Mang e Ra Dugliy Rogon e Par Rom Boch Nga M’on?

N’EN NIB MICH U WAN’ BOOR E GIRDI’

PI N’EN U LAN E LANG: Bay boch e girdi’ nib mich u wan’rad ni gin ni immoy reb nge reb e t’uf riy u lan e lang ko rofen nni gargeleg be’ riy e ra dugliy e n’en nra buch rok boch nga m’on. Yad ma beeg boch ban’en ni ka nog e horoscope ngay ni be yog e n’en nra buch rorad nga m’on me ayuwegrad ni ngar dugliyed e n’en ngar rin’ed.

NGAN BEY KO KAT: Bay boch e girdi’ nib mich u wan’rad ni faan yad ra yan nra guyed e girdi’ ni ma bey ko kat, ma rayog ni nga rogned fan ni be buch boch ban’en rorad nge n’en nib t’uf ni ngar rin’ed. Nap’an ni yad ra nang fan ni be buch e pi n’em, ma aram e rayog ni ngar siyeged boch ban’en nib kireb ndabi buch rorad, mar gayed rogon ni ngar pithiged e magawon rorad, me fel’ e par rorad.

NGAN TAYFAN E PI GA’ KAKROM: Ku bay boch e girdi’ ni yad ma lemnag nthingar ra ted fan e pi ga’ rorad ni immoy kakrom ara yugu boch e got ya nge dabi buch ban’en rorad min tow’athnagrad. Vana ni be’ ni ma par u Vietnam e yog ni gaar, “Gu ma lemnag ni faan gu ra tayfan e pi ga’ rog kakrom, ma ra fel’ boch e par romad pi fakag e chiney nge boch nga m’on.”

NGAN NGAL’ NI YUGU BE’ ARA BAN’EN: Boor e girdi’ nib mich u wan’rad nnap’an nra yim’ be’ me ngal’ ni yugu be’ ara yugu ban’en, ma re n’ey e yugu ma buch. Ba mich u wan’rad ni pi n’en nib fel’ ara pi n’en nib kireb ni be buch rorad e chiney e bochan e n’en ni ur rin’ed ko bin baaram e yafos ni ur moyed riy.

Boor e girdi’ ni yad ma lemnag ni pi n’ey e boch ban’en nde riyul’ ni ke mich u wan’uy. Yugu aram rogon maku yad ma un nga boch ban’en ni bod ni ngan yaliy e wol u paay, nge ngan bey ko kat, nge ku boch ban’en ni aray rogon. Yad ma lemnag nsana rayog ni nge ayuwegrad e pi n’ey ni ngar nanged e n’en nra buch rorad boch nga m’on.

RAYOG NI NGE AYUWEG E PI N’EY E GIRDI’, FA?

Ere gur, ke yag ni nge fel’ e par rok e piin be pagan’rad ko pi n’ey, fa?

Am lemnag e n’en ni buch rok Hào ni be’ ni ma par u Vietnam. I tayfan e pi ga’ rok ni ur moyed kakrom, ma be fanay e pi n’en bay u lan e lang, nge ku boch ban’en ni nge pow’iy. Ere yag ni nge fel’ e par rok, fa? I yog ni gaar, “I m’ay e salpiy rog, mug par nga tabon e malfith, me magawon e tabinaw rog, mi ri kireban’ug.”

Qiuming ni be’ nu Taiwan e kub mich u wan’ nrayog ni ngan fanay e pi n’en bay u lan e lang ni ngan nang e n’en nra buch nga m’on, ma kub mich u wan’ nnap’an nra yim’ be’ me ngal’ ni yugu be’ ara yugu ban’en, ma kan dugliy e n’en nra buch rok be’ boch nga m’on, maku ma tayfan e pi ga’ rok ni ur moyed kakrom, nge ku boch ban’en. Tomuren ni fal’eg i fil murung’agen e pi n’ey, me yog ni gaar: “Gu nang ni pi n’ey e ba togopuluw reb nga reb, ma ra athukuy lanin’uy. Gu nang ni pi n’en bay u lan e lang ni yima fanay ni nga nog e n’en nra buch nga m’on e ba ga’ nde puluw. Ma bin baaram nnap’an nra yim’ be’ me ngal’ ni yugu be’ ara yugu ban’en e faanra dam nang e n’en um rin’ ko bin baaram e yafos ni um moy riy, ma aram e dabiyog ni ngam thilyeg e ngongol rom ko bin migid e yafos ni ga ra yan ngay.”

Gubin e pi n’ey ni kad weliyed e dabiyog ni nge ayuwegdad ni ngad nanged e n’en nra buch rodad boch nga m’on ni bod e n’en ke nang Hào, nge Qiuming, nge yugu boch e girdi’. Ere gur, re n’ey e be yip’ fan ndariy ban’en nrayog ni ngad rin’ed e chiney ni nge fal’eg e par rodad boch nga m’on?

Boor e girdi’ ni yad ma lemnag ni faanra nge fel’ e par rorad boch nga m’on mab t’uf ni ngar nameged e skul nib tolang nge flaab. Ere mang e ke buch rok boch e girdi’ ni kar dugliyed ni ngar rin’ed e re n’ey?