“Um Pired ni Gimed Ba T’uf rok Got”

“Um pired ni gimed ba t’uf rok Got, ma gimed be sonnag e Somol rodad i Jesus Kristus ni nge pi’ e yafos ndariy n’umngin nap’an ngomed ni bochan e be runguymed.”​—JUDE 21.

1, 2. (a) Uw rogon ni ke dag Jehovah nriyul’ ni gad ba t’uf rok? (b) Uw rogon ni kad nanged ndabiyog ni nguud pired ni gad ba t’uf rok Got ni faanra demtrug e n’en ni gad be rin’?

BOOR e kanawo’ ni ke t’ufegdad Jehovah Got riy. Dariy e maruwar riy ni fare biyul ni maligach ni pi’ Jehovah e ri ireram e mich riy nriyul’ ni gad ba t’uf rok. Rib t’uf e girdi’ rok, ere aram fan ni l’og Fak nrib t’uf rok ni nge yib nga fayleng nge yim’ ni fan ngodad. (John 3:16) Ki rin’ e re n’ey ni bochan e baadag ni nge yog e yafas ni manemus ngodad, miki fel’ rogodad ko t’ufeg rok ndariy n’umngin nap’an!

² Machane, gur, rayog ni nguud pired ni gad ba t’uf rok Jehovah ni faanra demtrug e n’en ni gad be rin’? Dabiyog, ya kan fonownagdad u Jude 21 ni gaar: “Um pired ni gimed ba t’uf rok Got, ma gimed be sonnag e Somol rodad i Jesus Kristus ni nge pi’ e yafos ndariy n’umngin nap’an ngomed ni bochan e be runguymed.” Fapi thin ni “um pired ni gimed ba t’uf rok Got” e be dag ni bay ban’en nib t’uf ni ngad rin’ed. Ere, mang e ba t’uf ni ngad rin’ed ni faanra nguud pired ni gad ba t’uf rok Got?

Uw Rogon ni Nguud Pired ni Gad Ba T’uf rok Got?

3. Mang e yog Jesus nib ga’ fan ni nge rin’ ni faanra nga i par nib t’uf rok e Chitamangin?

³ Gad ra nang e fulweg ko re thin nem ko thin ni yog Jesus ko bin tomur e rran ko yafas rok u fayleng. I gaar: “Faan gimed ra fol ko tin ni kug ning chilen ngomed, ma gimed ra par ni gimed ba t’uf rog, ni bod rogon ni kug fol ko tin ni ning e Chitamag chilen ngog gu be par ni ku gub t’uf rok.” (John 15:10) Kad guyed ko re thin ney ni manang Jesus ni faanra nga i par nib fel’ u wan’ e Chitamangin ma gubin ngiyal’ thingar i fol ko pi motochiyel rok. Ere, faanra aram rogon e lem rok Fak Got ni be’ nib flont, me ere gathi susun e ngki er rogodad?

4, 5. (a) Uw rogon ni ngad daged ngak Jehovah nriyul’ nib t’uf rodad? (b) Mang fan ndariy rogon ni ngad dabuyed ni ngad folgad ko pi motochiyel rok Jehovah?

⁴ Faanra ud folgad rok Jehovah ma aram e gad be dag ngak nriyul’ nib t’uf rodad. I weliy apostal John rogon e re n’ey ni gaar: “Baaray fan ni nge t’uf Got rodad: fan e ngad folgad ko tin ni ke yog ni ngad rin’ed. Ma tin ni ke yog ni ngad rin’ed e gathi rib mo’maw’.” (1 John 5:3) Boor e girdi’ e ngiyal’ ney ni dubrad ni ngar folgad rok be’. Machane, am tay fanam i yan ko fare thin ni gaar: “Tin ni ke yog ni ngad rin’ed e gathi rib mo’maw’.” Be yip’ fan nder lemnag Jehovah ni ngad rin’ed ban’en ni manang ni kaygi mo’maw’ ngodad.

⁵ Ga ra yog ngak e fager rom ni nge fek ban’en ni ga manang ndabi taw rok? Ba mudugil ni danga’! Jehovah e ri kab pag feni gol ngodad ma ri manang e tin ndabiyog rodad. Be yog e Bible ni ‘manang Jehovah ni gadad e fiyath.’ (Ps. 103:14) Dabi yog ban’en ni ngad rin’ed ndabiyog rodad. Ere, dariy rogon ni ngad dabuyed ni ngad folgad ko pi motochiyel rok. Gad baadag ni nguud folgad rok Jehovah ni bochan e aram reb e kanawo’ ni ngad daged ngak nriyul’ nib t’uf rodad ma gad baadag ni nguud pired ni gad ba t’uf rok.

Ba Tow’ath ni Ke Pi’ Jehovah Nrib Fel’

6, 7. (a) Mang e nangan’? (b) Mu weliy rogon nra ayuwegdad e nangan’ rodad ni nguud pired ni gad ba t’uf rok Got.

⁶ Gad be par u ba fayleng ni ke mo’maw’ e par riy, ma boor ban’en nib t’uf ni ngad dugliyed ni bay rogon ko yul’yul’ rodad ngak Got. Ere uw rogon ma gad nang ni pi n’en ni gad ma dugliy e gubin nib puluw ko n’en nib m’agan’ Got ngay? Bay reb e tow’ath ni ke pi’ Jehovah ni ma ayuwegdad u rogon ni nguud pired ni gad be fol rok, ni aram e nangan’ rodad. Mang e nangan’? Nangan’ e ban’en ni bay rodad ni ma ayuwegdad ni ngad fal’eged i yaliy rarogodad nge ngongol rodad nge n’en ni gad ma mel’eg ni ngad rin’ed me yog ngodad ko fel’ fa ba kireb.​—Mu beeg e Roma 2:14, 15.

⁷ Uw rogon ni nge ayuwegdad e nangan’ rodad? Mu lemnag be’ ni be yan u bangi ban’en nib palog ndariy e girdi’ riy. Gin ni be yan riy e dariy e kanawo’ riy. Machane ke yog ni nge taw ko gin ni be nameg ni nge yan ngay. Uw rogon? Bochan e bay e compass rok. Compass e ban’en ni yima fanay ko milekag ni taareb pa’ngin ni bay e magnet riy ni ma par nib sap ko lel’uch. Faanra dariy e compass rok e cha’ nem ma ra malog. Ere ku er rogodad nfaanra dariy e nangan’ rodad ma dariy ban’en nra pow’iydad u rogon e ngongol ni ngad rin’ed nge pi n’en ni nguud mel’eged.

8, 9. (a) Mang boch ban’en nthingar ud lemnaged u rogon e nangan’ rodad? (b) Mang e ngad rin’ed me yog ni ayuwegdad e nangan’ rodad?

⁸ Nangan’ e ku bod e compass ni bay yu ngiyal’ nder ma maruwel nib fel’ rogon. Compass e faan yira chugurnag bangi magnet ngay ma dabki sap pa’ngin ko lel’uch. Ere mang e ra buch ni faan gad ra pag e ar’ar rodad ni nge gagiyegnag e pi n’en ni gad ma dugliy? Rayog ni nge dabki maruwel e nangan’ rodad nib fel’ rogon. Be yog e Bible ni laniyan’ e girdi’ ara gum’irchaen e “dakuriy yugu reb e ban’en ni aram feni sasaliyeb.” (Jer. 17:9, BT; Prov. 4:23) Maku reb, e faanra dariy e map ni be fek be’ ni be milekag ma compass ni ba’ rok e dabiyog ni nge ayuweg. Ku aram rogon e nangan’ rodad ni faanra der taga’ nga daken e Thin rok Got u Bible ma dabiyog ni nge ayuwegdad. (Ps. 119:105) Boor e girdi’ nu fayleng ni ar’ar rorad e aram e n’en ni ma gagiyegnagrad maku darur folgad ko pi motochiyel nu Bible. (Mu beeg e Efesus 4:17-19.) Aram fan ni boor e girdi’ ni ma rin’ e tin nib kireb ni yugu aram rogon ni bay e nangan’ rorad.​—1 Tim. 4:2.

⁹ Thingar da gayed rogon ndabi buch e re n’ey rodad. Ya ngad ululgad i skulnag e nangan’ rodad ko Thin rok Got ya nge yog ni ngi i ayuwegdad. Thingar u da folgad ko n’en ni be yog e nangan’ rodad ni kan skulnag ko Thin nu Bible ma dabda paged e ar’ar rodad ni nge mang ir e gagiyegnagdad. Maku reb, e thingar uda lemnaged e nangan’ rok pi walagdad u lan e ulung. Thingar da gayed rogon ni dabda magawonnaged lanin’rad ma ngaud lemnaged nib thilthil e nangan’ rodad.​—1 Kor. 8:12; 2 Kor. 4:2; 1 Pet. 3:16.

10. Mang dalip ban’en ni ngad weliyed murung’agen?

¹⁰ Ngad weliyed dalip ban’en nrayog ni ngad daged riy ngak Jehovah nriyul’ nib t’uf rodad. Machane, faanra ngad rin’ed e pi n’ey ma som’on e thingari puluw e nangan’ rodad ko pi motochiyel nu Bible u murung’agen e ngongol ni baadag Jehovah. Re dalip i n’em e: (1) Ngad t’ufeged e piin ni yad ba t’uf rok Jehovah, (2) ngad ted fan e piin ni yad ma yog e thin, nge (3) ngad gayed rogon ni ngad pired ni gad ba beech u mit Got.

Mu T’ufeg e Piin ni Yad Ba T’uf Rok Jehovah

11. Mang fan ni ngad t’ufeged e piin ni yad ba t’uf rok Jehovah?

¹¹ Som’on e ngad t’ufeged e piin ni yad ba t’uf rok Jehovah. Gadad e girdi’ e gadad bod e bate ni demtrug ban’en nib ranran ni yira lithag ngay me wanum nga fithik’. En ni Sunmiydad e manang fel’ngin nge kirebun e chag ni ma tay e girdi’ ndawor ra flontgad. Aram fan ni ke fonownagdad ni gaar: “Mpachegem ngak e piin ni yad ba gonop me yog e gonop ngom. Mm’agem ngak e girdi’ ni balyang ma ga kireb.” (Prov. 13:20; 1 Kor. 15:33) Dariy bagadad ni baadag ni nge mang be’ nib “kireb” ya gad gubin ni gad baadag ni nge “yog e gonop” ngodad. Jehovah e ir e th’abi gonop ere daki t’uf ni ngki ga’ boch e gonop rok maku dariy be’ nrayog ni nge waliy nge denen. Machane ke tay e kanawo’ nib fel’ ni ngad folwokgad riy ko piin ni ngaud chaggad ngorad. Am lemnag, mini’ e piin ni ma mel’egrad Jehovah ni ngar manged tafager rok?

12. Ba miti mang girdi’ e ma mel’eg Jehovah ni ngar manged fager rok?

¹² I yog Jehovah e “fager rog” ngak Abraham. (Isa. 41:8) Ya ir be’ nib yul’yul’, mab mat’aw, ma ma fol rok Got. (Jas. 2:21-23) Ireram e miti girdi’ ni ma mel’eg Jehovah ni ngar manged fager rok. Ere, faanra er rogon Jehovah, me ere thingar ki er rogodad ni ngkud fal’eged i mel’eg e piin ni ngar manged fager rodad, ya nge yog nda pacheged gadad ngak e piin ni yad ba gonop me yog e gonop ngodad.

13. Mang e ra ayuwegdad ni ngad mel’eged e fager nib fel’?

¹³ Mang e ra ayuwegem ni ngam mel’eg e fager nib fel’? Ga ra beeg e Bible ma boor ban’en riy nra ayuwegem. Am lemnag feni rib fel’ e fager ku Ruth nge Naomi ni chitiningin e pumoon rok, nge David nge Jonathan, nge Timothy nge Paul. (Ruth 1:16, 17; 1 Sam. 23:16-18; Fil. 2:19-22) Rib fel’ e fager ko pi cha’ ney ni bochan e be tor nga daken e t’ufeg rorad ngak Jehovah. Rayog ni ngam pirieg boch e fager nib t’uf Jehovah rorad ni bod gur? Dab mu pagtalin nu lan e ulung e rayog ni ngam pirieg e mit ney e fager riy. Fager ni aray rogon e dab ra waliyed gur ngam rin’ ban’en ni dabun Jehovah, ya yad ra ayuwegem ni nguum fol rok Jehovah, me chugur e tha’ u thilmew, mag ngongol nib puluw nga rogon ni be pow’iyem gelngin nib thothup. (Mu beeg e Galatia 6:7, 8a.) Yad ra ayuwegem ni ngam par ni gab t’uf rok Got.

Ngan Ta’ fan e Piin ni Yad Ma Yog e Thin u Lan e Ulung

14. Mang boch ban’en ni ma mo’maw’nag ngodad ni ngad ted fan e piin ni yad ma yog e thin?

¹⁴ Bin l’agruw e kanawo’ ni ngad daged ngak Jehovah nriyul’ nib t’uf rodad e ngad ted fan e piin ni yad ma yog e thin u lan e ulung. Mang fan ni yu ngiyal’ e ba mo’maw’ ni ngad folgad? Reb e bochan ni pi girdi’ ney e dawor ra flontgad. Ma reb e ku er rogodad ndawor da flontgad ere ba mom ni ngaud togopuluwgad.

15, 16. (a) Mang nib ga’ fan ni ngaud ted fan e piin ni ke tayrad Jehovah ni nguur ayuweged e girdi’ rok? (b) Mang e gad ra fil ko togopuluw ni tay piyu Israel ngak Moses?

¹⁵ Sana ra lungum, ‘Mang fan nib mo’maw’ ni ngan tayfan e piin ni yad ma yog e thin, ma ngan rin’?’ Fulweg ko re deer ney e bay rogon ko fare deer ni sum u murung’agen e en ni bay mat’awun ni nge gagiyegnag gubin ban’en. Mini’ e ga ra mel’eg ni nge mang pilung rom? Faanra Jehovah, mab t’uf ni ngam tayfan e piin ni yad ma yog e thin. Ga be lemnag, ma rayog ni nga dogned ni Jehovah e pilung rodad ni faanra darud ted fan e piin ni yad ma yog e thin u lan e ulung? Ba ga’ ni ma gagiyeg Jehovah u daken e girdi’ ndawor ra flontgad ni ke tayrad ni nguur ayuweged e girdi’ rok. Ere, faan gad ra togopuluw ngorad, ma gur, uw rogon u wan’ Jehovah?​—Mu beeg e 1 Thessalonika 5:12, 13.

¹⁶ Bod nnap’an ni i gun’gun’ piyu Israel nib togopuluw ngak Moses kakrom, mi ri damumuw Jehovah ngorad ya ra yan i aw ni ir e yad be togopuluw ngak. (Num. 14:26, 27) Jehovah e dawori thil, ere faan gad ra togopuluw ko piin ni yad ma yog e thin u lan e ulung, ma aram e gad be togopuluw ngak!

17. Susun ni nge uw rogon e ngongol rodad ngak e piin ni yad ma yog e thin u lan e ulung?

¹⁷ Ke yog apostal Paul rogon nthingar ud ngongolgad ngak e piin ni yad ma ayuweg e ulung ni gaar: “Mu folgad ko thin rok e piin ni yad be yog e thin romed. Ya yad be matanagiy lanin’med ndarir talgad, ni bochan e thingar rogned ngak Got rogon e maruwel rok ni ur ngongliyed. Ya faan gimed ra fol rorad ma ra ur ngongliyed e maruwel rorad nib felan’rad ngay; ya faanra dangay ma bay ur ngongliyed nib taganan’rad, ma aram e dabi fel’ rogomed riy.” (Heb. 13:17) Ere, thingar da athamgilgad ya nge yog ni nguud folgad ma gad sumunguy ngorad. Dab da paged talin ni gad be gay rogon ni ngad pired ni gad ba t’uf rok Got. Ere rib ga’ fan ni ngad gayed rogon ni nguud folgad rorad.

Mpar ni Gab Beech u P’eowchen Jehovah

18. Mang fan ni baadag Jehovah ni nguud pired ni gad ba beech?

¹⁸ Bin dalip e kanawo’ ni ngad daged ngak Jehovah nriyul’ nib t’uf rodad e ngad gayed rogon ni ngad pired ni gad ba beech u p’eowchen. Piin gallabthir e yad ma gay rogon ni nga i par e bitir rorad nib beech. Mang fan? Ya, faanra i par reb e bitir nib beech ma ra mo’maw’ ni nge yib e m’ar ngak. Maku reb e ra fel’ thin e gallabthir, ya yira nang ni yow ma t’ufeg ma yow ma tayewan’row ko bitir rorow. Ku arrogon Jehovah ni baadag ni ngad pired ni gadad ba beech. Manang ni faanra ud pired ni gad ba beech ma ra fel’ rogodad ko tirok ban’en ma gad ra felfelan’. Ku manang Jehovah ni bay rogon ngak, ya faanra i guydad e girdi’ ni gad ba beech ma gad ba thil ko girdi’ nu fayleng ma yad ra adag ni ngar uned ko pigpig ngak Jehovah.

19. Uw rogon ni kad nanged nib ga’ fan ni ngad pired ni gad ba beech?

¹⁹ Mang boch ban’en ni ngad beechgad riy? Gubin ban’en. Kakrom u Israel, e tamilangnag Jehovah ko girdi’ rok ni thingar ra beechgad u gubin ban’en. (Lev. 15:31) Fare Motochiyel nni pi’ ngak Moses e kub muun ngay boch e motochiyel u murung’agen rogon i k’eyag e magangan, nge rogon ni nge par e dabiy nib beech, nge rogon i luknag paay, nge rifrif u ey, nge mad. (Ex. 30:17-21; Lev. 11:32; Num. 19:17-20; Deut. 23:13, 14) Pi n’ey e i puguran ngak piyu Israel ni Jehovah ni Got rorad e reb e Got nib ‘beech,’ mab ‘machalbog,’ mab ‘thothup.’ Ere piin ni yad ma pigpig ngak e thingar ra pired ni yad ba thothup.​—Mu beeg e Levitikus 11:44, 45.

20. Mang boch e kanawo’ ni ngad pired ni gad ba beech riy?

²⁰ Thingari beech lanin’dad nge wuru’ i dowdad. Gad ma fol ko pi motochiyel rok Jehovah u rogon ni nge fel’ e ngongol rodad ni yugu aram rogon ni girdi’ ko re fayleng ney e dakuriy fan yalen e par ko pumoon nge ppin u wan’rad. Bin th’abi ga’ fan e nge par e liyor rodad nib machalbog ndariy ban’en ko pi yurba’ i teliw ni googsur ni nge magawonnag. Dabda paged talin fare ginang ni bay ko Isaiah 52:11, BT ni gaar: “Gimed urngin e piin gimed be fek mam’en e Tempel, mu chuwgad u Babylon ni ka chingiyal’ ney! Dab mmathgad nga ban’en ni ke yog e motochiyel ndab mmathgad ngay.” Arrogodad e ngiyal’ ney ni gad ma par nib gad ba beech ko tirok Got ma darud uned nga ban’en ni bay rogon ko liyor ni googsur. Aram fan ni darud uned ko pi madnom ni ma madnomnag e pi yurba’ i teliw ni googsur nge boch e rran ni ma madnomnag e fayleng e ngiyal’ ney. Riyul’ ni gathi ban’en nib mom ni ngad pired ni gad ba beech. Machane ireray ban’en ni ma athamgil e girdi’ rok Jehovah ni ngar rin’ed ya ra ayuwegrad ni nguur pired ni yad ba t’uf rok Got.

21. Uw rogon ni nguud pired ni gad ba t’uf rok Jehovah?

²¹ Baadag Jehovah ni nguud pired ni gad ba t’uf rok. Machane, thingari bagadad me gay rogon ni nga i par nib t’uf rok Got. Rayog ni ngad rin’ed e re n’ey ni faan gad ra folwok rok Jesus ma gad micheg ngak Jehovah nrib t’uf rodad ni aram e nguud folgad ko pi motochiyel Rok. Faan gad ra rin’ e re n’ey ma dariy ban’en nra “daregdad u rogon ni gadad ba t’uf rok Got ni ke yog ngodad u daken Kristus Jesus ni ir e Somol rodad.”​—Rom. 8:38, 39.

[Footnote]

Ka Ga Manang?

• Uw rogon nra ayuwegdad e nangan’ rodad ni nguud pired ni gad ba t’uf rok Got?

• Mang fan ni ngad t’ufeged e piin ni yad ba t’uf rok Jehovah?

• Mang fan ni nguud ted fan e piin ni yad ma yog e thin?

• Uw feni ga’ fan u wan’ e girdi’ rok Got ni nguur pired ni yad ba beech?

[Picture on page 28]

“Faan gimed ra fol ko tin ni kug ning chilen ngomed, ma gimed ra par ni gimed ba t’uf rog, ni bod rogon ni kug fol ko tin ni ning e Chitamag chilen ngog gu be par ni ku gub t’uf rok”