Nap’an Nra Sum Reb e Magawon nib Tomgin

Yugu aram rogon ni ga be guy rogon ni nge par e mabgol rom nge tabinaw rom ni bay e felfelan’ riy, machane, rayog ni nge buch boch ban’en nib tomgin nrayog ni ngari kireban’um ngay. (Eklesiastes 9:11) Nap’an nra buch boch ban’en ni aray rogon, ma ma ayuwegdad Got. Faan ga ra fol ko pi kenggin e motochiyel ni baaray ni kan fek u Bible, ma rayog ni ngam nanged chon e tabinaw rom rogon ni ngam athamgilgad u nap’an ni ke sum reb e magawon u lan e tabinaw romed ni ki mada’ ko tin th’abi ga’ e magawon.

1 NGE PAGAN’UM NGAK JEHOVAH

N’EN NI BE YOG E BIBLE: “Mpaged fan urngin e magafan’ romed ngak, ya be lemnag rogomed.” (1 Peter 5:7) Dab mu pagtalin ni gathi Got tapgin e pi magawon ni ma yib ngodad. (James 1:13) Ma faan ga ra chugurnagem ngak, ma ra ayuwegem. (Isaiah 41:10) ‘Mu weliy ngak urngin e magafan’ rom.’​—Psalm 62:8.

Faanra um beeg ma ga be fil e Bible rom ni gubin e rran, ma rayog ni ngki fal’eg lanin’um. Ma angin nra yib riy e, ga ra nang rogon ni ma ayuwegdad Jehovah u “urngin e gafgow nge kireban’ ni ma yib ngodad.” (2 Korinth 1:3, 4; Roma 15:4) Ke micheg nra pi’ ngom e ‘gapas rok ndabi chuchugur ni nge nang e girdi’ fan.’​—Filippi 4:6, 7, 13.

N’EN NRAYOG NI NGAM RIN’:

• Mmeybil ngak Jehovah ni nge ayuwegem ni ngam par nib gapas lanin’um me yag ni ngam lem nib fel’ rogon

• Mu lemnag urngin e kanawo’ ni bay nrayog ni ngam pithig e magawon rom riy mag mel’eg e bin nib fel’

2 MU AYUWEGEM NGE TABINAW ROM

N’EN NI BE YOG E BIBLE: “Girdi’ nib llowan’ e gubin ngiyal’ ni yad be nameg ni ngar filed ban’en.” (Proverbs 18:15, BT) Mu gay rogon ni ngam nang urngin ban’en u rarogon fare magawon. Kum guy rogon ni ngam nang e pi n’en nib t’uf rok chon e tabinaw rom. Mu non ngorad, mag motoyil ngorad.​—Proverbs 20:5.

Ere, uw rogon ni faanra ke yim’ be’ nib t’uf rom? Dab mu rus ni ngam dag e n’en ni bay u lanin’um. Dab mu pagtalin ni mus ngak Jesus miki “yor.” (John 11:35; Eklesiastes 3:4) Kub ga’ fan ni nge fel’ e chuchuw rom me gaman e toffan rom. (Eklesiastes 4:6) Ya re n’ey e ra ayuwegem u rogon ni ngam athamgil u nap’an ni ke buch ban’en ni kari kireban’um ngay.

N’EN NRAYOG NI NGAM RIN’:

• U m’on ni nge buch ban’en nib tomgin, mag guy rogon ni nge fel’ rogon e numon u thilmed chon e tabinaw rom. Ya nap’an nra sum e magawon, ma ra mom ngorad ni ngar nonad ngom

• Mu non ngak boch e girdi’ ni kur mada’naged boch e magawon ni taareb rogon ko magawon rom

3 MU GAY E AYUW

N’EN NI BE YOG E BIBLE: “Pi tafager e gubin ngiyal’ ni yad ma dag e t’ufeg rorad. Mang gam’engin e walag ni faanra dab ra puruy’naged e gafgow rorad?” (Proverbs 17:17, BT) Sana baadag e pi fager rom ni ngar ayuweged gur, machane sana dar nanged e n’en ni ngar rin’ed. Ere, mog ngorad e n’en nib t’uf rom. (Proverbs 12:25) Kum ning e ayuw ngak e piin ni yad manang fan e thin nu Bible ni ngar ayuweged gur ko tirok Got ban’en. Ya pi fonow ni yad ra weliy ngom u lan e Bible e ra ayuwegem.​—James 5:14.

Maku reb e faanra um chag ko piin nriyul’ nib mich Got u wan’rad ma be pagan’rad ko pi n’en ni ke micheg, maku rayog ni ngan ayuwegem. Ku rayog ni nge fel’ lanin’um u nap’an ni ga ra ayuweg e piin ni ke t’uf ni ngan pi’ e athamgil nga lanin’rad. Mu weliy e michan’ rom ngorad nge murung’agen e pi n’en ni ke micheg Jehovah. Mu fanay e tayim rom ni ngam ayuweg e piin ni ke t’uf e ayuw rorad, ma dab mu palognagem rok e piin ni gab t’uf rorad ma yad ma lemnagem.​—Proverbs 18:1; 1 Korinth 15:58.

N’EN NRAYOG NI NGAM RIN’:

• Mu non ngak reb e fager rom nrib chugur thilmew mag pag ni nge ayuwegem

• Dab mu mithag e pi n’en nib t’uf rom, ya nga mog nib tamilang