Ga Ma Pag Got ni Nge Non Ngom ni Gubin e Rran?
UW URNGIN yay ni ga ma yaliy yaam nga therek? Yooren i gadad e ra reb e rran ma boor yay ni ke guy yaan nga therek. Mang fan? Bochan e ba ga’ fan yaadad u wan’dad.
Ga ra beeg e Bible ma bod ni ga be yaliy yaam nga therek. (James 1:23-25) Bay gelngin e thin nu Bible ya ra ayuwegdad ngad nanged e bin nriyul’ i rarogodad. Ma ma “yan i taw nga fithik’ i lanin’dad ko n’en ni gadad be lemnag.” (Hebrews 4:12) Re n’ey e be yip’ fan ni thin nu Bible e rayog ni nge dag e n’en nriyul’ ni bay u lanin’dad. Maku rayog ni nge ayuwegdad ngad nanged e n’en nib t’uf ni ngad thilyeged u rarogodad, ni bod e therek ni gad ma yaliy yaadad ngay.
Bible e gathi kemus ni ma ayuwegdad ngad nanged e n’en nib t’uf ni ngad thilyeged u rarogodad, ya ku ra ayuwegdad ni ngad thilyeged e pi n’en nib t’uf ni ngad thilyeged. I yoloy apostal Paul ni gaar: “Urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoloyed nga babyor, me ir e ba ga’ fan ya ma fil e tin nib riyul’ e thin ngodad, ma be yal’uweg e tin ni be oloboch e girdi’ riy, ma be fulweg e girdi’ ko ngongol nib fel’, ma be fonownag e girdi’ u rogon e ngongol ni ngar pired riy ni ir e mmat’aw u mit Got.” (2 Timothy 3:16, 17) Mu tay fanam i yan u aningeg ban’en ni kan tamilangnag u roy, ma dalip riy e aram e ma yal’uweg e tin ni ma oloboch e girdi’ riy, ma ma fulweg e girdi’ ko ngongol nib fel’, ma ma fonownag e girdi’ u rogon e ngongol ni ngar pared riy nib muun boch ban’en ngay nib t’uf ni ngar thilyeged ko ngongol rodad. Ere, faanra gubin e rran ni gad ma yaliy yaadad nga therek, me ere Thin Rok Got u Bible e thingar ud beeged ni gubin e rran!
Nap’an ni kan dugliy Joshua ni nge pow’iy fare nam nu Israel, me yog Jehovah ngak ni gaar: “Thingari dab mu pagtalin fare babyor ko Motochiyel, thingar um fil ni rran nge nep’, ma ngam guy rogon nguum rin’ urngin ban’en ni ba’ riy ni kan yoloy. Ma pi n’en ni ga ra lemnag ngam dugliy e ra fel’, ma yira rin’ ma ra yan i fel’.” (Joshua 1:8) Riyul’ ni thingari beeg Joshua e Thin Rok Got ni “rran nge nep’” ni aram e gubin e rran.
Bin som’on e psalm e ku be tamilangnag angin e fol Bible u gubin e rran ni gaar: “Ba felan’ e cha’ ni ma siyeg ni nge fol ko fonow rok e girdi’ nib kireb, ma der folwok ko tin ni be ngongliy e piin ni tadenen, ara chag ngak e piin ni yad ma moningnag Got. Ma ra beeg e motochiyel rok Somol ma ma yib e felfelan’ riy ngak, ma ku aram rogon ni ra beeg ni rran nge nep’ ni bochan e nge nang fan. Ir e bod ba gek’iy ni ke tugul u tooben ba lul’; gubin ngiyal’ ni ma k’uf ko ngiyal’ nra taw ngay ni nge k’uf, ma der mororoy yuwan. Urngin e tin ni ma ngongliy e ma yan i aw nib fel’.” (Psalm 1:1-3) Riyul’ ni gad gubin ni gad baadag ni ngad boded facha’ ni kan weliy murung’agen u roy.
Boor e girdi’ ni kar mechameged ngorad ni ngaur beeged e Bible ni gubin e rran. Reb e Kristiano e nap’an nni fith ngak ko mang fan ni ma beeg e Bible ni gubin e rran, me gaar: “Faanra gubin ngiyal’ ni gu ma meybil ngak Got ya gu baadag ni nge motoyil ngog, me ere mang fan ndab gu beeg e Thin Rok ni gubin e rran nggu motoyil ngak? Faanra ngad manged fager nib fel’, ma gathi goo gadad e ngaud nonad ni gubin ngiyal’.” Riyul’ e n’en ni ke yog, ya faanra ud beeged e Bible ma bod ni gad be motoyil ngak Got ni bochan e rayog ni ngad nanged rogon laniyan’ u gubin ban’en.
Magawon ni Yira Mada’nag
Sana ga ma gay rogon ni ngaum beeg e Bible rom ni gubin e rran. Ere, kam beeg ni ga’ngin, fa? Ireray reb e kanawo’ nib fel’ nrayog ni ngam nang e n’en ni bay u Bible. Machane, boch e girdi’ e boor yay ni kar gayed rogon ni ngar beeged e Bible ni ga’ngin, ma faani munmun mi yad tal. Ka a buch rom ni aray rogon, fa? Mang e rayog ni ngam rin’ me yog nim beeg e Bible ni ga’ngin? Mang ndab mu gay rogon e gali kanawo’ ni baaray?
Mu uneg e beeg Bible ko pi n’en ni ga ma rin’ u gubin e rran. Mu mel’eg ba ngiyal’ u gubin e rran nrayog ni ngam beeg e Bible rom. Mu kum tay ba ngiyal’ ni faanra de m’ag ma aram e ngiyal’ ni ngam beeg riy ya nge dabi yan reb e rran ni dam beeg e Thin Rok Got. Faan ga ra rin’ ni aray rogon ma aram e ga be fol ko n’en ni rin’ piyu Beroea kakrom. Ke weliy e Bible murung’agrad ni gaar: “Mi yad motoyil ko thin rok Got ni kar uthumed telrad ngay, ma gubin e rran ni ur gayed u lan e babyor nib thothup ni ngar guyed ko riyul’ e tin ni ke yog Paul fa.”−Acts 17:11.
Mu nameg ban’en. Faanra ga ma beeg dalip i yan ko lal e guruy u lan e Bible u gubin e rran, ma rayog ni ngam beeg e Bible ni polo’ u lan reb e duw. Ere mang ndab mu gay rogon ni ngam rin’ ni aray rogon?
Machane, nap’an ni ga ra beeg ni ga’ngin, ma dab mu tal u rom ya rayog ni ngam sul ngkum beeg bayay. Maku rayog ni ngam thilthilyeg e gin ni ngaum tabab i beeg riy. Ma reb e faanra ga baadag ni ngam beeg ni buchuuw ma buchuuw, ma rayog ni ngam beeg taareb i yan ko l’agruw e guruy u gubin e rran.
Gubin ngiyal’ ni ga ra beeg, ma ga ra pirieg boch ban’en nib beech nra ayuwegem ni kub muun ngay boch ban’en ni dam pirieg riy kafram. Boor ban’en ni be thil u lan e re fayleng ney, maku arrogon e yafas rodad nge rarogon e par rodad. Ere, mu dugliy ni ngaum beeg e Thin Rok Got u Bible ni gubin e rran. Faan ga ra rin’ ni aray rogon ma aram e ga be pag ni nge non Got ngom ni gubin e rran.—Psalm 16:8.
[Picture on page 12]
Rayog ni ngam tay ba ngiyal’ u gubin e rran ni ngam beeg e Bible, fa?