Mman u Kanawoen Gelngin Got nib Thothup Mag Rin’ e N’en ni Kam Micheg
“Machane gu be yog ngomed ni be lungug, um marod u kanawoen gelngin Got nib thothup ma aram e dab um marod nga ar’aren lanin’med.”—GAL. 5:16, NW.
1. Uw rogon e taufe nni tay ko rofen ni Pentekost?
NAP’AN e Pentekost ko duw ni 33, me non pi gachalpen Jesus ni lungun boch e nam u tomuren ni kan taufenagrad nga gelngin Got nib thothup. Ma aram me yog e tow’ath ngorad ni yib u gelngin nib thothup. (1 Kor. 12:4-10) Mang angin e re tow’ath nem nge fare welthin ni pi’ apostal Peter? Boor i yad e ‘yib e marus ngak.’ Nap’an e non Peter ngorad, ma aram mar kalgadngan’rad ngar uned ko taufe. Be gaar e Bible: “Boor i yad e mich u wan’ e thin ni ke weliy ngorad, ma aram min taufenagrad; gonap’an e dalip i biyu’ e girdi’ ni mun ko re ulung rorad nem e chirofen nem.” (Acts 2:22, 36-41) Ere ba mudugil ni kan taufenagrad nga fithingan e Chitamangiy, nge Fak nge gelngin Got nib thothup, ni bod rogon ni yog Jesus ni ngan rin’.—Matt. 28:19.
2, 3. (a) Mog e n’en nib thil u thilin e taufe nga gelngin Got nib thothup nge taufe nga fithingan gelngin Got nib thothup. (b) Mang fan nthingar ni taufenag e tin riyul’ e Kristiano e ngiyal’ ney?
2 Ere gur, bay ban’en nib thil u thilin e taufe nga gelngin Got nib thothup nge taufe nga fithingan gelngin Got nib thothup? Bay, ya piin ni kan taufenagrad nga gelngin Got nib thothup e kan gargelnagrad bayay ma kar manged pi fak Got. (John 3:3) Pi girdi’ ney e kan dugliyrad ni ngar manged pilung nge prist u Gil’ilungun Got u tharmiy, ma yad bang u downgin Kristus. (1 Kor. 12:13; Gal. 3:27; Rev. 20:6) Ere aray e n’en ni rin’ Jehovah ko rofen ni Pentekost, mu tomuren me mel’eg boch e girdi’ ni ngar uned ngak Jesus ko gagiyeg. (Rom. 8:15-17) Ere uw rogon e taufe ko ran ni kan rin’ u fithingan gelngin Got nib thothup, ni aram ban’en ni yima rin’ u gubin e assembly nge convention ni ma tay e girdi’ rok Jehovah e ngiyal’ ney?
3 Tin riyul’ e Kristiano e yima taufenagrad ko ran ni aram e mich riy ni kar ognaged yad ngak Jehovah Got. Ku aram rogon e piin ni yad ra un nga tharmiy. Machane piin ni yad be athapeg e yafas ni manemus u fayleng e thingar kun taufenagrad ko ran. Ere demtrug ko athap rok be’ e nge yan nga tharmiy fa nge par u fayleng, machane thingar ni taufenag ko ran u daken “fithingan e Chitamangiy nge Fak nge gelngin Got nib thothup” ya nge yog ni fel’ facha’ u wan Got. Ma gubin e Kristiano ni kan taufenagrad ni aray rogon e thingar u “ranod u kanawoen gelngin Got nib thothup.” (Mu beeg e Galatia 5:16, NW.a) Ere ga be yan u kanawoen gelngin Got nib thothup ma ga be rin’ e n’en ni kam micheg ngak Got, fa?
N’en ni Be Yip’ Fan ni Ngaun Yan u “Kanawoen Gelngin Got nib Thothup”
4. Mang e be yip’ fan ni ngaun yan u “kanawoen gelngin Got nib thothup”?
4 Ngam man u “kanawoen gelngin Got nib thothup” e be yip’ fan ni thingar mu pag gelngin Got nib thothup ni nge gagiyegnigem ni gubin ngiyal’. Ke tamilangnag e Galatia ko guruy ni 5 e n’en nib thil ko ngan pag gelngin Got nge gagiyegnagey nge ngan pag ar’aren lanin’uy nge gagiyegnagey.—Mu beeg e Galatia 5:17, 18.
5. Faanra nga i gagiyegnigem gelngin Got nib thothup, ma mang boch e ngongol ni ngam palog riy?
5 Faanra gelngin Got nib thothup e be gagiyegnigem, ma ra um gay rogon ni ngam palog ko tin ni ma ar’arnag e dowef. Pi n’en nib muun ngay e aram e “ngongol ni darngal, nge ngongol ni golong, nge ngongol ni puwlag; nge ta’fan nge meybil ngak e liyos ni ma meybil boch e girdi’ ngay, nge pig; nge tathil ni be tay e girdi’, nge cham ni yad be tay, nge awan’, nge damumuw, nge athamgiliy ban’en ni fan e gur faanem e nga nog e sorok ngom. Ma yad be wer ngar yuraba’gad ara ra yuulunggad; ma yad ba chogow, ma yad be balyang ko rrum, ma yad be ngongliy e mur ni yibe wagagey u fithik’, ma yad be rin’ boch ban’en ni bod e tiney.” (Gal. 5:19-21) Faan ga ra palog ko pi ngongol ney, ma bod ni kam ‘li’ ngem e ngongol rom nib denen’ nga gelngin Got nib thothup. (Rom. 8:5, 13) Re n’ey e ra ayuwegem ni ngam palog ko pi n’en ni ma ar’arnag e dowef ya nge yog ni um lemnag e pi n’en ni bay rogon nga gelngin Got nib thothup mag pag nge gagiyegnigem.
6. Mog ko mang e ba t’uf ni ngam rin’ me m’ug wom’engin gelngin Got nib thothup ko ngongol rom.
6 Faanra i gagiyegnigem gelngin Got nib thothup ma aram e ra m’ug [“wom’engin gelngin Got nib thothup,” NW] ko ngongol rom. (Gal. 5:22, 23) Machane, re n’ey e be dag ni thingar kum athamgil ni ngam rin’ ban’en. Bod rogon reb e tamilay’ ni ke ngongliy e milay’ rok mab t’uf raen e yal’ nge ran ya nge yog ni ga’ e woldug rok me yib wom’engin. Gelngin Got nib thothup e taareb rogon nga raen e yal’. Ba t’uf rodad ya nge yog ni m’ug wom’engin ko ngongol rodad. Machane mang e ra yib ni faanra dabi maruwel fare tamilay’ nib gel? (Prov. 10:4) Rogon ni ga be suguy lanin’um ko tin nib fel’ e ir e be gagiyegnag rogon nra m’ug wom’engin gelngin Got nib thothup ko ngongol rom. Ere ngam fithem, ‘Gu ma pag gelngin Got nib thothup nge gagiyegnigeg ya nge yog ni m’ug wom’engin ko ngongol rog, fa?’
7. Faanra ga baadag ni nge m’ug wom’engin gelngin Got nib thothup ko ngongol rom, ma mang nrib ga’ fan ni ngaum fil e thin rok Got mu um fal’eg i lemnag?
7 Pi tamilay’ e faanra nge yib wom’engin e woldug rorad nib fel’ mab t’uf ni ngar rannaged. Ere faanra nge m’ug wom’engin gelngin Got nib thothup ko ngongol rom mab t’uf ni ngam rannagem ko tin riyul’ ni yira pirieg u lan e Bible ngu lan e ulung ni Kristiano. (Isa. 55:1) Dabisiy ni boor e girdi’ ni kan tamilangnag ngorad ni gubin e thin nu Bible e ni yoloy u daken gelngin Got nib thothup. (2 Tim. 3:16) Ma fare tapigpig nib yul’yul’ mab gonop e ku boor ban’en ni yad be tamilangnag ngodad ko thin riyul’ u Bible. (Matt. 24:45-47) Ere ba tamilang e n’en ni gad be weliy u roy, ni aram e faanra nga i gagiyegnagdad gelngin Got nib thothup ma thingar ud beeged e Thin rok Got mu ud fal’eged i lemnag. Faanra ga be rin’ ni aram rogon ma aram e ga be folwok rok e pi profet kakrom ni faan ur fal’eged i “gayiy” murung’agen e thin riyul’ rok Got. Maku arrogon e pi engel ni yad baadag ni ngar nanged e tin riyul’ u murung’agen fa en Fak ni kan micheg nge fare ulung ni Kristiano ni kan dugliyrad.—Mu beeg e 1 Peter 1:10-12.
Uw Rogon ni Nge Gagiyegnagdad Gelngin Got nib Thothup?
8. Mang nib ga’ fan ni ngam ning gelngin Jehovah nib thothup?
8 Gathi kemus ni ngaud beeged e Bible ma gad be fal’eg i lemnag, ya kub t’uf ni ngad ninged e ayuw ngak Jehovah ni nge pow’iydad. Rayog rok Jehovah ni nge “muruwliy u daken fare n’en ni gelngin ni ku ir e be maruwel u fithik’dad.” (Efe. 3:20; Luke 11:13) Machane mang e ga ra yog ni faanra fithem be’ ni gaar, “Mang fan ni ngaug ning ni faanra manang e n’en nib t’uf rog ‘u m’on ni dawor ning ngak’?” (Matt. 6:8) Reb riy e faanra um ning gelngin Got nib thothup u lan e meybil rom ma aram e ga be dag ni ga be taga’ ngak Jehovah. Bod ni faanra ning be’ e ayuw ngom, mab mudugil ni ga ra rin’ e tin rayog rom ni ngam ayuweg ni bochan e ke yib i ning e ayuw ngom ma ga be guy ni be pagan’ ngom. (Mu taarebrogonnag ko Proverbs 3:27.) Ere ku arrogon Jehovah nib felfelan’ ngay ni ngam ning gelngin nib thothup mab mudugil nra pi’ ngom.—Prov. 15:8.
9. Faanra ud uned ko muulung ni gubin ngiyal’ ma uw rogon nra ayuwegdad nge yog ni i gagiyegnagdad gelngin Got nib thothup?
9 Ku reb e kanawo’ ni rayog ni nge pow’iydad gelngin Got nib thothup e ba muun ngay e pi muulung, nge assembly, nge convention. Rib ga’ fan ni ngaud athamgilgad ngaud uned ko pi muulung ney ni gubin ngiyal’ ma gad be motoyil nib fel’ rogon. Faan gad ra rin’ ni aray rogon ma ra ayuwegdad ni ngad nanged fan e ‘tirok Got ban’en nib toar fan.’ (1 Kor. 2:10, NW) Kub ga’ angin e pi fulweg ni gad ma pi’ u nap’an e muulung. Am sul ngam lemnag e muulung ni kam un ngay u lan fa aningeg i wik ni ke yan. Uw urngin yay ni kam pi’ e fulweg ma kam weliy e michan’ rom? Ga be guy ma ka bay boch ban’en nib t’uf ni ngam mon’og riy, fa? Faanra arrogon ma ga lemnag rogon nrayog ni ngam mon’og. Ra guyem Jehovah ni ga be athamgil ma rra pi’ gelngin nib thothup nge ayuwegem nge yog ni yoor ban’en ni ngam fil u nap’an e muulung.
10. Ra nga u darod u kanawoen gelngin Got nib thothup ma mang e ngad rin’ed?
10 Ra nga u darod u kanawoen gelngin Got nib thothup mab muun ngay ni ngad rin’ed e n’en ni bay ko Revelation 22:17 ni gaar: ‘Gelngin nib thothup nge fare pin ni nge mabgol e lungurow, “Moy!” Urngin e girdi’ ni yad ra rung’ag e re bugithin ney e thingar ki lungurad, “Moy!” Moy i gur e en ni ke yib e belel ngom; ngam fek fare ran ko yafos nib tow’ath ni yira pi’ ngak e en ni ba adag ni nge yog ngak.’ Be maruwel e re gelngin ney u daken fare ulung ni kan dugliyrad ma yad e yad be pining e girdi’ ni ngar unumed e re ran ko yafos ney. Ere faanra ke m’agan’um ngay ni nga ‘mub!’ ma rayog ni nge lungum, “Moy!” fa? Ba tow’ath e en ra un ko re maruwel ney ni ngan ayuweg e girdi’ nge yog e yafas ngorad.
11, 12. Uw rogon ni be pi’ gelngin Got nib thothup e ayuw ko fare maruwel ni machib?
11 Re maruwel ney nib ga’ fan e yibe rin’ e chiney u tan gelngin Got nib thothup. Kad beeged rogon ni i pi’ gelngin Got nib thothup e ayuw ko bin som’on e chibog ya nge yog ni nge yoor yang e gin ni ngan machib riy. Apostal Paul nge piin ni ur uned ngak e de pagrad gelngin Got nib thothup “ni ngar machibgad u lan e nug nu Asia”; maku de pagrad ni nga ranod nga Bithynia. Dada nanged ko mang fan nde pagrad gelngin Got nib thothup nga ranod ko pi binaw nem, machane ba tamilang ni pow’iy gelngin Got nib thothup Paul ni nge machib ko binaw ni bay u Europe. Mu kun pilyeg e changar rok Paul nge guy be’ nib moon ni be wenig ni ngan ayuweg.—Acts 16:6-10.
12 Ku arrogon e ngiyal’ ney ni gelngin Jehovah e ir e be pow’iy e machib ni yibe tay u ga’ngin yang e fayleng. Dakir pilyeg Got e changar ko pi tapigpig rok u daken e maang’ang, ni bochan e ngar nanged rogon ni ngar rin’ed e re maruwel ney; machane be pow’iy Jehovah girdien fachi ulung u daken gelngin nib thothup. Maku re gelngin nem e ir e be k’aring e pi walag ni Kristiano ni ngar machibgad ma yad be fil e Bible ko girdi’ nib mus rogorad riy. Ma dariy e maruwar riy ni ga be un i rin’ e re maruwel ney. Ere gur, rayog ni nge gel boch e felfelan’ ni ga be tay ko re maruwel ney?
13. Uw rogon ni ngam pag gelngin Got nib thothup ni nge pow’iyem? Mu weliy.
13 Rayog ni ngam pag gelngin Got nib thothup nge pow’iyem ni aram e ngaum fol ko pi fonow ni yibe pi’ ni fan ko girdi’ rok Got. Mu lemnag e n’en ni rin’ Mihoko ni ir reb e fel’ yangaren nu Sapan. Bochan ni ka fini un ko pioneer ma ke lemnag ndabiyog rok ni nga i sul ngak e girdi’ ni ke mada’nag u nap’an e machib. Ki lemnag ndabi nang rogon ni nge weliy ban’en nra adag be’ ni nge motoyil ngay. De n’uw nap’an min ngongliy reb e Machib ko Gil’ilungun ni be weliy rogon ni ngan sul ngak be’ ni kan mada’nag u nap’an e machib, ngemu’ mu kun ngongliy reb e babyor ni kenggin e A Satisfying Life—How to Attain It. Re babyor ney e ri yib angin ko machib ni un tay u Sapan. Ke fol Mihoko ko fonow ni bay ko re babyor nem ni be weliy rogon ni ngan sul ngak e girdi’. Ma aram ma de n’uw nap’an me tabab i fil e Bible ngak boch e girdi’ ndubrad e machib kafram. Ke yog ni gaar, “Ri boor e girdi’ ni ug fil e Bible ngak, nra bayay ma 12 me munmun ma dakiyog ni nggu fil e Bible ngorad ni yad gubin, ere ku gog ngak boch i yad ni nge son!” Ere faan ga ra yan u kanawoen gelngin Got nib thothup mag fol ko pi fonow ni be pi’ ngak e pi tapigpig rok Jehovah ma rayog nim t’ar wom’engin nib fel’.
Ngam Taga’ nga Daken Gelngin Got nib Thothup
14, 15. (a) Uw rogon me yog ni ngad rin’ed e n’en ni kad micheged ngak Got? (b) Uw rogon ni ngam pirieg e tin th’abi fel’ e fager?
14 Thingar mu machib ni bochan e gur reb e tamachib. (Rom. 10:14) Sana ga be lemnag ni dabiyog rom ni ngam rin’ e re n’ey. Machane taareb rogom ko fachi ulung ni Got e ir e ra mel’egem ni ngam un i rin’ e re maruwel ney. (Mu beeg e 2 Korinth 3:5.) Rayog ni ngam rin’ e tin kam micheg ngak Got ni aram e ngam rin’ e tin ni rayog rom mag taga’ nga daken gelngin Got nib thothup.
15 Machane de mom ni ngad ted u gil’ e n’en ni kad micheged ngak Jehovah Got ni bochan e dawor da flontgad. Reb i fan nib mo’maw’ e bochan ni piin ni ud chaggad ngorad kafram e ke balyangan’rad nga rogon e ngongol rodad e chiney ma yad be ‘yog e thin nib kireb ngodad.’ (1 Pet. 4:4) Machane dab mu pagtalin ni ke yog l’agruw e fager ngom nib fel’ ni aram Jehovah nge Jesus Kristus. (Mu beeg e James 2:21-23.) Kub ga’ fan ni ngam nang e pi walag u lan e ulung ya yad ba muun ko piin “ni gimed ni ke mich Got u wan’rad” u ga’ngin yang e fayleng. (1 Pet. 2:17; Prov. 17:17) Ra ayuwegem Jehovah u daken gelngin nib thothup ni nge yog e fager ngom nrayog ni ngar pied e athamgil nga lanin’um.
16. Mang fan nrayog ni nge ‘fel’ u wan’um e meewar’ ni bod Paul?
16 Yugu aram rogon ni boor e fager rom u lan e ulung, machane ku rayog ni ngam pirieg ni bay yu ngiyal’ nib mo’maw’ ni ngam pithig e magawon rom. Ere rayog ni nge k’aring e magawon e mochuch ngom nib gel ngam par ni gowa dakuriy gelngim. Aram e ngiyal’ ni ngam ning gelngin Jehovah nib thothup ni nge ayuwegem. I yoloy apostal Paul ni gaar: “Ya ngiyal’ ni gub meewar, e aram e ngiyal’ ni gub gel.” (Mu beeg e 2 Korinth 4:7-10; 12:10.) Manang Paul nrayog ni nge ayuweg gelngin Got e girdi’ ko pi meewar rorad ni demtrug ko mang. Aram fan ni ga ra thamiy ni kam meewar mab t’uf e ayuw rom ma rayog ni nge ayuwegem gelngin Got nib thothup. I yog Paul nrayog ni nge ‘fel’ u wan’ e meewar.’ Nap’an nra meewar ma aram e ngiyal’ ni ma thamiy gelngin Got nib thothup ni be ayuweg, maku arrogon gur nrayog ni nge buch rom ni aray rogon!—Rom. 15:13.
17. Uw rogon nra ayuwegem gelngin Got nib thothup u nap’an ni ga be yan ko gin ni ga be nameg?
17 Ba t’uf rodad gelngin Got ni nge ayuwegdad ni ngad rin’ed e n’en ni kad micheged. Mu lemnag ni gur reb e gabitey u reb e barkow ni lay. Ga be nameg ni ngam pigpig ngak Jehovah ni dariy n’umngin nap’an. Gelngin Got nib thothup e taareb rogon ko nifeng ni ga be lek ya nge yog ni ngam taw ko gin ni ga be nameg. De fel’ ni ngam pag e re fayleng ney nge mang ir e i gagiyegnigem. (1 Kor. 2:12) N’en nib t’uf ni ngam rin’ e ngam sor ko gin ni ga manang ni dabi buch ban’en rom riy, ni aram e ngam lek gelngin Got nib thothup. Ra pow’iyem gelngin Got nib thothup u daken e Thin rok Got nge ulung rok ya nge yog ni ngam man ko bin nib mat’aw e kanawo’.
18. Mang e kam dugliy ni ngam rin’, ma mang fan?
18 Faanra gimed be fil e Pi mich Rok Jehovah e Bible u taabang, ma ga be chag ko pi walag machane dawor mu ognagem ngak Got ma dawor mu un ko taufe, ma ngam fithem ni nge lungum, ‘Mang ndab gu un ko taufe?’ Faanra kam nang rogon ni be maruwel gelngin Got nib thothup nge rogon ni be lebug e n’en nib m’agan’ Got ngay, ma ngam rin’ e n’en ni kam fil. Ya rra tow’athnagem Jehovah, ma ra pi’ gelngin nib thothup ni nge ayuwegem. Faanra ke n’uw nap’an ni kam un ko taufe ma dabisiy ni kam guy rogon e ayuw ni be pi’ gelngin Got nib thothup ngom. Ma rayog ni nge par ni aram rogon e chiney i yan nga m’on. Ere um man u kanawoen gelngin Got nib thothup.
[Footnote]
a Galatia 5:16 (NW): “Machane gu be yog ngomed ni be lungug, um marod u kanawoen gelngin Got nib thothup ma aram e dab um marod nga ar’aren lanin’med.”
Ka Ga Manang?
• Mang e be yip’ fan ni ngaun ‘yan u kanawoen gelngin Got nib thothup’?
• Mang e rayog ni nge ayuwegem ni ngaum man u “kanawoen gelngin Got nib thothup”?
• Uw rogon ni ngam tay u gil’ e n’en ni kam micheg ni ngam rin’?
[Picture on page 17]
Thingar mu athamgil ngam suguy lanin’um ko tin nib fel’
[Picture on page 19]
Ga be guy rogon e ayuw ni be pi’ gelngin Got nib thothup ngom?