Deer Ko Piin Ma Beeg

I yoloy apostal Paul ni Jehovah e ‘dabiyog ni nge pagdad nge yib ngodad e pi n’en ni ma waliy e girdi’ nge denen nge pag rogon ndabiyog rodad ni ngad taleged gadad riy.’ (1 Kor. 10:13) Ere gur, re n’ey e be yip’ fan ni ma dugliy Jehovah u m’on riy e pi n’en nrayog ni ngad k’adedan’dad u fithik’ ngemu’ me mel’eg e pi skeng ni nge pag ni nge yib ngodad?

Faanra riyul’ e re thin ney, ma ere ngam lemnag e n’en nrayog ni nge rin’ ngodad. Reb e walag ni pumoon e immoy ba pagel ni fak ni li’ ir nge yim’. Ere, fith e re walag ney ni gaar: ‘Gur, ke guy Jehovah u m’on riy nrayog romow leengig ni nggu athamgilgow u nap’an ni ke li’ e re pagel ni fakmow nem ir ke yim’? Gur, fan ni ke buch e re n’ey e bochan ni ke nang Got u m’on riy nrayog ni nggu athamgilgow?’ Ere, ba puluw ni ngad lemnaged ni ma gagiyegnag Jehovah boch ban’en ni ma buch u lan e yafos rodad, fa?

Nap’an ni gad ra fal’eg i yaliy fapi thin ni yog Paul ni bay ko 1 Korinth 10:13, ma rayog ni nge tamilang u wan’dad e re thin ni baaray: Dariy bang u Bible ni be yog nib puluw ni ngaud lemnaged ni ma dugliy Jehovah u m’on riy e pi n’en nrayog ni ngad k’adedan’dad riy, ngemu’ mfini dugliy e re miti skeng ni nge pag ni nge yib ngodad. Baaray aningeg i fan nrayog ni nga dogned e re n’ey.

Bin som’on e, ke pi’ Jehovah e puf rogon ko girdi’. Baadag ni gadad e ngad dugliyed e n’en ni ngad rin’ed. (Deut. 30:19, 20; Josh. 24:15) Ere, faan gad ra mel’eg ni ngad rin’ed e tin nib fel’ ma aram e rayog ni ngad paged Jehovah ni nge pow’iydad. (Prov. 16:9) Machane, faan gad ra mel’eg ni ngad rin’ed e tin nib kireb, ma aram e ra yib wenegan nib kireb ngodad. (Gal. 6:7) Ere, faanra Jehovah e ir e ma mel’eg e re miti skeng ni nge yib ngodad, ma gathi aram e be darifannag e puf rogon ni ke pi’ ngodad nib tow’ath?

Bin migid e, der ma yororiydad Jehovah ko “pi n’en ni ma buch ndan lemnag nge ngal’an ni ma buch.” (Ekl. 9:11, NW) Rayog ni nge buch ban’en rodad nib tomgin ma gad gafgow riy ni bochan e ba kireb e gin ni gad bay riy u nap’an ni ke buch fare n’em. I weliy Jesus murung’agen 18 i girdi’ nra m’ad u nap’an ni thig ba wulyang ntafen e damit nga dakenrad, miki yog ni pi girdi’ nem nra m’ad e gathi kar m’ad ni bochan e aram rogon nib m’agan’ Got ngay. (Luke 13:1-5) Ere, de puluw ni ngad lemnaged ni ma dugliy Got u m’on riy e en ni nge par nib fos nge en ni nge yim’ u nap’an ni ke buch ban’en ni aray rogon.

Bin dalip e, gad gubin nra bagadad ma thingari par nib yul’yul’ ngak Jehovah. Dab mu pagtalin ni ke yog Satan ni fan ni be pigpig e girdi’ ngak Jehovah e bochan e pi n’en ni be yag riy ngorad, ma faanra yib e skeng ngorad ma aram e dab kur pared ni yad ba yul’yul’. (Job 1:9-11; 2:4; Rev. 12:10) Ere, faanra nge taleg Jehovah boch e skeng ndabi yib ngodad ni bochan e manang ndabiyog rodad, ma gathi aram e be tay tanggin e thin ni yog Satan u murung’agen e pigpig ni gad be tay ngak?

Bin aningeg e, der ma dugliy Jehovah ni nge nang urngin ban’en ni ma buch rodad u m’on riy. Faanra ma mel’eg Got u m’on riy e re miti skeng ni nge yib ngodad, ma ere dabisiy ni manang urngin ban’en nra buch boch nga m’on. Machane, de puluw e re lem ney ko n’en ni be yog e Bible. Riyul’ nrayog ni nge nang Got e n’en nra buch boch nga m’on. (Isa. 46:10) Machane, be yog e Bible ni ma mel’eg Got e pi n’en ni nge nang u m’on riy. (Gen. 18:20, 21; 22:12) Ma t’ufegdad Jehovah ma kub mat’aw gubin ban’en ni ma rin’, ere dabi togopuluw ko puf rogon ni ke pi’ ngodad ni ngad dugliyed e n’en ni ngad rin’ed.​—Deut. 32:4; 2 Kor. 3:17.

Ere, uw rogon ni ngad nanged fan fare thin ni yog Paul ni faani gaar: “Got e . . . dabiyog ni nge pagmed nge yib ngomed e pi n’en ni ma waliy e girdi’ nge denen nge pag rogon ndabiyog romed ni ngam taleged gimed riy”? Be weliy Paul u roy murung’agen e n’en ni ma rin’ Jehovah u nap’an ni kad mada’naged e skeng, ma gathi u m’on riy.a Pi thin ney ni yog e be micheg ngodad ndemtrug e re miti skeng nra yib ngodad, ma ra ayuwegdad Jehovah ni faanra pagan’dad ngak. (Ps. 55:22) Chiney e ngad weliyed l’agruw i fan ni yog Paul e pi thin ney.

Som’on e, pi skeng ni ma yib ngodad e ‘ereram e mit i n’en ni ka ma yib ngak e girdi’.’ Ere, pi skeng ney ni ma yib ngodad e gathi bogi ban’en ndabiyog ni ngad k’adedan’dad u fithik’. Machane, thingar da taga’gad ngak Got. (1 Pet. 5:8, 9) Faan gad ra yaliy e pi verse ni bay u m’on ko fare thin ni yog Paul ni bay ko 1 Korinth 10:13, ma be weliy murung’agen e pi skeng ni i mada’nag piyu Israel u nap’an ni ur moyed u daken e ted. (1 Kor. 10:6-11) Gubin e pi skeng nem ni yib ngorad e bogi skeng ni ka ma yib ko girdi’ maku gathi bogi ban’en ndabiyog ni ngar k’adedan’rad u fithik’. Aningeg yay ni yog Paul ni “boch i yad” e de fol. Ere, rib gel e kireban’ riy ya immoy boch piyu Israel nra paged e ar’ar nib kireb ni nge gel ngorad ni bochan e dar taga’gad ngak Got.

Bin migid e, “Got e dabi thiliyeg e tin ni ke yog nra rin’.” Faan gad ra beeg murung’agen e pi n’en ni i rin’ Got ko girdi’ rok kakrom, ma be dag nib yul’yul’ ngak e ‘piin ni yad ma par nib t’uf rorad ma yad be fol ko tin ni ke yog ni nguur rin’ed.’ (Deut. 7:9) Re n’ey e ku be dag ni Got e gubin ngiyal’ ni ma tay u gil’ e pi n’en ni ke micheg. (Josh. 23:14) Piin nib t’uf Got rorad ma yad ma fol rok e faan yad ra lemnag rogon ni i par nib yul’yul’ ko girdi’ rok kakrom ma rayog ni nge pagan’rad ni: (1) Dabi pag reb e skeng ni ke yib ngodad ni ngari gel e mo’maw’ riy ndabiyog ni ngad k’adedan’dad u fithik’, ma (2) ra ‘pi’ e kanawo’ ngodad ni ngad bad riy nga wuru’ e pi n’em.’

Uw rogon nra pi’ Jehovah e kanawo’ ngak e piin ni yad ma taga’ ngak ni ngar bad riy nga wuru’ e pi skeng ni yad be mada’nag? Riyul’ nrayog rok ni nge chuweg reb e skeng ni gad be mada’nag ni faanra aram e n’en nib m’agan’ ngay. Machane, mu tay fanam i yan ko n’en ni yog Paul ni gaar: “Ra pi’ [Jehovah] gelngimed ngam k’adedan’med riy, ni aram e ke pi’ e kanawo’ ngomed ni ngam bad riy nga wuru’ e pi n’em.” Ere, boor yay nnap’an nra yib e skeng ngodad ma ma dag e “kanawo’” ngodad ni aram e ma pi’ e n’en nib t’uf rodad ya nge yag nda athamgilgad u fithik’ e pi skeng nem. Baaray boch e kanawo’ ni ma dag Jehovah e kanawo’ ngodad ni ngad bad riy nga wuru’ e pi skeng ni gad ma mada’nag:

• Ma “ayuwegdad [“fal’eg lanin’dad,” NW] u urngin e gafgow nge kireban’ ni ma yib ngodad.” (2 Kor. 1:3, 4) Rayog ni nge pi’ Jehovah e gapas nga lanin’dad nge gum’ircha’dad u daken e Thin rok, nge gelngin nib thothup, nge pi n’en ni ma pi’ fare tapigpig nib yul’yul’ ngodad.​—Matt. 24:45; John 14:16; Rom. 15:4.

• Rayog ni nge pow’iydad u daken gelngin nib thothup. (John 14:26) Nap’an ni gad ra mada’nag e skeng, ma rayog ni nge ayuwegdad gelngin Got nib thothup ni nge yib ngan’dad e pi n’en ni i buch rok boch e girdi’ u Bible nge boch e pi kenggin e motochiyel me ayuwegdad u rogon ni ngad nanged e n’en nib fel’ ni ngad rin’ed.

• Rayog ni nge fanay e pi engel rok ni nge ayuwegdad.​—Heb. 1:14.

• Rayog ni nge ayuwegdad u daken e pi walag u lan e ulung. Rayog ni nge yog ara rin’ pi walagdad boch ban’en nra pi’ e athamgil nga lanin’dad.​—Kol. 4:11.

Ere, mang e kad filed ko fapi thin ni yog Paul ni bay ko 1 Korinth 10:13? Kad filed riy nder ma mel’eg Jehovah e re miti skeng nra yib ngodad. Machane, nap’an ni gad ra mada’nag e skeng, ma rayog ni nge pagan’dad ni: Faanra pagan’dad ngak Jehovah, ma dabi pag e skeng ni ke yib ngodad ni nge pag rogon ndabkiyog ni ngad k’adedan’dad u fithik’, ya ra pi’ e kanawo’ ngodad ni ngad bad riy nga wuru’ e pi n’em. Riyul’ nra fal’eg e re thin ney lanin’dad!