Ngan Fol ko Tin Ka Nog e Ngiyal’ Ney ni Bod Rogon ni Un Fol u Nap’an Kan Thoy Fapi Yabul

GAD gubin nib mich u wan’dad ni be pow’iy Jehovah e girdi’ rok ma be pi’ e tin nib t’uf rorad ya nge yag nra pared ni yad ba chugur ngak e ngiyal’ ney ko “tin tomren e rran.” (2 Tim. 3:1) Machane, ra bagadad ma ke milfan ngak ni nge fol rok Jehovah. Rarogodad e chiney e rayog ni ngan taarebrogonnag nga rarogon piyu Israel u nap’an ni ur moyed u daken e ted. Nap’an ni yad ra rung’ag lingan e yabul ni kan thoy, ma aram e thingar rrin’ed ban’en.

I yog Jehovah ngak Moses ni nge ngongliy l’agruw i yabul ko silber ni kan amanag ni ‘nguun pong girdi’ ngay ni nge mokun nga taabang nge ngiyal’ ni ngar piliged e pi Tent rorad nga but’ ni aram e ngar n’iged gil’rad.’ (Num. 10:2) Ba thilthil rogon ni ma thoy e pi prist e pi yabul nem ni bochan e nge yag ni nang e girdi’ e n’en ngar rin’ed. (Num. 10:3-8) Ngiyal’ ney e kub thilthil rogon kanawoen ni yibe fonownag e girdi’ rok Got riy. Re article ney e gad ra weliy riy dalip e kanawo’ ni yima fonownagdad riy, ma gad taarebrogonnag e re dalip i n’ey nga rogon yima thoy fapi yabul ni nge rung’ag piyu Israel kakrom. Re dalip i kanawo’ ney e aram e nap’an ni kan piningdad ni ngad uned nga boch e muulung nib ga’, ngu nap’an ni yibe skulnag e piin piilal, ngu nap’an ni kan thilyeg boch e yaram ko ulung rodad.

NAP’AN NI KAN PININGDAD NI NGAD UNED NGA BOCH E MUULUNG NIB GA’

Nap’an nra lemnag Jehovah ni nge “muulung e girdi’” nga langan e mab ko fare tabernacle ni bay ko ba’ ni ngek, ma aram e l’agruw e yabul ni ma thoy e pi prist. (Num. 10:3, BT) Gubin e pi ganong ni kar n’ufed e tent rorad nib liyeg fare tabernacle e yad ra rung’ag lingan e gal yabul nem ni kan thoy. Ma piin yad ba chugur nga langan e garog ko tabernacle e rayog ni ngar bad nib papey. Ma tin nib palog e girdi’ e sana ra t’uf ni ngan pi’ buchuuw e tayim ngorad mfini yag ni ngar tawgad ngaram. Demtrug rogon, ma n’en ni baadag Jehovah e nge muulung urngin e girdi’ nga taabang ya nge yag ni ngar rung’aged e n’en nge yog ngorad.

Ngiyal’ ney e dakunir piningdad ni ngad muulunggad nga tabernacle, machane bay boch e muulung ni ma tay e girdi’ rok Got ni yima piningdad ngay. Pi muulung ney e ba muun ngay e pi regional convention nge boch e muulung ni gad ma tay, ma aram e gin yima fil boch ban’en riy ngodad nib ga’ fan maku yima pi’ boch e fonow riy ngodad. Gubin e girdi’ rok Jehovah u ga’ngin yang e fayleng ni ku taab n’en e yad ma rin’ ni yad ma felfelan’ ngay. Ere urngin e piin ma m’agan’rad ngay ni ngar bad ko pi muulung ney e yad ma felfelan’ ko muulung ni yad ma tay. Bay boch i yad nib n’uw e gin nge milekag riy. Machane, yad gubin ni kar bad ngaram e yad manang ndabi aw nib m’ay fan e athamgil ni kar ted.

Ere uw rogon e piin yad be par u boch e binaw nib palog ko gin yima tay e pi muulung ney riy? Bochan e computer nge boch e masin ni bay e ngiyal’ ney, ma aram fan ni ku rayog ko pi girdi’ ney ni nge yib angin ngorad e pi muulung ney ni yima tay ni gowa yad bay u rom. Bod nnap’an ni yan reb e walag ni pumoon ni owchen e tochuch rodad ko fare branch nu Benin, ma aram min n’igin ni nge yag ni guy e pi walag ni yad ma par u Arlit nreb e binaw u Niger ni bay ko fare Sahara Desert e muulung ni kan tay. Reliw’ nge taareb e walag, nge piin baadag e machib nra muulunggad nga taabang ni fan ko re muulung nem. Yugu aram rogon nib palog e gin yad bay riy, machane gowa yad bay ko gin be muulung fapi walag riy ni yad 44,131 u gubin. I yoloy reb e walag ni pumoon ni gaar: “Karim magargad ni kam yarmiyed rogon ni nge yag nug guyed e re muulung ney. Re n’ey e ke yag ni ngki dag ngomad bayay gelngin ri gamad ba t’uf romed.”

NAP’AN YIRA PINING E PIIN PIILAL NI NGAR UNED NGA BOCH E SKUL

Nap’an nra thoy e pi prist nu Israel taareb e yabul, ma aram e yigoo “pi mitethin ko yu ke girdi’ e ngar muulunggad” ko gin bay e tabernacle riy. (Num. 10:4, BT) Aram e gin ra weliy Moses boch e thin riy ngorad miki fil ngorad rogon ni ngar rin’ed boch e maruwel. Re n’ey e ra ayuwegrad ni ngar rin’ed e pi maruwel nib milfan ngorad ni ngar rin’ed ni fan ko ganong rorad. Faan gomanga gur reb e pi mitethin nem, ma ga ra athamgil u rogon nrayog rom ni nga mub ko re muulung ney me yib angin ngom e tin yira fil riy, fa?

Piin piilal u lan e ulung e ngiyal’ ney e gathi yad boch e “mitethin,” maku darur guyed rogon ni ngar suweyed e pi saf rok Got ni kan pag fan ngorad. (1 Pet. 5:1-3) Machane, yad ma athamgil u rogon nrayog rorad ni ngar ayuweged e pi saf rok Got nib fel’ rogon. Aram fan nnap’an yira piningrad ni ngar uned nga boch e skul ni kan ngongliy ni fan ngorad ni bod rogon fare Kingdom Ministry School, mab m’agan’rad ni ngar uned ngay. Pi skul ney e ma fil ngak e piin piilal rogon ni ngar rin’ed boch e maruwel u lan e ulung nib fel’ rogon. Bochan e pi skul ney, ma aram fan ni piin piilal nge pi walag ni yad ma ayuweg u lan e ulung e rayog ni ngar chugurgad ngak Jehovah. Mus ni faanra dawor mu un nga reb e pi skul ney, machane ba mudugil ni ka be yib angin boch ban’en riy ngom ni bochan e piin kar uned ngay e yad be fanay e pi n’en kar filed riy ni ngar ayuweged e ulung.

NAP’AN YIRA YOG NI NGAN THILYEG BOCH E YARAM KO ULUNG RODAD

Bay yu ngiyal’ nra taw ngay ma aram e nge thoy e pi prist nu Israel ba yabul ni boor yay mab ngoch lingan. Nap’an yira thoy e re yabul ney, ma aram e ke nang urngin e girdi’ ni baadag Jehovah ni ngar chuwgad ngku ranod nga bang. (Num. 10:5, 6) Ba yaram rogon ni ma chuw piyu Israel nga ranod nga bang, machane urngin e girdi’ nrib gel e maruwel ni yad ma tay ya nge yag ni mithmith urngin e girdi’ ngar chuwgad. Yu ngiyal’ e sana bay boch e girdi’ u Israel ndabun ni nge chuw nge yan nga bang nib thil. Mang fan?

Sana rayog ni bay boch i yad ni be lemnag ni kaygi papey ni kan thoy e yabul ni yibe yog ni ngan chuw ma ban’en ni kan rin’ nib tomgin ndan lemnag. ‘Ba’ yu ngiyal’ ni ma par fagi manileng ni ke mus ni blayal’ nge yan i mada’ ko kadbul.’ Ma yu ngiyal’ e ma par ni “l’agruw e rran, ara reb e pul” ara ba n’uw nap’an mfin nog ni ngan chuw. (Num. 9:21, 22) Maku reb e, uw urngin yay nnog ngak piyu Israel ni ngar chuwgad nga ranod ra pared nga yugu bang nib thil? Numbers ko guruy ni 33 e be weliy murung’agen sogonap’an 40 e binaw ni i yan piyu Israel riy i yan.

Bay yu ngiyal’ ni ma pirieg boch e girdi’ bang nrayog ni ngar pared riy nib tagalul’. Rayog nib fel’ ni ngan par u bang nib tagalul’ ko re gin’em “nib ga’ yang mab kan dugwen.” (Deut. 1:19, BT) Ere rayog ni nge lemnag e girdi’ ni faanra ngar chuwgad mab mom ni yad ra yan nga bang ni gathi rib fel’ e par riy.

Nap’an nra tabab fapi ganong ni ngar mithmithgad ni ngar chuwgad, ma sana ra t’uf ni nge gum’an’nag boch e ganong yad nge taw ko ngiyal’ ni ngar chuwgad. Yad gubin ni kar rung’aged lingan fare yabul ni kan thoy, machane dabiyog ni ngar mithmithgad ni yad gubin taab yay. Nap’an yira thoy e re yabul nem ni boor yay mab ngoch lingan, ma aram e pow riy ni pi ganong ni kar n’ufed e tent rorad ko ngek, ni aram e ganong rok Judah, nge Issakar, nge Zebulun e susun ni ngar chuwgad nsom’on. (Num. 2:3-7; 10:5, 6) Tomuren ni kar chuwgad, ma aram e ku ra thoy e prist fare yabul ko yay ni migid ma aram me chuw fa dalip ni baaram e ganong ni kar n’ufed e tent rorad ko yimuch. Aray rogon e n’en nra rin’ e pi prist nge taw ko ngiyal’ ni ke chuw urngin e girdi’.

Sana rayog ni be mo’maw’ rogon ngom ni ngam fol u boch ban’en ni kan thilyeg ko ulung rodad. Sana rayog ni kam lemnag ni kaygi yoor ban’en ni kan thilyeg. Fa reb e bay boch e yaram ni kan ngongliy rogon ni ga baadag ma dabum ni nge thil. Demtrug rogon, ma rayog ni kam pirieg nib mo’maw’ ni ngam gum’an’nagem u nap’an ni kan thilyeg boch ban’en. Machane, faan gad ra athamgil ni ngad folgad ko yaram ni kan ngongliy nrogon nsusun e ngad rin’ed, mab mudugil ni gad ra guy ni ke tow’athnagdad Got.

Nap’an Moses me pow’iy Jehovah bokum milyon e pumoon, nge ppin, nge bitir u daken e ted i yan. Faan gomanga der ayuwegrad ma der pow’iyrad ma dabiyog ni ngar mageygad ni yad ba fos. Ngiyal’ ney ko tin tomuren e rran ni ke mo’maw’ rogon e par e be pow’iydad Jehovah. Ma ayuwegdad ni ngad pared ni gad ba chugur ngak mab gel e michan’ rodad. Ere manga yugu da athamgilgad u rogon nrayog rodad ni ngad folgad ni bod rogon piyu Israel ni yad ba yul’yul’ ni ur folgad u rogon ni be pow’iyrad fapi yabul ni yima thoy!