KENGGIN E RE KE BABYOR NEY | GA BAADAG NI NGAM FIL E BIBLE?

Fol Bible Ni Yima Tay Ni Fan Ngak Urngin E Girdi’

Yigoo yimanangmad e Pi Mich Rok Jehovah ni bochan e machib ni gamad ma tay. Machane, ga manang ni ka gamad ma fil e Bible ko girdi’ u ga’ngin yang e fayleng?

Nap’an e duw ni 2014 mab pag 8,000,000 e Pi Mich Rok Jehovah u 240 e nam ni ur filed e Bible nga sogonap’an 9,500,000 e girdi’ u gubin e pul.a Ere, boor e girdi’ ni gamad be fil e Bible ngorad ko urngin e girdi’ ni ma par u 140 e nam u fayleng!

Bochan e re maruwel ney ni ma rin’ e Pi Mich Rok Jehovah u ga’ngin yang e fayleng, ma aram fan nib chugur ko reb nge baley e bilyon ken e Bible, nge babyor, nge magazine, nge ku boch ban’en ni yima fanay ko fol Bible ni yima ngongliy u sogonap’an 700 mit e thin! Re n’ey e ma ayuweg e girdi’ ni ngar filed e Bible ko bin ni yad baadag e thin.

“Nap’an ni kug bay u skul ma dabug ni gu ma fil e babyor rog, machane biney e fol Bible ni gu be un ngay e gu baadag. Gubin ban’en ni kug fil riy e ke yag ni nge fal’eg lanin’ug!”—Katlego, South Africa.

“Ke yag ni nggu pirieg e fulweg ko pi deer rog nge ku boch ban’en ni gu baadag ni nggu nang.”—Bertha, Mexico.

“Yima fil e Bible ngog u tabinaw rog ko ngiyal’ nib m’ag ko tayim rog. Aray rogon ni gu baadag!”—Eziquiel, Brazil.

“Pi n’en ni gamad ma fil e ba ga’ ni 15 i yan ko 30 e minit n’umngin nap’an, ma yu ngiyal’ e ma n’uw boch nap’an. Machane, yima tay nrogon ni gu baadag.”—Viniana, Australia.

“Rib manigil e biney e fol Bible ya dariy puluwon!”—Aimé, Benin.

“En ni i fil e Bible ngog e ir be’ nib gum’an’ mab gol. Munmun mi ri fel’ e tha’ u thilmow.”—Karen, Northern Ireland.

“Boor e girdi’ ni yad ma fil e Bible, machane dar manged boch e Pi Mich.”—Denton, England.

FULWEG U BOCH E DEER NIB GA’ NI MA FITH E GIRDI’ U MURUNG’AGEN E FOL BIBLE NI GAMAD MA TAY KO GIRDI’

Uw rogon ni gamad ma fil e Bible ko girdi’?

Gamad ma weliy boch e machib u lan e Bible ma gamad ma beeg boch e thin riy nib puluw ko n’en ni gamad be weliy. Bod ni, be weliy e Bible e fulweg u boch e deer ni bod e pi deer ni baaray ni be gaar: Mini’ Got? Uw rarogon Got? Bay fithingan fa dariy? Uw e ma par riy? Rayog ni ngad chugurgad ngak, fa? Kemus ni n’en nib mo’maw’ riy e ngan gay e gin ni bay e fulweg ko pi deer ney riy u lan e Bible.

Ba ga’ ni gamad ma fanay fare ke babyor ni 256 e page riy ni kenggin e, Mang e Ri Be Fil e Bible?b ni nggu ayuweged e girdi’ ni ngar pirieged e fulweg ko pi deer ney. Kan ngongliy e re ke babyor ney ni nge ayuweg e girdi’ ni ngar nanged fan e pi kenggin e machib u lan e Bible. Bay boch ban’en riy ni be weliy murung’agen Got, nge Jesus Kristus, nge murung’agen e gafgow ni ma tay e girdi’, nge fos ko yam’, nge meybil, nge ku boch ban’en.

Wuin nge uw e rayog ni ngan tay e re fol Bible ney riy?

Rayog ni ngan tay e re fol Bible ney ko ngiyal’ nge gin’en ni ga baadag ni ngan tay riy.

Uw n’umngin nap’an e fol Bible ni yima tay?

Boor e girdi’ nib ga’ ni yad ma tay reb e awa u reb e wik ni ngar filed e Bible riy. Machane, rayog ni nge thilthil n’umngin nap’an e fol Bible ni ngan tay. Ya yira guy rogon ni nge m’ag ko schedule rom. Bay boch e girdi’ ni yad ma fil e Bible u lan 10 i yan ko 15 e minit u reb e wik.

Bay puluwon ni ngan fil e Bible ngak be’, fa?

Dariy puluwon e fol Bible, maku dariy puluwon e babyor ni yima fanay ko fol Bible. Ba puluw e re n’ey ko fare thin ni yog Jesus ngak pi gachalpen ni faani gaar: “Ke yog ngomed nda mpied puluwon, ere mpied ndab ni pi’ puluwon ngomed.”—Matthew 10:8.

Uw n’umngin nap’an ni yira fil e Bible ngak be’?

Rayog ni ngam fil e Bible u n’umngin nap’an ni ga baadag. Ragag nge mereb e guruy ni bay ko fare ke babyor ni Mang e Ri Be Fil e Bible? Rayog ni ngam fil urngin e pi guruy ney ara bin ni ga baadag riy u payngin ni ga baadag ni ngan fil ngom.

Ra nge un be’ ko fol Bible Ma Aram e Ke Mang Reb e Pi Mich Rok Jehovah?

Danga’. Gamad manang nra be’ ma bay mat’awun ni nge mel’eg e n’en ni nge mich u wan’. Nap’an ni bayi fil be’ e pi kenggin e machib u Bible, ma aram e ir e ke milfan ngak ni nge dugliy e n’en ni baadag ni nge rin’.

Uw e rayog ni ngkug nang boch murung’agen e re n’ey riy?

Bay murung’agen e machib nge pi n’en ni ma rin’ e Pi Mich Rok Jehovah ko fare Web site ni jw.org.

Faanra gu baadag ni ngan fil e Bible ngog, ma mini’ e rayog ni nggu non ngak?

Mu yoloy bang e request ni bay u online ko www.jw.org.
Mu yol nga reb fapi address ni bay ko page two ko re ke babyor ney.

Boch e thin nra tamilangnag murung’agen]

a Ba ga’ ni yima fil e Bible ngak taabe’ ara in e girdi’ u taabang.

b Ke ngongliy e Pi Mich Rok Jehovah. Ba pag 230 milyon ken e re ke babyor ney ni kan ngongliy u boor ko 260 mit e thin.

AYUW NI FAN KO TABINAW

“Nap’an ni tabab e ppin rog i fil e Bible, mug guy ni ke thil. Ke fel’ boch e par ko tabinaw romow. Ma bochan ni gu baadag ni nggu nang ko mang e be fil e ppin rog, ma aram mu gu un ko fol Bible. Pi n’en ni gu fil e ayuwegeg ni nggu thil nge fel’ e ngongol rog. Bochan ni gu unew ko fol Bible, ma aram mi ri chugur thilmad chon e tabinaw rog.”—Eziquiel.

“Nap’an ni gu tabab i fil e Bible, ma aram mug tal nda kug fanay boch e falay ni kireb, mu kug tal ko muun rrum, mug nang rogon ni nggu gagiyegnag e damumuw rog. Chiney e ke beech ma ke yaram boch e naun rog. Ke ga’ fan chon e tabinaw rog u wan’ug, ma kug adag ni nggu rin’ boch ban’en ni nge felfelan’nagrad. Kug felfelan’ boch ko kafram.”—Karen.

“Bay boch e girdi’ ni yad ma gathibthibnageg ni bochan e gu ma fil e Bible. Machane, ke yog e pumoon rog ngog nib fel’ e n’en ni kug rin’. I yog ni gaar: “Dariy fan u wan’ug e n’en ni be yog e girdi’. Kug guyem ni kam thil, kam mang be’ nib manigil, ma aram e n’en nib ga’ fan u wan’ug. Mu ulul ngaum rin’ e n’en ni ga be rin’.’ Ere, kari manigil e tabinaw romow!”—Viniana.