Mang e be buch ko piin ni fel’ yangaren?

THIN nib fel’ ara thin nib kireb​—bin ngan e ga baadag ni ngam rung’ag ni som’on? Kan fith e re deer ney ngak e piin ni fel’ yangaren ma boor i yad e kar adaged ni ngar rung’aged e thin nib kireb nsom’on ya kar lemnaged nra par e thin nib fel’ u wan’rad nib n’uw nap’an boch.

Faan gad ra lemnag e pi n’en ni be buch ko piin ni fel’ yangaren, ma thingar da lemnaged rogon e fayleng e ngiyal’ ney. Piin ni pillibthir e yad ma yog ni piin ni fel’ yangaren ko ngiyal’ ney e gathi yad bod e piin ni fel’ yangaren ni kafram. Machane dabun e piin ni fel’ yangaren ni ngan nog ni darur ma maruwelgad ni bod rogon e piin ni fel’ yangaren kafram. Yugu demtrug, taab laniyan’ e girdi’ ni ma lemnag morngaagen e par ko girdi’ e ngiyal’ ney ma yad ma lemnag ni ba thil e piin ni fel’ yangaren e ngiyal’ ney ko tin kafram.

Uw Fene Thil Rogon?

Yugu aram rogon ni ma lemnag e girdi’ ni susun ni nge ngongliy e piin ni fel’ yangaren e ngongol nib fel’, ma ra rin’ed e pi n’en nib mil fan ngorad, ma ra ted fan yugu boch e girdi’, machane baga’ ni darur ma rin’ed e pi n’en ney. Bay e report u lan e simbung nu London ni The Independent, ni be weliy ni piin ni fel’ yangaren e yad “be k’aring e ‘lem nib biech’ ni ngar togopuluwgad nga reb e fayleng ni yad be lemnag ni de ayuwegrad.” Rayog ni ngan guy biney e ‘lem nib biech’ ni ngar togopuluwgad” riy ya rib buchuw e piin ni fel’ yangaren ni yad baadag ni ngan lemnagrad ni yad e girdi’ nib “llowan’ mab pagan’.” Yad baadag ni ngan lemnagrad ni yad “mmaloboch ma de yalen e wok rorad.”

Ya amu lemnag e bugel u Britain​—baga’ ni ke rin’ e piin ni fel’ yangaren​—ma ke man ragag yay u thilin e duw ni 1950 nge 1993. Maku ke man ni kan pag rogon e drugs nge alkul. Kan yoloy e thin u lan e simbung ni The Times nu London ni ke chugur ni urngin e nam nib fel’ rogon e ke “yoor e m’ar ni kan nog e psychosocial disorder ngay ko piin ni fel’ yangaren ni ka nap’an e Bin L’agruw e Mahl u Fayleng.” Be weliy David J. Smith ni ir e professor ko criminology ni pi m’ar ney e “de sum ni bochan e gafgow ara ke yoor ni ke fel’ rogoy ko ban’en ndemtrug rogon.” Be dag e report ni rib gel thil u thilin e piin ni fel’ yangaren e ngiyal’ ney nge piin ni kar ilalgad.

Ngiyal’ ney ma ba gel e n’en ni ma tomalnagan’ e piin ni fel’ yangaren. Boor e piin ni fel’ yangaren e kar guyed rogon ni ngar uchuliyed k’angarad ma aram e kar m’ad. Be weliy e simbung ni Scotland’s Glasrow Herald ni ke mun l’agruw yay e piin ni fel’ yangaren ni dawori 12 e duw rorad ni kar guyed rogon ni ngar uchuliyed k’angarad ni ka nap’an ragag e duw faram. Ma ku aram rogon e piin ni fel’ yangaren nib ilal ngorad ni kar paged e tin nib tomal laniyan’ ni nge pow’iyrad ni ngar uchuliyed k’angarad. Me weliy e simbung ni gaar: “Ke yoor e girdi’ ni be uchuliy k’angan ni bochan e kab gel e magawon u laniyan’ e piin ni fel’ yangaren ko ayuw ni yibe pi’ ngorad.”

Mini’ e Kireb e Rok?

Mom ko piilal ni nga rogned ni aram e kireb rok e piin ni fel’ yangaren ni bochan nib “kireb” e lem rorad. Machane, gathi rriyul’ ni pi n’en ni be buch ko piin ni fel’ yangaren e ngiyal’ ney e ku aram e kireb rok e piilal? Baga’ ni yima yog ni ke kireb e lem rok e bitir ni bochan e towasar u thilin e girdi’, der ayuweg e gallabthir e bitir rok, ma dariy be’ ni nge pagan’ e bitir ngak. Be weliy e Professor Sir Michael Rutter ni ir e ga’ ko Britain’s Medical Research Council Child Psychiatry Unit ni gaar: “Taareb rogon e mulan’ ko urngin e girdi’ e ngiyal’ ney ko 30 e duw faram.” Mi gaar: “Machane kari gel ko bitir nge piin ni fel’ yangaren. . . . Dariy e maruwar riy ni ke gel e mulan’ ko bitir ni bochan e tabinaw ni ke war, ni gathi ke mus ni bochan e dar ko mabgol, machane ku bochan e pi magawon u thilin e piilal.”

Ke weliy reb e researcher ni piin ni fel’ yangaren e yad be “togopuluw ko yalen kafram.” Mang fan? “Ya yalen kafram e de puluw ko ngiyal’ ney.” Nga mu lemnag rogon ni kan togopuluw ko yalen kafram ko ngiyal’ ni be ngongol reb e pumoon ni bod e ppin nge ppin ni bod e pumoon. Baadag boor e rugod e ngongol nib gel nge cham, ma baadag boor e pagal e ngongol ni bod e ppin. Rib thil ko yalen kafram!

U lan 80,000 e congregation ko Pi Mich Rok Jehovah ma ga ra guy e piin ni fel’ yangaren nrayog ni ngam tay fan. Ur folgad ko pi thin ni i yog Paul ngak Timothy ni ngar “ngongliyed e tin nib fel’, ma ngongol nib fel’ e nge yoor ni ngar ngongliyed, ma ngar golgad ni nge m’agan’rad ngay ni ngar pied boch e tin ni ba’ rorad ban’en ngak boch e girdi’. Ereray kanawoen mi yad kunuy e flaab ni fan ngorad ni ir e bay mang def ngorad nib gel ni fan ngorad e chiney i yan ngaram.” (1 Timothy 6:18, 19) Nga mu un ko pi muulung ni ngam nang boch u morngaagen e piin ni fel’ yangaren ney. Ya ku rayog rom ni ngam athapeg e par nib fel’.

[Sasing ko page 4]

Yad be kunuy e flaab ni fan ngorad ni ir e bay mang def ngorad nib gel ni fan e chiney i yan ngaram”