Nge “Pasigan’dad ni Ngad Rin’ed e Tin nib Fel’”!

“I ir e pi’ ir ni bochdad ni fan e nge lagdad u fithik’ urngin e kireb me ngongliydad ngad manged ba ulung i girdi’ ni kad machalboggad nib mil fadad ngak me pasigan’dad ni ngad rin’ed e tin nib fel’.”​—TITUS 2:14.

1. Mang e buch u nap’an ni yan Jesus nga tempel ko Nisan 10 ko duw ni 33?

NGIYAL’ nem e nap’an e madnom ko Paluk’af ko Nisan 10 ko duw ni 33. Ma goo bay e girdi’ u tempel u Jerusalem ni yad be son ni ngar uned ko re madnom nem. Mang e buch u nap’an ni yan Jesus e ngaram? I yog Matthew, Mark nge Luke ni aram e yay ni l’agruw ngay ni tuluf Jesus e piin ni yad be fol chuway’ u tempel. Me thikiy e tebel ko piin ni yad be thilyeg e salpiy nge chiya rok e piin ni yad be chuway’ ko bulogol. (Matt. 21:12; Mark 11:15; Luke 19:45) Dalip e duw ni ke yan nap’an ni klinnag Jesus e tempel, mi ki mada’ ko ngiyal’ nem ma ri kab pasig ni be tiyan’ ngay.​—John 2:13-17.

2, 3. Uw rogon ni kad nanged ni gathi kemus ni klinnag Jesus e tempel?

² I yog Matthew ni gathi kemus ni klinnag Jesus e tempel ya ki golnag e piin nib malmit nge piin nib marwoth. (Matt. 21:14) Ma babyor rok Luke e be weliy murung’agen e maruwel ni i tay Jesus. “I machib Jesus u lan e tempel ni gubin e rran.” (Luke 19:47; 20:1) Ere machib ni i tay e ke m’ug riy nrib pasig.

³ Boch nga tomren me yol apostal Paul ngak Titus me yog ngak ni ke pi’ Jesus “ir ni bochdad ni fan e nge l’agdad u fithik’ urngin e kireb me ngongliydad ngad manged ba ulung i girdi’ ni kad machalboggad nib mil fadad ngak me pasigan’dad ni ngad rin’ed e tin nib fel’.” (Titus 2:14) Ere gadad, ra diin me “pasigan’dad ni ngad rin’ed e tin nib fel’”? Ma uw rogon nra ayuwegdad e n’en ni rin’ fapi pilung nu Judah nib fel’ kakrom?

Ngad Pasiggad ko Machib nge Fol Bible Ngak e Girdi’

4, 5. Mang e rin’ aningeg e pilung nu Judah ni be dag nib pasigan’rad i rin’ e tin nib fel’?

⁴ Asa nge Jehoshafat nge Hezekiah nge Josiah e yad gubin ni ur rin’ed boch ban’en ni fan e nge digey e girdi’ e meybil ni yad be tay nga boch e got ni googsur u Judah. I chuweg Asa e “pi altar nu yugu boch e nam nge yungi tagil’ e tayfan rok e piin dar nanged Got, me buthug yu ulung i malang ni yima meybil ngay, me t’ar nga but’ fapi yaan Asherah ni fare got nib pin.” (2 Kron. 14:3, BT) Ku arrogon Jehoshafat ni “gothey gubin fa yungi tagil’ e meybil rok e piin ndar nanged Got nge fapi yaan Asherah nib got nib pin u lan yu Judah.”​—2 Kron. 17:6; 19:3, BT.a

⁵ Tomren fare madnom ko Paluk’af ni yog Hezekiah ni ngan tay u Jerusalem, “ma gubin e girdi’ nu Israel ni ranod nga lan gubin e pi binaw nu Judah ngar biliged e yu raba’ i malang, mi yad th’ab nga but’ e pi pow rok Ashera ni fare got nib pin, mi yad gothey e pi altar nge yungin tagil’ e tayfan rok e piin ndar nanged Got. Ma ku aram e n’en ni rrin’ed u daken yu Judah ni ga’ngin, nge yu yang i nug rok Benjamin, Efraim, nge Manasseh; ma aram mi yad sul ni yad gubin nga taferad.” (2 Kron. 31:1, BT) I pilung Josiah ko ngiyal’ ni ke gaman meruk e duw yangaren. Be gaar e Bible: “U lan e re duw ni gaman e meruk ngay ni ke pilung Josiah, nnap’an ni kab pagel, me tabab i liyor ngak e Got rok e ga’ rok ni aram David ni Pilung. Ma aningeg e duw nga tomren me tabab i gothey e yungin ni tagil’ e tayfan rok e piin ndar nanged Got, nge pi pow rok Asherah ni fare got nib pin, nge urngin e liyos.” (2 Kron. 34:3, BT) Ere, ba pasigan’ e re aningeg i pilung nem ni ngar rin’ed e tin nib fel’.

6. Mang fan nrayog ni ngan taarebrogonnag e machib ni gad ma tay ko n’en ni i rin’ fapi pilung nu Judah kakrom?

⁶ Ngiyal’ ney e ku gad be ayuweg e girdi’ ni ngar digeyed e machib ko pi yurba’ i teliw ni googsur ni kub muun e meybil ko liyos ngay. Rayog ni ngad pirieged gubin mit e girdi’ ko machib ni gad ma tay u mit e tabinaw. (1 Tim. 2:4) Keb ngan’ reb e rugod u Asia rogon ni ma meybil e chitiningin ko liyos ni bay u tabinaw rorad. Ke lemnag ndabisiy ma de riyul’ e pi liyos nem ere ke meybil ni nge nang e bin riyul’ e Got. Faani borran meb l’agruw e Pi Mich Rok Jehovah nga tafen, ma aram mar ayuwegew ni nge nang murung’agen e bin riyul’ e Got nge fithingan, ni aram Jehovah. Kari felfelan’ ni ke nang e tin riyul’ u murung’agen e meybil ni yima tay ko liyos! Ma chiney e rib pasig ko machib ma be ayuweg e girdi’ ni ngar nanged murung’agen Jehovah nge tin nib m’agan’ ngay.​—Ps. 83:18; 115:4-8; 1 John 5:21.

7. Uw rogon ni ngad folwokgad ko fapi girdi’ nra machibgad u ga’ngin yang u Judah u nap’an Jehoshafat?

⁷ Ba fel’ rogon e machib ni gad ma tay ko yungi n’en ni gad ma machib riy, fa? Nap’an e bin dalip e duw ko gagiyeg ni tay Jehoshafat me l’og lal e tolang, nge mereb e Levite nge l’agruw e prist ni nga ranod nga ga’ngin yang u Judah ngar filed e motochiyel rok Jehovah ko girdi’. Rib fel’ rogon e re maruwel nem nra ted ya ki mada’ ko pi nam nib liyeg fare nam nu Judah ni rrusgad ngak Jehovah. (Mu beeg e 2 Kronicles 17:9, 10.) Faanra da thilyeged e tayim nge rran ni gad ma yan nga tafen e girdi’ ko machib ma dabisiy nra thil e girdi’ ni gad ra mada’nag u reb e tabinaw ngu reb.

8. Uw rogon me yoor boch e girdi’ ni ngad machibniged?

⁸ Boor e tapigpig rok Got e ngiyal’ ney ni kar paged e tabinaw rorad ni fan e ngar pied e ayuw ko yungi n’en nib t’uf boch e tamachib riy. Rayog ni ngam rin’ ni aray rogon, fa? Bay boch i gadad ndabiyog rorad ni nga ranod nga bang ngar pied e ayuw machane rayog ni ngar machibniged e girdi’ u yugu boch e nam ni yad bay ko gin ni yad ma par riy. Ron e ma par u bang ni boor e girdi’ u yugu boch e nam ni ma par riy, ere nap’an ni ke gaman 81 e duw rok me fil rogon ni nge non ngak be’ ni kafin ra mada’ u 32 mit e thin. Immoy ba wu’ i mabgol nu Africa ni mada’nagrow u kanawo’ me non ngorow ko thin rorow ni Yoruba. Me fith fare wu’ i mabgol ko ka immoy u Africa, me yog ni danga’. Ere ra fithew ngak ko mang e ke rin’ ma ke nang e thin ko nam rorow. Ma aram me tabab i machibnagrow. Kar fekew e babyor ni pi’ ngorow ma rognew ngak e gin ni yow ma par riy ma aram me yog fare walag nga reb e ulung ni ngar ayuweged fare wu’ i mabgol ni ngar filew e Bible.

9. Mang nib ga’ fan ni ngaud beeged e Bible ko girdi’ u nap’an e machib? Mu weliy ban’en ni ke buch.

⁹ Fapi tamachib ni yog Jehoshafat ngorad ni ngar machibgad u lan yu Judah e “ra feked fare ke babyoren e motochiyel” rok Jehovah nge un ngorad. Ku arrogodad ni gad ma gay rogon ni ngad machibniged e girdi’ nrogon nib puluw ko Thin rok Got u Bible. Ku gad ma athamgil ni ngad beeged e Bible ko girdi’ u nap’an e machib ya nge yog nra nanged feni ga’ fan e thin riy mar nanged ni gathi thin rodad e gad be machibnag. Immoy reb e walag ni Linda fithingan ni mada’nag reb e ppin u nap’an e machib me yog fare pin ngak ni ke stroke e pumoon rok mab t’uf ni nge ayuweg. Miki gaar: “Dagnang ko mang e kug bucheg ni ke pag Got e biney e gafgow keb ngog.” Me gaar Linda ngak: “Rayog ni nggog ban’en ngom?” Ma aram me beeg fare thin ni bay ko James 1:13, me gaar: “Gubin e gafgow ni ma yib ngodad e gathi Got e ma k’aring.” Me yan fare pin i gumuchmuch ngak Linda. I yog Linda ni gaar: “Ke yog ni nggu fal’eg laniyan’ fare pin u daken e thin nu Bible. Yu ngiyal’ e fapi thin nu Bible ni gad ma beeg e dawori rung’ag e piin ni gad ma machibnagrad bayay.” Bochan e n’en ni buch ma aram mar tababnagew e fol Bible.

Piin Fel’ Yangaren ni Yad Be Pigpig ni Yad Ba Pasig

10. Mang fan nrayog ni nge folwok e piin fel’ yangaren ko n’en ni rin’ Josiah?

¹⁰ Ngad sulod ngad weliyed murung’agen Josiah. Kad filed faram ni tabab ko liyor ngak Got ko ngiyal’ ni kab bitir. Ma nap’an ni gaman 20 e duw rok me tabab i gothey e yungi n’en ni tagil’ e liyor nga boch e got ni googsur. (Mu beeg e 2 Kronicles 34:1-3.) Ku arrogon e ngiyal’ ney ni boor e tapigpig rok Got nib fel’ yangarrad ni yad ba pasig ko machib.

11-13. Mang e gad ra fil rok boch e fel’ yangaren ni yad be pigpig ngak Jehovah e ngiyal’ ney ni yad ba pasig?

¹¹ Nap’an ni gaman 13 e duw rok Hannah ni ma par u England me rung’ag ni bay reb e ulung nib beech ko gin ni ma par riy ni yad ma non ko thin ni French, ma ngiyal’ nem e be fil e thin ni French u skul. Ere yog ko chitamangin me m’agan’ e chitamangin ngay ni nge un ngak nga u ranow ko muulung e ngaram. Chiney e ke gaman 18 e duw ku Hannah, mma machib u polo’ e tayim rok ko thin ni French. Gur, rayog ni ngam fil yugu reb e thin nge yog nim ayuweg boch e girdi’ ni ngar filed murung’agen Jehovah?

¹² Rachel e kari adag fare kachido ni kenggin e Pursue Goals That Honor God (Mu Nameg e Pi N’en ni Yira Pining e Sorok Riy ngak Got). I sul nge lemnag e ngiyal’ ni ka fini tabab ko pigpig ngak Jehovah ko duw ni 1995, me gaar: “Ug lemnag nri gu be pigpig ngak Got nib fel’ rogon. Machane, tomren ni kug yaliy fare kachido ma kug nang ni ka boor ban’en nib t’uf ni nggu rin’. Thingar gu par ni gub mudugil ni fan ko tin riyul’ maku thingar gu tiyan’ug ko fol Bible nge pigpig ni gu be tay.” Chiney e ke guy Rachel ni ke gel boch e pasig ko pigpig ni be tay ngak Jehovah ko kafram. Ere, mang angin ni keb ngak? I yog ni gaar: “Kari fel’ e tha’ u thilmow Jehovah. Ma ke fel’ boch rogon e meybil nge fol Bible ni gu ma tay, ma urngin e thin nu Bible e kari riyul’ u wan’ug. Rib pasigan’ug ko machib ni gu ma tay maku gub felfelan’ ni gu be guy boor e girdi’ ni ke fel’ lanin’rad ni bochan e thin rok Jehovah.”

¹³ Luke reb e fel’ yangaren ni ke athamgil laniyan’ ni bochan fare kachido ni, Young People Ask​—What Will I Do With My Life? (Deer ni Ma Fith e Piin Fel’ Yangaren​—Mang e Gu Ra Rin’ ko Yafas Rog?) I yoloy ni gaar: “Kafram e kan towasariyeg ni nggu nameg e skul nib tolang ni fan e nge yog e maruwel nib tolang puluwon ngog, mfin gu nameg e tirok Got ko tomur. Machane, faan yira towasariy be’ ni aray rogon mab mo’maw’ ni nge fel’ e tha’ u thilrow Jehovah.” Ere gimed e pi walag ni kab fel’ yangarmed, mang ndab mu guyed rogon ngam mon’ognaged rogon e machib ni gimed be tay ko pi n’en ni kam filed u skul ni bod e n’en ni rin’ Hannah? Ma mang ndab mu folwokgad ko n’en ni rin’ Rachel ngam nameged e tin ni yira pining e sorok riy ngak Got? Mu folwokgad ko n’en ni rin’ Luke ngam siyeged e pi n’en ni ke yoor e piin fel’ yangaren ni kan bannagrad riy.

Ngan Fol ko Ginang

14. (a) Ba miti mang liyor e ba m’agan’ Jehovah ngay? (b) Mang fan nib mo’maw’ e re n’ey?

¹⁴ Piin ni yad ma pigpig ngak Jehovah e thingar ra pired ni yad ba beech ma aram e ra m’agan’ Jehovah ko pigpig rorad. Ke ginangey Isaiah ni gaar: “Gimed urngin e piin gimed be fek mam’en e Tempel, mu chuwgad u Babylon ni ka chingiyal’ ney! Dab mmathgad nga ban’en ni ke yog e motochiyel ndab mmathgad ngay; mu ted gimed ni gimed ba thothup mi gimed chuw u lan e re binaw nir.” (Isa. 52:11, BT) Bokum e duw u m’on ni yoloy Isaiah e pi thin ney me chuweg Asa ni Pilung urngin e piin ni yad ma un ko darngal u Judah. (Mu beeg e 1 Kings 15:11-13.) Ma bokum miriay e duw nga tomren me yog apostal Paul ngak Titus ni ke machalbognagdad Jesus ma ke mil fadad ngak ma ke “pasigan’dad ni ngad rin’ed e tin nib fel’.” (Titus 2:14) Ngiyal’ ney e kari mo’maw’ ni ngan palog ko ngongol nde yalen, nib ga’ ni piin fel’ yangaren e rib mo’maw’ ngorad. Bod e pi yaan e puwlag ni yima pag u TV, nge boch e kachido, nge internet nge yu ken e babyor nthingari palog e pi tapigpig rok Got riy.

15. Mang e ra ayuwegdad ni ngad fanenikayed e tin nib kireb?

¹⁵ Faan gad ra fol ko ginang ni be pi’ Got ma ra ayuwegdad ni ngad fanenikayed e tin nib kireb. (Amos 5:15; Rom. 12:9) I yog reb e Kristiano ni faan gad ra fanenikay yaan e ngongol ni puwlag ma aram e “rayog ni ngad paloggad u gelngin ndabi giringiydad ni bod e gamig.” Ra ngam wereg e wasey ni bay e gamig u fithik’ mab t’uf ban’en nib gel gelngin ni ngam wereg ngay. Ere ku aram rogon yaan e ngongol ni puwlag, ni kemus nrogon mag palog riy e ngam athamgil. Machane, kub ga’ fan ni ngam nang wenegan nra yib ngom, ya kemus rogon mag fanenikay. Reb e walag ni pumoon e kari athamgil ni nge dabki yan nga yu yang ko Internet ni bay yaan e puwlag riy. N’en ni ke rin’ e ke fek e computer rok nge tay nga bang nrayog ni guy gubin e girdi’ u tabinaw. Me dugliy u wan’ ni nge beechnag e ngongol rok me pasig i rin’ e tin nib fel’. Machane, ba ga’ ni ma yan ko Internet ni bochan e maruwel rok, ere ke dugliy ni gubin ngiyal’ nra yan ko Internet ma yow leengin.

Angin e Ngongol nib Fel’

16, 17. Mang angin e ngongol nib fel’ ni gad ma rin’? Mu weliy ban’en ni ke buch.

¹⁶ Riyul’ nib fel’ e ngongol ko piin fel’ yangaren ni yad be pigpig ngak Jehovah ni yad ba yul’yul’! Ma re n’ey e ra guy e girdi’ ma yad ma gin ngay. (Mu beeg e 1 Peter 2:12.) Immoy reb e pumoon ni yan nga Bethel u London ni nge fal’eg ba masin mi ri thil e lem rok ni guy e Pi Mich Rok Jehovah. Nap’an ni sul u rom me nang e ppin rok ni ke thil e lem ko pumoon rok. Kafram e dabun ni ma yan e Pi Mich Rok Jehovah nga tafen machane rofen nem e nap’an ni sul nga tabinaw ma boor ban’en nib fel’ ni weliy u murung’agen e girdi’ ni ma maruwel u rom nge fene ri yad ba gol. I yog ndariy be’ u rom ni ma yog e thin ni kireb ma gubin e girdi’ ni yad ba gum’an’ ma ba gapas thilrad. Kari gin ko pi walag ni kab fel’ yangarrad ni yad be maruwel ni yad ba pasig ndariy puluwrad ni fan ko fare thin nib fel’.

¹⁷ Taareb rogon ko pi walag ni pumoon nge ppin ni yad ma un ko maruwel ni ngar ayuweged e tabinaw rorad ni ku yad ma tedan’rad ko maruwel. (Kol. 3:23, 24) Angin e re n’ey e boor e girdi’ ni kar adaged ni ma maruwel e Pi Mich Rok Jehovah rorad ndab ra talgad, ya ba pagan’rad ngorad.

18. Uw rogon ni nge “pasigan’dad ni ngad rin’ed e tin nib fel’”?

¹⁸ Pagan’ rodad ngak Jehovah, nge fol ni gad ma tay ko thin rok, nge rogon ni gad ma ayuweg tagil’ e muulung rodad e aram rogon ni gad ma dag nriyul’ ni gad be tedan’dad ko naun rok Jehovah. Maku gad baadag ni ngad pasiggad ko machib ni gad ma tay nge rogon ni gad ma ayuweg e girdi’ ni ngar manged boch i gachalpen Jesus. Faan gad ra athamgil ni ngaud pired ni gad be fol ko pi kenggin e motochiyel nu Bible ndemtrug ko ka gad ba pagel fa kad pilibthirgad, ma ra yib angin ngodad me nang e girdi’ nib “pasigan’dad ni ngad rin’ed e tin nib fel’.”​—Titus 2:14.

[Footnote]

Mang e kam fil rok boch e girdi’ nib yul’yul’ kakrom nge ngiyal’ ney u

• rogon ni ngam pasig ko machib nge fol Bible ngak e girdi’?

• rogon ni nge pasigan’ e fel’ yangaren ni Kristiano i ‘rin’ e tin nib fel’’?

• rogon ni ngan palog u boch ban’en nib kireb ni kan mecham ngay?

[Picture on page 19]

Gubin ngiyal’ ni ga ma yan ko machib ma ga ma beeg reb e thin nu Bible ngak be’, fa?

[Picture on page 21]

Ga ra fil yugu reb e thin u skul ma ra ayuwegem ko machib