Rogon ni Ma Lebguy Jehovah e Tin nib M’agan’ Ngay u Daken Gelngin nib Thothup

“Ku aram rogon e thin ni ma yib u l’ugunag ndabiyog ni nge dabi rin’ . . . urngin ban’en ni kug l’og ni nge rin’.”​—ISA. 55:11.

1. Mu weliy rogon e n’en nib thil u thilin e n’en ni kam dugliy ni ngam rin’ nge rogon ni kam dugliy ni ngam rin’ ban’en.

AM LEMNAG l’agruw e pumoon ni yow be fal’eg rogorow ni nga ranow ko milekag u karrow. Bagayow e yoloy e re pa’ i kanawo’ ni nge yan riy me taw ko gin ni be nameg. Ma bagayow e ba tamilangan’ ko gin ni nge sor ngay, maku boor pa’ e kanawo’ nib sor ko gin ni nge yan ngay ni manang. Ke fal’eg rogon nrayog ni nge thilyeg kanawoen ni faanra ke mada’nag boch e magawon. Ere n’en ni dugliy e gal pumoon ney ni ngar rin’ew e be dag e n’en nib thil u thilin e n’en ni kam dugliy ni ngam rin’ nge rogon ni kam dugliy ni ngam rin’ ban’en.

2, 3. (a) Mang e ba muun ko n’en nib m’agan’ Jehovah ngay? (b) Mang e rin’ Jehovah u nap’an ni denen Adam nge Efa? (c) Mang fan nib t’uf ni ngaud pared ma gad manang rogon ni be rin’ Got e tin nib m’agan’ ngay?

² Jehovah e de t’uf ni nge lemnag rogon ni nge lebguy e n’en nib m’agan’ ngay, ya ke mu’ i dugliy e n’en ni nge rin’, ma ra taw nga nap’an me rin’ nrogon ni ke dugliy. (Efe. 3:11) Ere, n’en nib m’agan’ Got ngay e ba muun ngay e n’en ni lemnag ni fan ko girdi’ nge fayleng ni aram e nge paradis e fayleng me par e girdi’ nib flont riy u fithik’ e gapas nge felfelan’. (Gen. 1:28) Nap’an ni denen Adam nge Efa, me rin’ Jehovah ban’en ni fan e nge lebguy e n’en nib m’agan’ ngay. (Mu beeg e Genesis 3:15.) I dugliy be’ nra yib ni owchen ara “fak,” fare pin rok u tharmiy nib fanathin ni ir e ra thang e en ni be k’aring e kireb ni aram Satan me sulweg urngin ban’en ni ke kirebnag nga rogon.​—Heb. 2:14; 1 John 3:8.

³ Dariy be’ ara ban’en u tharmiy ngu fayleng nrayog ni nge taleg Got ndab ki lebguy e n’en nib m’agan’ ngay. (Isa. 46:9-11) Mang fan nrayog ni nga dogned ni aray rogon? Bochan e ba l’ag rogon gelngin Jehovah nib thothup ngay. Re gelngin ney e ir e ma micheg nra “rin’” Got urngin ban’en nib m’agan’ ngay. (Isa. 55:10, 11) Aram fan nib t’uf ni ngad pared ma gad manang rogon ni be rin’ Got e tin nib m’agan’ ngay ma gad ngongol nib puluw ngay, ya athap rodad boch nga m’on e be yan u rogon ni be lebug e pi n’ey. Maku reb e, ra i gel e michan’ rodad ni faanra gubin ngiyal’ ma gad be guy rogon ni be maruwel Jehovah nga gelngin nib thothup. Ere, chiney e ngad weliyed e n’en ni i rin’ gelngin Got kakrom, nge n’en ni be rin’ e chiney, nge n’en ni bay fini rin’ boch nga m’on ni fan e nge lebguy e n’en nib m’agan’ Jehovah ngay.

Rogon ni i Maruwel Gelngin Got nib Thothup Kakrom

4. Uw rogon ni ke tamilangnag Jehovah e n’en nib m’agan’ ngay ni buchuuw ma buchuuw?

⁴ Kakrom e i tamilangnag Jehovah e n’en nib m’agan’ ngay ni buchuuw ma buchuuw. Som’on e dan nang ko mini’ e ra yan i mang faen owchen ni kan micheg ni bochan e kab “mith” ndawori tamilang. (1 Kor. 2:7) Ma sogonap’an 2,000 e duw nga tomuren mfini weliy Jehovah bayay murung’agen faen owchen ni kan micheg. (Mu beeg e Genesis 12:7; 22:15-18.) I micheg ban’en ngak Abraham nra lebug boch nga m’on. Fare bugithin ni “owchen” e be dag ni cha’nem e ra yib nib girdi’, maku ra yib ko tabinaw rok Abraham. Ere ba mudugil nnap’an ni yibe weliy e pi n’ey ma be motoyil Satan. Ma dariy e maruwar riy nri baadag ni nge kirebnag e piin ni yad ra yib ko tabinaw rok Abraham. Miki n’igin ni nge dabi lebug e n’en nib m’agan’ Jehovah ngay. Machane, dabiyog ni nge buch ni aram rogon ni bochan e bay gelngin Jehovah nib thothup ni be maruwel. Ni uw rogon?

5, 6. Uw rogon ni fanay Jehovah gelngin nib thothup ni nge ayuweg fare ganong nra yib owchen riy?

⁵ Ke fanay Jehovah gelngin nib thothup ni nge ayuweg fare ganong nra yib faen owchen riy. I yog ngak Abraham ni gaar: “I gag ba yoror ni nggu yoror rom.” (Gen. 15:1) Rib ga’ fan e thin ni yog ngak, ya am lemnag e n’en ni buch u bang ko 1919 B.C.E. u nap’an ni ke yan i par Abraham nge Sarah nga Gerar. I fek Abimelek ni Pilung nu Gerar Sarah ni ke lemnag ni nge leay ya de nang ni yow ba mabgol Abraham. Ere gur Satan e ke k’aring e re n’ey ya nge dabi yib owchen Abraham? Der yog e Bible. Kemus ni n’en ni be yog e taleg Jehovah ndabi buch e re n’em. I yog ngak Abimelek u malik’ay ndabi chugur ngak Sarah.​—Gen. 20:1-18.

⁶ Gathi kemus e ngiyal’ ni ayuweg Jehovah e tabinaw rok Abraham, ya boor yay. (Gen. 12:14-20; 14:13-20; 26:26-29) Aram fan nrayog ni nge yog e en ni yoloy e Psalm ni gaar: “Kam gagiyegnag e pan be tugul ni fan ngak e pi garbaw, ma kam gagiyegnag e woldug be tugul ni fan ngak e girdi’, ya nge yog ni yung e woldug rok, me ngongliy e wain nge pi’ e felfelan’ ngak, nge gapgep ko olive ni nge felan’ ngay, nge flowa ni nge pi’ gelngin.”​—Ps. 105:14, 15.

7. Uw rogon ni i ayuweg Jehovah fare nam nu Israel kakrom?

⁷ I fanay Jehovah gelngin nib thothup ni nge ayuweg fare nam nu Israel ni aram e gin nra yib faen owchen ni kan micheg riy. Mu daken gelngin nib thothup e ke pi’ e motochiyel riy ngak piyu Israel ni aram e n’en ni ayuweg e bin riyul’ e liyor miki ayuweg piyu Jew ni ngar pared ni yad ba beech, mab fel’ e ngongol rorad, mab machalbog e liyor rorad. (Ex. 31:18; 2 Kor. 3:3) Ma nap’an fapi Tapuf Oloboch ma ke pi’ Jehovah mat’awun boch e pumoon ni ngar ayuweged piyu Israel u pa’ e toogor rorad. (Judg. 3:9, 10) Nap’an e pi chibog u m’on nni gargeleg Jesus ni en th’abi ga’ fan u fithik’ e piin owchen Abraham, mab mudugil ni ayuweg gelngin Jehovah nib thothup yu Jerusalem, Bethlehem, nge fare tempel, ya gubin ni bay rogon ko fare yiiy u murung’agen Jesus nge rogon nra lebug.

8. Mang e be dag ni i gagiyegnag gelngin Got nib thothup e yafas rok Jesus nge machib ni i tay?

⁸ Gelngin Got nib thothup e ir e ayuweg Jesus ko machib ni i tay nge pi n’en ni i rin’. Maku bochan e re gelngin ney, ma aram me diyen Maria nge gargeleg reb e bitir nib flont ni aram ban’en ndawori buch biid. (Luke 1:26-31, 34, 35) Ku re gelngin ney e ayuweg Jesus ni nge dabi yim’ u nap’an ni kab bitir. (Matt. 2:7, 8, 12, 13) Ma nap’an ni ke gaman 30 e duw rok me dugliy Got nga gelngin nib thothup ni nge mang pilung ni bod rogon David me pi’ fare maruwel ngak ni nge machib. (Luke 1:32, 33; 4:16-21) Maang’ang ni i ngongliy Jesus e i rin’ u daken gelngin Got nib thothup, nib muun ngay ni i golnag e m’ar ma be duruw’iy e girdi’ ma be faseg e yam’. Pi n’ey e be dag e n’en nra rin’ Jesus boch nga m’on u nap’an ni be gagiyeg nib pilung.

9, 10. (a) Mang e mich riy ni immoy gelngin Got nib thothup rok pi gachalpen Jesus ko bin som’on e chibog? (b) Mang boch ban’en ni i buch ko bin som’on e chibog C.E. ni bay rogon ko n’en nib m’agan’ Jehovah ngay?

⁹ Ka nap’an e Pentekost ko 33 C.E. me fanay Jehovah gelngin nib thothup ni nge dugliy e gin ni ka bay ko piin ni yad ra mang owchen Abraham ni boor i yad e de yib ko tabinaw rok Abraham. (Rom. 8:15-17; Gal. 3:29) I maruwel gelngin Got nib thothup u daken pi gachalpen Jesus ya nge yog ni ngar machibgad u fithik’ e pasig mu ur ngongliyed e maang’ang. (Acts 1:8; 2:1-4; 1 Kor. 12:7-11) Bochan e pi tow’ath ney ma ke gagiyel yugu boch e kanawo’ ni ma maruwel gelngin Jehovah nib thothup ni nge lebguy e n’en nib m’agan’ ngay. Ngiyal’ nem e daki m’agan’ Jehovah nga rogon e liyor ni un tay ngak u tempel u Jerusalem kakrom ya ke m’agan’ ko fare ulung ni Kristiano ni kab beech ni ir e ke fanayrad ni ngar rin’ed e n’en nib m’agan’ ngay kakrom nge yib i mada’ ko chiney.

¹⁰ Ere aram boch e kanawo’ ni fanay Jehovah gelngin nib thothup kakrom ni nge lebguy e n’en nib m’agan’ ngay. Ma uw rogon e ngiyal’ ney? Uw rogon ni be fanay Jehovah gelngin nib thothup ni nge lebguy e n’en nib m’agan’ ngay? Ba t’uf ni ngad nanged ya nge yog ni ngaud ngongolgad nib puluw ngay. Ere ngad weliyed aningeg e kanawo’ ni be maruwel Jehovah nga gelngin e ngiyal’ ney.

Rogon ni Ma Maruwel Gelngin Got nib Thothup e Ngiyal’ Ney

11. (a) Mang e be dag ni gelngin Got nib thothup e ma ayuweg e pi tapigpig rok Got? (b) Uw rogon ni nge m’ug ni ga be pag gelngin Got nib thothup be gagiyegnagem?

¹¹ Bin som’on e ma ayuweg gelngin Got nib thothup e pi tapigpig rok Got ni ngar pared ni yad ba beech. Ere piin ni yad ma pigpig ngak Jehovah u rogon nib m’agan’ ngay e thingari beech e ngongol rorad. (Mu beeg e 1 Korinth 6:9-11.) Boch e girdi’ ni kar manged Kristiano e ur uned kafram ko ngongol ndarngal, ma ur pared e piin ni gathi mabgol rorad, ara yad e pumoon ni ma darngalnag e pumoon, ara ppin ni ma darngalnag e ppin. Ere ar’ar ni ma k’aringey ni ngan denen e ra mo’maw’ ni nge chuw. (Jas. 1:14, 15) Machane pi girdi’ ney ni kan “beechnagrad” e be dag ni kar thilyeged boch ban’en ko yafas rorad ya nge yog nra fel’gad u wan’ Got. Mang e ra ayuweg be’ nib t’uf Got rok ni nge siyeg e ar’ar nra k’aring ni nge denen? Be yog e 1 Korinth 6:11, NW, ni “gelngin e Got rodad nib thothup.” Faanra beech e ngongol rom, ma aram e be dag ni kam pag gelngin Got nib thothup be gagiyegnagem.

12. (a) Uw rogon ni be pow’iy Jehovah e ulung rok nrogon nni pilyeg e changar rok Ezekiel nge guy? (b) Uw rogon ni nge m’ug ni ga be pag gelngin Got nib thothup ni nge pow’iyem?

¹² Bin migid e ma fanay Jehovah gelngin nib thothup ni nge pow’iy e ulung rok u rogon nib m’agan’ ngay. Nap’an nni pilyeg e changar rok Ezekiel, me guy ba karrow ni ma girngiy e os ni be yip’ fan e ulung rok Jehovah u tharmiy ni be yan ni nge lebguy e n’en nib m’agan’ Jehovah ngay. Mang e be pow’iy e re karrow ni be girngiy e os nem? Aram gelngin Got nib thothup. (Ezek. 1:20, 21) Dab da paged talin ni bay e ulung rok Jehovah u tharmiy maku bay u fayleng. Ere faanra gelngin Got nib thothup e be pow’iy e ulung rok u tharmiy, me ere ku arrogon e ulung rok u fayleng. Faan ga ra par ni gab yul’yul’ ma ga be fol ko fonow ni be pi’ e ulung rok Got u fayleng, ma aram e be m’ug ni ga be fol u rogon e yaram ko ulung rok Jehovah u tharmiy ma ga be pag gelngin nib thothup ni nge pow’iyem.​—Heb. 13:17.

13, 14. (a) Mini’ e ba muun ko fare “mfen” ni weliy Jesus murung’agen? (b) Mu weliy reb e kanawo’ ni be dag ni be maruwel gelngin Got nib thothup ni nge tamilangnag e tin riyul’ u Bible. (Mu guy fare thin ni kenggin e “Ga Be Tiyan’um nga Rogon ni Be Tamilang Boch e Thin Riyul’ u Bible, Fa?”)

¹³ Bin dalip e be maruwel gelngin Got nib thothup ni nge tamilangnag e thin riyul’ u Bible. (Prov. 4:18) Ke n’uw nap’an ni ma ngongliy “fare tapigpig nib yul’yul’ ma ba gonop” e pi babyor ney ya nge yog ni tamilang e thin nu Bible u wan’dad. (Matt. 24:45) Bod rogon ni kan tamilangnag ngodad fan fare bugithin ni “re mfen ney” ni faani weliy Jesus murung’agen. (Mu beeg e Matthew 24:32-34.) Mang mfen e i weliy Jesus murung’agen? Fare thin ni kenggin e “Ngiyal’ ni Ba’ Jesus​—Mangfan Ngom?” e be weliy nre bugithin ney ni yog Jesus e gathi be yip’ fan e piin ni yad ba kireb, ya be yip’ fan pi gachalpen ni yira dugliyrad nga gelngin Got nib thothup.a Pi gachalpen Jesus ni kan dugliyrad ko bin som’on e chibog nge ngiyal’ ney e yad e piin ni yad ra guy fare pow mar nanged ni “fare ngiyal’ i n’em” e ke chugur ni nge tabab.

¹⁴ Mang rogon e re n’ey ngodad? Yugu aram rogon ndabiyog ni nga dogned e ngiyal’ nra mus e “re mfen ney” riy, machane bay in i ban’en ni yira nang u rogon fare bugithin ni “mfen”: Ba ga’ ni yima yog ko girdi’ nib thilthil yangarrad ni ur moyed u reb e tayim ara ngal’an ban’en, ma dabi n’uw nap’an, ma bay e ngiyal’ nra mus. (Ex. 1:6) Ere uw rogon ni ngad nanged fan fapi thin ni yog Jesus u murung’agen e “re mfen ney”? Ba tamilang ni be yip’ fan ni piin ni kan dugliyrad ni ur moyed u nap’an ni gagiyel fare pow ko duw ni 1914 e ra ka yad ba fas mu kun dugliy yugu boch i girdien fachi ulung ni aram e bay boch i yad ndabi yim’ me yib fare gafgow nib ga’. Re mfen nem e bay e gin ni tabab riy ma bay e gin nra mus riy. Ere rogon ni be lebug fare pow e be dag ni kari chugur fare gafgow nib ga’. Faan ga ra par ni gab od ko tirok Got ban’en ma rayog ni ngam dag ni ga be tiyan’um maku ga be fol u rogon ni be pow’iyem gelngin Got nib thothup.​—Mark 13:37.

15. Mang e be dag ni gelngin Got nib thothup e ir e ma ayuwegdad ni ngad machibnaged fare thin nib fel’?

¹⁵ Bin aningeg, gelngin Got nib thothup e ma pi’ gelngidad ni ngad machibnaged fare thin nib fel’. (Acts 1:8) Mang e ku rayog ni nge tamilangnag rogon ni yibe machibnag fare thin nib fel’ u ga’ngin yang e fayleng? Sana gur be’ ni um moy ni gab tamra’ kafram, mag lemnag ndabiyog ni ngam un ko machib. Machane, chiney e gab pasig ko machib.b Boor e Pi Mich Rok Jehovah ni yad ba yul’yul’ ni yad be ulul ko machib ni yugu aram rogon ni yibe togopuluw ngorad ma yibe gafgownagrad. Kemus ni yigoo gelngin Got nib thothup e rayog ni nge pi’ gelngidad nga darod u fithik’ boch e magawon nib mo’maw’ ma gad rin’ boch ban’en ndabiyog u gelngidad. (Mik. 3:8; Matt. 17:20) Faan ga ra machib u fithik’ e pasig ma aram e ga be dag ni ga be fol u rogon ni be pow’iyem gelngin Got nib thothup.

N’en Nra Rin’ Gelngin Got nib Thothup Boch nga M’on

16. Mang fan nrayog ni nge pagan’dad nra ayuweg Jehovah e girdi’ rok u nap’an fare gafgow nib ga’?

¹⁶ Boch nga m’on ma ra maruwel Jehovah nga gelngin nib thothup ni nge lebguy e n’en nib m’agan’ ngay. Mu lemnag rogon ni ma ayuwegdad. Kad filed faram ni i fanay Jehovah gelngin nib thothup kakrom ni nge ayuweg boch e pi tapigpig rok nge fare nam nu Israel. Ere rayog ni nge pagan’dad nra maruwel ko re gelngin nem ni nge ayuweg e girdi’ rok u nap’an fare gafgow nib ga’ ni kari chugur. De t’uf ni ngad lemnaged rogon nra ayuwegdad Jehovah e ngiyal’ nem. Ya ngad athapeged e pi n’en ni bay nga m’on u fithik’ e pagan’ ya gad manang ndabi pagdad Jehovah maku ra pi’ gelngin nib thothup ni nge ayuwegdad.​—2 Kron. 16:9; Ps. 139:7-12.

17. Uw rogon nra maruwel Jehovah nga gelngin nib thothup u nap’an e bin nib beech e fayleng?

¹⁷ Uw rogon nra maruwel Jehovah nga gelngin nib thothup u lan e bin nib beech e fayleng? Re gelngin nem e ir e ra gagiyegnag fa yungi babyor ni kan bachiy ni yira pithig e ngiyal’ nem. (Rev. 20:12) Mang e bay u lan e yungi babyor ney? Ba tamilang ni aram boch e motochiyel ni bay fini pi’ Jehovah ngodad u lan fare biyu’ i duw. Ga baadag ni ngam nang ko mang e bay u lan e yungi babyor nem? Aram boch ban’en ni gad be athapeg ni ngad nanged. Ba mo’maw’ ni ngad susunnaged rogon feni fel’ e par rodad e ngiyal’ nem u nap’an nra maruwel Jehovah nga gelngin nib thothup ni nge lebguy e tin nib m’agan’ ngay ni fan ko fayleng nge girdi’.

18. Mang e kam dugliy ni ngam rin’?

¹⁸ Dab da paged talin nra fanay Jehovah gelngin nth’abi gel ni nge lebguy e n’en nib m’agan’ ngay. Ka gab muun ko re n’em. Ere ngaum ning gelngin Got nib thothup ni nge ayuwegem mag fol u rogon ni be pow’iyem. (Luke 11:13) Ya faan ga ra rin’ ni aram rogon ma aram e rayog ni ngam athapeg e yafas ni manemus u paradis u fayleng ni aram e n’en ni lemnag Jehovah som’on ni fan ko girdi’.

[Footnotes]

Ka Ga Manang?

• Uw rogon ni i maruwel Jehovah nga gelngin nib thothup ni nge lebguy e n’en nib m’agan’ ngay kakrom?

• Uw rogon ni be maruwel Jehovah nga gelngin nib thothup e ngiyal’ ney?

• Uw rogon nra maruwel Jehovah nga gelngin nib thothup boch nga m’on ni nge lebguy e n’en nib m’agan’ ngay?

[Box on page 22]

Ga Be Tiyan’um nga Rogon ni Be Tamilang Boch e Thin Riyul’ u Bible, Fa?

Gubin ngiyal’ ni be tamilangnag Jehovah e thin rok ngak e girdi’ rok. Ere mang boch ban’en u Bible ni kan thilyeg rogon i weliy u lan Fare Wulyang Ntagil’ E Damit?

▪ Mang e be tamilangnag fare fanathin rok Jesus ni murung’agen e n’en ni ma thownag e flowa u rogon ni ma mon’og be’ ko tirok Got ban’en? (Matt. 13:33)​—July 1, 2008, page 25-26.

▪ Wuin e ra m’ay i dugliy e piin ni nga ranod nga tharmiy?​—January 1, 2008, page 23, par. 15, 16.

▪ Mang e be yip’ fan ni ngan liyor ngak Got u daken “gelngin nib thothup”? (John 4:24, NW)​—February 1, 2003, page 10.

▪ Tamaniyang ko fare tempel nib fanathin e be pigpig fare ulung nib ga’ riy? (Rev. 7:15)​—December 1, 2006, page 17, par. 14, 15.

▪ Wuin e kan tabab i kieg e saf nge kaming? (Matt. 25:31-33)​—October 15, 1995, page 18-28 ni thin ni Meriken.