Mang e Ma Yog Boch e Girdi’ u Murung’agen e Armageddon?

“Me kunuy fapi moonyan’ e pi pilung nga taabang nga bang ni ka nog yu Armageddon ngay ni thin ni Hebrew.”​—REVELATION 16:16.

MANG e ga ma lemnag u nap’an ni ga ra rung’ag fare bugithin ni “Armageddon”? Sana ga ma lemnag e gafgow nib tomgin mab elmerin. Yugu aram rogon ni kemus ni taab yang u Bible e bay e re bugithin ney riy, mab ga’ ni yugu ma weliy girdien e news nge pi tayugang’ ko teliw murung’agen.

Ba puluw e n’en ni ma lemnag e girdi’ u murung’agen e Armageddon ko n’en ni be yog e Bible, fa? Ba t’uf ni ngan nang e fulweg ko re deer ney. Mang fan? Ya faan ga ra nang e tin riyul’ u murung’agen e Armageddon ma rayog ni nge dab kum rus ngay, me tamilangan’um ko pi n’en ni bay nga m’on, me thilyeg rogon ni ga ma lemnag Got.

Mu yaliy e re dalip i deer ni baaray, mag taareb rogonnag e n’en ni ma lemnag e girdi’ u murung’agen e Armageddon ko n’en ni be yog e Bible.

1. GIRDI’ E RA SUNMIY E ARMAGEDDON, FA?

Girdien e news nge piin ni yad ma gay murung’agen ban’en e ba ga’ ni yad ma fanay fare bugithin ni “Armageddon” u nap’an ni yad be weliy murung’agen e gafgow ni ke k’aring e girdi’ nib tomgin mab elmerin. Bod ni yima yog e Armageddon ko Bin Taareb nge Bin L’agruw e Mahl ko Fayleng. Tomuren e gal mahl nem me magarnag e girdi’ nri pag yu Meriken e donmach ni bay e nuclear riy nga Soviet Union fa reb e pag yu Soviet Union e donmach ni bay e nuclear riy nga Meriken. Girdien e news e yad be yog ni re mahl nem ni yira fanay e donmach ni bay e nuclear riy e “Armageddon”. Piin ni yad ma gay murung’agen ban’en e ngiyal’ ney ni yad be magarnag nra thil e yafang u fayleng ni bochan e yibe alitnag e nifeng, nge day, nge binaw e ka rogned nrayog ni nge sum e “Armageddon ni bochan e yafang ni be thil.”

N’en ni yad be yog: Girdi’ e yad ra gagiyegnag e n’en nra buch ko re fayleng ney nge yafas ni bay riy boch nga m’on. Faanra dabi gagiyeg e pi am nib fel’ rogon, ma ra gafgow e fayleng boch nga m’on.

N’en ni be fil e Bible: Dabi pag Got e girdi’ ni ngar gotheyed e re fayleng ney. Be micheg e Bible nde ngongliy Jehovaha e fayleng nge “tay ni bangi ted” ya ngongliy ni “ngi i par e girdi’ riy.” (Isaiah 45:18) Ere, ra thang Got e “piin ni kar kirebniged e fayleng.”​—Revelation 11:18.

2. ARMAGEDDON E ARAM E YOKO’, ARA DURRU’, ARA BOCH BAN’EN NI MA YIB NI YIMA GAFGOW RIY, FA?

Yu ngiyal’ e ma fanay girdien e news fare bugithin ni “Armageddon” ni nge yip’ fan reb e yoko’, ara reb e durru’ nrib gel, ara yugu boch ban’en ni ma yib ni yima gafgow riy. Bod nnap’an fare duw ni 2010, me weliy reb e report murung’agen e “‘Armageddon’ ni ke yib nga Haiti.” Re n’em ni ka nog e be tamilangnag urngin e girdi’ ni ke yim’, nge gelngin e gafgow, nge magothgoth ni tay fare durru’ ni aw ko re nam nem. Girdien e news nge girdi’ ni ma fal’eg e kachido e ku yad ma fanay e re bugithin ney u nap’an ni yad be weliy murung’agen boch ban’en ni ke buch, machane ku yad ma fanay u nap’an ni yad be weliy murung’agen ban’en ni yad be lemnag ni bayi buch. Bod ni yad ma fanay fare bugithin ni “Armageddon” u nap’an ni yad be weliy murung’agen e n’en nra buch u nap’an nra mul reb fapi malang nib ga’ ni bay u lan e lang nga fayleng.

N’en ni yad be yog: Armageddon e aram ban’en nra buch ndemtrug e girdi’ nra yim’ riy. Dabiyog ni ngam ayuwegem riy.

N’en ni be fil e Bible: Armageddon e gathi aram ban’en nra buch ndemtrug e girdi’ nra yim’ riy. Ya kemus ni goo piin ni yad ba kireb e yira thangrad u nap’an e Armageddon. Ke micheg e Bible ni “dab ki n’uw nap’an me yan e piin nib kireb nga bayang; ra mu gayiyrad, ma dab mu piriegrad.”​—Psalm 37:10.

3. RA THANG GOT E RE FAYLENG NEY U NAP’AN E ARMAGEDDON, FA?

Boor e girdi’ ni yad ba m’ing ko teliw rorad e ba mich u wan’rad nra yan i tomur me cham e piin ni yad ba fel’ nge piin ni yad ba kireb ma aram me pil e re fayleng ney. Reb e survey ni tay reb e ulung u Meriken ni ka nog e United States by Princeton Survey Research Associates ngorad e kar pirieged ni 40 e pasent ko girdi’ u rom e ba mich u wan’rad nra yib tomuren e fayleng u nap’an e “cham ni yira tay u nap’an e Armageddon.”

Fan e machib rorad: Dan lemnag ni nge par e girdi’ u fayleng ndariy n’umngin nap’an. I sunmiy Got e girdi’ me lemnag nra taw nga ba ngiyal’ mar m’ad ni yad gubin.

N’en ni be fil e Bible: Rib tamilang ni be yog e Bible ni ke tay Got e fayleng “nga daken e def riy nri be par nib mudugil, ndabiyog ni ngan mithmitheg.” (Psalm 104:5) Be yog e Bible murung’agen e piin ni yad ra par u fayleng ni gaar: “Piin ni yad mmat’aw e bay ra tafanayed e fayleng, me par ni taferad ni dariy n’umngin nap’an.”​—Psalm 37:29.

Ba tamilang nde puluw e n’en ni ma lemnag e girdi’ u murung’agen e Armageddon ko n’en ni be yog e Bible. Ere, mang e ba riyul’?

[Footnote]