Jehovah E —Ba Th’abi Fel’ Rogon Ni Dag E Fel’ Ngak E Girdi’
“Mu pininged e sorok ngak Jehovah u fithik’ e yoor, ya Jehovah e ba fel’!”—JEREMIAH 33:11, New World Translation.
1. Mang fan ni kan k’aringdad ni ngada pininged e sorok ngak Got nbochan ma dag e tin nib fel’ ban’en?
JEHOVAH GOT e rib fel’ ni polo’. I tolul Zekariah ni profet ni, “O uw feni ga’ u rogon ni ma dag ni ir e ba fel’ ngak e girdi’’!” (Zekariah 9:17, NW) Riyul’, ni rayog ni ngan guy ni Got e ba fel’ ngak be’ ko urngin ban’en ni ke rin’ ni nge fal’eg fare fayleng ni fan ni nge falan’dad riy. (Genesis 1:31) Ri dabiyog ni ngada nanged fan urngin e motochiyel ni i fanay nib mo’maw’ u nap’an ni be sunmiy fare palpalth’ib. (Eklesiastes 3:11; 8:17) Machane chuuw ni kada nanged e ra k’aringdad ni ngada pininged e sorok ngak Got nbochan ir be’ nib fel’.
2. Uw rogon ni ngam weliy e tin nib fel’ ban’en?
2 Mang e fel’ ngak e girdi’? Aram e gafarig nib fel’, ara fel’ngin nib fel’. Yugu aram rogon, ma re n’ey e kab fel’ boch ko fare n’en ni ri dabni rin’ e tin nib kireb. Fare fel’ ngak e girdi’ e reb ko fapi wom’engin e kan ni thothup, ya aram felngin ni ri ma rin’ e tin nib fel’. (Galatia 5:22, 23) Gad ma dag e fel’ ngak e girdi’ u nap’an ni gad be rin’ e tin nib fel’ ma ra fel’ rogon yugu boch e girdi’ riy. U lan e re m’ag ney, ma tin ni be lemnag yugu boch e ulung ko girdi’ nib fel’ e sana aram e n’en nib kireb ko yugu boch e girdi’. Machane, rayog ni nge aw e gapas nge falfalan’ u thildad ma aram susun bay e motochiyel u murung’agen e fel’ ngak e girdi’. Mini’ e bay mat’awon ni nge fal’eg e motochiyel?
3. Mang e be yog ko Genesis 2:16, 17 u murung’agen rogon ni ngan rin’ e tin nib fel’ ban’en?
3 Got e ir e ke dag rogon ni ngan fel’ ngak e girdi’. Nap’an ni tabab chepin e girdi’, ma Jehovah e i tay chilen ngak fa bin som’mon e pumoon ni gaar: “Ra um koy wom’engin urngin e gek’iy ni bay ko re gi woldug ney, ma kemus ni fare ke gek’iy ni ma tamilangnag an’uy ko tin nib fel’ nge tin nib kireb e dabmu koy. Thingar dabmu koy wom’engin. Ya rofen ni ga ra kay e ga ra yim’.” (Genesis 2:16, 17) Arrogon, ba t’uf ni nge pagan’ e girdi’ ngak e En ke Sunmiyrad u murung’agen e tamilangan’ ko tin nib fel’ nge tin nib kireb.
Dariy Rogon ni Ngan Dag e Fel’ Ngak e Girdi’
4. Mang e n’en ni ke rin’ Got ni fan ko girdi’ ni ka nap’an ke denen Adam?
4 Athap ko girdi’ ni nge yog ngorad e falfalan’ ndariy n’umngin nap’an ma ra ngar flontgad e ke kireb u nap’an ni denen Adam me dabuy ni nge ta’fan mat’awon Got ni nge fal’eg e motochiyel u murung’agen e fel’ ngak e girdi’. (Genesis 3:1-6) Machane m’on ni kan gargelnag pifak Adam ni yad e piin ni ke af ngorad e denen nge yam’, ma aram me yog Got u murung’agen fare Owchen ni bay yib ni ba flont. Riyul’ ni be non Jehovah ngak “fare porchoyog ni ke kakrom,” i Satan ni fare Moonyan’, me yog ni gaar: “I gur nge fare ppin e bay mu mpirew ni gimew ba toogor; ma ku er rogon pi fak nge pi fakam ni bay ur pired ni yad ba toogor. Ma be’ nib moon ni fak fare pin e bay pirdiiy lolugem nge maadad nib gel, mi gur e bay mu k’ad wurilen e rifrif u ay.” (Revelation 12:9; Genesis 3:15) Ba m’agan’ Jehovah ngay ni nge biyuliy e girdi’ ni tadenen. Dariy rogon ni nge dag e fel’ ngak e girdi’, ma riyul’ ni i rin’ Jehovah e re yaram nem ni fan ni nge fas e piin ni be dag ko ngongol ni kari mich e biyul ni pi’ Fak nib t’uf rok.—Matthew 20:28; Roma 5:8, 12.
5. Yugu aram rogon ni ke af ngodad e gum’ircha’ ni baadag ni nge rin’ e tin nib kireb, ma mang fan nrayog rodad ni ngada daged e tin nib fel’ ban’en u boch e kanawo’?
5 Riyul’ nbochan ke denen Adam, ma ke af ngodad e gum’ircha’ ni baadag ni nge rin’ e tin nib kireb. (Genesis 8:21) Yugu aram rogon, ma bay e falfalan’ riy, ya ra pi’ Jehovah boch e ayuw ni fan ni ngada daged e tin nib fel’. Ra ngada pired ni gad be fol ko babyor rok nib thothup mab tolang puluwon e gathi kemus nra ‘ayuwegdad ni ngad gonopgad ni fan ni ngada fasgad’ ma ra ‘ayuwegdad u rogon ni ngad rin’ed urngin e maruwel nib fel’ machane ku ra ayuwegdad ni ngada rin’ed e tin nib fel’ nga owchen. (2 Timothy 3:14-17) Machane, rogon ni nge fel’ rogodad ko thin nu Bible ma rayog ni ngada daged e tin nib fel’, ma thingar ni yog ngodad fare lem ko ko fare psalmist ni i yon’ e tang ni gaar: “Gur [Jehovah] e gab fel’ ma ga be rin e tin nib fel’. Mu fil ngog e tirom e motochiyel.”—Psalm 119:68.
Ngongol nib Fel’ Rok Jehovah e Kan Pining e Sorok Ngay
6. Tomren ni ke fek David ni pilung fare kiwaren e m’ag nge Jerusalem, me yon’ piyu Levite e tang ni bay e thin riy ni mang?
6 David ni pilung nu Israel kakrom e tay fan nrogon ni ma dag Got ni ir e ba fel’ ngak e girdi’ me athamgil ni nge fol ko thin ni Ma yog. “I Somol e mmat’aw ma ba fel’”; ereray e thin ni ke yog David. Me ulul ngay ni gaar, “ma ma fil ngak e pi tadenen e kanawo’ ni susun e ir e nga ranod riy.” (Psalm 25:8) Thin ni pi’ Got ngak piyu Israel nib muun ngay ragag e motochiyel nib ga’ fan—ni aram Fa Ragag i Motochiyel—ni kan yoloy nga daken l’agruw i malang min chaariy min ta’ nga lan fare kahol ni ka nog e kiwaren e m’ag ngay. Tomren ni ke fek David fare kiwaren e m’ag ko fare mach nth’abi ga’ nu Israel, ni Jerusalem, me yon’ piyu Levites reb e tang nib muun ngay e thin ni gaar: Gimed e girdi’, e “ngam pininged e magar ngak Jehovah, ya ir e ba fel’, ya bochan ni ma dag e t’ufeg rok nge gol ndariy n’umngin nap’an.” (1 Chronicles 16:34, 37-41, NW) Uw feni gel e falfalan’ u nap’an ni kan rung’aged e pi thin ni yib u l’ugun piyu Levite ni yad tamatang!
7. Mang e ke buch u tomren ni kan fek fare kiwaren e m’ag ko gin ni th’abi thothup nge tomren e meybil ni tay Solomon ni fan ko ngan ognag fare tempel?
7 Pi thin nem ni be pining e sorok ngak Got e ku kan gelnag u nap’an ni kan ognag fare tempel rok Jehovah ni toy Solomon ni fak David. Tomren ni kan ta’ fare kiwaren e m’ag nga lan fare singgil ni th’abi thothup ko fare tempel ni kefin ni toy, me tabab piyu Levite ngar pininged e sorok ngak Jehovah, “ya bochan ir e ba fel’, ya ma dag e t’ufeg nge gol rok ndariy n’umngin nap’an.” Nap’an e re madenom nem mu daken e maangang ma ke sug fare tempel ko manileng ni be dag ni ke falan’ Jehovah ngay. (2 Chronicles 5:13, 14) Tomren e meybil rok Solomon ni fan ko re madenom nem, “me yib e nifiy u tharmiy me urfeg fare maligach ni immoy u rom nge ku boch e maligach.” Nap’an ni kan guy e re ney, ma “pifak Israel . . . e ur gurgad ngar siroogad ngar ted owcherad nga but’ ko gin ni kan pichnag mi pining e magar ngak Jehovah, ‘ya bochan ir e ba fel’, ya ma dag e t’ufeg rok nge gol ndariy n’umngin nap’an.’” (2 Chronicles 7:1-3, NW) Tomren ni ke m’ay fare madenom ni 14 e rran n’umngin nap’an, me sul piyu Israel nga tabinaw rorad “ni yad ba falfalan’ ma rib fel’ lanin’rad nbochan ke dag Jehovah ni ir ba fel’ ngak David nge Solomon nge ngak piyu Israel ni girdi’ rok.”—2 Chronicles 7:10.
8, 9. (a) Yugu aram rogon ni piyu Israel e kara pininged e sorok ngak Jehovah ya bochan ke dag e tin nib fel’ ban’en, ma tomur riy mang ngongol e kara folgad riy? (b) Mang yiiy e ka nog ni fan ko Jerusalem u daken Jeremiah, ma uw rogon ni ke lebug e re yiiy nem?
8 N’en ni be k’aring e kireban’, e de yog rok piyu Israel ni ngar pared nrogon nib puluw ko tang ni ka ron’ed ni be pining e sorok ngak Got. Munmun, ma girdi’ nu Judah e ‘kar pininged e sorok ngak Jehovah ni kemus nu dap’e l’ugunrad.’ (Isaiah 29:13) Ur tababgad i rin’ e tin nib kireb ko bin ni ngar folgad ko motochiyel rok Got ni be dag rogon ni ngan fel’ ngak e girdi’. Ma mang tin nib kireb ni kara rin’ed? Kar pigpiggad ko liyos, ma kar uned ko ngongol ni darngal, ma kar magawonnaged e piin nib gafgow, nge yugu boch e kireb nib gel! Ma wenegan ni yib riy, e kan gothey Jerusalem nge Juda min fekrad nib kalbus nga Babylon ko duw ni 607 B.C.E.
9 Ireray e kanawo’ ni i gechignag Got e girdi’ rok. Machane, u daken Jeremiah ni profet, me yiiynag ni ka bay e girdi’ u Jerusalem ni yad be yog ni gaar: “Mu pining e sorok ngak Jehovah ni bay u fithik’ e pi salthaw, ya bochan Jehovah e ba fel’; ya ma dag e t’ufeg rok nge gol ndariy n’umngin nap’an!” (Jeremiah 33:10, 11, NW) Ma ri aram e n’en ni ke buch. Tomren 70 e duw ndariy e girdi’ ni ma par ko re binaw nem, me taw ko duw 537 B.C.E., ma tin ni ka ba’ ko piyu Jew e kar sulod nga Jerusalem. (Jeremiah 25:11; Daniel 9:1, 2) Kara toyed biyay fare altar ko gin bay e tempel riy u daken fare burey ni Moriah mi yad tabab i pi’ e maligach u rom. Kan ta’ fare def ko fare tempel ko fa bin l’agruw e duw u tomren ni kar sulod nga ram. Uw feni gel e falfalan’ rorad ko ngiyal’ nem! “Nap’an nra tababgad i ubung e def ko tempel,” ireray e n’en ni yog Ezra, me ulul ngay ni gaar, “me yan i sak’iy e pi prist nga tagil’rad ni ka ron’ed fapi mad rorad ni n’un’uw, ni bay e rappa u pa’rad, ma pi Levite ni girdien e tabinaw rok Asaph, e yad bay u rom ni bay e cymbal rorad ni tatlin e musik. Mi yad pining e sorok ngak Somol nrogon ni duguliy David ni pilung nu Israel kakrom. Mi yad tang ni yad be pining e sorok ngak Somol ma yad be sul u daken e pi thin ni baaray, ‘I Somol e rib manigil, ma rogon nib t’uf piyu Israel rok e bay i par ndariy n’umngin nap’an.’”—Ezra 3:1-11.
10. Mang thin ni baga’ fan ni kan tababnag min museg fare Psalm 118?
10 Thin ni be pining e sorok nga rogon ni ma dag Jehovah e fel’ ngak e girdi’ ku bay ko fapi psalm ni boor. Ma ba muun ngay e thin ni bay ko Psalm 118, ni fapi tabinaw ko piyu Israel e ka ron’ed e tang nap’an ni kar museged fare madenom ko Paluk’af. Re psalm nem e kan tababnag min museg ko thin ni baaray: “Mpininged e magar ngak Somol, yi Somol e ba fel’, ma rogon nib t’uf e girdi’ rok e bay i par ndariy n’umngin nap’an.” (Psalm 118:1, 29) Sana aram rogon e thin ko tang ni bin tomur ni ke yon’ Jesus Kristus nge fapi apostal rok nib yul’yul’ ko fare nep’ u m’on ni ke yim’ ko duw 33 C.E.—Matthew 26:30.
“Wenig Ngom, Mu Gagiyegnag Nge Yog ni Gguy Ramaem ni Be Gal”
11, 12. Nap’an ni ke guy Moses ramaen Got nib ngoch nap’an, ma mang e thin ni ke rung’ag?
11 Kan tababnag ni ngan pethuy e ngongol nib fel’ ngak e girdi’ rok Jehovah ko t’ufeg rok nge gol u boch e chibog u m’on ko ngiyal’ rok Ezra. De n’uw nap’an nga tomren ni piyu Israel e kar liyorgad ko garbaw ni kan ngongliy ko gol u daken e ted min thang e piin kar denengad, me wenig Moses ngak Jehovah ni gaar: “Wenig ngom, mu gagiyegnag nge yog ni gguy ramaem ni be gal.” Ma manang Jehovah ndabiyog rok Moses ni nge guy owchen me par nib fas, me yog ni gaar: “Gag e gu gagiyegnag ni urngin e tin nib fel’ rog e ra yan nga owchem.”—Exodus 33:13-20.
12 Bin migid e rran u daken fare Burey ni Sinai ma tin nib fel’ rok Jehovah e ke yan nga owchen Moses. Ngiyal’ nem, ma ke guy Moses nib ngoch nap’an ramaen Got me rung’ag e thin ni baaray: “Jehovah, Jehovah, e ir fare Got nri ma runguy e girdi’ ma ma kireban’ ngorad, ni gathi mmachreg ni ma yib e puwan’ ngak, ma ma t’ufeg e girdi’ ma ma yul’yul’ ngorad. Tin ni ke yog ngak boor i biyu’ e girdi’ ni bay rin’ ngorad e dabi thil, ma n’ag fan u wan’ e tin ni kan rin’ nde mat’aw, nge tin nib kireb, nge denen; machane dabi fek owchen fe pag ndabi gechignag pi fakey nge mada’ ko bin dalip nge aningeg e mfen ni bochan e denen ni ke ngongliy pi chitamangirad.” (Exodus 34:6, 7, NW) Pi thin ney e be dag ni rogon ni ma dag Jehovah e fel’ ngak e girdi’ e ba l’eg ko t’ufeg rok nge gol nge wok rok. Ran weliy e re n’ey ma ra ayuwegdad ni ngada daged e fel’ ngak e girdi’. Som’mon gad ra weliy fare felngin ni kan weliy ni l’agruw yay ko pi thin ney ni be weliy murung’agen rogon ni dag Got e fel’ ngak e girdi’ ni yira ngat ngay.
“Reb e Got . . . ni Ri Ma Dag e T’ufeg Nge Gol”
13. Nap’an ni kan weliy u rogon ni ma dag Got e tin nib fel’ ban’en, ma mang felngin ni kan weliy ni l’agruw yay, ma mang fan nib puluw e re ney?
13 “Jehovah [ir] e Got . . . ni ri ma dag e t’ufeg nge gol . . . , be chaariy e t’ufeg rok nge gol ni fan ko bokum biyu’ e girdi’.” Fare bugithin ni Hebrew ni kan piliyeg ni “t’ufeg nge gol” e ku e be yip’ fan e “t’ufeg nib yul’yul’.” Goo ir e felngin ni kan yoloy ni l’agruw yay ko thin ni ke yog Got ngak ni ke yog Got ngak Moses. Uw feni puluw e re n’ey, ya bochan reb i felngin Jehovah ni rib gagiyel e t’ufeg! (1 John 4:8) Fare bugithin ni be pining e sorok ngak Jehovah ni ri yimanang ni “bochan ir e ba fel’, ya bochan ma dag e t’ufeg rok nge gol ndariy n’umngin nap’an” ma aram e n’en ni be gelnag e re felngin ney.
14. Mini’ e kari fel rogorad ko tin nib fel’ ban’en ni ma dag Got nge t’ufeg rok nge gol?
14 Reb ni be gagiyelnag e ngongol rok Jehovah nib fel’ e aram “ri ma dag e t’ufeg rok nge gol.” Kan dag e re ney nrib tamilang u rogon ni be ayuweg nib sasaf’og e piin ni kara ognaged yad ngak, ni yad e pi tapigpig rok nib yul’yul’. (1 Peter 5:6, 7) Rogon ni Pi Mich rok Jehovah e rayog rorad ni ngara weliyed murung’agen, e ‘be chaariy e t’ufeg rok nge gol ni fan ko piin ni nib t’uf Got rorad ma yad be pigpig ngak. (Exodus 20:6) Bin riyul’ e nam nu Israel e kar thamiyed e t’ufeg rok Jehovah nge gol, ara t’ufeg nib yul’yul’, ya bochan kara n’aged Fak. Machane rogon ni ma dag Got e fel’ ngak e girdi’ nge t’ufeg rok nib yul’yul’ ngak e piin Kristiano u gubin e nam e ra par ndariy n’umngin nap’an.—John 3:36.
Jehovah e—Tarunguyey Nge Ffel’ Ngak e Girdi’
15. (a) Thin ni ke rung’ag Moses u daken e Burey ni Sinai e kan tababnag ko mang thin? (b) Runguy e ba l’ag ngay e mang?
15 Thin ni ke rung’ag Moses u daken e Burey ni Sinai e kan tababnag ko thin ni gaar: “Jehovah, Jehovah, ir Got ni ta runguyey mab fel’ ngak e girdi’.” Fare bugithin ni Hebrew ni kan thiliyeg ni “runguy” e rayog ni nge yip’ fan ni “fapi chew” ma rib peth ko thin ni fan ko “meyal.” Ere runguy e ba l’ag ko thamtham ni ma yib u fithik’ be’. Machane runguy e gathi goo taganan’ nib riyul’. Ra k’aringdad ni ngada rin’ed boch ban’en ni fan ni ngan ayuweg yugu boch e girdi’ ko gafgow ni keb ngorad. Ni bod ni, piin piilal ni Kristiano e kar nanged nib t’uf ni ngar daged e runguy ngak e pi walagrad, ni ‘be dag e runguy u fithik’ e falfalan’ ko ngiyal’ nib puluw.—Roma 12:8; James 2:13; Jude 22, 23.
16. Mang fan nrayog ni nga nog ni Jehovah e ba fel ngak e girdi’?
16 Ngongol rok Got nib fel’ e ku kan dag rogon ni ir ba fel’ ngak be’. En nib fel’ ngak e girdi’ ara gracious e “ri ma lemnag ko uw rogon ni be lemnag yugu boch e girdi’ ban’en” ma ra dag ni ‘ri yad ba gol ngak e piin nib sobut’.’ Jehovah e ba th’abi fel’ rogon ni dag ni ir ba fel’ ngak be’ u nap’an ni be ayuweg e tapigpig rok nib yul’yul’. Ni bod ni, u daken e pi engel, ma rib fel’ rogon ni i gelnag Daniel ni profet ni ke pilibthir me yog ngak Mary ni be’ ni ppin ni dawori nang e pumoon u murung’agen e taw’ath ni keb ngak ni ir e ra gargelnag Jesus. (Daniel 10:19; Luke 1:26-38) Gadad, ni gadad e girdi’ rok Jehovah, e ba mudugil ni ke falan’dad ko uw rogon ni be pingegdad u daken e thin ni bay u Bible. Gad be pining e sorok ngak u rogon ni dag e ngongol rok nib fel’ ma gad be athamgil ni ngad golgad u rogon ni ngada ayuweged yugu boch e girdi’. Nap’an ni piin ni kar ilal gad ko tirok Got ban’en e ra ayuweg reb e walag “u fithik’ e sumunguy,” ma yad be athamgil ni ngar golgad, ma yad be lemnagrad.—Galatia 6:1.
Reb e Got nib Sasagaal ni Nge Damumuw
17. Mang fan ni ke falan’dad ni Jehovah e ba “sasagaal ni nge damumuw”?
17 “Reb e Got . . . nib sasagaal ni nge damumuw.” Pi thin nem e be gagiyelnag nga rogon ni be dag Jehovah e fel’ ngak e girdi’ u reb e kanawo’. I gum’m’anag Jehovah ir u puluwdad ko tin ni gad ba meewar riy me pi’ e tayim ngodad ni ngad gelgad ko re magawon rodad ney ma ngada mon’ogad ko tirok Got. (Hebrews 5:12–6:3; James 5:14, 15) Gum’an’ rok e ku ke fel’ rogon e piin ni dawori mang tapigpig rok. Ka bay e tayim rorad ni ngar folgad ko thin ko Gil’ilungun ma ngar kalgadngan’rad. (Roma 2:4) Yugu aram rogon ni Jehovah e ba gum’an’, machane, yu ngiyal’ ma fel’ ngak e girdi’ e ra k’aring ni nge dag e damumuw rok, ni bod rogon e n’en ni i rin’ u nap’an ni piyu Israel e kara liyorgad ko garbaw ni kan ngongliy ko gol u daken e Burey ni Sinai. Dabki n’uw nap’an ma ra dag Got e damumuw rok ni kab gel boch u nap’an ni ra gathey nge ma’y e re m’ag rok Satan nib kireb ney.—Ezekiel 38:19, 21-23.
18. Rogon nib m’ag ko tin riyul’, ma mang e thil u thilin Jehovah nge girdi’ ni pi tayugang?
18 “Jehovah [ir] e Got . . . ni ri ma dag e . . . e thin riyul’.” Uw rogon ni Jehovah e rib thil ko girdi’ ni tayugang, ni ri ma micheg ban’en ma dabiyog rorad ni ngar lebguyed e thin ni ka rogned! N’en nib thil riy, e aram e pi tapigpig rok Jehovah e be pagan’rad ko urngin ban’en ni bay ko Thin rok ni kan thagthagnag. Bochan Got e ri ma dag e thin riyul’, ma aram e rayog ni ngad pagedan’dad ko tin ni ke micheg. Bochan Chitamangidad nu tharmiy e ba fel’, ba mudugil ni ra fulweg taban e meybil rodad ma ra pi’ e tin riyul ko tirok Got ni boor ngodad.—Psalm 43:3; 65:2.
19. Mang e tin nib fel’ ban’en ni yira ngat ngay ni dag Jehovah ngak e piin tadenen ni kar kalgadngan’rad?
19 “Jehovah [ir] e Got . . . ni ma n’agfan e oloboch nge kireb nge denen.” Bochan ni Jehovah e ba fel’ ma m’agan’ ngay ni nge n’agfan e kireb ko piin tadenen ni kar kalgadngan’rad. Mab mudugil ni kari falan’dad ya Chitamangidad nu tharmiy ni ma t’ufegey e ke bing e kanawo’ ma rayog ni nge n’ag fan e denen u daken e maligach ni pi’. (1 John 2:1, 2) Riyul’ ni gad ba falfalan’, ni urngin e girdi’ nra dag ko ngongol rorad ni ke mich fare biyul u wan’rad e ra fel’ thilrad Jehovah, ma bay athap rorad ni yafas ni manemus u lan fa bin nib biech e fayleng ni ke micheg. Ireray boch i fan nrib fel’ ni ngan pining e sorok ngak Jehovah ya bochan ke dag e ngongol rok nib fel’ ngak e girdi’!—2 Peter 3:13.
20. Mang mich ni bay rodad ni dabi pag Got e tin kireb?
20 “Ri dabi pag [Jehovah] ni dabni gechignag e tin kireb.” Ri aram reb i fan ni ngan pining e sorok ngak Jehovah ni bochan ir ba fel’. Mang fan? Bochan bang ko tin nib fel’ ban’en ni baga’fan e aram dabni pag ni nge par e tin nib kireb. Maku, “ngiyal’ nra m’ug Somol Jesus u lan e lang ni ke yib u tharmiy ni yad e pi engel rok nib yargel,” ma yira gechignag e “piin ni dar nanged Got nge ku piin ni der ma fol ko thin nib fel’.” “Bay ra gafgowgad ko gechig ni ngan pi’ ngorad ni aram e gafgow ni ngan thang owcherad ndariy n’umngin nap’an.” (2 Thessalonika 1:6-9) Ngemu’ ma pi tapigpig rok Jehovah nra magaygad nib fas e rayog ni nge yog ngorad e yafas ni ri dariy e girdi’ nra magawonnagrad, ma “dariy e t’ufeg rorad ko fel’ ngak e girdi’.”—2 Timothy 3:1-3.
Mu Folwok Rok Jehovah u Rogon ni Ma Dag e Ngongol nib Fel’
21. Mang fan ni susun ngada daged e tin nib fel’ ban’en?
21 Dariy e maruwar riy ni bay boor i fan ni ngada pininged e sorok ngak Jehovah ma ngad pininged e magar ngak nbochan e tin nib fel’ ni ma dag. Gadad ni gadad e pi tapigpig rok, e gathi susun ni ngada rin’ed ni mus mus rogodad riy ni ngada daged e re felngin ney? Arrogon, ya Paul ni apostal e ke fonownag e pi walag ni Kristiano ni gaar: “Thingar um guyed rogon ni gimed be folwok rok Got, ni bochan e gimed pi fak ni gimed ba t’uf rok.” (Efesus 5:1) Chitamangidad u tharmiy e be ulul iyan ni be dag e fel’ ngak e girdi’, ma ku arogodad.
22. Mang e gad ra weliy ko bin migid e article?
22 Faanra kada ognaged gadad ku Jehovah u polo’ i gum’irchadad, ma dariy e maruwar riy ni ri gad baadag ni ngada folwokgad rok u rogon ni ma dag e tin nib fel’ ban’en. Bochan gadad pifak Adam ni en tadenen, ma de mom ngodad ni ngada rin’ed e tin nib mat’aw. Machane bin migid e article, ma gad ra nang ko mang fan nrayog rodad ni ngada daged e fel’ ngak e girdi’. Maku gadra weliy boch e kanawo’ nib thilthil nrayog ma susun ni ngada folwokgad rok Jehovah—ni ir e en nth’abi fel’ rogon ni ma dag e fel’ ngak e girdi’.
Uwrogon ni Ngam Pi’ e Fulweg?
• Mang e tin fel’ ban’en?
• Mang thin nu Bible ni be gagiyelnag u rogon ni ma dag Got e tin nib fel ban’en?
• Mang boch e kanawo’ ni dag Jehovah e tin nib fel’ ban’en?
• Mang fan ni thingarda folwokgad rok Jehovah rogon ni dag e tin nib fel’ ban’en?
[Picture on page 12]
I gechignag Jehovah e girdi’ rok kakrom ya bochan dar folgad ko thin ni ka rogned ni be pining e sorok ngak Got
[Picture on page 12]
Piin nib yul’yul’ ni ka ba’ e kar sulod nga Jerusalem
[Picture on page 13]
I rung’ag Moses e thin ni be weliy rogon ni ma dag Got e tin nib fel’ ban’en ni yira ngat ngay
[Picture on page 15]
Kan guy rogon ni ma dag Jehovah e tin nib fel’ ban’en u kanawo’ ni ma pingegdad u daken e thin nu Bible