“Mired Ngog, . . . Mu Gu Baudegmed”

‘Ra un i Machibnag fare Thin’ Ma ra Baudegney

BE’ nib moon nib flont ni keb ni nge rin’ ba maruwel ni rib ga’ fan. Rib manging’ e pi kanawoen e fonow rok ma aram “mi ri gin e pi girdi’ ni yoor nem nga rogon kanawoen ni ma skulnag e girdi’.” (Matthew 7:28, New World Translation) Maku Ir ba tamachib ni der ma magar. Tayim rok, nge gelngin, nge pi n’en ni ba’ ni fan ko machib u murung’agen Gil’ilungun Got. Ri ba riyul’, ni Jesus Kristus e i milekag u gaangin yang e nam rok ni ba tamachib ma ba senseyey ni dariy ban’en ni rayog ni ngan taareb rogonnag ngak.—Matthew 9:35.

N’en nib Jesus ni nge rin’ nib gur ma baga’ fan e nge machibnag “fare thin nib fel’ ni murung’agen e gil’ilungun” ko girdi’ ko ngiyal’ nem me fal’eg rogon pi gachalpen ngaki yog ni ra rin’ed e re maruwel nem u gaangin yang e fayleng. (Matthew 4:23; 24:14; 28:19, 20) Gur rayog ni malngin e machib ni ka nog ngorad ni ngar rin’ed nge feni gur nge feni ga’ fan nge feni ga’ yang e gin ni ngar maruwelgad riy e ra chuchiy nga but’ pi gachalpen ni dar flontgad ma bay e gin ra mus gelngirad riy?

Ri danga’! Tomuren ni ke yog rogon ngak pi gachalpen ni nga ura meybilgad ngak “fare Masta ko mokun woldug,” Jehovah Got, ni ngaki pi’ boch e girdien e maruwel ni mokun woldug, ma aram me pi’rad Jesus nga ranod ni ngar skulnaged e girdi’. (Matthew 9:38; 10:1) Me yognag ngorad ni ngar pagedan’rad ngak ya re maruwel nem ni kar manged pi gachalpen—ni kub muun ngay e machib ni kan pi’rad ngay e—ra yibnag e baudan’ nib gel nge pagan’ ngorad. I gaar Jesus: “Mired ngog, . . . mu gu baudegmed.”—Matthew 11:28.

Gin Ma Yib e Falfalan’ Riy

Uw feni mu runguy, ma ba t’ufeg, ma ba gol e binem e pong! Be weliy rogon feni gel ni ma lemnag Jesus pi gachalpen. Pi gachalpen e ra pirieged e baudan’ u nap’an nra rin’ed e maruwel rorad ni machibnag “fare thin nib fel’” ni murung’agen Gil’ilungun Got. Re n’eney e ri falfalan’nagrad me fel’ u wan’rad.—John 4:36.

Um’on nib Jesus nga fayleng, me yog e Bible ni falfalan’ e thingari gagiyel ko pigpig ku Got. Re n’eney e ni tamilangnag u nap’an ni i tang fa en tamatang ni gaar: “Mu tolulgad nga mogned e sorok ku Jehovah, ni gimed gubin e girdi’ nu fayleng. Mu pigpiggad ngak Jehovah u fithik’ e falfalan’. Mired nga p’eowchen ni gimed be tolul nib bochan e falfalan’.” (Psalm 100:1, 2, NW) Chiney, ma girdi’ ko gubin e nam e yad be falfalan’ ku Jehovah, ma rogon ni yad be pining e sorok ngak e bod e tolul ni falfalan’ u barba’ i salthaw ni kar gelgad. Piin rriyul’ ni yad ba yul’yul’ ku Got e yad be yib ngak ni “yad be tolulnag e falfalan’.” Ma rib puluw, rriyul, ya Jehovah e “ba Got nib falfalan’,” nib adag e pi tapigpig rok ni ngar pirieged e falfalan’ ni yad be rin’ e tin kar ognaged ngak.—1 Timothy 1:11.

Pi Tamachib ni kan Baudegrad

Ra diin me yog ni maruwel nib gel ni yibe machib i yan e der ma awparowdad riy machane be baudegey? Rogon ni yog Jesus ra ngan rin’ e maruwel rok Jehovah ma bod rogon e ggan ni be pi’ gelngiy. I gaar: “Ggan rog e nga gu rin’ e n’en nib m’agan’ e en ke l’ugeg ngay nge nggu mu’nag e maruwel rok.”—John 4:34, NW.

Ni bod, ni pi Kristiano ni yad e tamachib e chiney e yad ba pasig ni yad be “machibnag fare thin.” (2 Timothy 4:2) Connie, ni be’ nib ppin nib Kristiano ni ke taw nga yangaren ni ma pag e 70 e awa ni ma maruwel ni machib u lan reb e pul, e yog ni gaar: “Tomuren ni kar gu tayan’ug ko machib, me yib e lem ngog ni ke fel’ u wan’ug e n’en gu be rin’ ma kugu falfalan’, ni ku yugu ra kugu magar u tomuren e maruwel u reb e rran.”

Ma uw rogon ni faanra fare thin ni murung’agen e gil’ilungun e de adag e girdi’? Ki ulul Connie ngay ni gaar: “Yugu demtrug be motoyil be’ fa dangay, ma ri dariy ba ngiyal’ ni goma nga kugu kalngan’ug ni gu be un ko machib. Gathi kemus ni gu manang ni gu be rin’ e tin baadag Jehovah, ya kugu be falfalan’ ngay ni gu be weliy murung’agen e tin riyul’ ya nap’an ni gu ra rin’, ma fare athap nib fel’ ni bay u lan e Bible e be gel u lan gum’irchaeg.”

Boch e girdi’ e kar pirieged ni ngan ayuweg boch e grdi’ ngar nanged e tin riyul’ u murung’agen Got e ke pi’ fan e birorad e yafas. Meloney, ba rugod ni ma pi’ 50 e awa reb e pul ko maruwel ni machib, e gaar: “Fare machib e ma fal’eg lanin’ug ya ma pow’iy ma ma pi’ fan e yafas rog. Magawon rog nge mochuch ko yu rran e ma m’ay nga bayang koo ngiyal’ ni gu be un ko fare maruwel.”

Millicent, ku reb e tamachib nib pasig ni reb e Pi Mich rok Jehovah, e gaar: “Fare machib e ma yibnag felngin reb e rran nge reb ni faan gu ra weliy ngak boch e girdi’ e pi n’en nib m’agan’ Got ngay ni fan ko girdi’ mu gu weliy ngorad rogon ni bay kun fal’eg e Paradis u fayleng. Re n’eney e ribe riyul’nag Jehovah u wan’ug ni yu rran ma be pi’ e gapas nge falfalan’ u fithik’ag ni dabiyog ni nge yog ngog u yugu ban’en.”

Piin ni ke Yog e Baudan Ngorad

Pi tamachib ko Gil’ilungun e rib mudugil ni ke baudan’rad ko fare machib ko Kristiano, ma piin kar adaged e re thin nib aram ni ra pi’e yafas e ke fel’ rogorad riy. Yugu aram rogon ni reb e sensey nu Portugal ni skulnag e sebester nge prist, ma ka be lemnag ni tirok Got ban’en nib t’uf rok e dawori fel’ rogon ko birok e galesiya. Pi deer rok u lan e Bible e kaba’ ni dan pi’ e fulweg riy. Ma ra tababnagew reb e Pi Mich rok Jehovah e fol Bible me yibnag e tamilangan’ ko yu bugithin u Bible nib bbug nge bbug. Ma kari gin fare sensey. I gaar: “Ri gu ma par ni gu be sonnag e fol Bible rog ni gubin e dalip fen maruwel,” “ma aram min fulweg e pi deer rog ni reb nge reb ni be micheg e thin u Bible.” Chiney, ma re ppin ney e ke ognag ir ke mang reb e tapigpig ku Jehovah, maku arrogon ir ni ku be baudeg boch e girdi’ ko tin rriyul’ u Bible.

Ba tamilang, ni, Pi Mich rok Jehovah e gathi ban’en ni kaygi pag gelngin e maruwel ko machib ni kan pi’ ni ngar rin’ed fa gaangin yang e gin ngan machib riy. Maku arrogon ni ku ra dabun be’ ara be togopuluw be’ maku der ma magawon nagan’rad. Yad ba gel ni kar tayedan’rad ko machib ko Gil’ilungun ni kan pi’ ngorad. Yad ma yog e re thin nib fel’ nem ko girdi’ ni yugu demtrug e gin kar mada’gad riy—ko gin ma tal e karro ni gagang’ riy u Meriken (1), gin ma aw e skoki riy u Korean (2), u fithik’ e burey u Andes (3), fa market u London u England (4). Piin ni yad be lek Jesus e ngiyal’ ney e ri yad ba falfalan’ ni yad be mur weliy e maruwel rorad ni ba’ puluwon u gaangin yang e fayleng. Ma rriyul’ ya bod ni micheg, ke baudegrad ma ke fanayrad ni nga kur baudeged boor e girdi’.—Revelation 22:17.