Rogon ni Ke Tamilangnag e En Ke Sunmiydad Murung’agen e Tin Ke Micheg

Ka nap’an nni sunmiy e girdi’ ma ma non e En Ke Sunmiydad ko girdi’ u daken e pi engel nge boch e profet ni pumoon nge ppin. Maku reb e, ke mel’eg ni ngan yoloy e thin rok nga but’ nge murung’agen e pi tow’ath ni ke micheg. Pi n’ey ni ke micheg Got e ra yib angin ngom boch nga m’on. Ere uw e rayog ni ngam pirieg murung’agen e pi n’en ke micheg Got riy e ngiyal’ ney?

Thin rok Got ni fan ngodad e bay u lan fare Babyor nib Thothup. (2 Timothy 3:16) Uw rogon ni fanay Got e pi profet ni ngar yoloyed e thin rok nga but’? (2 Peter 1:21) I tay Got e pi n’ey nga laniyan’ boch e pumoon, ngemu’ mar yoloyed nga babyor. Bod rogon e ngiyal’ ney ni faanra baadag reb i girdien e siyobay ni nge fanay reb e tayol ni nge yoloy e thin rok nga lan bang e babyor, ma ka gad ra yog ni facha’ ni girdien e siyobay e ir e thin rok e bay u lan fagi babyor. Ere ku arrogon Got ni yugu aram rogon ni ke fanay boch e pumoon ni ngar yoloyed e thin rok nga but’, machane Ir e Thin rok e bay u lan fare Babyor nib Thothup.

GUBIN YANG NI BAY E THIN ROK GOT RIY

Bochan nrib ga’ fan e thin rok Got ma aram fan ni ke n’igin ni nge urngin e nam, nge ganong, nge girdi’ u gubin mit e thin mar filed e thin rok. (Revelation 14:6) Bochan ni be tow’athnag Got e re maruwel ney, ma aram fan ni chiney e kan pilyeg e thin ko fare Babyor nib Thothup nga boor ko 3,000 mit e thin ni boch e ba polo’ ma boch e yu yang riy. Dariy ba ken e babyor u fayleng ni aram urngin mit e thin ni kan pilyeg ngay.