Ga Manang Murung’agen E Re N’ey, Fa?

Uw rogon ni ma milekag e girdi’ kakrom u barkow?

BA GA’ ndariy e barkow ni ma fek e girdi’ ko milekag ko ngiyal’ ni immoy Paul riy. Ra nge milekag be’ u barkow, mab ga’ ni ma fithfith ngak e girdi’ murung’agen e barkow ni ma fek e chugum ni nge yan ko gin ni nge sor ngay nrayog ni nge un riy. (Acts 21:2, 3) Ma mus ni faanra dabi yan fare barkow ko gin ni baadag fare milekag ni nge yan ngay, ma rayog ni nge og u reb e gampek nib chugur ko gin ni nge yan ngay, ma aram miki yaliy yugu reb e barkow nra fek ko gin ni be finey ni nge yan ngay.​—Acts 27:1-6.

Milekag ni yima tay u maday e bay ngal’an ma dariy e ngiyal’ ni kan dugliy ni ngaun milekag u barkow. Pi sala e gathi kemus ni yad ma sagaalnag e milekag ni ngar ted ni fan e be kireb e lang, ya ku bochan boch ban’en ni ke mich u wan’rad nde riyul’. Bod ni faanra be non e gapluw u daken e gaf ni kan m’ag ko lay ko barkow, ara kar guyed reb e barkow ni ke pil u dap’el’ay, ma aram e yad be lemnag nra buch waathrad ni faanra yad ra milekag e ngiyal’ nem. Pi sala e yad ma sonnag e ngiyal’ nra fel’ gelngin e nifeng, ma aram mfini chuw e barkow u gampek nge yan ko milekag. Ere nap’an nra pirieg be’ e re barkow ni nge un riy, ma aram me yan ko gin ni bay fare barkow riy ni ke fek e chugum rok nge sonnag e ngiyal’ ni nge chuw e barkow riy.

I yog be’ nib moon ni ma weliy chepin e girdi’ ni ka nog Lionel Casson ngak ni gaar: “Fare mach nu Roma e ba mom rogon ni ngan pirieg e barkow ni ngan milekag riy. Ere de t’uf ni ngan gay e barkow ni ngan un riy, ya gampek riy e bay ko gin ni ma yib fare lul’ ni Tiber riy nge po’ nga maday. Ma fare binaw nu Ostia nib chugur ko re lul’ ney e bay bangi ban’en u rom nib ga’ yang nib liyeg e ofis. Boor ko pi ofis ney e bay e barkow rorad ni ma yan nga boch e gampek, ni bod fare gampek u Narbonne [ni ngiyal ney e France] nge Carthage [ni ngiyal’ ney e Tunisia] nge ku boch e gampek. Ere faanra nge yan be’ ko milekag ma kemus ni nge yan nga reb ko pi ofis ney nge fith ko bin ngan e barkow e rayog ni nge milekag riy.”

Milekag u barkow e ba papey machane ku bay e riya’ riy. Bay in yay ni pil e barkow ngak Paul u nap’an e milekag ni be tay ni be machib.​—2 Kor. 11:25.