Mu Par Ni Ga Be Dag E Fel’ Ngak E Girdi’

“Fapi woom’engin e tamilang e ba muun ngay urngin mit e tin nib fel’ nge tin nib mat’aw ban’en nge tin riyul’.”—EFESUS 5:9, New World Translation.

1. Uw rogon ni dag bokum milyon e girdi’ nib fel’ e thin ni bay ko Psalm 31:19 u wan’rad?

BAN’EN th’abi fel’ ni rayog ni nge rin’ e girdi’ e ngara n’ufed Jehovah. Ngiyal’ ney, ma bokum milyon e girdi’ e ma rin’ ni aram rogon ya yad be pining e sorok ngak Got nbochan e ir e ba fel’ ngak e girdi’. Gadad e Pi Mich rok Jehovah nib yul’yul’, e kari fel’ u wan’dad e n’en ni yog fare psalmist u nap’an ni be yon’ e tang ni gaar: “Uw feni gel rogon ni ga ma dag e tin nib fel’, ni aram e n’en ni kam chaariy ni fan ko piin ni bay madgum u wan’rad!”—Psalm 31:19.

2, 3. Mang e ra buch nfaanra fare maruwel rodad ni ngan pingeg e girdi’ ngar manged pi gachalpen e de chag ngay e ngongol nib fel’?

² Madgun Jehovah nib muun ngay e tayfan nib gel e ra k’aringdad ni ngad pininged e sorok ngak nbochan e ba fel’ ngak e girdi’. Maku ra k’aringdad e re n’ey ni ‘ngada pininged e sorok ngak Jehovah, ma ngada pininged e sorok ngak, ni ngada machibnaged e flaab ko gagiyeg rok.’ (Psalm 145:10-13) Arfan ni gad be wereg e machib ko Gil’ilungun ma gad ma pingeg e girdi nge mang gachalpen u fithik’ e pasig. (Matthew 24:14; 28:19, 20) Riyul’ ni, maruwel rodad ni ngan wereg e machib e susun ni ngan uneg ngay e ngongol nib fel’. Faanra danga’, ma gad ra kirebnag fithingan’ Jehovah nib thothup.

³ Boor e girdi’ e ma yog ni yad be liyor ku Got machane ngongol rorad e de puluw ko kenggin e motochiyel ni bay ko Thin rok ni kan thagthagnag. Murung’agen boch e girdi’ ni ngongol rorad e de puluw ko thin nib fel’ ni yad ma yog, me yol Paul ni apostal ni gaar: “Ga be machibnag boch e girdi’ - mang fan ndab machibnagem? Ga be machibnag ni be lungum, “Dab ni moro’ro’” - me gur ga ma moro’ro’ fa? Be lungum, “Dabmu mu pirew be’ ni gathi mabgol rom” - me gur gimew be par be’ ni gathi mabgol rom fa? . . . Ya be gaar e babyor ni thothup, “Piin ni gathi yad piyu Israel e yad be yog e thin nib kireb nga fithingan Got ni bochan e ngongol romed piyu Israel.”—Roma 2:21, 22, 24.

4. Mang e ra rin’ e ngongol rodad nib fel’ ngak yugu boch e girdi’?

⁴ Dabda rin’ed e n’en nra kirebnag fithingan Jehovah, ya ngada athamgilgad ni ngad pininged e sorok ngak u daken e ngongol rodad. Bay ban’en nra rin’ e re n’ey ngak e piin ni gathi yad bang ko ulung rodad ni Kristiano. Ya reb, ma ra ayuweg e re n’ey ni nge th’ab gulungan e piin tatogopuluw. (1 Peter 2:15) Ma n’en ni ri baga’ fan, e ra ayuweg e ngongol rodad ni nge adag e girdi’ e ulung rok Jehovah, ma kan bing e kanawo’ ngorad ni ngara pininged e sorok ngak me yog ngorad e yafas ni dariy n’umngin.—Acts 13:48.

5. Mang boch e deer ni gad ra weliy e chiney?

⁵ Bochan daworda flontgad, uw rogon ni ngada siyeged e ngongol nra dariyfannag Jehovah ma ra warnag laniyan’ e piin ni be gay e tin riyul’? Riyul’, uw rogon ma rayog rodad ni ngada daged e fel’ ngak e girdi’?

Reb e Wom’engin e Tamilang

6. Mang boch ko fapi n’en ni “yima rin’ ni tin ndabi yib fan ban’en nib mil suwon nga fithik’ e lumor,” machane mang boch wom’engin e susun ni nge m’ug u fithik’ e piin Kristiano?

⁶ Gadad ni gadad e Kristiano ni kad ognaged gadad, ma kada fanayed ban’en ni ke ayuwegdad ni ngada siyeged e “tin ndabi yib fan ban’en nib mil suwon nga fithik’ e lumor.” Mab muun ngay boch e ngongol ni ma dariyfannag Got ni bod e malulfith, nge moro’ro’, nge thin ni ra kirebnag be’, nge un nog e thin nib puwlag, nge ngongol ni yira tamra’ ngay, nge gosgos ni ma yog e thin ni puwlag, nge ngan balyang ko wain. (Efesus 4:25, 28, 31; 5:3, 4, 11, 12, 18) Dabda uned ko pi ngongol ney, ya ngada “ngongolgad ni bod rogon e girdi’ nib mil suwrad ko tamilang.” I yog Paul ni apostal ni “tamilang e boor e wom’engin urngin mit e fel’, nge mat’aw, nge tin riyul’ ni ma pi’. (Efesus 5:8, 9) Ere gad ra yan ko tamilang ma aram rayog rodad ni ngada ululgad i dag e fel’ ngak e girdi’. Machane mit i mang e tamilang e re n’ey?

7. Mang e thingarda rin’ed ni fan nrayog ni ngada ululgad i dag wom’engin e ngongol ni fel’ ngak e girdi’?

⁷ Demtrug rogon ndaworda flontgad, rayog ni ngada daged e fel’ ngak e girdi’ nfaan gad ra yan ko tamilang ni tin spiritual ban’en. “Thin rom e ba magal ni be pow’iyeg, me ir e tamilang ko kanawo’ ni gu be yan riy,” i yon’ fare psalmist e tang ni aram rogon. (Psalm 119:105) Faanra gad baadag ni ngada ululgad i dag e “wom’engin e tamilang” u daken “urngin mit e fel’ ngak e girdi’,” ma susun ni ngada fanayed fare tamilang nib spiritual ni bay ko Thin rok Got, ni kan yaliy nib fel’ rogon u lan e pi babyor ko Kristiano, ma yibe weliy u nap’an e muulung rodad. (Luke 12:42; Roma 15:4; Hebrews 10:24, 25) Maku ba t’uf ni ri ngada tiyan’dad ko ngongol ni dag Jesus Kristus nge tin ni ke fil ngak be’, ya ir fare “tamilang ko girdi’ nu fayleng” ma “yira guy ramaen [Jehovah] ni be galgal ramaen u daken.”—John 8:12; Hebrews 1:1-3.

Wom’engin e Kan ni Thothup

8. Mang fan rayog rodad ni ngada daged e fel’ ngak e girdi’?

⁸ Fare tamilang ni tin spiritual ban’en e mmutrug nra ayuwegdad ni nge yog rodad ni ngada daged ni gadad ba fel’ ngak be’. Maku reb, rayog ni ngada daged e re felngin n’ey ya bochan kan ni thothup rok Got ara gelngin e be pow’iydad. Fel’ ngak e girdi’ e ir “bang ko fare wom’engin e kan ni thothup.” (Galatia 5:22, 23) Faan gad ra fol u rogon ni be pow’iydad fare kan ni thothup rok Jehovah, ma bochan e re n’ey e rayog ni nge yog ngodad wom’engin ni e fel’ ngak e girdi’ nyira ngat ngay.

9. Uw rogon ni ngada ngongolgad nrogon nib puluw ko thin rok Jesus ni bay ko Luke 11:9-13?

⁹ Bochan ri gad baadag ni ngad falfalan’naged Jehovah ma gad ra dag wom’engin e kan ni thothup ni fel’ ngak e girdi’ ma susun aram e n’en ni ra k’aring’dad ni ngad rin’ed e tin nib puluw ko thin rok Jesus ni gaar: “Mu ninged, mi gimed pirieg; mu tugtuguyed e mab, min bing e mab ngomed. Ya gubin e girdi’ ni yad ra ning ban’en e rayog ngorad, ma en nra gayiy ban’en e re pirieg, ma mab e yira bing ngak e en nra tugtuguy. Rayog ni nge pi’ bigimed e pi matam ba porchoyog ngak fak ni faanra ning fak e nig ngak? Ara pi’ e skorpion ngak ni faanra ning ba pi fak e nimen ngak? Yugu ereyer fanmed [dawora flontgad arfan ni ku ka nog ni yad ba] kireb, ma gimed manang rogon ni ngam pied e tin nib fel’ ban’en ngak pi fakmed. Ere en ni Chitamangiy ni bay u tharmiy e ri ra pi’ fare Kan ni Thothup ngak e piin ni ra ning ngak!” (Luke 11:9-13) Ngada folgad ko fonow ni pi’ Jesus ma ngada yibilayed fare kan ni thothup rok Jehovah ma aram rayog rodad ni ngada daged wom’engin e re fel’ ngak e girdi’ ney.

“Mu Par ni Gimed Be Rin’ e Tin nib Fel’”

10. Mang bang ko ngongol rok Jehovah ni fel’ ngak e girdi’ e kan weliy ko Exodus 34:6, 7?

¹⁰ Bochan e tamilang ko tin ba spiritual ban’en nge ayuw ko kan ni thothup rok Got, ma rayog rodad ni “ngada ululgad i rin’ e tin nib fel’.” (Roma 13:3) U daken e fol Bible, ma rayog ni nge tamilang u wan’dad rogon ni ngada folgad rok Jehovah u rogon ni ma rin’ ban’en. Fare article ni ke yan e weliy murung’agen yu yang ko felngin Got ni ir ba fel’ ngak be’ ni bang ko thin ni kan weliy ngak Moses ni bay ko Exodus 34:6, 7, (NW) ma rayog ni ngada bieged ni gaar: “Jehovah, Jehovah, e Got ni tarunguyey mab fel’ ngak e girdi’, mab sasagaal ni nge damumuw ma ri ma dag e t’ufeg nge gol nge tin riyul’, ma ma chaariy e t’ufeg nge gol ni fan ko bokum biyu’ e girdi’, ma ma n’agfan e oloboch, nge kireb, nge denen, machane dabi pag ni dabi gechignag be’ nib kireb.” Ra ngada filed nib fel rogon e pi n’en ney ni yu yang i felngin Jehovah ni fel ngak e girdi’ ma ra ayuwegdad ni ngada pared ni ngada ululgad i “rin’ e tin fel’.”

11. Mang e ra rin’ ngodad fare n’en ni kada nanged ni Jehovah e ir Got ni tarunguyey mab fel’ ngak e girdi’?

¹¹ Re thin rok Got ney e be ayuwegdad ni ngari tamilang u wan’dad nib t’uf ni ngada folwokgad rok Jehovah nib tarunguyey mab fel ngak e girdi’. “Nge falan’ e piin ni yad ma runguy e girdi’, ya ra runguyrad Got,” me ulul ngay ni gaar, “ya ra runguyrad Got.” (Matthew 5:7; Luke 6:36) Bochan gad manang ni Jehovah e ba fel’ ngak e girdi’, ma aram kan k’aringdad ni ngada daged ni ngad fel’gad nrogon ni gad ma rin ban’en ngak yugu boch e girdi’, mab muun ngay e piin ni gad be machibnag. Ba puluw e re n’ey ko fonow ni pi’ Paul ni gaar: “Ma gubin ngiyal’ nthingar umogned e thin ngorad nib fel’ ma ba’ fan, ma thingar mu nanged rogon ni ngam pied e fulweg nib mat’aw ngak urngin e girdi’ ni ke fith boch e deer ngomed.”—Kolose 4:6.

12. (a) Bochan ni Got e ba sasagaal ni nge damumuw, ma susun nge uw rogon e ngongol rodad ngak yugu boch e girdi’? (b) T’ufeg rok Jehovah nge gol e ra k’aringdad ni ngada rin’ed e mang?

¹² Bochan ni Got e ba sasagaal ni nge damumuw, ma tafinay rodad ni ngada “ululgad i rin’ e tin nib fel’” e ra k’aringdad ni ngada gum’an’gad ko oloboch ni rin’ e pi walagdad ma ngada tedan’dad ko ngongol rorad nib fel’. (Matthew 7:5; James 1:19) T’ufeg nge gol rok Jehovah e ra k’aringdad ni ngada daged e t’ufeg nib yul’yul’, ni mus nga nap’an ni keb e skeng ngodad nib gel. Mmutrug ni ireray e n’en nrib fel’.—Proverbs 19:22.

13. Uw rogon ni ngada ngongolgad nrogon ni gad be dag ni ‘kari sug’ Jehovah ko thin riyul’?

¹³ Bochan Chitamangidad nu tharmiy e ‘ke sug ko tin riyul’,’ ma gad baadag ni ngada pied gadad ngak ni gadad e pi tapigpig rok u daken e thin riyul’ ni gad ma yog.’ (2 Korinth 6:3-7) Ma bang ko fa medlip i n’en ni dabun Jehovah e aram “ba yunmon ni ma lifith e thin” nge “reb e mich nib ni ma lifith ligin ni ma wereg e thin nde riyul’.” (Proverbs 6:16-19) Ere tafinay rodad ni ngada falfalan’naged Got e ke k’aringdad ni ngada ‘n’aged e tin nde riyul’ ma nga dogned e thin riyul’.’ (Efesus 4:25) Yibe athapeg ni dariy ban’en nra talegdad ni ngada daged e fel’ ngak e girdi’ ya ireray e kanawo’ nib ga’fan.

14. Mang fan ni thingarda n’aged fan u wan’dad e kireb ni kan rin’?

¹⁴ Thin ni yog Got ngak Moses e ku susun ni nge k’aringdad ni ngada n’aged fan e kireb ku be’, ya bochan Jehovah e ma n’agfan e kireb ni kan rin’. (Matthew 6:14, 15) Riyul’, ni ma gechignag Jehovah e piin tadenen ni dabi kalngan’rad. Ere thingarda tolangnaged e kenggin e motochiyel rok ni fan ko fel’ ngak e girdi’ nrogon nib m’ag ko ngan par nib klin e ulung ko tirok Got.—Leviticus 5:1; 1 Korinth 5:11, 12; 1 Timothy 5:22.

“Ngarim Kol Ayuw”

15, 16. Uw rogon ni fonow ni pi’ Paul ni bay ko Efesus 5:15-19 e ra ayuwegdad ni ngada ululgad i rin’ e tin fel’ ngak e girdi’?

¹⁵ Rogon nrayog ni ngada daged e fel’ ngak e girdi’ nyugu aram rogon ni bay e tin nib kireb ni be liyegdad, ma aram ba t’uf ni ngari par e kan ni thothup rorad ma ngada koled ayuwngidad uw rogon ni gad be yan. N’en nib puluw ngay, e rogon ni fonownag Paul e piin Kristiano u Efesus ni gaar: “Ere um ayuwgad u rogon e ngongol romed. Dab um ngongolgad ni bod e girdi’ ndawori tamilangan’rad, machane nguum ngongolgad ni bod rogon e girdi’ nib gonop. Urngin yay nra mab e kanawo’ ngomed ma ngam maruwelgad ngay ni fan ko tin nib fel’, ya tiney e rran e mmo’maw’. Ere dab mpired ni gimed balyang, ya ngam guyed rogon ngam nanged e n’en nib m’agan’ Somol ngay ni ngam rin’ed. Dabmu balyanggad ko wain, ya ra kirebnagmed; machane nge sugnagmed fare Kan ni Thothup. Ra bigimed mi i yin’ e tang ni thin rok Got ni bay ko Psalm, nge tang ni machib, nge tang ni murung’agen Got; um tangnaged Somol ni gimed be yin’ e tang ni machib, nge tang ni thin rok Got ni bay ko Psalm, ni gimed be pining e sorok ngak u fithik’ i lanin’med.” (Efesus 5:15-19) Re fonow ney e ba mudugil nib puluw ngodad ko ngiyal’ ney nib mo’maw’.—2 Timothy 3:1.

¹⁶ Faan gadra ulul i rin’ e tin ba fel’ ngak e girdi’, ma susun ri ngada ayuwgad ni gad be yan ni bod e piin ni ma dag e gonop rok Got. (James 3:17) Thingarda paloggad ko denen nib gel ma susun ni nge sugnagdad fare kan ni thothup, mi gad pag ni ir e ra pow’iydad. (Galatia 5:19-25) Gad ra fol ko thin ni tirok Got ni yima wereg u nap’an e muulung ko Kristiano, nge fapi assembly, nge pi convention, ma rayog ni ngada ululgad i rin’ e tin nib mat’aw. Thin rok Paul ngak piyu Efesus e ku ra puguran ngodad ni baga’ ni muulung rodad ko liyor ku Got, ma ra fel’ rogodad ko tang ni gad ma tang ni yib u gum’irchadad ni aram e “tang ni tirok Got”—ni boor e tang e be weliy murung’agen felngin ni tirok Got, ni bod e fel’ ngak e girdi’.

17. Faanra bochan e m’ar nib gel ma boch e Kristiano e dabiyog ni ngara uned ko muulung, ma rayog ni nge mudugil laniyan’ e pi cha’ nem ko mang?

¹⁷ Ma uw rogon e pi walagdad ni dabiyog rorad ni ngara uned ko muulung ko Kristiano ni gubin ngiyal’ ya bochan keb e m’ar ngorad nib gel? Rayog ni ngari kireban’rad ya bochan dabiyog rorad ni ngar liyorgad ku Jehovah ni ngara chaggad ngak e pi walagrad ni piin pumoon nge ppin. Machane rayog ni nge mudugil ni manang Jehovah e magawon rorad, ma ra ayuwegrad ni yad ra par ko gin ni bay e tin riyul’ riy, ma ra pi’ ngorad e kan ni thothup rok, ma ra ayuwegdad ni ngar ululgad i rin’ e tin nib fel’.—Isaiah 57:15.

18. Mang e ra ayuwegdad ni ngada ululgad i dag e fel’ ngak be’?

¹⁸ Rogon ni gad ra ulul ko kanawo’ ni ngad daged e fel’ ngak e girdii ma bat’uf ni ngada koled ayuwngidad ko chon mini’ e gad ra chag ngorad ma ngada paloggad rok e piin ni kara “dabuyed e tin nib fel.” (2 Timothy 3:2-5; 1 Korinth 15:33) Gad ra fol ko re fonow ney ma ra ayuwegdad ni dabda “kirebnaged laniyan’ fare kan ni thothup” u daken e ngongol nib togopuluw ko tin baadag. (Efesus 4:30) Maku, yira ayuwegdad ni ngada rin’ed e tin nib fel’ nfaanra ri ngada chaggad ngak e piin ni ri ma dag e fel’ ngak e girdi’, ma kan ni thothup rok Jehovah e be pow’iyrad.—Amos 5:15; Roma 8:14; Galatia 5:18.

Fel’ Ngak e Girdi’ e Ra Yibnag Angin nib Fel’

19-21. Mu weliy boch ban’en ni buch ni be dag ni ba’ angin ko ngan dag e fel’ ngak be’.

¹⁹ Gad ra yan ko tamilang ni tirok Got, ma gad ra fol u rogon ni be pow’iyrad e kan ni thothup rok Got, ma ngada ayuwgad u rogon ni gad ra yan ma aram e n’en nra ayuwegdad ni ngada paloggad ko tin kireb ma “ngada ululgad i rin’ e tin nib fel’.” Ma aram, ra yib angin nib fel’. Mu lemnag e n’en ni ke buch rok Zongezile, ir bagayad e Pi Mich Rok Jehovah u South Africa. Reb e kakadbul u nap’an ni be yan ko skul, me yan i guy e salpiy rok u bank nge nang ko in e ka ba’. Fare babyor ni yib ko fare masin ni automatic teller e ke oloboch ni be dag ni salpiy rok e ke pag R42,000 ($6,000, U.S.). Ma en ni matanag ko bank nge boch e girdi’ e ka rogned ngak ni nge fek fare salpiy nge tay nga yugu reb e bank. Kemus ni ba wu’ i mabgol ni yow e Pi Mich e ka rognew ngak ni ffel’ e n’en ni ke rin’ ya de fanay ni musko taareb ko re salpiy nem.

²⁰ Bin migid e rran ko maruwel, me yan Zongezile nga bank ni nge yog fare oloboch. Ma kan pirieg ni fare account number rok e ba taab rogon ko account number ko reb e tafol chuway nib fel rogon ma kan oloboch ni ngan ta’ e salpiy rok ko account ni gathi birok. Bochan ke gin fa en ni tafol chuway ni de fanay Zongezile reb ko fare salpiy nge chuwiy ban’en, me fith ngak ni gaar: “Mang e teliw rom?” Me weliy Zongezile ni ir bagayad ko Pi Mich rok Jehovah. Ma girdien e bank nib tolang e liw rorad e ka rogned e thin u murung’agen u fithik’ e yul’yul’ ni gaar: “Ffel’ nfaanra urngin e girdi’ e yad ba yul’yul’ ntaab rogon ko Pi Mich Rok Jehovah.” Riyul’, ni ra ngan dag e yul’yul’ nge fel’ ngak e girdi’ ma ra k’aring yugu boch e girdi’ ni ngara pininged e sorok ngak Jehovah.—Hebrews 13:18.

²¹ Rogon ni ngan dag e ngongol ni fel’ ngak e girdi’ e de t’uf ni ngan rin’ e n’en ni yira ngat ngay ma fini yib angin nib fel’. N’en nra dag ni riyul’ ni aram rogon e bod ni: Reb e Mich ni pioneer ni kab pagal ni ma par u reb ko fapi donguch nu Samoa e susun ni nge yan nga hospital u rom. Girdi’ e yad be sonnag ni ngar guyed fare togta, ma fare Mich e ke guy ni bay reb e ppin ni ke pilibthir u tooben ni rib m’ar. Me yarmiy ni nge yan fare pin nga luwan ma aram rayog ni ngan ayuweg nib papey boch. Immoy ba ngiyal’ nga tomren, ma fare Mich e ke mada’nag fare pin ni ke pilibthir u Kantin. Ma ke poy fare pin e cha’ nem me yib ngan’ e tin ke rin’ ngak nib fel’ u hospital. “Gu manang e chiney ni Pi Mich Rok Jehoah e riyul’ nib t’uf e piin buguli yoror rorad rorad,” aram e n’en ni ke yog. Yugu aram rogon ni dabun fare pin e thin ko Gil’ilungun kafram, ma fel’ ngak e girdi’ ni ke dag reb e mich ngak e keb angin nib fel’. Me adag ni nge un ko fol Bible u tabinaw me tabab ni nge fil e tamilangan’ ko Thin rok Got.

22. Mang reb e kanawo’ ni ri bay fan nrogon ni “ngan rin e tin nib fel’ ni gubin ngiyal’”?

²² Sana, ku rayog ni ngam weliy murung’agen ban’en ni buch nra dag ni ri bay fan ni ngan dag e fel’ ngak e girdi’. Reb e kanawo’ ni rib fel’ rogon ni “ngan rin’ e tin nib fel’ ni gubin ngiyal’” e ngan un ko maruwel ni ngan wereg e thin nib fel’ ko Gil’ilungun Got ni gubin ngiyal’. (Matthew 24:14) Manga yigi da ululgad i un ko re maruwel n’ey ni baga’ fan, ya bochan gad manang ni aram reb e kanawo’ ni ngada rin’ed e tin nib fel’, ni baga’ ni fan ko piin ni baadag ni nge fol riy. Ma n’en ni ri baga’ fan, e aram e maruwel rodad i wereg e machib nge ngongol nib fel’ ni ra pining e sorok ngak Jehovah, ni ir e tabolngin e fel’ ngak e girdi’.—Matthew 19:16, 17.

Mu Ulul i “Rin’ e Tin nib Fel’”

23. Mang fan nib fel’ fare maruwel ko Kristiano ni ngan wereg e machib?

²³ Dariy e maruwar riy ni fare maruwel rodad ni ngan wereg e machib e aram e maruwel nib fel’. Bochan e re n’ey ma rayog ni ngada thapgad ngak Got nge piin nra motoyil ko thin nu Bible ma aram rayog ni nge un i yan ko kanawo’ ni yan ko yafas ndariy n’umngin nap’an. (Matthew 7:13, 14; 1 Timothy 4:16) Nap’an ni yib e tayim ni thingarda dugliyed ban’en, me e re, fare tafinay rodad ni gad baadag ni ngada rin’ed e tin nib fel’ e baga’ ni ra k’aringdad ni ngada fithed gadad ni gaar: ‘Gu ra dugliy ni aram rogon ma mang e ra rin’ e re n’ey ko maruwel rog ni ngan wereg e thin ko Gil’ilungun? Riyul’ nib fel’ fare kanawo’ ni gu be lemnag? Rayog ni nge ayuweg e re n’en ney yugu boch e girdi’ ni ngara adaged fare “thin nib fel’ ndariy n’umngin nap’an” ma ra fel’ thilrad Got i Jehovah?’ (Revelation 14:6) Ra yib e falfalan’ nib gel ko n’en ni kan dugliy ni be mon’eg e maruwel ko Gil’ilungun.—Matthew 6:33; Acts 20:35.

24, 25. Mang boch e kanawo’ ni ngan rin’ e tin nib fel’ u lan e ulung, ma faanra ngada ululgad i dag e fel’ ngak e girdi’ ma kari mudugil lanin’dad ni ngeb ngodad e mang?

²⁴ Dabda dariyfannaged e angin ni yib nbochan e fel’ ngak e girdi’ ni kan rin’. Rayog ni ngada ululgad i dag e re ngongol ney nfaan gad ra ayuweg e ulung ko Kristiano ma gad ra rin’ e tin rayog rodad ni fan ni nge fel’ boch ban’en riy. Ba mudugil ni gad be rin’ e tin nib fel’ nfaan gadra un ko muulung ma gad ma un ko n’en ni yima rin’ u nap’an e pi muulung ko Kristiano. Wub rodad e ra gelnag e pi walag, ma rogon ni gad ma pi’ e fulweg ni kan fal’eg rogon e ra gelnagrad ko tirok Got. Maku gad be rin’ e tin nib fel’ ko ngiyal’ ni gad be fanay e chugum rodad ni fan ni ngada ayuweged e Tafen e Muulung rodad ma ngada uned ko maruwel ni yima tay riy. (2 Kings 22:3-7; 2 Korinth 9:6, 7) Riyul’ ni, “urngin ngiyal’ nra puf rogodad ma ngad ngongliyed e ngongol nib fel’ ngak urngin e girdi’, machane nge ga’ fadad ngak e piin ni kad manged girdien e tabinaw rok Got u fithik’ e mich u wun’uy ngak Kristus.”—Galatia 6:10.

²⁵ Dabiyog rodad ni ngada guyed urngin ban’en nib t’uf ni ngan dag e ngongol nib fel’ ngak e girdi’ riy. Ere, nap’an ni keb ngodad reb e magawon nib biech, ma ngada gayed e tamilangan’ ko Thin rok Got, ma ngada yibilayed nge ayuwegdad fare kan ni thothup rok Jehovah, ma gad ra rin’ e tin th’abi fel’ ni fan ni ngada lebguyed e tin nib m’agan’ Got ngay nib fel’ mab flont. (Roma 2:9, 10; 12:2) Rayog ni nge pagan’dad ni ngari flaabnagdad Jehovah nfaan gad ra ulul i dag e fel’ ngak e girdi’.

Uwrogon ni Ngam Pi’ e Fulweg?

• Uw rogon ma rayog ni ngada rin’ed e tin th’abi fel’?

• Mang fan ni fel’ ngak e girdi’ e yima yog ni ‘wom’engin fare tamilang’?

• Mang fan ni fel’ ngak e girdi’ e yima yog e ‘womengin e kan ni thothup’?

• Ngongol rodad nib fel’ e mang angin nra yib riy?

[Picture on page 17]

Thin rok Got nge fare kan ni thothup rok e ra ayuwegdad ni ngada daged e fel’ ngak e girdi’

[Pictures on page 18]

Ngan dag e fel’ ngak e girdi’ e ra yibnag angin nib fel’