Mu Pagan’um ku Jehovah Fare Got ni Ir e Ba Riyul’
Kamu changar nga lan e lang u reb e nep’ ni dariy e manileng mag guy bokum miriay e t’uf? Uw rogon ni ga be lemnag rogon ni yad be par?
NAP’AN ni ra gapas ni nep’, me non fapi t’uf ngak David ni Pilung ni kakrom u Israel, ni yad be gur ngak ni nge yol ni nge gaar: “Pi tharmiy e yad be garareg felngin Got; ma fare lan e lang e be dag e tin ke rin’ u pa’.” (Psalm 19:1, New World Translation) Arrogon, fa eni Tasunmiy ma gathi pi n’en kan sunmiy e “ba rogon ni nga nog e sorok ngak min tay fan nge gelngin nib gel.”—Revelation 4:11; Roma 1:25.
“Mi Got e ir e ke sunmeg urngin ban’en,” ara’ e n’en ni yog e Bible. (Hebrews 3:4) Ri arrogon, fa bin riyul’ e Got, ‘ni fithingan e Jehovah, e ir e eni Th’abi Tolang u daken e fayleng ni polo’.’ (Psalm 83:18, NW) Ma gathi yibe susunag ban’en—ni de riyul’. I Jesus Kristus e yog murung’agen e Chitamangin u tharmiy, ni Jehovah ni gaar: “Ya en ni ke l’ugeg ku gub e ba riyul’.”—John 7:28.
Jehovah—Faan ni Ma Rin’ e Tin ni ke Lemnag
Fithingan Got ni kari maagirag, ni Jehovah, e bay u Bible ni goo Hebrew Scripture ma ba chugur i 7,000 yay ni bay riy. Fani yoor e re ngochol nem e be dag nib riyul’. Fan e re bugithin ni baaram ni fithingan Got e “Ir tapgin me Yib.” Me fal’eg Jehovah Got i weliy murung’agen ni aram e ir faanem ni ma rin’ e tin ke lemnag ni nge rin’. Ma nap’an ni fith Moses fithingan Got, me fal’eg Jehovah i weliy fan ni baaray rogon ni gaar: “I gag e baygu micheg e n’en kugu micheg ni nga gu mang.” (Exodus 3:14, NW) Ma rogon ni piliyeg Rotherham e ri yog ni gaar: “Baygu Mang e n’en Gu baadag ni nga Gu Mang.” Jehovah e ra micheg ir, ara mel’eg ni nge mang, e n’en nib t’uf ni nge mang ni nge riyul’nag mat’awun nib mat’aw nge pi n’en ni ke micheg. Arfan, ni be fek fithingan bogi liw nib fel’ ma boor ni aram e, Tasunmiy, Matam, Somol ni Th’abi Tolang, Ani ta Pow’iyey, Jehovah ko pi salthaw, Ani ma motoyil ko Meybil, Tapuf Oloboch, Tafonow ni Th’abi ga’, Ani ta Biyul.—Judges 11:27; Psalm 23:1; 65:2; 73:28; 89:26; Isaiah 8:13; 30:20; 40:28; 41:14, NW.
Kemus ni goo bin riyul’ e Got e rayog ni ngan pining Jehovah ngak, ya girdi’ e dabiyog ni ngari mich u wan’rad ni n’en ni kar lemniged e ra yan i aw nib fel’ rogon. (James 4:13, 14) Kemus ni goo Jehovah e rayog ni nge yog ni gaar: “Ri bod rogon e n’uw ni be yib nga but’, nge fare ayis, u tharmiy ma dabi sul bayay ko re gi n’enem, ni faanra dabi tarannag e but’ nge yog ni pi’ e tin ma pi’ ma awoch, e ni pi’ ko ani ma wereg e awoch ma flowa e ni pi’ ko ani ma abich, e re ku arrogon e thin rog ni ma yib u l’ugunag ni kub mich ni aram rogon. Dabi sul ngog ni dariy angin, ya rib mich ni ra rin’ e n’en ni ir e ba m’agan’ug ngay, ma ri ra fel’ rogon i rin’ rok e n’en ni kug l’og ni nge rin’.”—Isaiah 55:10, 11, NW.
Jehovah e ma rin’ e tin ke lemnag ni rib mudugilan’ ngay ni ra fel’ ni ku arrogon e tin ni gomanga be lemnag e girdi’ ni de riyul’ ya ba riyul’ e p’eowchen. Ke n’uw nap’an ni kem’ Abraham, Isak, nge Jakob, me yograd Jesus ni gaar: “I ir [Jehovah] e ba Got, ni gathi Got ko piin kar m’ad, ya Got ko piin ni ka yad ba fas, ya yad gubin ni ka yad ba fas u puluwon.” (Luke 20:37, 38, NW) Fa dalip i patriarchs ni yad ba yul’yul’ ni kar m’ad, machane n’en ni ke lemnag Got ni nge fasegrad ko yam’ e rib mudugil ni ra rin’ e re rogon u p’eowchen Got e yad ba fas ya ba mudugil ni ra fasegrad. Re n’eney ni ngan fulweg e pi tapigpig ney nib yul’yul’ ngar fasgad e ri de mo’maw’ rok Jehovah ni nge rin’ ni bod ni ku de mo’maw’ rok ni sunmiy e bin som’mon e pumoon ko fiyath u but’.—Genesis 2:7.
Apostal Paul e ki pi’ reb i rogon ni riyul’ ni Got e ma n’amun e n’en ke lemnag ngan rin’. U lan e Bible, e Abraham e ni pining ni “chitamangin boor e nam.” (Roma 4:16, 17, NW) Nap’an ni dariy e bitir rok Abram, me thiliyeg Jehovah fithingan ni Abraham, ni fan e “Chitamangin e girdi’ ni boor (Pire’ ni pire’).” Jehovah e k’aring fan e re ngochol nem nge yibi riyul’ ni baaram ni ba maangang ye fulweg rogon downgin Abraham nge ppin rok, ni kar pillibthirgow ngaki yog ni kur fakayew e bitir.—Hebrews 11:11, 12.
Kan pi’ gelngin nib gel nge mat’awun, ma aram e Jesus Kristus e i weliy e tin riyul’ u reb e dodow ni kab tolang e sap riy ko girdi’. Yugu aram rogon ni fager rok ni rib chuchugur ngak ni Lazarus e ke yim’, me yog Jesus ngak e pi apostal rok ni gaar: “Lazarus ni fager rodad e ke yan i toffan, machane nga gu wan ngaram nggu pug nge od ko mol ni ke tay.” (John 11:11, NW) Mang fan ni be weliy Jesus murung’agen be’ nib yam’ ni kemus ni be mol?
Nap’an ni taw Jesus ko binaw rok Lazarus u Bethany, me yan ko fare malang me yog ni ngan chuweg fare gaf i malang ni upungen fare low. Tomuren ni ke meybil nib ga’ laman, me non ni gaar: “Lazarus, moy nga wen!” Ma piin ni yad be changar ni yad be sap ko fare malang, “me yib fare yam’ nga wen, ni kan ing pa’ nruw raba’ nge ay ko mad ko gum’eyag, ma ka ni bachiy bangi mad nga owchen.” Me gaar Jesus: “Mpithiged e mad u downgin nge yan.” (John 11:43, 44) Jesus e faseg Lazarus ko yam’—i fulweg e yafas ngak be’ nib moon ni ke yim’ ni ke gaman e aningeg e rran! Kristus e de thiliyeg e n’en ni yog ni riyul’ ni faani gaar fager rok e ke mol. Rogon rok Jehovah nge Jesus, e yam’ ni Lazarus e bod ni kaygi mol. Arrogon, Jesus nge Chitamangin nu tharmiy e yow ma rin’ e tin ba riyul’.
Jehovah e Rayog ni nge Pingeg e Athap Rodad nge Riyul’
Uw feni ga’ e thil u thilin e pi liyos, nge fare Got nib riyul’! Piin yad ma liyor ko liyos e kar olobochgad kar tayed ni ba’ gelngin e pi n’en ni yad be tay fan nib gel nga gelngin e girdi’. Demtrug gelngin e ta’ fan, ni, yira tay ko pi liyos me yog ni ngeb gelngirad ni ngar rin’ed boch e maangang. Maku reb e, Jehovah Got e ba mat’aw ni rayog ni nga i yog murung’agen e pi tapigpig rok ni kar m’ad kakrom ni faan gowa ki yad ba fas, ya rayog rok ni ngaki pi’ e yafas ngorad bayay. “Riyul’ ni Jehovah ir Got,” ma dabi bannag e girdi’ rok.—Jeremiah 10:10, NW.
Uw feni fel’ ni ngan nang ni bay i taw nga nap’an u wan’ Jehovah, ma pi yam’ ni yad bay ko lem rok e bayni fasegrad—ngan sulwegrad ko yafas! (Acts 24:15) Arrogon, fas ko yam’ e ba l’ag rogon ko ngan fulweg rarogon e yafas rok be’ ngak. Ngam lemnag ni rarogon e yafas ko piin kar m’ad nge ngan fasegrad e gathi magawon u puluwon e eni Tasunmiy, ni dariy e gini mus e gonop rok nge gelngin riy. (Job 12:13; Isaiah 40:26) Bochan ni Jehovah e ba gel e runguy rok, ma aram e bayi fana’ e lem rok nib flont nge sulweg e piin kar m’ad ko yafas nga daken ba fayleng ni ba paradis ni kar ragon rarogorad ni ur moyed u m’on ni ra m’ad.—1 John 4:8.
Nap’an ni be chugur i yib tomuren e birok Satan e fayleng, ma tin ka ba’ nga m’on e ri be tamilang i yan ko piin ni yad be pagan’rad ko bin riyul’ e Got. (Proverbs 2:21, 22; Daniel 2:44; 1 John 5:19) Fa ani tamatang e micheg ngodad ni gaar: “Ka bochuw ni daki n’uw nap’an, ma piin kireb e bayi m’ay; . . . ma piin nib sumunguy e yad e bay ra tafanayed e fayleng, ma rib mudugil ni yad ra pirieg e falfalan’ nib gel u fithik’ e gapas.” (Psalm 37:10, 11, NW) Ma cham nge bugel e ra yan i aw ni bogi n’en ko tin kakrom e rran. Ma tin nib ba puluw e bay un rin’, ma magawon ko par nge girdi’ e bayi m’ay. (Psalm 37:6; 72:12, 13; Isaiah 65:21-23) Urngin i chachubungen e totoogor u thilin e par ko girdi, raen dow e girdi’ yu ulung i girdi’ nge yuraba’ i girdi’ e bay ni thang. (Acts 10:34, 35) Mahl nge tatalin e cham ko mahl e bayi m’ay. (Psalm 46:9) Re ngiyal’ i n’enem e “dakuriy be’ ni nge yog ni nge gaar: ‘Kugu m’ar.’” (Isaiah 33:24, NW) Urngin e girdi’ e bayra falfalan’gad ya kar flontgad ma ke fel’ fithik’ i dowrad. (Revelation 21:3, 4) Paradis u fayleng e dabki n’uw nap’an ma bay yib i m’ug nib riyul’. Ya Jehovah e ke lemnag!
Arrogon, urngin e pi athap ni ba’ u Bible e dabki n’uw nap’an me lebug. Ere mang fan ni ngad paged gadad nge bannagdad e pi n’en ni kan pagan’uy ngay ko re fayleng ney ni rayog ni ngad pagedan’dad ni polo’ ngak Jehovah? I ir e ba m’agan’ ngay “ni urngin mit e girdi’ e thingar ni ayuweg ngar nanged e tin riyul’.” (1 Timothy 2:3, 4) Ko bin baaray ni ngad pied e tayim rodad nge tin ba’ rodad nga fon, ara bogi n’en de riyul’, ko re m’ag ney nge pi got riy, e re nge ga’ e tamilangan’ rodad ko fare Got nib riyul’ ma gad pagan’dad ngak u polo’ i gum’irchadad.—Proverbs 3:1-6; John 17:3.
[Picture on page 6]
Rogon ni be sap Jehovah nge Jesus ngay, e Lazarus e kemus ni be mol
[Pictures on page 7]
Paradis u fayleng e dabki n’uw nap’an me riyul’