4 De Mat’aw e Ngongol rok Got​—Riyul’ e Re N’ey, Fa?

Sana kam rung’ag ni: “Got e ir e ba milfan e re fayleng ney ngak. Ma gubin ban’en ni be buch e aram rogon nib m’agan’ ngay. Ke gel e laniyan’ ko girdi’, ma ke sug e fayleng ko tin de mat’aw, ma ke gel e gafgow ni yibe tay ko girdi’. Ere ba mudugil ni Got e ir e be k’aring e pi n’ey.”

N’en ni be fil e Bible: Gathi Got tapgin e tin nde mat’aw ni be buch u fayleng. Be weliy e Bible murung’agen Jehovah ni gaar: “Ba yal’uw ma mmat’aw urngin e tin ni ma rin’.”​—Deuteronomy 32:4.

Got e ba gol ngak urngin e girdi’ nib muun ngay e piin ndariy rogon ni nge gol ngorad. Bod ni ma “mateg ramaen e yal’ rok nga daken e girdi’ nib tagan nge girdi’ nib fel’ ntaareb rogon, ma be pi’ e n’uw ngak e piin ni yad be rin’ e tin nib mat’aw nge piin ni yad be rin’ e tin nib kireb.” (Matthew 5:45) Taareb rogon e ngongol rok ngak urngin mit e girdi’, ya be gaar e Acts 10:34, 35: “Gubin e girdi’ ma taareb rogorad u wan’ Got. En ni ba’ madgun Got u wan’ ma be rin’ e tin nib mat’aw e ra i par nib fel’ u wan’ Got ndemtrug ko be’ u kun nam.”

Ere, mini’ tapgin e tin de mat’aw? Boor e girdi’ ni yad ma dugliy ni ngar rin’ed e tin de mat’aw ma dab ra folgad ko tin ma rin’ Got nib mat’aw. (Deuteronomy 32:5) Ku be dag e Bible ni ke pag Got e toogor rok ni Moonyan’ ni nge gagiyegnag e fayleng.a (1 John 5:19) Machane, dab ki n’uw nap’an me mus e gagiyeg ni be tay Moonyan’. Ke mu’ Got i dugliy ni nge “kirebnag e maruwel” rok Moonyan’.​—1 John 3:8.

Rogon nra ayuwegem e tin riyul’: Sana ke balyangan’um ni bochan e yugu yibe weliy murung’agen e sasalap ni be tay girdien e am, nge gafgow ni yibe tay ko girdi’, nge pi n’en ni be buch nde mat’aw. Ga ra nang e n’en ni be k’aring e pi n’ey, ma ra ayuwegem ni ngam nang fan ni kari gel e kireb nge fan nder yog ko girdi’ ni ngar fal’eged e re fayleng ney nge fel’. (Psalm 146:3) Rayog ni nge mudugil e athap rom ni fan ko gabul nge langlath ni faanra pagan’um ko pi n’en ni ke micheg Got, ko bin ni ngaum n’ag e tayim rom nge gelngim nga boch ban’en ni kemus ni chiney e ra yib angin.​—Revelation 21:3, 4.

Gad ra nang e en ni tabolnginnag e tin nde mat’aw, ma ra ayuwegdad u nap’an ni ke yib e gafgow ngodad. Nap’an nra buch boch ban’en rodad nde mat’aw, ma rayog ni nga dogned fapi thin ni yog Habakkuk ni tapigpig rok Got ni gaar: “Ke par e motochiyel ni ke war ma ke m’ay fan, ma dakunir rin’ e tin nib yal’uw.” (Habakkuk 1:4) De damumuw Got ngak Habakkuk fe gechignag ko pi thin ney ni yog, ya micheg ngak ni ke dugliy ngal’an ni nge yal’uweg gubin ban’en me ayuweg Habakkuk ni nge par nib felfelan’ ni yugu aram rogon ni be mada’nag e magawon. (Habakkuk 2:2-4; 3:17, 18) Ere ku er rogodad ni faanra pagan’dad ko n’en ni ke micheg Got nra yal’uweg e tin de mat’aw, ma aram e rayog ni ngad pared nib gapas lanin’dad u lan e re fayleng ney nde mat’aw.

[Footnote]

[Blurb on page 7]

Riyul’ ni Got e ir e be k’aring e gafgow nge tin nde mat’aw, fa?

[Picture Credit Line on page 7]

© Sven Torfinn/Panos Pictures