Um Par nib Gel e Michan’ Rom u Daken e Fol Bible ni Goo Gur

Fol Bible e ra ayuwegdad ni ngaud pared ni gad ba gel ko tirok Got ban’en mab gel e michan’ rodad, ni bod ni faanra ud ked e ggan nib fel’ nga fithik’ i dowey ma ra fel’ fithik’ i dowdad. Dabiyog ni nga i par e michan’ rom nib gel ni faanra damur fil e Bible ni gubin ngiyal’. Machane, faanra ud filed e Bible nib fel’ rogon ma aram e rayog ni nge par e michan’ rodad nib gel, miki yog ni ngad gelgad ko togopuluw ni ma fek Satan i yib ngodad, nge chogowen e chugum, nge skeng ni ma yibnag ngodad ya ngad rin’ed e tin nib kireb.​—Efe. 6:16.

Angin e Fol Bible nra Be’ ma Ir Rok: Fol Bible ni goo gadad e ma ga’nag e tamilangan’ rodad ko thin nu Bible. Ma ayuwegdad ni nge gel e michan’ rodad ma gad nang feni ga’, nge feni n’uw, nge feni tolang, nge feni toar e t’ufeg rok Kristus. (Rom. 11:33; Efe. 3:16-19) Michan’ e aram bang u wom’engin gelngin Got nib thothup, ma rayog ni nga i gagiyegnagdad. Re n’ey e ku ra ayuwegdad ni nga don’ed e bin nib beech i gadad nga dakendad mu ud ngongolgad ni bod rogon e piin ni kar ilalgad ko tirok Got ban’en. (Gal. 5:22, 23; Efe. 4:24) Michan’ e ku ma ayuwegdad u rogon ni ngad pithiged boch e magawon ni ma yib ngodad, ma gad n’ag fan e kireb ni ke rin’ boch e girdi’ ngodad, me par e gapas nge taareban’ u lan e ulung. (Kol. 3:10, 13, 14) Pi n’ey e rayog ni nge pi’ e athamgil nga lanin’dad nge boch e girdi’.

Fol Bible ni goo gadad e ku rayog ni nge ayuwegdad ni ngad salapgad u rogon ni ngad ayuweged e girdi’ u nap’an e machib. Ku ra ayuwegdad ‘ni ngad pied e fulweg ko n’en nra fith be’ ngodad ni ngad weliyed u murung’agen e re n’en ni ir e ke l’agan’dad ngay.’ (1 Pet. 3:15) Rayog ni ngad machibgad ni bod Jesus Kristus ni i machib ni bay gelngin e thin rok, ma gad manang e tin nib m’agan’ Jehovah ngay, ma rayog ni ngad tamilangnaged e n’en ni bay u Bible.​—Matt. 7:28, 29.

Rogon nge Ngiyal’ ni Ngan Fil e Bible: N’en ni ngad nameged e gathi kemus ni ngad beeged e pi babyor ni yima fil. Ba t’uf e tayim ni ngad fal’eged i lemnag e pi n’en ni gad be beeg. Mu fithem ni nge lungum: Mang rogon e re n’ey ngog? Mang e be dag u murung’agen Jehovah, nge pi fel’ngin, nge pi kanawo’ rok? Uw rogon nrayog ni nggu fanay e re n’ey ni nggu ayuweg boch e girdi’ ngay? Mang rogon e re n’ey ko pi n’en ni gu manang? Faan gad ra fal’eg i gay e fulweg u boch e deer ni ke sum, ma rayog ni nge yoor ban’en nda nanged u murung’agen e n’en ni gad be fil ma gad guy rogon nra m’ag ko tin riyul’ ni kad filed. Aram rogon ni ma yog e tamilangan’ ngodad.​—Prov. 4:5.

Ra nge fel’ rogon e fol Bible ni ngad ted, mab t’uf ni ngad ted e tayim ni fan ngay ma gad fol riy. (Mu taareb rogonnag ko Filippi 3:16.) Boch e girdi’ e kar pirieged nib mo’maw’ e re n’ey, machane ke mom boch ni bochan e kar ted e tayim ni fan ngay ma kar athamgilgad. Ma rib ga’ angin ni ke yib! Sana rayog ni ngam fil e Bible rom u m’on ni ngam mol ni blayal’. Boch e girdi’ e yad baadag ni ngar odgad nri kakadbul ngar filed e Bible rorad ya aram e ngiyal’ ndariy lingan ban’en riy. Ku rayog ni ngan fil e Bible u tomuren e abich ni misiw’ u nap’an e maruwel. Demtrug e ngiyal’ mab fel’ ni ngam mel’eg bang nib fel’ ni ngam tay e fol Bible riy, ya re n’ey e ra ayuwegem ni ngam tiyan’um ko n’en ni ga be fil me mit ngom. Faanra aram rogon ma rayog ni nge puluw e lem rom ko tin nib mat’aw.​—Prov. 15:28.

N’en ni Ngan Fil: Fol Bible ni gad ma tay e susun ni ngki un ngay e ngiyal’ ni gad ma fal’eg rogodad ni fan ko pi muulung ni gad ma tay u gubin e wik. Be yib angin ngom e pi n’en ni kan fal’eg ni fan ko fare Theocratic Ministry Skul, nge rogon ni ga ma fal’eg rogom ni fan ko Fol Wulyang ko Damit nge Fol Bible ko Ulung, fa? Mu guy rogon ngaum fol ko schedule ni fan ko pi thin nu Bible ni gad ma beeg, mag tay e tayim ni ngam fal’eg i gay boch e thin nu Bible ko pi babyor rodad. Faan ga ra yan u daken e pi n’en ni yira weliy ko bin taareb, nge bin l’agruw, nge bin dalip e welthin, ma ga ra adag ni ngam motoyil ko pi n’en ni yira weliy u nap’an e skul. Rayog ni nge mit boch e machib ko Bible ngom nib ga’ fan.

De t’uf ni ngad ted boor e tayim ni gad ma fanay ko fol Bible ni goo gadad ni fan ko ngad fal’eged rogodad ko Service Meeting, machane thingar da uneged e re n’ey ko schedule rodad. Faan ga ra tay in e minit u gubin e wik ni ngam man u daken e pi n’en ni bay ko fare Machib Ko Gil’ilungun, ma ra ayuweg e michan’ rom nga i par nib gel miki ayuwegem nge yog nim weliy e tin ni ke michan’um ngay u nap’an e machib.

Fol Bible nib fel’ rogon e ra ayuwegem ni nge ‘yib gelngin lanin’um.’ (Efe. 3:16) Arrogon, bochan e michan’ nib gel, nge t’ufeg rodad ngak Jehovah nge Jesus Kristus, nge tamilangan’ rodad, nge salap rodad ko machib, ma aram fan nrib t’uf ni ngaud filed e Bible ni goo gadad. Bay e schedule rom ni fan ko ngiyal’ ni ngam fil e Bible ni goo gur ma ga ma fol riy, fa?