Be Mich u Wan’um e Reincarnation?

“KA GA manang fachi ppin ni gimed bugli yoror u nap’an ni ga be ilal u India?” aram e n’en ni yoloy Mukundbhai ngak fak ni be un ko skul ko university u Meriken. “Ra un ko mabgol in e wik nga m’on. Kug lemnag ni fel’ ni ngam nang.”

Mang fan ni weliy e chitamangin e re n’em ngak fak? Ya ke taleg Mukundbhai e re t’ufeg nem in e duw faram. Ma bay fak u Meriken ni be un ko skul nib tolang u lan nel’ e duw. Ma ngiyal’ nem ma da ur nonow e chi ppin nem, ma manang Mukundbhai e re n’em.

Ere mang fan ni be lemnag e re n’em? Ya ke michan’ Mukundbhai ko reincarnation, ara gargel biyay.a Ere faanra ke adag fagal bitir yow ni bochan ni yow mabgol u lan reb e yafas rorow faram, ma ra kireb ni ngar parew nib dar e chiney ni kar tawgow ko duw ni rayog ni ngar mabgolgow riy. Ere ba adag Mukundbhai ni nge nang fak e re n’em u m’on ni nge leengiy fachi ppin yugu be’ ko re yafas ney.

Mu lemnag e re n’ey. Immoy bochi buliyel ni aningeg e duw rok ni kan nin’ nga aspital in yay u Mumbai, India. Ya ke kireb e valve ko gumercha’ rok. Ma gallibthir rok e ba fel’ rogon ma kari kireban’row ni be gafgow e bitir rorow. Machane ur lemnagew nra gaar: “Thingar gu lemnagew ni susun ni aram rogon. Ya dabi siy ni ke rin’ ban’en u reb e yafas rok kafram ma ereray wenegan e ngongol rok.”

Fare machib ko reincarnation e baga’ fan u wan’ bokum milyon e girdi’ ni ma un ko teliw ni Hindu nge Buddha, nge Jain nge Sikh, nge yugu boch e teliw ni sum u India. Yibe lemnag ni pi n’en ni ma buch ko yafas​—nib muun ngay ni ngan t’ufeg be’ fa ngan gafgow u ban’en​—e aram wenegan e pi n’en ni kan rin’ faram ko yugu reb e yafas.

Boor e girdi’ ni ma par ko pi binaw u Ngal e ku yad ba adag e machib ko reincarnation. Reb e actress nu Meriken ni Shirley MacLaine e be yog ni ke mich u wan’ e re n’em. Ma be’ ni ma yoloy e babyor ni Laurel Phelan nu Vancouver, British Columbia, Canada, e be yog ni ka manang boch ban’en ni buch u nap’an 50 e yafas rok faram. Kan deeriy e girdi’ u nap’an e 1994 Gallup poll ko CNN/USA Today ma kan pirieg ni ke pag 270 ko 1,016 e piin nib ilal ni ke mich u wan’rad e reincarnation. Michan’uy ko reincarnation e ku aram bang ko machib ko New Age movement. Machane mang e mich riy nib riyul’ e re machib ney?

Piin ni mmich u wan’rad ko reincarnation e ma gaar: “Pi n’en ni ma yib ngan’uy ko reb e yafas faram!” e ma micheg. Ere ke lemnag e girdi’ ni n’en ni buch ku Ratana ni bochi buliyel ni dalip e duw rok e be micheg e reincarnation ya ir be’ nu Bangkok ma ke tabab ni nge “yib ngan’ e pi n’en ni buch ko yafas rok faram ni immoy ni ir be’ ni ppin nib pasig ko teliw me yim’ u nap’an ni ke 60 nge boch e duw rok.”

Machane boor e girdi’ e de michan’ rad ko re n’em. Ma ku rayog ni ngan nog yugu ban’en ni ar fan ni be yib ngan’uy morngaagen e yafas faram.b Ke yoloy Nikhilananda ni ir e philosopher ni Hindu e babyor ni Hinduism: Its Meaning for the Liberation of the Spirit me weliy riy ni ‘Dabiyog ni ngan micheg ban’en ni buch u tomren ni yim’ be’.’ Machane ku be yog ni “fare machib ni gargel biyay e sana riyul’ ni aram rogon ko bin nde riyul’.”

Machane bpuluw e re machib ney ko Bible fa? Ma be mang e athap ko piin ni kar m’ad ni bay ko Thin Rok Got ni kan thagthagnag?

[Boch e Thin nra Tamilangnag Murung’agen]

[Sasing ko page 4]

Yibe gechignagey u boch e denen ni kan rin’ u reb e yafas faram fa?