PI DEER NI BAY E FULWEG RIY U BIBLE

Gur, bay ba ngiyal’ nra m’ay e gafgow?

Gubin e duw ma bokum milyon e girdi’ ni yad ma yim’ ni bochan e mak’iy nge m’ar. Yugu aram rogon ni bay yu yang u fayleng nib fel’ rogon e par ko girdi’ riy, machane yooren e nam u fayleng e rib gel e gafgow ko girdi’ riy. Ireray reb e magawon ni be yog e Bible ni ke n’uw nap’an nder chuw.​—Mu beeg e John 12:8.

Ra nge tal e girdi’ ndab ku ur gafgowgad, mab t’uf reb e am ni nge gagiyeg u fayleng nrayog ni nge pi’ e tin nib t’uf rok urngin e girdi’. Re am ney e thingar ki yag rok ni nge taleg e mahl, ya aram reb e ban’en nri be gelnag e gafgow ko girdi’. Machane, ke micheg Got ni bay reb e am nrayog ni nge rin’ urngin e pi n’ey.​—Mu beeg e Daniel 2:44.

Mini’ e rayog rok ni nge chuweg e gafgow ni be tay e girdi’?

Ke dugliy Got Fak ni aram Jesus ni nge gagiyegnag e girdi’. (Psalm 2:4-8) Ra ayuweg Jesus e piin gafgow, miki taleg e gafgow ni yibe tay ko girdi’ nge cham.​—Mu beeg e Psalm 72:8, 12-14.

Jesus e ir fare “Pilung ko Gapas” ni kan yiiynag murung’agen. Ma ir e ra fek e gapas nge pagan’ nga fayleng. Nap’an nra gagiyegnag e fayleng ma urngin e girdi’ nrayog ni ngar pared u taferad nib fel’ rogon e par rorad, mar felfelan’gad ko maruwel rorad, mab gaman e ggan ni ngar ked.​—Mu beeg e Isaiah 9:6, 7; 65:21-23.