Mu Chichiiy Pa’am Ko Michan’ Rom, U Fithik’ E Magawon!

“Pi walageg ni girdien Kristus! Mu lemniged gimed nib fel’ waathmed ko ngiyal’ nra yib urngin mit e skeng riy ngomed.”​—JAMES 1:2.

1. Ke michan’ e girdi’ rok Got ngak me “falfalan’rad” ngay ni yugu aram rogon ni bay mang rorad?

GIRDI’ rok Jehovah e yad e pi Mich rok ni ke michan’rad ngak me “falfalan’rad” ngay. (Deuteronomy 28:47; Isaiah 43:10) Yad ma yodor ni yugu aram rogon ni ma yib urngin mit e skeng ngorad. Yugu aram rogon ni bay e magawon rorad, machane ke pi’ e pi thin ni baaray e athamgil nga lanin’rad: “Pi walageg ni girdien Kristus! Mu lemniged gimed nib fel’ waathmed ko ngiyal’ nra yib urngin mit e skeng ngomed, ya gimed manang ni faanra gelnagmed e michan’ romed ko pi skeng nem ni aram rogon, ma wenegan nra yib ngomed e aram e ke yog romed ni nguum k’adedan’med.”​—James 1:2, 3.

2. Mang e yima nang morngaagen e cha’ ni yoloy e babyor ni James?

² Ke yoloy James ni gachalpen nge walagen Jesus e pi thin nem ni gonap’an 62 C.E. (Mark 6:3) James e ir reb e piilal ko congregation u Jerusalem. Rriyul’ ni ir, nge Cephas (ara Peter), nge John e “yad be gagiyegnag girdien e galesiya”​—ni yad e girdi’ ni yad ba mudugil. (Galatia 2:9) Nap’an ni sum e magawon ko circumcision min tamilangnag ngak e “pi apostal nge piin ni piilal ko galesiya” ni gonap’an 49 C.E., ma aram me tamilangnag James e thin nu Bible ni ke fel’ u wan’ girdien e governing body u nap’an e bin som’on e chibog.​—Acts 15:6-29.

3. Mang boch e magawon ni immoy rok e pi Kristiano ko fa bin som’on e chibog, ma uw rogon nra fel’ rogodad ko babyor ni James?

³ Ke ayuweg James e girdi’ ni bod be’ ni be gafaliy e saf ma ‘manang rarogon fare ran’ i saf.’ (Proverbs 27:23) Ma manang ni ba gel e skeng ni be yib ngak e Kristiano ko ngiyal’ nem. Ba t’uf ni nge yal’uweg boch e Kristiano e lem rorad, ya be yib laniyan’rad ko girdi’ ni bay boor ban’en rorad. Ke par boch e Kristiano ni dar yul’yul’gad ko liyor ni yad be tay ku Got. Boch i yad e ur fl’eged e magawon u blowtherad ni dan llowan’nag. Nifengin e fayleng e ke kirebnag e ulung, ma de gum’an’ boor e girdi’ ma dar meybilgad. Rriyul’ ni ke af e m’ar ko tirok Got ban’en ngak boch e Kristiano. Ke yoloy James e babyor ni fan ni nge ayuweg e girdi’ ko pi magawon nem me ubungrad, ma fonow rok e ku bpuluw ko ngiyal’ ney ni bod rogon e bin som’on e chibog C.E. Ri ra fel’ rogodad riy ni faan gad ra lemnag ni kan yoloy e re babyor nem ni fan ngodad.a

Nap’an Nra Yib Mmit e Skeng Ngodad

4. Susun uw rogon e gad ra lemnag e pi skeng ni ma yib ngodad?

⁴ Be dag James ngodad rogon ni ngad lemnaged e pi skeng ni ma yib ngodad (James 1:1-4) De yog ni ir walagen Jesus ni Fak Got, machane ke sobut’nag ir me yog ni “ir reb e tapigpig rok Got nge Somol i Jesus Kristus.” I yoloy James e thin ngak “fa ragag e ganong” nu Israel nib spiritual ni “ra wergad” ni bochan e togopuluw. (Acts 8:1; 11:19; Galatia 6:16; 1 Peter 1:1) Ku gadad e Kristiano ma yibe togopuluw ngodad, ma ma “yib urngin mit e skeng ngodad.” Machane faanra dabda paged talin ni skeng e ma gelnag e michan’ rodad, ma aram e gad ra ‘lemnag ni gadad rib fel’ waathdad” ko ngiyal’ nra yib e skeng ngodad. Faanra gad ra yul’yul’ ku Got u nap’an e skeng, ma aram e ra fek i yib e falfalan’ ngodad.

5. Mang e ba l’ag ngay ko pi skeng nra yib ngodad, ra diin ni faan ra k’adan’dad ngay?

⁵ Pi skeng ni ma yib ngodad e ba muun ngay e pi magawon ni bay rok urngin e girdi’ u fayleng. Amu lemnag e m’ar ni ma gafgownagdad. Darur ma fl’eg Got e maangang ni nge golnagdad, machane ma pi’ e fulweg ko meybil rodad ni gad ma ning e gonop nge gelngiy nib t’uf riy ni ngad k’adedan’dad ko m’ar. (Psalm 41:1-3) Maku yibe gafgownagdad ko ‘tin nib mat’aw ban’en’ ya yima togopuluw ko Pi Mich Rok Jehovah. (2 Timothy 3:12; 1 Peter 3:14) Faan gad ra k’adan’dad ko pi skeng nem, ma kad micheged e michan’ rodad ma aram me yib wenegan riy. Ma faanra gel e michan’ rodad ngay, ma aram me yog ngodad ni nguud k’adedan’dad. Michan’ ni ke gel ni bochan e skeng e ra ayuwegdad nguuda k’adedan’dad ko pi skeng nra yib ngodad nga m’on.

6. Uw rogon ni “ngad guyed rogon ngad k’adedan’dad nge mada’ ko tomur ndabda mulgad” ma mang e rayog ni ngad rin’ed ko ngiyal’ nra yib e skeng ngodad?

⁶ I gaar James: “Machane ngam guyed rogon ngam k’adedan’med nge mada’ ko tomur ndab mmulgad.” Faan gad ra pag ni ngi i ulul e skeng ma dabda guyed rogon ni ngad taleged u rogon nib togopuluw ko thin nu Bible, ma k’adan’uy e ra maruweliy ngad manged e Kristiano ni polo’, ndariy ban’en nde gaman ko michan’ rodad. Faanra tamilangnag e skeng ban’en nib meewar rodad, ma susun ni ngad gayed e ayuw rok Jehovah ni ngad gelgad ngay. Faan manga skeng e be wawliydad ni ngad uned ko ngongol ndarngal? Ngad yibilayed e re magawon nem ma da ngongolgad u rogon ni bpuluw ko meybil ni kad ted. Sana ba t’uf ni ngad thiliyeged e maruwel rodad ara ngad maruweliyed e kanawo’ ni ngad yul’yul’gad ku Got.​—Genesis 39:7-9; 1 Korinth 10:13.

Ngan Guy Rogon ni Nge Yog e Gonop

7. Uw rogon ni ran ayuwegdad ngad gelgad ko skeng?

⁷ Be dag James ngodad rogon ni ngad maruwelgad nfaanra dad nanged rogon ni ngad gelgad ko skeng. (James 1:5-8) Dabi lemnag Jehovah ni aram e kireb rodad nfaanra dariy e gonop rodad ma gad be yibilay. Ya ra ayuwegdad ngad lemnaged e skeng nrogon ni bpuluw ma ra ayuwegdad ngad k’adedan’dad riy. Sana ra yog e pi walagdad e thin nu Bible ngodad ara gad ra rung’ag e thin u nap’an e fol Bible ara muulung. Rayog ni ngad nanged e n’en nthingar da rin’ed ko ngiyal’ nra yarmiy Got e kanawo’ nge pow’iydad. Ya rayog ni nge pow’iydad gelngin Got. (Luke 11:13) Ra nge fel’ rogodad ma ba t’uf ni ngad chaggad ngak e girdi’ rok.​—Proverbs 18:1.

8. Mang fan ndabi yib e ayuw rok Jehovah ngak be’ ni ke maruwaran’ ngak?

⁸ Ma pi’ Jehovah e gonop ngodad ni fan ni nge ayuwegdad ngad k’adedan’dad ko pi skeng nfaanra “pagan’dad ngak Got ko ngiyal’ ni gadad ra wenignag ban’en ngak, ma dabi maruwaran’dad rok.” Be’ ni ra maruwan’ rok e “bod ba ley i n’ew u maday nnifeng e be mithmitheg ma be yannag.” Faanra aram rogodad ko tirok Got ban’en, ma ‘thingari dabda lemnaged nra pi’ Jehovah ban’en ngodad.” Dabda pired nde “mudugil laniyan’dad” ko meybil nge yugu boch ban’en. Ya nguuda pired nib mich Jehovah u wan’dad, ni ir e Ani Tapgin e Gonop.​—Proverbs 3:5, 6.

Piin ni Pire’ Ban’en Rorad nge Piin ni Gafgow e Rayog ni Ngar Falfalan’gad

9. Mang fan ni rayog ni nge falfalan’ e pi tapigpig rok Jehovah?

⁹ Faanra gafgow e aram reb e skeng rodad, ma dabda paged talin ni pi Kristiano ni pire’ ban’en rorad nge pi Kristiano ni gafgow e ku rayog ni ngar falfalan’gad. (James 1:9-11) U m’on ni ke mang e girdi’ ni kakrom pi gachalpen Jesus ni kan dugliyrad ma baga’ ni buchuw ban’en ni bay rorad ma kan lemnag ni yad ba sobut’. (1 Korinth 1:26) Machane rayog ni ngar falfalan’gad ko “flaab” rorad ni ngar uned ngak Kristus ko gagiyeg u Gil’ilungun Got. (Roma 8:16, 17) Mus ko girdi’ ni pire’ ban’en rorad ni kan tay farad u fayleng e kan “sobut’nag lanin’rad” ko ngiyal’ ni kar manged pi gachalpen Kristus ya ke fanenikayrad e fayleng. (John 7:47-52; 12:42, 43) Machane gadad e pi tapigpig rok Jehovah ma gad gubin e rayog ni ngad falfalan’gad ya dabiyog ni ngan taarebnag e fel’ rogon ko fayleng nge liw nib tolang ko flaab ko tirok Got ban’en ni bay rodad. Ma kari falfalan’dad ni dariy u fithik’dad e lem nib tolangan’ ko liw u fayleng!​—Proverbs 10:22; Acts 10:34, 35.

10. Uw rogon u wan’dad e Kristiano e par ko girdi’ ni pire’ ban’en rorad?

¹⁰ Be ayuwegdad James nge tamilang u wan’dad ni n’umngin e yafas rodad e de tor ko pire’ ban’en rodad ara ba tolang e liw rodad. Bod rogon yaan e floras nib fel’ ni dabiyog ni nge taleg “gawelngin e yal’” nge mororoy, ma aram rogon e girdi’ ni pire’ ban’en rorad ni chugum rorad e dabiyog ni nge n’uwnag e pogofan rorad. (Psalm 49:6-9; Matthew 6:27) Sana ra yim’ ko ngiyal’ ni “ka be maruweliy e tirok riy,” ni bod e business. Ere bin ni baga’ fan riy e ngad kunuyed ni nge “yoor e tirok Got ban’en rodad” ma ngad mon’ognaged Gil’ilungun Got.​—Luke 12:13-21; Matthew 6:33; 1 Timothy 6:17-19.

Ke Falfalan’ e Piin ni Kar K’adedan’rad ko Skeng

11. Mang angin nra yib ngak e piin ni ma chichiiy pa’rad ko michan’ rorad u nap’an e skeng?

¹¹ Demtrug ni pire’ ban’en rodad ara gad ba gafgow, ya ke mus nrayog e falfalan’ ngodad ni faanra gad ra k’adan’dad ko skeng. (James 1:12-15) Faanra gad ra k’adan’ ko skeng ma ngad pired nib gel e michan’ rodad ma aram e rayog ni ngan nog ni ke falfalan’dad ngay, ya ra falfalan’ e girdi’ ni be rin’ e tin nib mat’aw u p’eowchen Got. Ma faanra par girdien fachi ulung nib gel e michan’ rorad nge mada’ ko ngiyal’ ni ngar m’ad, ma yira pi’ e “teeliyaw ko yafas” ngorad ngar pired ni yad ba fas ndariy n’umngin nap’an u tharmiy. (Revelation 2:10; 1 Korinth 15:50) Faanra gad be athapeg e yafas u fayleng ma gad ra par nib gel e michan’ rodad, ma aram e rayog e yafos ni dariy n’umngin nap’an ngodad u paradis u fayleng. (Luke 23:43; Roma 6:23) Ri ma runguy Jehovah e piin ni yad be maruweliy e michan’ rorad ngak!

12. Faanra yib e skeng ngodad, mang fan ni susun ndab dogned: “Re n’ey ni be n’en ni nge wawliyeg nggu denen e yib rok Got”?

¹² Be skengnagdad Jehovah ni ngad rin’ed e kireb fa? Danga’, ya susun ndab dogned ni nge lungudad: “Re n’ey ni be n’en ni nge wawliyeg nggu denen e yib rok Got.” Gathi be guy Jehovah rogon ni nge wawliydad ngad denengad machane ba mugudil ni baadag ni nge ayuwegdad me pi’ gelngidad nib t’uf rodad ngad k’adedan’dad ko skeng nfaanra gad ra par nib gel e michan’ rodad. (Filippi 4:13) Ba thothup Got, ere dabi pi’ e magawon ngodad ni nge warnagdad ngad uned ko kireb. Faanra bay e magawon rodad ni kad togopuluwgad ko thin nu Bible ma kad denengad, susun ni dab dogned ni aram e kireb rok Got, “ya dariy ban’en nib kireb nrayog rok ni nge yan i guy rogon nge wawliy nge denen, mi Got e der rin’ ngak be’.” Yugu aram rogon nra pag Jehovah ni nge yib e skeng ngak pi gachalpen Jesus ni fan ni nge llowan’nagrad nge fel’ rogorad riy, machane dabi skengnagdad ni ngad rin’ed e kireb. (Hebrews 12:7-11) Sana ra wawliydad Satan ni ngad rin’ed e kireb, machane rayog ni nge ayuwegdad Got rok faanem nib kireb.​—Matthew 6:13.

13. Mang e ra buch ni faanra dabda chuweged e ar’ar’ u gum’ercha’dad?

¹³ Ba t’uf ni ngad meybilgad ku Got ya boch e magawon e ra k’aring e ar’ar’ nib kireb ma rayog ni nge wawliydad ngad denengad. Be gaar James: “Pi n’en ni ma wawliy e girdi’ nge denen e ma yib ngak e en ni pag ir ko n’en nib kireb ni be ar’arnag nge wawliy faanem nge aw ko wup.” Dabiyog ni nga dogned ni denen ni kad ngongliyed e yib rok Got ni faanra kad paged ni nge par e ar’ar’ u gum’ercha’dad. Faanra dabda chuweged e ar’ar’ u gum’ercha’dad, ma ra “diyen e tin nib kireb,” ma ra “gargeleg e denen.” Faani ilal e denen, ma aram me “gargeleg e yam’.” Ere ba gagiyel ni ba t’uf ni ngad ayuweged gum’ercha’dad ma ngad togopuluwgad ko ar’ar ni be wawliydad ngad denengad. (Proverbs 4:23) Kan ginang Kain nra gel e denen ngak, machane de fol rok. (Genesis 4:4-8) Ere, faan manga gad be nameg e ngongol nib togopuluw ko thin nu Bible? Dabi siy ni susun ni ngad ted fan e piin ni piilal ni Kristiano nfaanra yad be guy rogon ni ngar yal’uweged gadad ndabda denengad nib togopuluw ngak Got.​—Galatia 6:1.

Got​—Tapgin e Tin nib Fel’ Ban’en

14. Uw rogon nrayog ni ngan nog ni ba “flont” e pi tow’ath ni ma pi’ Got?

¹⁴ Susun ndabda paged talin ni Jehovah e ir Tapgin, ngathi tapgin e skeng ni ma yib ngodad, machane ir tapgin e tin nib fel’ ban’en. (James 1:16-18) Ke pining James ngak pi gachalpen, “gimed e pi walageg ni girdien Kristus” me dag ni Got e ir e Ani be Pi’ “urngin e tin nib fel’” nge “urngin e tow’ath nrib flont.” Ba “flont” e pi tow’ath ni yib rok Jehovah ni bod e chugum nge tirok Got ban’en ya ba polo’ ma dariy ban’en nde gaman riy. Be yib u lang, me yib u tagil’ Got u tharmiy. (1 Kings 8:39) Jehovah e ir e Ani “sunmiy urngin ban’en ni be gal ramaen u lan e lang”​—e yal’, nge pul, nge pi t’uf. Maku ma pi’ e tamilangan’ ko tirok Got ban’en nge thin riyul’. (Psalm 43:3; Jeremiah 31:35; 2 Korinth 4:6) Got e gathi bod e yal’ ni ma yan ko kanawo’ rok u lang me n’igin ni nge thilthil fon ban’en me par ni th’abi tolang ni goo ke mus ko misiw, ya gubin ngiyal’ ma bay Got ni th’abi tolang ma ma pi’ e tin nib fel’. Dabi siy nra pi’ Got e tin nib t’uf rodad ni ngad gelgad ko pi skeng nra yib ngodad ni faanra gad ra tay fan e tirok Got ban’en ni be pi’ u daken e Thin rok nge fare “tapigpig nib yul’yul’ mab gonop.”​—Matthew 24:45.

15. Mang e tow’ath ni bin th’abi manigil ni be pi’ Jehovah?

¹⁵ Mang e tow’ath ni bin th’abi manigil ni ke pi’ Got ngodad? Aram pi fak ni ke fakayrad ma bay e kan ni thothup rorad ni yad be maruweliy e thin nib fel’, ara “thin rok nib riyul’.” Pi girdi’ nem ni kan gargelnagrad biyay ko kan ni thothop e yad “boch e tin mm’on u fithik’ urngin wom’engin e gek’iy,” ni kan mel’egrad u fithik’ e girdi’ nu fayleng ni nga ranod nga tharmiy mar “manged ba nam i prist .” (Revelation 5:10; Efesus 1:13, 14) Sana ke lemnag James morngaagen e barley ni ir e mm’on u fithik’ urngin e wom’engin e gek’iy ni yima pi’ ni maligach u nap’an e Nisan 16, ni aram rofen nni faseg Jesus ko yam’, nge l’agruw e flowa ni wheat ni yima pi’ ko Pentecost, ni aram e rofen ni kan puog e kan ni thothup nga daken pi gachalpen Jesus. (Levitikus 23:4-11, 15-17) Jesus e ir mm’on u fithik’ urngin wom’engin e gek’iy ma pi gachalpen nra un ngak ko gagiyeg u tharmiy e yad “boch e tin mm’on u fithik’ wom’engin e gek’iy.” Faan manga gad be athapeg e yafos u fayleng? Faanra dabda paged talin e athap rodad ni ngad pired u fayleng ndariy n’umngin nap’an e ra ayuwegdad ngad chichiiyed pa’dad ko michan’ rodad ko fa Ani “be pi’ urngin e tin nib fel’,” ni ir e ke fl’eg rogon ni nge yog e par ndariy n’umngin nap’an u tan e Gagiyeg rok.

“Mmaruwelgad Ngay”

16. Mang fan ni susun ni ngad “gurgad ko motoyil machane dabda gurgad ngad welthingad ma dabda gurgad ngad damumuwgad?

¹⁶ Demtrug ni bay e skeng ko michan’ rodad e ngiyal’ ney fa danga’, thingar da “maruwelgad ngay.” (James 1:19-25) Thingar da “gurgad ko motoyil” ko thin rok Got, ma ngad maruwelgad ngay. (John 8:47) Machane, dabda “gurgad ngad welthingad,” ma ngad koled ayuwngidad riy ni ngad mel’eged e thin nib mat’aw. (Proverbs 15:28; 16:23) Be piningdad James ni dabda gurgad nga dogned ni skeng rodad e yib rok Got. Maku ke fonownagdad ni “dabda gurgad ngad damumuwgad; ya damumuw rok e girdi’ e dar ma ayuweg e girdi’ nge yog nra ngongliyed e e tin nib mat’aw ni ir e be finey Got.” Faanra yib e damumuw ngodad ni bochan e n’en ni yog be’, “dabda gurgad” ni ngad sulweg e thin ni ba gel. (Efesus 4:26, 27) Damumuw e ra sunmeg e magawon rodad ma ra skengnag e michan’ rok yugu girdi’ ya ngongol rodad e dabi ayuwegrad nge michan’rad ngak e Got rodad nib mat’aw. Maku, faanra “yoor e gonop” rodad, ma dabda “gurgad ni ngad damumuwgad,” ma ra chugur e pi walagdad ni pumoon nge ppin ngodad.​—Proverbs 14:29.

17. Mang angin nra yib nfaanra gad ra n’ag urngin e kireb u gum’ercha’dad nge lanin’dad?

¹⁷ Ri ba t’uf ni ngad n’aged “urngin e ngongol rodad nib golong”​—ni gubin ban’en ni dabun Got ni ma k’aring e damumuw. Maku, thingar da n’aged “urngin i pangidad nib kireb.” Gad gubin e susun ni ngad n’aged urngin e ngongol nge lem nde klin rodad. (2 Korinth 7:1; 1 Peter 1:14-16; 1 John 1:9) Nap’an ni kad n’aged e kireb u gum’ercha’dad nge lanin’dad kafram ma ke ayuwegdad ni ngad “folgad ko thin rok ni riyul’ ni ke yung nga lanin’dad.” (Acts 17:11, 12) Demtrug ko uw n’umngin nap’an ni gad e Kristiano, thingar ud paged ni ngan yung e thin riyul’ nga lanin’dad. Mang fan? Ya thin riyul’ ni ra yung e kan ni thothup nga lanin’dad e ra k’aring e “bin nib biech gadad” me thapegdad ngak Got.​—Efesus 4:20-24.

18. Uw rogon nib thil be’ ni ma motoyil ko thin rok Got machane dabi maruwel ngay nge be’ ni ma maruwel ngay?

¹⁸ Uw rogon ni gad ra dag ni be pow’iydad e thin rok Got? Ya gad ra fol ni gathi ke mus ni “nguud motoyilgad ko thin rok, ya ngad maruwelgad ngay. (Luke 11:28) Piin ni ma “maruwel ngay” e bay e michan’ riy ni ma k’aringrad ni ngar pasiggad ko machib mar uned ko pi muulung ko girdi’ rok Got. (Roma 10:14, 15; Hebrews 10:24, 25) Be’ ni ra motoyil ko thin rok Got ma dabi maruwel ngay e “bod be’ ni changar nga lan mit e thirek nge guy rogon yaan.” Ra sap nga lan e thirek nge guy rogon yaan ma ra chuw me pag talin yaan ban’en nib t’uf ni nge fl’eg. Faan gadad e girdi’ ni ma “maruwel ko thin rok Got, ma gad ra fil e thin rok ma gad ra fol ko pi “motochiyel nib flont” rok Got nib muun ngay gubin ban’en ni baadag Got ni ngad rin’ed. Ere ba math keru’ e puf rogoy ni ke falfalan’dad ngay ko n’en ni be koldad ni m’ar nge yam’, ya ra pow’iydad ko yafos. Ere nguuda tedan’dad ko fare motochiyel nib flont, ma ngad fl’eged i yaliy gadad ni fan ngad folgad riy. Ma amu lemnag! Faan nguud motoyilgad ko thin rok ma ngad maruwelgad ngay, ma ra yog e falfalan’ ngodad ya kad fel’gad u wan’ Got.​—Psalm 19:7-11.

Gathi Bogi Girdi’ ni Ma Liyor Ku Got

19, 20. (a) Mang e be weliy James 1:26, 27, ni ba t’uf ni ngad rin’ed ni fan ko liyor nib biech? (b) Mang boch ban’en nib l’ag ngay ko liyor nib biech?

¹⁹ Faanra gad ra fel’ u wan’ Got, ma ba t’uf ni ngad lemnaged ni bin riyul’ e liyor e gathi bod bogi girdi’ ni ma liyor ku Got. (James 1:26, 27) Sana gad be lemnag ni gad ffel’ u wan’ Jehovah, machane n’en nra turguy Got e aram e n’en ni ri baga’fan. (1 Korinth 4:4) Taareb e oloboch e sana dabda “gagiyegnaged blowthedad.” Gad be bannagdad ni faanra gad be lemnag ni ke falfalan’ Got ko liyor ni gad be tay ni faanra gad be tar e thin nga daken e girdi’, nge lifith l’ugudad, ma da fanayed blowthedad nga rogon nde mat’aw. (Levitikus 19:16; Efesus 4:25) Dabi siy ni dubdad ni nge “m’ay fan” e “liyor ni gad be tay ngak Got” me par nde fel’ u wan’.

²⁰ Yugu aram rogon ni de tamilangnag James gubin ban’en u morngaagen e liyor nib biech, machane be weliy ni ba l’ag ngay ni “ngan ayuweg e bitir ndariy e gallabthir rorad nge piin ni ppin ni ke yim’ e pumoon rorad ma yad be gafgow.” (Galatia 2:10; 6:10; 1 John 3:18) Baadag e congregation rok Kristus ni nge ayuweg e piin ni ppin ni ke yim’ e pumoon rorad. (Acts 6:1-6; 1 Timothy 5:8-10) Got e ir e Ani be Ayuweg e piin ni ppin ni ke yim’ e pumoon rorad nge pi bitir ndariy e gallabthir rorad, ere ngad folgad Rok ma ngad rin’ed e n’en nrayog rodad ni ngad ayuweged yad ko tirok Got ban’en nge chugum. (Deuteronomy 10:17, 18) Liyor nib biech e ku be sor fan ni nge “dabi kirebnagey e kireb nu fayleng,” ni aram e girdi’ nu fayleng nde mat’aw ni bay u tan pa’ Satan. (John 17:16; 1 John 5:19) Ere nguuda pired nib orel ko re fayleng ney ni de nang Got ma ngad pininged e sorok ngak Jehovah ma ngad maruwelgad ngay ni ngad pigpiggad ngak.​—2 Timothy 2:20-22.

21. Mang boch e deer ni gad ra weliy morngaagen e babyor ni James?

²¹ Pi thin ni yoloy James ni kad weliyed e susun ni nge ayuwegdad ni nguud k’adedan’dad ko skeng nra yib ngodad me ayuwegdad ngad chichiiyed pa’dad ko michan’ rodad. Susun ni nge ayuwegdad nguud ted fan e Ani be pi’ e tow’ath nrib manigil. Ma pi thin rok James e be ayuwegdad ni ngad maruweliyed e liyor nib biech. Mang e ka bay ni ke tamilangnag ngodad? Mang e rayog ni ngad rin’ed ngad micheged ni bay e bin riyul’ e michan’ rodad ku Jehovah?

[Boch e Thin nra Tamilangnag Murung’agen]

Uw Rogon e Fulweg Rom?

◻ Mang e ra ayuwegdad ngad k’adedan’dad ko skeng?

◻ Yugu aram rogon ni ra yib e skeng, mang fan nra falfalan’ e Kristiano?

◻ Uw rogon ni gad ra maruwel ko thin rok Got?

◻ Mang e ba l’ag ngay ko liyor nib biech?

[Sasing ko page 6]

Faan ra yib e skeng ngom, mu maruweliy e michan’ rom nga gelngin Jehovah nra fulweg e meybil