Abraham​—e Ir Be’ nib Sobut’an’

Rofen nem e rib gel e gowel, ma bay Abraham u langan e mab ko tento rok. Faani sap nga palog, me guy dalip i pumoon.a Ka chi ngiyal’ nem me sak’iy nge mil i yan ngorad ni ngar mada’gad, ma aram me yog ngorad ni nga ranod nga tabinaw rok ngar toffangad buchuuw. Ma aram me yan i yog ni ngan ngongliy rogon e ggan ni aram e flowa ni kan lith, nge milik ni kan mugninnag, nge milik ni kab beech, nge ufin. Re n’ey ni ke rin’ Abraham e gathi kemus ni ke m’ug riy ni ir be’ nib gol, ya ku ir be’ nib sobut’an’.​—Genesis 18:1-8.

MANG E SOBUT’AN’? Sobut’an’ e ba math keru’ ko tolangan’. Be’ nib sobut’an’ e manang ni kab fel’ boch e girdi’ ngak u yugu reb e kanawo’. (Filippi 2:3) Ma motoyil ko n’en ni ma yog boch e girdi’ mab m’agan’ ngay ni nge rin’ e tin nib t’uf ni nge rin’ ngorad.

UW ROGON NI DAG ABRAHAM E SOBUT’AN’? I rin’ Abraham boch ban’en ni fan ngak boch e girdi’ nib felfelan’ ngay. Rogon ni kan weliy faram e, nap’an ni guy Abraham fa dalip i pumoon, ma ka ngiyal’ nem me tabab i lemnag e pi n’en nib t’uf rorad. I gur Sarah ni leengin nge ngongliy rogon e ggan. Machane, kum tay fanam i yan riy ni boor ko pi maruwel nem e Abraham e i rin’. Ir e yan ni nge mada’nag fapi milekag, me ir e yog ni nge pi’ e ggan ngorad, maku ir e yan i mel’eg reb u fithik’ e pi gamanman rok ni ngan li’, maku ir e fek fapi ggan nge yan i tay nga p’eowcherad. Cha’ney e ir be’ nrib sobut’an’, ya rin’ urngin ban’en nib t’uf ni nge rin’ ni fan ko pi milekag nem, ma de yog ko pi tapigpig rok ni ngar rin’ed. De lemnag ni ir e yugu ba thil ndabi rin’ e pi n’ey ni fan ngak boch e girdi’.

I motoyil Abraham ko n’en ni yog e piin ni yad bay u tan pa’. Ri in ban’en ni i weliy Abraham nge Sarah murung’agen e kan tay nga Bible. Machane, l’agruw yay ni be yog e Bible ni motoyil Abraham ngak Sarah me rin’ e n’en ni ke yog. (Genesis 16:2; 21:8-14) Immoy bayay ni yog Sarah ban’en nri “dabuy Abraham.” Machane, nap’an ni yog Jehovah ngak Abraham nib fel’ e n’en ni ke yog Sarah, me t’ar laniyan’ nge rin’ e n’en ni ke yog.

MANG E GAD RA FIL RIY? Faanra gad ba sobut’an’, ma gad ma felfelan’ ngay ni ngad rin’ed boch ban’en ni fan ngak boch e girdi’, ma demtrug e n’en ni gad ra rin’ ni nge ayuwegrad.

Ku rayog ni nge m’ug ni gad ba sobut’an’ ko n’en ni gad ma rin’ u nap’an nra yog be’ laniyan’ u ban’en. Rayog ni ngad paged boch e girdi’ ngar weliyed lanin’rad ko bin ni ngad siyeged e n’en ni ka rogned ni bochan e gathi gadad e ke sum rodad. (Proverbs 15:22) Re n’ey e ra yib angin ngak e piin ni yad ma yog e thin rok boch e girdi’. John ni ir be’ ni ma yarmiy e maruwel ni ma rin’ boch e girdi’ e yog ni gaar, “Kug pirieg ni faanra ba fel’ e en ni be yarmiy e maruwel ma aram e ra mom ko girdi’ ni ngar weliyed lanin’rad. Thingar mu sobut’nag lanin’um ma aram e rayog ni ngam nang ni faen ni bay u tan paam e sana ka bay boch e kanawo’ ni ma rin’ boch ban’en riy ni kab fel’ nga rogon ni ga ma rin’. Dariy be’ nib muun ngay e piin ni yad ma yaliy e maruwel nib puluw e n’en ni ma lemnag ni gubin ngiyal’.”

Faan gad ra folwok rok Abraham ngaud paged boch e girdi’ ni ngar weliyed lanin’rad u boch ban’en mu ud rin’ed e tin nib t’uf ni ngad rin’ed ngorad, ma aram e gad ra fel’ u wan’ Jehovah, ya “Got e ma togopluw ngak e piin nib tolangan’rad, ma ma ayuweg e piin nib sobut’an’rad.”​—1 Peter 5:5.

[Footnote]