Ba Ke Babyor nde Togopuluw Reb e Thin Riy nga Reb
“Ya dariy bbugithin ni yog e profet ni sum u laniyan’ be’, ya [“gelngin Got nib thothup,” NW] e yib i ying ngak e girdi’ ngar weliyed e thin ni ke yib rok Got ngorad.”—2 PETER 1:21.
UW ROGON NIB THIL E BIBLE? Ku bay boch e babyor kakrom nib togopuluw e thin riy ni yugu aram rogon ni kan fal’eg u taab ba ngiyal’. Ba ga’ nra togopuluw e thin u lan reb e babyor ni faanra ba thilthil e girdi’ ni kar yoloyed, ma kub thil e gin ni yad be par riy, nge ngiyal’ ni ur yoloyed. Machane, Bible e ba thil. Ya 66 ken e babyor ni bay riy ni goo taa be e Thin rok, ni taab ban’en ni be weliy murung’agen, ma gubin e thin riy nde togopuluw reb nga reb.—2 Timothy 3:16.
BOD ROGON NI: U nap’an fare chibog ni 16 B.C.E., ma Moses ni ir be’ ni ma gafaliy e saf e yoloy e bin som’on e babyor ko Bible ni “faen owchen” e ra thapeg e girdi’. Maku bay ko re ke babyor ney ni faen owchen e ra yib ko tabinaw rok Abraham nge Isak nge Jakob. (Genesis 3:15; 22:17, 18; 26:24; 28:14) Sogonap’an 500 e duw ni ke yan ma Nathan ni profet e ke tamilangnag ni faen owchen e ra yib ko fare tabinaw rok David ni pilung. (2 Samuel 7:12) Reb e biyu’ e duw nga tomuren me weliy apostal Paul ni faen owchen e aram Jesus nge piin ni kan mel’egrad ni yad pi gachalpen. (Roma 1:1-4; Galatia 3:16, 29) U tomuren e bin som’on e chibog me yiiynag e bin tomur e babyor ko Bible ni piin ni yad bang ko fare owchen e yad ra mang e mich rok Jesus u fayleng, min fasegrad ko yam’ nga ranod nga tharmiy, mi yad un ngak Jesus ko gagiyeg u lan 1,000 e duw. Re ulung i owchen ney e ra thang Satan me yad thapeg gubin e girdi’.—Revelation 12:17; 20:6-10.
N’EN NI YOG E GIRDI’ NI YAD MA FIL MURUNG’AGEN E BIBLE: U tomuren ni fal’eg i gay Louis Gaussen murung’agen 66 ken e babyor ko Bible, me yoloy ni gaar: “Kug gin u rogon nde togopuluw gubin e thin u lan e re babyor ney ni yugu aram rogon ni ke yoloy boor e girdi’ u lan 1500 e duw. . . . Ya taab ban’en e yad be weliy murung’agen Fak Got ni nge thapeg gubin e girdi’ u fayleng , ni gowa kar nanged fan nge mada’ ko tungun.”—Theopneusty—The Plenary Inspiration of the Holy Scriptures.
MANG E GA BE LEMNAG? Ga be lemnag ma dabi togopuluw e thin u lan reb e babyor ni faanra 40 e girdi’ ni kar yoloyed u lan 1,500 e duw, fa? Ara ba thil e Bible nga yugu boch e babyor?
[Blurb on page 7]
“Nap’an ni ga ra chagliy gubin e pi thin ney nga taabang ma taa ban’en e be weliy murung’agen . . . Dariy yugu reb e babyor ni yira taareb rogonnag ngay.”—THE PROBLEM OF THE OLD TESTAMENT, BY JAMES ORR