3 Ma Fulweg Got Taban e Kireb​—Riyul’ e Re N’ey, Fa?

Sana kam rung’ag ni: “Got e der ma pagtalin e denen ni ma rin’ e girdi’, ma ma fulweg taban ngorad ni aram e ma gechignagrad u infierno ndariy n’umngin nap’an.”

“Ma pag Got e yoko’, nge durru’, nge ku boch ban’en ni nge yib ni gechig rok e pi tadenen.”

N’en ni be fil e Bible: Be yog e 2 Peter 3:9 ni Jehovah e “dabun ni nge n’ag be’, ya ba adag ni nge urngin e girdi’ mi yad pi’ keru’rad ko urngin e denen ni yad be rin’.” Der ma yaliy e oloboch rodad, ya ma yaliy fel’ngidad. Got e “ma fal’eg i yaliy e re fayleng ney ni ga’ngin, ni nge pi’ gelngin e piin yad ba yul’yul’ ngak u gum’ircha’rad.”​—2 Kronicles 16:9, BT.

Infierno e gathi machib nu Bible, ma fare lem ni ngan gafgownag be’ ndariy n’umngin nap’an e ba fanenikan Got. Bin th’abi gel e gechig ni ma pi’ ko girdi’ ni kireb e aram e ma thang e fan rorad. (Jeremiah 7:31; Roma 6:7) Ma yoko’, nge durru’, nge ku boch ban’en ni be yim’ e girdi’ riy e gathi Got e be k’aring, ya aram boch ban’en ni ma buch ndan nang, ma demtrug be’ nrayog ni nge gafgow riy.​—Eklesiastes 9:11.

Rogon nra ayuwegem e tin riyul’: Rayog ni ngad chugurgad ngak Got ni faan gad ra nang ni ma ‘n’ag fan u wan’ e kireb rodad’ ma der ma gur nge gechignag e girdi’. (Psalm 86:5, BT) De t’uf ni ngad pigpiggad ngak ni bochan e gad be rus nri gechignagdad, ya rayog ni nge gel e michan’ rodad ngak Jehovah ni bochan e ba t’uf rodad. Re t’ufeg ney e ban’en nib gel gelngin nrayog ni nge k’aringdad ni ngad athamgilgad ngad rin’ed e tin nib m’agan’ ngay.​—Matthew 22:36-38; 1 John 5:3.

Yugu aram rogon ni baadag Got ni nge urngin e girdi’ mar rin’ed e tin nib fel’, machane ku manang ni boor i yad e dabi fol. Faan gomanga de gechignag e piin ni ur rin’ed e kireb, ma taareb rogon ngak reb e pilung ni ke fal’eg e motochiyel ma der guy rogon ni ngan fol riy, ma ke pag e ngongol nde mat’aw nge gafgow ni nge par ndariy n’umngin nap’an. (Eklesiastes 8:11) Bochan ni kad nanged ndabi pag Got e kireb nge par ndariy n’umngin nap’an, ma be gelnag e athap rodad ni fan ko gabul nge langlath. Ke micheg nra chuweg e piin ndab ra talgad i rin’ e kireb, ya nge yog ni par e “piin ni yad mmunguy” u fayleng ndariy n’umngin nap’an ni yad ba felfelan’ ni bod rogon ni lemnag aram ko tabolngin.​—Psalm 37:10, 11, 29.a

[Footnote]

[Blurb on page 6]

Ra adag Got ni ngad pigpiggad ngak ni bochan e gad be rus nri gechignagdad, fa?

[Picture Credit Line on page 6]

Engravings by Doré