“Nga Yug Kug Unum Taareb”

ALLEN e tabab ko unum u nap’an ni ke gaman 11 e duw rok.a Yad ma fafel e pi fager rok u magerger ni yad be yan u yaan boch e girdi’ ni yad ma guy u kachido. Pi kachido nem e de riyul’, machane rrum ni yad be unum e riyul’.

Tony e nap’an ni gaman 40 e duw rok ma ke yoor boch e n’en ni ma unum. Som’on e ma unum taareb fa l’agruw me munmun me yan ko lal nge nel’. Me tomur riy ma daki nang urngin ni be unum u reb e rran.

Allen e gay be’ ni nge ayuweg ko magawon rok, me Tony e dabun ni ngan ayuweg. Ka bay Allen ndawori yim’ nrayog ni nge weliy e n’en ni buch rok, machane Tony e ke yan in e duw ni ke yim’ ni maad’ad u otobay ni bochan e ba chingaw.

Yugu aram rogon ni be chingaw be’ ni goo ir, machane wenegan nra yib ngak e ku ra l’ag boch e girdi’ ngay. Chingaw e aram kenggin e cham ni ma tay e girdi’, nge thin ni kireb ni yima yog, nge ngan li’ be’ nge maad’ad fe yim’, nge maad’ad u karrow ngu taban e maruwel, nge ku boch e m’ar. Ra reb e duw ma bokum bilyon e dolla ni kan n’ag ko biya, nge rrum, nge ku boch ban’en ni yima chingnag ngay, ngki chag ko magawon ni be tay e tabinaw nge girdi’ riy.

I yog fare U.S. National Institutes of Health ni gaar: “Gathi gubin e girdi’ ni ma unum ni gubin e rran e bay e magawon rok ko chingaw, ma gathi gubin e girdi’ ni bay e magawon rok ko chingaw e ma unum ni gubin e rran.” Boor e girdi’ nda immoy e magawon rorad ko chingaw e yad be unum nge pag rogon ndarur nanged. Ma boch e girdi’ e fin munmun mi yad unum, machane faan yad ra unum mi yad unum nge pag rogon.

Faanra ga baadag ni ngam unum ban’en ni yira chingaw ngay, ma uw rogon ma kaygi yoor? Uw rogon mag nang ndab kum unum taareb? (Proverbs 23:29, 30) Tin migid e thin e be weliy boch ban’en nra ayuwegey.

[Footnote]