Michan’ E Ma N’igindad Ngad Pired Ni Gadad Ba Gum’an’ Ma Ra Ayuwegdad Nga Ud Meybulgad
“Mpired ni gimed ba gum’an’; mu pired nib mudugilan’med ko n’en ni ke l’agan’med ngay, ya chirofen nra moy Somol riy e ke chugur.”—JAMES 5:8, New World Translation.
1. Mang fan ni susun ni ngad lemnaged e thin ko James 5:7, 8?
KE n’uw nap’an ni kan sonnag e ngiyal’ nra “moy” Jesus Kristus ma chiney e ke riyul’. (Matthew 24:3-14) Gubin e girdi’ ni ke mich Got nge Kristus u wan’rad e susun ni ngar lemnaged e pi thin ni yog James ni ke gaar: “Pi walageg ni girdien Kristus, mpired ni gimed ba gum’an’ nge mada’ ko ngiyal’ nra moy Somol riy. Mu guyed feni gum’an’ e en ni ma woldug nga rogon ni ma sonnag e woldug rok ni nge yib limngun ara wom’engin nri baga’ fan ngak. Ma sonnag e ngiyal’ ni som’on ko n’uw nge ngiyal’ ni tomren e n’uw u fithik’ e gum’an’. Ere ku er rogomed nthingar mu pired ni gimed ba gum’an’! Mpired nib mudugilan’med ko n’en ni ke l’agan’med ngay, ya chirofen nra moy Somol riy e ke chugur.”—James 5:7, 8.
2. Mang boch e magawon rok e girdi’ ni ke yoloy James e babyor ngorad?
2 Fapi girdi’ ni ke yoloy James e pi thin nem ngorad e thingara pired ni yad ba gum’an’ mar pithiged e pi magawon rorad. De puluw e ngongol rok e girdi’ ni urogned ni ke mich Got u wan’rad. Ya amu lemnag, ba t’uf ni ngan yal’uweg boch e ar’ar’ ni ke sum u gum’ercha’en e girdi’. Ba t’uf ni ngan pithig e magawon u thilrad nge yog e gapas ngorad. Maku ba t’uf ni ngan fonownagrad ni ngar pired ni yad ba gum’an’ ma nga ur meybilgad. Gad ra weliy morngaagen e pi n’en ni yog James ngorad, ere ngad guyed ko uw rogon nrayog ni ngad folgad riy.
Ar’ar’ nib Kireb e Rayog ni Nge Kirebnagey
3. Mang fan ni immoy e magawon u lan e ulung, ma mang e rayog ni ngad filed riy?
3 De moy e gapas u fithik’ boch e Kristiano, ma ar’ar’ nib kireb e ir likngin e magawon rorad. (James 4:1-3) Gun’gun’ nib togopuluw e ke k’aring e magawon, ma boch e girdi’ e ur gathibthibnaged pi walagrad. Ke buch e re n’ey ni bochan e ar’ar’ ko ngongol ndarngal nib togopuluw ko dowef rorad. Sana ku er rogodad ni thingar da yibilayed e ayuw ni ngad togopuluwgad ko lem ni ngad tolanggad ko liw, nge gelngiy, nge chugum ni fan ndabda kirebnaged e gapas ko congregation. (Roma 7:21-25; 1 Peter 2:11) Ke gel e chogow u fithik’ boch e Kristiano ko fa bin som’on e chibog me sum e lem ni fanenikan nge cham. Bochan ni de fulweg Got taban e meybil rodad nde puluw ma aram ma ur chamgad ni nge yog e tin ni kar nameged ngorad. Faanra ku er rogon e ar’ar’ rodad, ma rayog ni ngad ninged ban’en machane dabki yog ngodad, ya dabi pi’ Got nib thothup e fulweg ko meybil ni aram rogon.—Lamentations 3:44; 3 John 9, 10.
4. Mang fan ni ke pining James “piin ni kar pired be’ ni gathi mabgol rorad” ngak boch e Kristiano, ma uw rogon u wan’dad?
4 Pi Kristiano kakrom e ur ngongolgad ni bod e fayleng, mu ur pired ni yad ba awan’ ma yad ba tolangan’. (James 4:4-6) I pining James e “piin ni kar pired be’ ni gathi mabgol rorad” ngorad ya ur fagergad ko fayleng ma aram e kar ngongliyed e ngongol ndarngal ko tirok Got ban’en. (Ezekiel 16:15-19, 25-45) Dubdad ni ngad boded e fayleng ko lem nge numon nge ngongol rodad, ya gad ra mang e pi toogor rok Got. Be dag e Thin rok Got ni “awan’” e ir bang e lem nib kireb, ara “gireng,” ni bay u fithik’ e girdi’ ni tadenen. (Genesis 8:21; Numbers 16:1-3; Psalm 106:16, 17; Ecclesiastes 4:4) Ere faanra ba t’uf ni ngad chamgad ko lem nib kireb rodad ni bod e awan’ nge tolangan’ ara yugu ban’en, ma nguud yibilayed e ayuw rok Got ni nge pi’ e kan ni thothup rok ngodad. Re gelngin nem ni aram e ayuw rok Got e kab gel ko “awan’.” Yugu aram rogon ni ma togopuluw Jehovah ngak e piin nib tolangan’rad machane ra ayuwegdad ni faanra gad ra cham ko ar’ar’ rodad.
5. Ra nge yog e ayuw rok Got ngodad, ma mang boch ban’en nthingar da rin’ed?
5 Uw rogon ni ra yog e ayuw rok Got ngodad? (James 4:7-10) Ra nge falfalan’dad ko ayuw rok Jehovah ma thingar da folgad rok, ngad ted fan e pi n’en ni ma pi’ ngodad ma ngad rin’ed e tin nib m’agan’ ngay. (Roma 8:28) Maku thingar da “togopuluwgad” ara ngad ‘sak’iygad’ u mit e Moonyan’. Ya ra ‘mil rodad’ ni faanra gad ra par nib yul’yul’ ko gagiyeg rok Jehovah. Maku bay rodad e ayuw rok Jesus ni be taleg e pi ulung nib kireb u fayleng ni dabra gafgownaged gadad ndariy n’umngin nap’an. Ma dabda paged talin: Faan gad ra meybil ngak Got ma ngad folgad rok ngad maruweliyed e michan’ rodad, ma gad ra chugur ngak, ma aram me chugur Got ngodad.—2 Kronicles 15:2.
6. Mang fan ni pining James e “pi tadenen” ngak boch e Kristiano?
6 Mang fan ni pining James e “pi tadenen” ngak boch e girdi’ ni urogned nib mich Got u wan’rad? Ya ur uned ko “mahl” nge fanenikan—ni aram boch ban’en ndabi un e Kristiano ngay. (Titus 3:3) Ba t’uf ni ngar maluknaged “pa’rad” ya ba sug e kireb riy. Maku ba t’uf ni ngar klinnaged “gum’ercha’rad” ya aram e n’en ni be k’aringrad ngar maruwelgad. (Matthew 15:18, 19) Pi girdi’ nem ni “piin ni yad be dake modingnaged yad,” e ur maloggad rok Got mu ur fagergad ko fayleng. Yibe ginangdad ko ngongol rorad nib kireb ere ngad athamgilgad ni dabi kirebnag e pi n’en nem e michan’ rodad.—Roma 7:18-20.
7. Mang fan ni yog James ngak boch e Kristiano ni ngar “dolo’loy’gad, mi yad yor”?
7 Yog James ngak e girdi’ nra bieg e babyor rok ni gaar: “Me kireban’med, mi gimed dolo’loy, mi gimed yor.” Faanra kireban’rad ngak Got, ma ra micheg ni ke kalngan’rad. (2 Korinth 7:10,11) Ngiyal’ ney ma bay boch e gird’ ni yad ma yog ni ke mich Got u wan’rad machane yad be guy rogon ni ngar fagergad ko fayleng. Faanra er rogon ni gad be nameg, susun dabi kireban’dad ngay ni kad wargad ko tirok Got ban’en ma ngad guyed rogon ni ngad yal’uweged nib papey? Faanra kad yal’uweged rarogodad me n’ag Got fan e kireb rodad ma ra tolangnagdad Got ya ra par e nangan’ rodad nib klin ma ra falfalan’dad ngay nrayog e par ndariy n’umngin nap’an ngodad nga m’on.—Psalm 51:10-17; 1 John 2:15-17.
Ra Bigimed ma Dabi Gathibthibnag Bigimed
8, 9. Mang fan ni ra bagadad ma susun ndabi weliy ban’en nib togopuluw ngak bagadad ara ngad thibthibnaged gadad?
8 Ba denen ni ngan thibthibnag be’ ni walagey. (James 4:11, 12) Machane aram rogon boch e Kristiano ni yad ma thibthibnag e pi walagrad, sana yad be rin’ ni bochan ni yad be lemnag ni yad ba mat’aw ara yad baadag ni ngar tolangnaged yad mar sobut’naged yugu girdi’. (Psalm 50:20; Proverbs 3:29) Fare bugithin nu Greece ni kan piliyeg ‘weliy ban’en nib togopuluw’ e ma sor fan ko fanenikan ma baga’ ni aram e thin nni tunguy nde riyul’. Aram rogon nra thibthibnag be’ walagen. Machane uw rogon ni ba m’ag riy ni yibe “welthin nib togopuluw ko fare Motochiyel min thibthibnag e re Motochiyel nem? Amu lemnag e pi scribe nge Farise ni ur ‘dariy fannaged e thin rok Got’ mu ur turguyed boch ban’en ko lem rorad. (Mark 7:1-13) Ku aram rogon e ngiyal’ ney, faanra gad ra turguy nde mat’aw be’ machane de lemnag Jehovah ni ir be nde mat’aw, ma gathi gad be welthin nib togopuluw ko motochiyel rok Got’ ma gathi gad be yog nde puluw? Faan gad ra gathibthibnag be’ ni walagdad, ma aram e darud maruweliyed e motochiyel ko t’ufeg.—Roma 13:8-10.
9 Dabda paged talin: “Goo Got e ir e ma pi’ e motochiyel ma ir e ma pufthin”—ni Jehovah. Ba polo’ ma ‘ba flont e motochiyel’ rok. (Psalm 19:7; Isaiah 33:22) Goo Got e bay mat’awun ni nge fl’eg e pi motochiyel ni fan ni nge thapeg e girdi’ ngak. (Luke 12:5) Ere fith James ni gaar: “Ga be finey me gur mini’ ni ngam thibthibnag be’ ni gimew?” De mil fan ngodad ni ngad pufthinnaged e yugu girdi’. (Matthew 7:1-5; Roma 14:4, 10) Faan gad ra lemnag nib mat’aw Got ko gagiyeg nge rogon nde laniyan’ Got nge rogon ni gad e girdi’ nib tadenen ma ra ayuwegdad ni dabda ufgad ni ngad pufthinnaged yugu girdi’.
Dabda Ufgad
10. Mang fan ni susun ni ngad lemnaged Jehovah u gubin e rran ni gad ba fas?
10 Gubin ngiyal’ ma susun ni ngad lemnaged Jehovah nge pi motochiyel rok. (James 4:13-17) Be’ ni ma uf e ma dariy fannag Got ma ma yog ni gaar: ‘Daba’ ara gabul e ngad milekaggad nga reb e binaw ngad siyobaygad riy u lan reb e duw me yog e salpiy ngodad ni pire’.’ Faanra ‘boor ban’en ni kad kunuyed ke yoor ban’en rodad, machane de yoor ban’en rodad u p’eowchen Got,’ ma rayog ni ngad m’ad gabul ma dabiyog ni ngad pigpiggad ku Jehovah. (Luke 12:16-21) Yog James ni gad bod bochi yang i ath ni sum ko garbeb, “ni yib i m’ug ma de n’uw nap’an me m’ay nga bayang.” (1 Kronicles 29:15) Ke mus nrayog ni ngad athapeged e falfalan’ nge yafos ndariy n’umngin nap’an ni faanra gad ra maruweliy e michan’ rodad ngak Jehovah.
11. Fapi thin ni “Faanra mm’agan’ Jehovah ngay” e be yip’ fan e mang?
11 Susun ndabda ufgad ngad dariy fannaged Got, ya ngad pired ni aray rogon lanin’dad: “Faanra mm’agan’ Jehovah ngay, ma bay da pired ni nguud rin’ed e tiney ara tinem.” Nap’an ni nga dogned ni “faanra mm’agan’ Jehovah ngay” ma sor fan ni gad be guy rogon ni ngad rin’ed e tin nib m’agan’ ngay. Sana ba t’uf ni ngan un ko siyobay ni fan ni ngan ayuweg e tabinaw, ara ngan milekag ni fan ko fare maruwel ko Gil’ilungun Got, nge yugu boch ban’en. Machane dabda ufanthingad. Urngin ban’en ni “gad be yog ni gad e sorodad riy e ba kireb,” ya gad be dariy fannag nib t’uf rodad e ayuw rok God.—Psalm 37:5; Proverbs 21:4; Jeremiah 9:23, 24.
12. Mang fan e pi thin u James 4:17?
12 Ni nge mu’nag James e thin rok u morngaagen e ufanthin me yog ni gaar: “Cha’ nde rin’ e tin nib fel’ ni manang nsusun ni nge rin’ e ba kireb e rok, ni aram e ke denen.” Ra reb e Kristiano ma susun ni nge par nib sobut’an’ me pagan’ ngak Got. Faanra dabi rin’, ma “aram e ke denen.” Maku aram rogon ni faanra dab ni rin’ e pi n’en ni ba m’ag ko girdi’ nib mich Got u wan’rad.—Luke 12:47, 48.
Ginang ko Girdi’ ni Pire’ Ban’en Rorad
13. Mang e be yog James u morngaagen e piin ni pire’ ban’en rorad ni kar fanayed e chugum rorad u rogon nde puluw
13 Immoy boch e Kristiano ni ur chogowgad ara kar lemnaged nib manigil e par ko piin ni pire’ ban’en rorad, me ere i yog James boch e thin nib gel’ u morngaagen e piin ni pire’ ban’en rorad. (James 5:1-6) Faanra fanay e girdi’ nu fayleng e fel’ rogon rorad u rogon nde puluw, ma bay ra ‘yorgad mi yad dolo’loy ni bochan e gafgow ni bayi yib ngorad’ ko ngiyal’ nra pufthinnagrad Got ko ngongol rorad. Nap’an e ngiyal’ nem, piin ni pire’ ban’en rorad e baga’ ni ur kunuyed e mad nge grain nge wain. (Joel 2:19; Matthew 11:8) Rayog ni nge wod e chugum rorad ara rayog ni nge “longuy e ngal,” machane gathi be tamilangnag James rogon ni ma wod e chugum ya be tamilangnag rogon fene dariy fan. Yugu aram rogon ni ma t’ay e gol nge silber, machane faanra gad ra kunuy ni gad ba siin ma aram e ra m’ay fan ni bod rogon e tin ni ma t’ay. Faan ra “t’ay” ma be yip’ fan ni dan fanay e chugum nib fel’ rogon. Ere, susun ndabda paged talin ni piin ni yad be pagan’ ko chugum rorad e kar kunuyed ban’en ni “bod e nifiy” u nap’an e “tin tomur e rran” ni aram e ngiyal’ nra puog Got e damumuw rok nga dakenrad. Baga’ fan e pi thin nem ngodad ya gad be par ko ngiyal’ ni “tin tomren e rran.”—Daniel 12:4; Roma 2:5.
14. Uw rogon e ngongol rok e piin ni pire’ ban’en rorad, ma mang e susun ni ngad rin’ed?
14 Baga’ ni ma bannag e piin ni pire’ ban’en rorad girdien e maruwel ko mokun woldug, ma puluwrad e be ‘yor’ ni ngan fulweg taban. (Mu taarebnag ko Genesis 4:9, 10.) Piin ni pire’ ban’en rorad ni yad e girdi’ nu fayleng e ur “pired ni ke fel’ rogorad ma kar n’aged e salpiy ko tin nib tolang puluwon ban’en.” Ke falfalan’rad ko ngongol ndarngal nib fafel, ma kar duruw’iyed yad kar sugsuggad ni fan ko “rofen” ni baaram ni bay nl’irad ngar m’ad. Ur ‘turguyed e gechig ko piin ndawor ra bucheged ban’en ma kar thanged e pogofan rorad.’ Fith James ni gaar: “Dar togopuluwgad ngomed?” Yugu demtrug, ma susun dabda pired ni ba lanin’dad ngak e piin ni pire’ ban’en rorad. Thingar da ted ni tirok Got ban’en e kab m’on ko tin nu fayleng ban’en ko par rodad.—Matthew 6:25-33.
Michan’ e Ra Ayuwegdad Nga Ud Gum’an’gad
15, 16. Mang fan ni baga’ fan ni nge par e Kristiano nib gum’an’?
15 Tomren ni i weliy morngaagen e piin ni pire’ ban’en rorad u fayleng, me pi’ James e athamgil nga laniyan’ e pi Kristiano ni ngar gum’an’gad. (James 5:7, 8) Faanra k’adan’ e pi Kristiano ko pi magawon rorad, ma ran tow’athnagrad ko yul’yul’ ni kar ted ko ngiyal’ nra moy Kristus, ni aram e ngiyal’ ni yira pufthinnag e piin ni ke gafgownagrad. (Matthew 24:37-41) Ba t’uf ni nge par e Pi Kristiano ni yad bod ba tamilay nib gum’an’ ni be sonnag e ngiyal’ ni som’on ko n’uw nge yung awochngin e woldug ma ra sonnag e ngiyal’ ni tomren e n’uw nge yib wom’engin e woldug riy. (Joel 2:23) Ku ba t’uf ni ngad gum’an’gad ma ngad pired nib mudugilan’dad ya ke taw ko “chirofen nra moy Somol” ni Jesus Kristus.
16 Mang fan ni ngad gum’an’gad? (James 5:9-12) Gum’an’ e ra ayuwegdad ni dabda gun’gun’gad ko ngiyal’ nra rin’ pi walagdad ban’en ni be k’aringdad. Faan ra bagadad ma ra “gun’gun’ nib togopuluw ngak bagadad” nib kireb laniyan’, ma aram ma ra pufthinnagdad fare Tapuf Oloboch ni Jesus Kristus. (John 5:22) Ke taw ko “chirofen nra moy” ma be “sak’iy nga langan e mab,” ere nguud mon’ognaged e gapas ma ngad gum’an’gad ngak e pi walagdad ni boor ban’en ni be skengnag e michan’ rorad. Faanra dabda paged talin ni ke tow’athnag Got Job ya i gum’an’ ko pi skeng ni yib ngak ma ra gelnag e michan’ rodad. (Job 42:10-17) Faanra gad ra maruweliy e michan’ rodad mad pired nib gum’an’dad, ma gad ra guy ni “rib runguy Jehovah.”—Mikah 7:18, 19.
17. Mang fan ni yog James, “dabmu micheg ban’en u mit Got ni ban’en ni ka mogned ku be’ ni gimed ra rin’”?
17 Faanra dabda pired ni gadad ba gum’an’, ma sana gad ra oloboch blowthedad ko ngiyal’ nib tomal lanin’dad. Susun, sana gad ra micheg boch ban’en ndawori mudugil u wan’dad. Yog James ni ‘dabmu micheged ban’en u mit Got ni ban’en ni ka mogned ku be’ ni gimed ra rin’” ni fan ni nge ayuweg e pi Kristiano ni dabra micheged ban’en ndawori mudugil u wan’rad. Ya faanra micheg be’ ban’en u gubin ngiyal’ machane dabi rin’ ma bod ni be ban. Ere susun ni nga dogned e thin riyul’, ma ngad dogned “er rogon” ni ke mus ni faanra aram rogon u wan’dad, ara nga dogned ni “gathi arrogon” ni ke mus ni faanra aram rogon u wan’dad. (Matthew 5:33-37) Gathi be yog James nib kireb ni ngam micheg ni ga ra yog e thin riyul’ u mit e tafpuf oloboch.
Michan’ nge Meybil Rodad
18. Wuin e susun ni ngad “meybilgad” ma wuin e susun ni nga “don’ed e tang ni be pining e sorok ngak Got”?
18 Thingar da meybilgad u gubin ngiyal’ ni faanra gad ra gagiyegnag blowthedad ma ngad pired ni gad ba gum’an, ma ngad pired nrib mich Got u wan’dad. (James 5:13-20) Ri susun ni ngad “meybilgad” ni faanra bay e skeng rodad. Faanra ke falfalan’dad ma nga “don’ed e tang ni be pining e sorok ngak Got,” ni bod rogon ni rin’ Jesus nge pi apostal ko ngiyal’ ni tababnag i madenomnag fare Puguran ko yam’ ni tay Jesus. (Mark 14:26, footnote) Yu ngiyal’ ma ri ra falfalan’dad ku Got ma gad ra yin’ e tang ngak u gum’ercha’dad. (1 Korinth 14:15; Efesus 5:19) Ma uw fene fel’ e falfalan’ rodad ni ngad n’ufed Jehovah ko tang u nap’an e muulung!
19. Mang e susun ni ngad rin’ed ni faanra yib e m’ar ngodad ko tirok Got ban’en, ma mang fan?
19 Ra dubdad ni nga don’ed e tang ni faanra gad ba m’ar ko tirok Got ban’en, ya sana kad uned ko ngongol nib kireb ara darud uned ko abich u table rok Jehovah u gubin ngiyal’. Faanra er rogodad, ngad sobut’an’gad ma ngad pininged e piin ni piilal ni ngar ‘yibilayed ngak Got.’ (Proverbs 15:29) Ya ku yad ra ‘liyef e gapgep nga dakendad u fithingan Somol.’ Bod rogon ni yima tay e gapgep nga daken e malad, ma thin rorad nge thin nu Bible e ra ayuweg i fl’eg laniyan’ be’ ni ke mulan’, ara ke maruwaran’, ara be tamdag nga ban’en. ‘Re meybil nem ni yira tay u fithik’ e michan’ ngak Got e ra golnag fare m’ar,’ ni faanra gad ra maruweliy e michan’ rodad. Faanra tamilang u wan’ e piin ni piilal ni tapgin e m’ar rodad e sum ko denen nrib kireb, ma yad ra tamilangnag e denen rorad ngodad mar guyed rogon ni ngar ayuweged gadad. (Psalm 141:5) Faanra ke kalngan’dad, ma rayog ni nge mich u wan’dad nra motoyil Got ko meybil rodad ma ra n’ag fan e kireb rodad.
20. Mang fan ni susun ni ngad weliyed ngodad e denen ni kad ngongliyed ma ra bagadad ma ra meybil ni fan ngak bagadad?
20 Faanra ‘ud weliyed ngodad e denen ni kad ngongliyed,’ ma ra ayuwegdad ni dab ud denengad. Susun ni nge k’aring e runguy, ni aram felngin nra mithmithegdad ni ra “bagadad me pi’ e meybil rok bagadad ngak Got.” Rayog ni nge mich u wan’dad nra yib angin ngodad ya ra fel’ u wan’ Jehovah e ‘meybil rok be’ nib mat’aw’—ni be maruweliy e michan’ rok ngak ma ir be’ nib mat’aw u wan’ Got. (1 Peter 3:12) Ba meewar Elijah ni bod gadad, machane ke yib angin e meybil rok. I meybil ku Jehovah, ma daki aw e n’uw ko dalip nge balay e duw. Ma faani meybil biyay, me aw e n’uw nga but’.—1 Kings 17:1; 18:1, 42-45; Luke 4:25.
21. Mang e rayog ni ngad rin’ed ni faanra pag reb e Kristiano e “tin riyul’ nge yan’ nga orel”?
21 Faan mang e bay be’ ko ulung ni ke pag e tin nib riyul’ e thin ke “yan nga orel,” me pag e ngongol nge machib nib mat’aw? Sana rayog ni ngad ayuweged ngan fulweg ni faan gad ra pi’ e fonow nu Bible ngak ma ngad meybilgad ni fan ngak. Faan gad ra fulweg be’ ma rayog ni nge thap ngak Got u daken e biyul’ ni tay Kristus me par ndabi yim’ ko tirok Got ban’en nge gechig rok Got. Faan gad ra fulweg be’ nib tadenen ma aram e kad chuweged ko kireb ni be ngongliy iyan. Ma ra falfalan’dad ko ngiyal’ nra pi’ be’ ni tadenen keru’ ko kireb rok me par ni ke kalngan’, me meybil ni nge n’ag Got fan e denen rok.—Psalm 32:1, 2; Jude 22, 23.
Gad Gubin e Ra Fel’ Rogodad ko Babyor ni Yoloy James
22, 23. Uw rogon e pi thin rok James u wan’dad?
22 Ba tamilang, nra fel’ rogodad ko pi thin ni bay ko babyor rok James. Be dag ngodad rogon ni ngad gelgad ko skeng, ma ma fonownagdad ni dabda pired ni gad ba laniyan’ ara gathi ke mus e girdi’ ni pire’ ban’en rorad e ngad ted farad, ma ma ayuwegdad ni ngad ngongliyed e ngongol nib mat’aw. Be pi’ James e athamgil nga lanin’dad ni ngad gagiyegnaged blowthedad, ma ngad togopuluwgad ko ngongol nu fayleng, ma ngad mon’ognaged e gapas. Pi thin rok e susun ni nge ayuwegdad ngad pired ni gad ba gum’an’ ma ngad meybilgad ku Got.
23 Arrogon, ke pi’ James e babyor ngak e pi Kristiano kakrom ni kan dugliyrad. Machane gad gubin e susun ni ngad paged e pi thin riy ni nge ayuwegdad ngad chichiiyed pa’dad ko michan’ rodad. Pi thin rok James e rayog ni nge gelnag e michan’ rodad ma ra mithmithegdad ngad pasiggad ngad pigpiggad ku Got. Ma re thin ney ni ke thagthagnag Got e be ubung e michan’ nra n’igindad ngad pired ni gad e Pi Mich Rok Jehovah nib gum’an’ ma ngad meybilgad ku Got u nap’an e “chirofen nra moy Somol riy,” ni Jesus Kristus.
Uw Rogon e Fulweg Rom?
◻ Mang fan ni ba t’uf rok boch e Kristiano kakrom ni ngar thiliyeged e lem nge ngongol rorad?
◻ Mang e ke ginang James ngak e piin ni pire’ ban’en rorad riy?
◻ Mang fan ni susun ni ngad pired ni gad ba gum’an’?
◻ Mang fan ni susun ni ngad meybilgad u gubin ngiyal’?
[Credit Line]
Pictorial Archive (Near Eastern History) Est.
[Sasing ko page 19]
Ba t’uf rok boch e Kristiano kakrom ni ngar pired ni yad ba gum’an’ ko pi walagrad
[Sasing ko page 20]
Ba t’uf ni nge par e Kristiano nib gum’an’, ma yad ma runguyey, ma yad ma meybil ku Got ni gubin ngiyal’