ni ngar ayuweged gimed ni nge tamilangan’med ko pi n’en ni be magawonnag e michan’ romed. Yad be piningem ni ngam un ngorad ma ga fal’eg i yaliy rogon ni yad be fil e machib nu Bible. Faan ga ra rin’ ni aram rogon ma rayog ni nge gelnagem nge michan’um ngak Got.

Ra ga baadag ni ngkum nang boch, mag guy fagali kenggin e thin ni “Birok Got E Am Nra Fl’eg E Gapas” ni bay ko guruy ni 13 nge “Mang Fan Ni Ke Pag Got E Kireb?” ni bay ko guruy ni 11 ko fare babyor ni Rayog Ni Ngam Par Ni Gab Fas U Paradis U Fayleng.a

[Footnote]

[Picture on page 9]

Girdi’ ni ke tamilang u wan’rad e thin ko Bible e ra gel e michan’ rorad