Mu Chugur Ngak Got

Ma Yaliy Got e Tin nib Fel’ ni Ma Rin’ e Girdi’

1 KINGS 14:13

“MANANG gubin e tafinay rom nge tin ga be ar’arnag.” (1 Kronicles 28:9, BT) Pi thin ney e kan yoloy ni fan e ngad nanged nri ma lemnagdad Jehovah. Ma yaliy Jehovah e tin nib fel’ u gum’ircha’dad ni yugu aram rogon ni daworda flontgad. Ba tamilang e re n’ey ko thin rok Jehovah u murung’agen Abijah ni bay ko 1 Kings 14:13.

I par Abijah u reb e tabinaw nib kireb e girdi’ riy. Jeroboam ni chitamangin e ir e ba ga’ u reb e am ni kar digeyed e motochiyel rok Jehovah.a Ke m’agan’ Jehovah ngay ni nge thang urngin e girdi’ rok Jeroboam me “thirif e tabinaw” rok u but ngar chuwgad “ni bod t’ay e gamanman.” (1 Kings 14:10, BT) Machane ke yog Got ni kemus ni taabe’ ko tabinaw rok Jeroboam nib m’ar ni Abijah fithingan e ngan chibgiliy nib fel’ rogon.b Mang fan? Ke weliy Got ni gaar: “Kemus ni ir u chon e tabinaw rok Jeroboam ni yira chibgiliy nib fel’ rogon, ya kemus ni ir e ba m’agan’ Somol ni Got rok yu Israel ngak.” (1 Kings 14:1, 12, 13, BT) Mang e be fil e pi thin ney ngodad u murung’agen Abijah?

De yog e Bible ni Abijah e reb e tapigpig rok Got nib yul’yul’. Machane bay ban’en nib fel’ ni ke rin’. N’en nib fel’ ni ke rin’ e ba “m’agan’” Jehovah ngay ya bay rogon ko liyor ngak. Piyu Jew ni yad ma yoloy e babyor e ka rogned ni sana ke yan Abijah nga tempel u Jerusalem ara ke chuweg e piin ni matnag ni ke tay e chitamangin ni ngar taleged piyu Israel ni nge dabiyog ni nga ranod nga Jerusalem.

Yugu aram ni gathi rib tamilang u wan’dad e n’en ni ke rin’ Abijah, machane gad manang nib fel’ e n’en ni ke rin’. Ya som’on e ke rin’ ban’en nib “m’agan’” Got ngay ni yib u gum’irchaen. Bin migid e ke rin’ Abijah e re n’em u nap’an ni be par u lan e “tabinaw rok Jeroboam.” Reb e girdi’ nib llowan’ e yog ni gaar: “Rib fel’ e girdi’ ni rayog ni ngar ululgad i rin’ e tin nib fel’ u nap’an ni yad be par u lan e binaw ara tabinaw nib kireb.” Maku reb e yog ni ngongol ni rin’ Abijah e “rib tamilang . . . , ni bod e pi t’uf nnap’an nra nep’ ma rib gagiyel ramaen nge ku bod e gek’iy ni cedar ni ma m’ug nib fel’ yaan u nap’an ni ke mulmul yuwan e tin ka bay e gek’iy u tooben.”

Bin th’abi ga’ fan e thin ni bay ko 1 Kings 14:13, (BT) e be fil ngodad ban’en nrib fel’ u murung’agen Jehovah nge n’en ni ma yaliy rodad. Dab ni pag talin ni bay ban’en nrib fel’ ni ke rin’ Abijah nib “m’agan’” Jehovah ngay. Ba tamilang ni ke yaliy Jehovah gum’irchaen Abijah me pirieg ni bay ban’en riy nib fel’. I yog be’ nib llowan’ ni faanra ngan taarebrogonnag Abijah ngak girdien e tabinaw rok ma bod e churuwo’ u l’ugun e yar ni bay u fithik’ “ba ulung i malang.” Ke felfelan’ Jehovah ko n’en nib fel’ ni ke rin’ Abijah me tow’athnag ya kemus ni yigoo ir u fithik’ girdien e tabinaw rok e i par nib fel’ e ngongol rok.

Ere gur, gathi gad ba felfelan’ ni kad nanged ni yugu aram rogon ndawor da flontgad machane ma yaliy Jehovah e tin nib fel’ rodad mab ga’ fan u wan’? (Psalm 130:3) Re n’ey e susun nra k’aringdad ni ngad chugurgad ngak Jehovah ni ir ba Got ni ma fal’eg i yaliy gum’ircha’dad ma be guy e tin nib fel’ rodad.

[Footnotes]