KENGGIN E RE KE BABYOR NEY | MANG FAN NI NGKI ULUL E YAFOS ROM?
1 Bochan ni Ma Thil Boch Ban’en
“Pire’ yay ni ke ingmad e gafgow ke pir’iymad u gubin yang, machane da gu masengsenggad; yu ngiyal’ e bay n’en ma da ku gu nanged e n’en ni nggu rin’ed, machane der mulan’mad.”—2 KORINTH 4:8.
Ba ga’ ni yima yog ni faanra li’ be’ ir nge yim’, ma aram rogon nrayog ni ngan “pithig e magawon rok.” Machane, mus ko magawon ni gad be lemnag ndabiyog i pithig e bay e puf riy. Bin riyul’ riy e, rayog ni nge thil boch ban’en nge fel’.—Mu guy fare kahol ni kenggin e “Ke Thil Boch Ban’en Ko Yafos Rorad.”
Mus ni faanra dabi buch e re n’ey, mab fel’ ni ngam gay rogon i pithig e magawon rom ni buchuuw ma buchuuw. I yog Jesus ni gaar: “Dabi magafan’med nga rogomed gabul; ya ba gaman e tin nra magafan’uy ngay ni ba’ riy. Dariy fan ni ngku ni puthuy boch e magafan’ ko magafan’ ni be fek e yu rran i yib.”—Matthew 6:34.
Machane, uw rogon ni faanra dabi thil boch ban’en? Ni bod ni faanra bay ba mit e m’ar rom nib mo’maw’ ni nge chuw, ara ke chuw e en mabgol rom, fa ke yim’ be’ nib t’uf rom.
Faanra ke buch boch ban’en rom ni aray rogon, maku bay ban’en ni ku rayog ni ngam thilyeg, ni aram e: rogon ni ga be lemnag fare magawon. Ga ra nang rogon ni nge fel’ u wan’um e pi n’en ndabiyog ni ngam thilyeg, ma aram e ga ra nang rogon ni nge puluw e lem rom u boch ban’en. (Proverbs 15:15) Ngam gay boch e kanawo’ u rogon ni ngam athamgil u fithik’ e magawon rom ko bin ni ngam lemnag ni ngam liem nga mum’. Mang angin nra yib ngom? Yugu aram rogon ndabiyog ni ngam chuweg fare magawon, machane rayog ni ngam gagiyegnag rogon ni ga be lemnag.—Job 2:10.
DAB MU PAGTALIN E RE N’EY: Dabiyog ni ngam furuy em ni taab yay ma kam taw nga peebgul bburey; machane faan ga ra athamgil ngam furuy em ni boor yay, mab mudugil ni ga ra taw nga peebgul fare burey. Re n’ey e taareb rogon ko pi magawon nib mo’maw’ ni gad ma mada’nag.
N’EN NRAYOG NI NGAM RIN’ E NGIYAL’ NEY: Mu weliy e magawon rom ngak e fager rom ara reb e girdi’ u lan e tabinaw rom. Dabisiy nrayog ni nge ayuwegem ni ngam lemnag fare magawon rom ko bin nib fel’ e kanawo’.—Proverbs 11:14.