Ngaum Fal’eg i Lemnag e Tirok Got Ban’en
“Um rin’ [“fal’eg i lemnag,” NW] e pi n’ey ma ga tiyan’um ngay, nge yog ni guy e girdi’ ni gubin ni ga be mon’og i yan.”—1 TIM. 4:15.
1, 2. Mang boch e kanawo’ nib thil e man’ey ko girdi’ riy?
THIN ni gad ma yog e aram e n’en ni ma ayuwegdad ko beeg babyor, nge yol, nge numon ni gad ma tay, nge rogon ni ngad nanged fan e n’en ni ke yog be’ nge be’, nge rogon ni ngad meybilgad, nge rogon ni ngad tanggad ni gad be pining e sorok ku Jehovah. Riyul’ ni yira gin nga rogon ni ma rin’ e girdi’ e pi n’ey, ni kub muun ngay rogon ni ma maruwel e man’ey rodad nge boch ban’en riy ni ke mada’ ko chiney maku dawori tamilang u wan’ e piin llowan’. Bochan ni yugu ba thil e man’ey rodad nga yugu boch ban’en ni kan sunmiy, ma aram fan nrayog ni ngad filed yugu reb e thin. I yog reb e sensey ni ma fil boor mit e thin ko girdi’ ni gaar: “Re n’em nrayog rok be’ ni nge fil e thin u nap’an nri kab bitir e aram reb e ban’en ni ma m’ug riy feni thil e [girdi’] ko tin ni ka bay ban’en.”
2 Thin ni gad ma yog e aram reb e tow’ath ni ke pi’ Got ngodad. (Ps. 139:14; Rev. 4:11) Ku arrogon e man’ey rodad ni yugu ba thil u reb e kanawo’. Ba thil e girdi’ ko gamanman, ya girdi’ e kan sunmiyrad ni yad “bod yaan Got.” Bay e puf rogon rorad, ma rayog ni ngar dugliyed ni ngar fanayed e thin ni yad ma yog ni ngar pininged e sorok ngak Got.—Gen. 1:27.
3. Mang reb e tow’ath nrib manigil ni ke pi’ Jehovah nra ayuwegdad ni ngad gonopgad?
3 Ke pi’ Got reb e tow’ath ngak e piin ni yad baadag ni ngaur pininged e sorok ngak ni Ir e Ke Sunmiy e thin ni gad ma yog. Re tow’ath nem e aram e Bible. Re ke babyor ney e kan pilyeg nga boor ko 2,800 mit e thin ni boch e ba polo’, ma boch e kemus ni yu yang riy. Nap’an ni ga ra fal’eg i fil e thin ni bay riy, ma ra munmun ma aram e rayog ni ngaum lem ni bod rogon ni ma lem Got. (Ps. 40:5; 92:5; 139:17) Maku reb e, ku ra ayuwegem ni ngam adag ni ngaum fal’eg i lemnag boch ban’en nrayog ni “nge tamilangnigem u rogon ni yima thap ngak Got.”—Mu beeg e 2 Timothy 3:14-17.
4. Mang e be yip’ fan ni ngan fal’eg i lemnag ban’en? Mang boch e deer ni gad ra weliy e fulweg riy?
4 Ra ngad fal’eged i lemnag ban’en ma be yip’ fan ni ngad lemnaged ban’en nib fel’ rogon ndemtrug ko ban’en nib fel’ ara ban’en nib kireb. (Ps. 77:12; Prov. 24:1, 2) Gali cha’ nth’abi fel’ ni ngaud fal’eged i lemnag murung’agrow e aram Jehovah Got nge Fak ni aram Jesus Kristus. (John 17:3) Machane, sana rayog ni ngad fithed ko mang e ba peth ko beeg babyor ni gad ma tay nge rogon ni gad ma fal’eg i lemnag ban’en? Mang boch ban’en nrayog ni ngad fal’eged i lemnag? Ma uw rogon nrayog ni ngad mechameged ngodad ni ngaud fal’eged i lemnag ban’en?
MU GUY ROGON NI NGE YIB ANGIN NGOM E FOL BIBLE NI GA MA TAY
5, 6. Mang e rayog ni nge ayuwegem ni nge tamilang boch ban’en u wan’um miki mit ngom?
5 Boor ban’en nrayog ni nge rin’ e man’ey rom ni yira ngat ngay. Ku bay yu ngiyal’ ni ma k’aringem e man’ey rom ni ngam rin’ boch ban’en nda mur lemnag, ni bod rogon ni ngam pogofan, ara ngam furuy em, ara ngam man u rat. Ku arrogon e beeg babyor. Bay yu ngiyal’ nrayog ni ngam beeg e babyor nda mur lemnag e n’en ni ga be beeg. Ere, aram fan nrib ga’ fan ni ngaum fal’eg i lemnag fan e n’en ni ga ma beeg. Nap’an ni ga ra beeg reb e paragraph nge m’ay, ara u m’on ni ngam man nga reb e subheading, ma rayog ni ngam tal ngam fal’eg i lemnag e n’en ni kam beeg ya nge yag nim nang ko kam nang fan fa dawor. Machane, faanra um beeg e babyor ma bay ban’en ni be magawonnagem ara der yag ni ngam tiyan’um ko n’en ni ga be beeg, ma rayog ni nge yan yan e lem rom ma dabi yib angin ngom e n’en ni ga be beeg. Ere, uw rogon nrayog ni ngad siyeged e re n’ey?
6 Ke pirieg e piin llowan’ ni faanra ud beeged e n’en ni gad be fil u rogon nrayog ni ngad rung’aged lamdad ma rayog ni nge mom ni nge mit ngodad. Manang e En ni Ke Sunmiy e man’ey rodad e re n’ey. Aram fan ni yog ngak Joshua ni nga i beeg fare babyor ko motochiyel nib “achig laman” ara nge beeg ni nge rung’ag. (Mu beeg e Joshua 1:8.a) Ga ra pirieg ni faanra um beeg e babyor nib achig lamam ara ngam beeg ni gur e ngam rung’ag, ma rayog ni nge ayuwegem ni ngam tiyan’um ko n’en ni ga be beeg miki mit ngom nib fel’ rogon.
7. Mingiyal’ e ba fel’ ni ngad fal’eged i lemnag e Thin rok Got? (Mu guy e sasing ni bay u tabolngin e re article ney.)
7 Ba mom e beeg babyor ni gad ma tay ni bochan e de t’uf ni ngad tedan’dad ko n’en ni gad be fil, machane ba mo’maw’ ni ngad fal’eged i lemnag ban’en ni bochan e ra ngam fal’eg i lemnag ban’en mab t’uf ni ngarim tiyan’um ko n’en ni ga be fil ya nge yag nim nang fan. Aram fan nib fel’ ni ngam fal’eg i lemnag ban’en ko ngiyal’ ndanim magargar, ma ngkum rin’ u bang ndariy lingan ban’en riy. Ere, ngiyal’ nib fel’ ni ngam fal’eg i lemnag ban’en e u nap’an ni ga be toffan ngu nap’an ni ga bay u bang ndariy ban’en riy nrayog ni nge magawonnagem. I yog fare psalmist ni ngiyal’ ni ma fal’eg i lemnag ban’en e nap’an ni bay u chob rok nnep’ ni be od. (Ps. 63:6) Jesus ni ir be’ nib flont e ma mel’eg bang ndariy lingan ban’en riy ni nge yan i par ngay ni nge fal’eg i lemnag ban’en me meybil.—Luke 6:12.
BOCH BAN’EN NIB FEL’ NI NGAUD FAL’EGED I LEMNAG
8. (a) Mang reb e ban’en ni ku rayog ni ngaud fal’eged i lemnag? (b) Uw rogon u wan’ Jehovah e tayim ni gad ma fanay ni ngad weliyed murung’agen?
8 Gathi kemus ni yigoo pi n’en ni ga ma beeg u Bible e rayog ni ngaum fal’eg i lemnag, ya ku bay boch ban’en. Bod nnap’an ni ga ra guy e pi n’en nib liyegdad ni ke sunmiy Jehovah, ma rayog ni ngam par ngam fal’eg i lemnag e pi n’em. Dariy e maruwar riy nra k’aringem e re n’ey ni ngam pining e sorok ngak Jehovah nga feni manigil. Ma faanra gimed bay boch e girdi’ u taabang, ma dabisiy ni ka ga ra adag ni ngam weliy lanin’um ngorad. (Ps. 104:24; Acts 14:17) Ga be lemnag ma baadag Jehovah ni ngaud fal’eged i lemnag murung’agen ma gad weliy ngak u lan e meybil rodad, fa? Bay e fulweg riy ko Thin rok. Bay ban’en ni kan micheg nra rin’ ni fan ngodad e ngiyal’ ney ko tin tomuren e rran. Be gaar e Bible: “Girdi’ ni ba’ madgun Jehovah u wan’rad e ur welthingad rorad, mi i motoyil Jehovah ngorad me rung’ag e thin ni yad be yog. Bay ba ke babyor rok ni kan yoloy ngay murung’agen e piin ni bay madgun Jehovah u wan’rad ma yad ma fal’eg i lemnag fithingan.”—Mal. 3:16, NW.
9. (a) Mang e yog Paul ngak Timothy ni nga i fal’eg i lemnag? (b) Uw rogon ni ngad folgad ko fonow rok Paul u nap’an ni gad be fal’eg rogodad u m’on ni nga darod ko machib?
9 I yog apostal Paul ngak Timothy ni nge “fal’eg i lemnag” e n’en nrayog ni nge rin’ e machib ni ma tay, nge ngongol rok, nge thin rok ko girdi’. (Mu beeg e 1 Timothy 4:12-16.) Boor ban’en ni fan ko tirok Got ban’en nib t’uf ni ngad fal’eged i lemnag. Bod nib t’uf e tayim ni ngad fal’eged i lemnag boch ban’en u nap’an ni gad be fal’eg rogodad u m’on ko rofen ni gad ra yan ni ngad guyed e en ni gad be fil e Bible ngak. Ba t’uf ni ngad fal’eged i lemnag rarogon faen ni gad be fil e Bible ngak, mu kud lemnaged reb e deer ara reb e fanathin nrayog ni nga dogned ngak nra ayuweg ni nge mon’og ko tirok Got ban’en. Faanra um rin’ e re n’ey, maku rayog ni nge ayuwegem ni nge gel e michan’ rom me yag ni ngam mon’og mu kum pasig u rogon ni ga ma fil e thin nu Bible ko girdi’. Kub fel’ ni ngad rin’ed e re n’ey u m’on ni nga darod ko machib. (Mu beeg e Ezra 7:10.) Faan ga ra beeg reb e guruy ko fare babyor ni Acts, ma rayog ni “ngam mon’og” ko machib mu kum pasig. Faan ga ra fal’eg i lemnag e pi thin nu Bible ni ga be lemnag ni ngam weliy ko girdi’ e rofen nem nge babyor ni ga be lemnag ni ngam pi’, ma rayog ni nge ayuwegem ni ngam rin’ e maruwel rom nib fel’ rogon. (2 Tim. 1:6) Thingar mu lemnag rarogon e girdi’ ko gin ni ga ma machib riy nge n’en ni yad baadag ni ngar motoyilgad ngay. Faan ga ra rin’ e pi n’ey, ma rayog ni ngam fanay e Thin rok Got nib fel’ rogon u nap’an ni ga be machibnag e girdi’.—1 Kor. 2:4.
10. Mang boch ban’en ni kub manigil nrayog ni ngad fal’eged i lemnag?
10 Bay yu ngiyal’ ni ga ma yoloy boch ban’en u nap’an e welthin ni fan ko yoor, ngu nap’an e pi assembly nge convention ni gad ma un ngay, fa? Ga ra yan u daken e pi n’en ni kam yoloy nga but’ ma rayog ni nge ayuwegem ni ngam fal’eg i lemnag boch ban’en ni kam fil ko Thin rok Got nge ulung rok. Maku reb e, boor ban’en ni yima tay nga lan fare Wulyang ko Damit nge Awake! ni yima ngongliy u gubin e pul nge pi babyor nge ku boch ban’en ni yima wereg u nap’an e pi convention nrayog ni ngaud beeged ma gad fal’eg i lemnag. Nap’an ni ga be beeg e Yearbook, mab fel’ ni ngam tal u tomuren ni kam beeg ban’en ni ke buch rok be’, mag fal’eg i lemnag fare n’em ni kam beeg ya nge yag ni taw e thin riy nga gum’irchaem. Rayog ni ngam underline nag boch e thin riy ni kam guy nib ga’ fan, mag yoloy boch e thin nga tooben ni ga be lemnag nra ayuwegem u nap’an ni kam sul ni ngam guy be’, ara nap’an ni kam man ni ngam guy reb e walag u lan e ulung ni ngam pi’ e athamgil nga laniyan’, ara ngam pi’ reb e welthin. Bin th’abi ga’ fan riy e faan ga ra tal ngam fal’eg i lemnag e n’en ni kam beeg, ma aram e ga be pag fapi thin ni nge rich nga gum’irchaem ma ka ga be tay e tayim ni ngam pining e magar ngak Jehovah u daken e meybil ni bochan e pi n’en nib manigil ni kam fil.
MU FAL’EG I LEMNAG E THIN ROK GOT NI GUBIN E RRAN
11. Mang e n’en th’abi ga’ fan ni ngaud fal’eged i lemnag, ma mang fan?
11 Riyul’ ni Thin rok Got ni kan thagthagnag e aram e n’en nth’abi ga’ fan ni ngaud fal’eged i lemnag. Machane, uw rogon ni faanra ga bay u bang ndariy e Bible rom maku dabiyog ni ngam beeg e thin riy? Dariy be’ nrayog ni nge talegem ndab kum fal’eg i lemnag e pi n’en ni kam fil ke mit ngom, ni bod rogon boch e thin nu Bible ni ga baadag nge thin ni bay ko pi tang rodad ni be weliy murung’agen Gil’ilungun Got. (Acts 16:25) Rayog ni nge ayuwegem gelngin Got nib thothup ni nge yib ngan’um urngin e pi n’em nib manigil ni kam fil.—John 14:26.
12. Mang reb e kanawo’ nrayog ni ngaum beeg e Bible rom riy?
12 Rayog ni ngam tay boch e rran u lan e wik ni ngam beeg e pi verse ko Bible ni kan dugliy ni ngan beeg ni yira weliy u nap’an fare Theocratic Ministry Skul, mag fal’eg i lemnag e thin riy. Ma tin ka bay e rran e rayog ni ngam fanay ni ngam fal’eg i lemnag murung’agen e pi n’en ni i yog Jesus nge pi n’en ni i rin’ ni bay ko pi Gospel u lan e Bible. (Rom. 10:17; Heb. 12:2; 1 Pet. 2:21) Bay ba ken e babyor ni kan ngongliy ni fan ko pi tapigpig rok Got ni be weliy murung’agen e pi n’en ni i buch rok Jesus u nap’an ni immoy u fayleng ni be yan u rogon e ngiyal’ ni buch reb nge reb. Rayog ni nge ayuwegem e re ke babyor ney ni nge yib angin ngom e pi n’en ni ga ma beeg u lan e pi Gospel.—John 14:6.
MANG NRIB GA’ FAN NI NGAUD FAL’EGED I LEMNAG BAN’EN?
13, 14. Mang nrib ga’ fan ni ngaud fal’eged i lemnag e tirok Got ban’en, ma mang e ra k’aringdad e re n’ey ni ngad rin’ed?
13 Faanra ud fal’eged i lemnag e tirok Got ban’en ma rayog ni nge ayuwegdad ni ngad mon’oggad ko tirok Got ban’en. (Heb. 5:14; 6:1) Be’ nder ma tay boor e tayim ni nge fal’eg i lemnag murung’agen Jehovah nge Jesus e dabiyog ni nge par nib gel e michan’ rok. Be’ ni aray rogon e ra munmun me palog ko tin riyul’. (Heb. 2:1; 3:12) I yog Jesus ni faanra da rung’aged e Thin rok Got ma dab da ‘ted u lanin’dad’ ma aram e dabiyog ni ngad “folgad” riy. Ma n’en nra buch e ra munmun ma rayog ni ngad paloggad ko tin riyul’ ni “bochan e magafan’, nge fel’ rogon nge felfelan’ . . . ko biney e tamilang,” ma aram e dab kud mon’oggad.—Luke 8:14, 15.
14 Ere, ngad athamgilgad ni ngaud fal’eged i lemnag e Thin rok Got. Re n’ey e ra k’aringdad ni ngad lemnaged e pi n’en ni yira pining e sorok riy ngak Jehovah, nge pi fel’ngin, nge rarogon ni be weliy e Bible. (2 Kor. 3:18) Dariy ban’en ni kab fel’ ni bod e re n’ey! Rayog ni ngam ulul ngaum fil murung’agen Got, mi i m’ug rarogon ko ngongol rom ndariy n’umngin nap’an.—Ekl. 3:11.
15, 16. (a) Mang angin nra yib ngodad ni faanra ud fal’eged i lemnag e tirok Got ban’en? (b) Mang fan ni bay yu ngiyal’ nib mo’maw’ ni ngad fal’eged i lemnag e tirok Got ban’en, machane mang fan nib fel’ ni ngad athamgilgad?
15 Faan gad ra ulul ni ngaud fal’eged i lemnag murung’agen e tirok Got ban’en, ma rayog ni ngad pared ni gad ba pasig ko tin riyul’. Ma re n’ey e rayog ni nge ayuwegdad ni ngad pied e athamgil nga laniyan’ pi walagdad u lan e ulung nge piin ni gad ma mada’nag u nap’an e machib. Maku reb e, faan gad ra fal’eg i lemnag murung’agen fare biyul ni maligach ni pi’ Jesus ni aram e bin th’abi fel’ e tow’ath ni ke pi’ Got ngodad, ma ra ayuwegdad ni nge ga’ fan u wan’dad e tha’ u thildad Jehovah ni ir e Chitamangidad. (Rom. 3:24; Jas. 4:8) Mark nreb e walag u South Africa e dalip e pul ni par u kalbus ni bochan e michan’ rok. I yog ni gaar: “Nap’an ni ga ra fal’eg i lemnag ban’en, ma bod ni kam man nga reb e milekag. Faanra um par ma ga be fal’eg i lemnag e tirok Got ban’en, ma aram e ra yoor ban’en nib beech ni ga ra fil u murung’agen Jehovah ni ir e Got rodad. Bay yu ngiyal’ nnap’an nra mulan’ug ara ke magafan’ug ko pi n’en ni ka bay nga m’on, ma gu ma fek e Bible rog nggu beeg reb e thin riy ngemu’ mug par ngaug fal’eg i lemnag fan fare thin ni kug beeg. Re n’ey e ri ma gapaseg lanin’ug.”
16 Riyul’ ni ngiyal’ ney e ri boor ban’en ko re fayleng ney nrayog ni nge magawonnagdad miki mo’maw’nag ngodad ni ngaud fal’eged i lemnag e tirok Got ban’en. Ku immoy reb e walag u Africa ni ka nog Patrick ngak ni yog ni gaar: “Lanin’ug e bod reb e kahol ni yima tay e mail nga langgin, ya boor ban’en ni bay riy ni boch e bogi ban’en ni gu baadag ni ngaug lemnag ma boch e danga’. Gubin e rran nib t’uf ni nggu yaliy e tin nib t’uf ni nggu tay u lanin’ug nge tin nib t’uf ni nggu chuweg riy. Ere, nap’an ni gu ra fal’eg i lemnag e pi n’ey, mab ga’ ni gu ma pirieg ni bay boch riy ni be ‘magafan’ug’ ngay ara de puluw ni nggu lemnag. Ere, gu ma meybil ngak Jehovah ni nge ayuwegeg ni nge chuw e pi n’em u lanin’ug ya nge yag ni gu fal’eg i lemnag e tirok ban’en ndariy ban’en ni be magawonnag lanin’ug. Yugu aram rogon nib t’uf e tayim ni nge chuw e pi n’ey u lanin’ug u m’on ni nggu tabab ni nggu fal’eg i lemnag e tirok Jehovah ban’en, machane re n’ey ni gu ma rin’ e ke ayuwegeg ni nggu chugur ngak Jehovah. Ya ma ayuwegeg ni nge tamilang lanin’ug ya nge yag ni gu nang fan e tin riyul’ nib fel’ rogon.” (Ps. 94:19, BT) Arrogon, rib ga’ angin nra yib ngak e piin ni yad ma ‘gay’ e thin u lan fare Babyor nib Thothup ni gubin e rran mu ur fal’eged i lemnag.—Acts 17:11.
UW ROGON NRAYOG NI NGAM PIRIEG E TAYIM NI NGAM RIN’ E RE N’EY RIY?
17. Mingiyal’ e ga ma fal’eg i lemnag ban’en?
17 Bay boch e girdi’ ni yad ma od nri kakadbul ni ngar beeged e babyor rorad, mar fal’eged i lemnag e thin riy, mar meybilgad. Ma bay boch e girdi’ ni yad ma rin’ e re n’ey u nap’an ni kar talgad ko maruwel ko misiw’ ni ngar abichgad. Machane, gur e sana rayog ni kam pirieg ni ngiyal’ nib fel’ ni ngam rin’ e re n’ey riy e aram e blayal’ ara u m’on ni ngam mol. Bay boch e girdi’ ni yad baadag ni ngar beeged e Bible rorad u nap’an ni kar odgad ni kakadbul ngu m’on ni ngar molod ni blayal’, ya yad ra rin’ ni aray rogon ma aram e yad be beeg ni “rran nge nep’” ara gubin ngiyal’. (Josh. 1:8) Machane, n’en nth’abi ga’ fan e ngaud ted e tayim ni gubin e rran ni ngad fal’eged i lemnag e Thin rok Got riy, ma gad buchuuwnag e tayim ni fan nga boch ban’en nde ga’ fan.—Efe. 5:15, 16.
18. Mang e be yog e Bible u murung’agen e piin ni yad ma fal’eg i lemnag e Thin rok Got ni gubin e rran ma yad ma athamgil ni ngar folgad riy?
18 Be micheg e Bible ngodad nra tow’athnag Got e piin ni yad ma fal’eg i lemnag e thin rok mar folgad riy. (Mu beeg e Psalm 1:1-3.) I yog Jesus ni gaar: “Ri kab felan’ e piin ni kar rung’aged e thin rok Got ma kar pired ni yad be fol riy!” (Luke 11:28) Bin th’abi ga’ fan riy e, faanra ud fal’eged i lemnag e tirok Got ban’en ni gubin e rran ma rayog ni nge ayuwegdad ni ngad pininged e sorok ngak Jehovah u daken e ngongol rodad. Ma faan gad ra rin’ ni aray rogon, ma aram e ra ayuwegdad Jehovah ni ngad felfelan’gad e chiney me yag e yafas ndariy n’umngin nap’an ngodad u lan e bin nib beech e fayleng rok.—Jas. 1:25; Rev. 1:3.
a Joshua 1:8, NW: “Thingar dab mu pag talin fare babyor ko Motochiyel, thingar um beeg nib achig lamam, mu um fil ni rran nge nep’, ma ngam guy rogon nguum rin’ urngin ban’en ni ba’ riy ni kan yoloy. Ma pi n’en ni ga ra lemnag ngam dugliy e ra fel’, ma yira rin’ ma ra yan i fel’.”