PI DEER NI BAY E FULWEG RIY U BIBLE

Mang fan nthingar da meybilgad?

Baadag Jehovah Got ni ngaud weliyed ngak e pi n’en ni be magafan’dad ngay ni gubin ngiyal’. (Luke 18:1-7) Ma motoyil ko meybil rodad ya bochan ni gadad ba t’uf rok. Bochan ni be piningdad e Chitamangidad ni bay u tharmiy ni ngad meybilgad ngak, me ere gathi ba puluw ni ngad rin’ed e re n’em?​—Mu beeg e Filippi 4:6.

Gathi kemus ni ngad meybilgad ya bochan nib t’uf e ayuw rodad. Machane, ku ma ayuwegdad e meybil ni ngad chugurgad ngak Got. (Psalm 8:3, 4) Nap’an ni gad ra weliy lanin’dad ngak Got, ma rayog ni nge chugur e tha’ u thildad.​—Mu beeg e James 4:8.

Uw rogon nthingar da meybilgad?

Nap’an ni gadad ra meybil ma dabun Got ni nga dogned yu bugithin nib gagang’ ara ngaud sulod u daken e meybil ni ke mit ngodad. Ku de mudugil rogon ni ngad pared u nap’an ni gad be meybil. Jehovah e be piningdad ni ngad meybilgad ngak ni rogon ni ke yib u gum’ircha’dad. (Matthew 6:7) Kakrom u nap’an piyu Israel, me meybil Hannah ni bochan ni bay e magawon u lan e tabinaw rok. Ma nap’an ni pirieg e felfelan’, me meybil ni be pining e magar ngak Got.​—Mu beeg e 1 Samuel 1:10, 12, 13, 26, 27; 2:1.

Ri gadad ba felfelan’ nrayog ni ngad meybilgad! Ma rayog ni ngad weliyed ngak e En Tasunmiy murung’agen e pi n’en ni be magafan’dad ngay. Maku rayog ni ngad pininged e sorok ngak maku gadad pining e magar ngak ko pi n’en ni ke rin’. Bin riyul’ riy e dab ud darifannaged e re tow’ath ney ni kan pi’ ngodad.​—Mu beeg e Psalm 145:14-16.