Rogon ni Ngan Dugliy Ban’en nib Fel’ Rogon u Nap’an ni Yibe Puruy’nag e Mabgol

1-2. Uw rogon u wan’ boch e girdi’ e ngiyal’ ni ur puruy’naged be’ e mabgol?

RAYOG ni nge felfelan’ l’agruw ni’ u nap’an ni yow be puruy’nag e mabgol. Faanra gimew be puruy’nag be’ e mabgol, ma dariy e maruwar riy ni ga baadag ni ngam felfelan’ ngay. Ma boor e girdi’ ni yad ma felfelan’ ko re ngiyal’ i n’em. Tsiona nreb e walag nib pin u Ethiopia e yog ni gaar: “Nap’an ni gamow be puruy’nag figirngig e mabgol, ma aram ba ngiyal’ u lan e yafos rog nrib gel e felfelan’ nug tay riy. Yu ngiyal’ e gamow ma weliy boch ban’en nib ga’ fan, ma yu ngiyal’ e gamow ma minmin nga boch ban’en. Gu felfelan’ u nap’an nug nang ni kug pirieg be’ nib t’uf rog maku gub t’uf rok.”

² Machane Alessio nreb e walag ni pumoon u Netherlands e yog ni gaar: “Gu felfelan’ nug nang rarogon leengig u nap’an ni gamow be puruy’nag e mabgol, machane ku bay boch e magawon ni ug mada’nagew.” Gad ra weliy ko re article ney boch e magawon nrayog ni nge mada’nag e piin yad be puruy’nag e mabgol nge boch i kenggin e motochiyel u Bible nra ayuwegrad ni ngar dugliyed boch ban’en nib fel’ rogon. Ku gad ra weliy rogon nrayog ni nge ayuwegrad e pi walag u lan e ulung.

FAN NI NGAN PURUY’NAG E MABGOL

3. Mang fan ni ma puruy’nag l’agruw ni’ e mabgol? (Proverbs 20:25)

³ Yugu aram rogon nrayog ni ngan felfelan’ u nap’an ni yibe puruy’nag e mabgol, machane ku aram ban’en nib ga’ fan ni bochan e rayog ni nge k’aring l’agruw ni’ ni ngar dugliyew ni ngar mabgolgow. Rofen ni m’agpa’ rok l’agruw ni’ e yow ra micheg u p’eowchen Jehovah ni ngaur t’ufegew yow ma yow be tay farow u n’umngin nap’an e yafos rorow. U m’on ni ngad micheged ban’en, ma susun e ngar da fal’eged i lemnag nib fel’ rogon. (Mu beeg e Proverbs 20:25.) Aram rogon e n’en yima micheg u nap’an e mabgol. Ere nap’an ni be puruy’nag l’agruw ni’ e mabgol, ma aram e ngiyal’ nrayog ni ngar nangew yow nib fel’ rogon mar dugliyew ko ngar mabgolgow fa dab kur puruy’nagew e mabgol. Faanra kar dugliyew ndab kur puruy’nagew e mabgol, ma aram e gathi be yip’ fan ni kar rin’ew ban’en nib kireb. Ya aram e kar nangew ko susun e ngar mabgolgow fa danga’.

4. Mang fan nsusun e nge puluw rogon ni ngad lemnaged e ngiyal’ ni ngan puruy’nag e mabgol?

⁴ Mang nib ga’ fan ni nge puluw rogon ni ngan lemnag e ngiyal’ ni ngan puruy’nag e mabgol? Ya ra ayuweg be’ ni nge dab ra puruy’nagew be’ e mabgol nder lemnag ni nge leay. Machane gathi yigoo piin muchugbil e ba t’uf ni nge puluw rogon e lem rorad u murung’agen e re n’ey, ya gad gubin. Bod ni bay boch e girdi’ ni yad ma lemnag ni faanra be puruy’nag l’agruw ni’ e mabgol, ma aram e thingar ra mabgolgow. Uw rogon nrayog ni nge magawonnag e re n’ey e pi Kristiano ni yad ba muchugbil? Melissa nreb e walag nib pin nib muchugbil u Meriken e yog ni gaar: “Nap’an ni be puruy’nag l’agruw ni’ e mabgol, ma bay boch e Pi Mich ni yad ma lemnag nthingar ra mabgolgow. Aram fan ni bay boch i yad ndarur dugliyed ni ngar talgad be’ i puruy’nag e mabgol ni yugu aram rogon ni yad be guy ndab ra m’aggad. Ma boch e walag e yad ma siyeg ni ngar puruy’naged be’ e mabgol. Ba gel e mochuch nrayog ni nge k’aring e re n’ey.”

NGAM NANGEW GIMEW NIB FEL’ ROGON

5-6. Mang e susun ni nge guy l’agruw ni’ ni yow be puruy’nag e mabgol rogon ni ngar nangew u murung’agrow? (1 Peter 3:4)

⁵ Faanra gimew be puruy’nag be’ e mabgol, ma mang e ra ayuwegem ni ngam dugliy ko ngam mabgolgow fa danga’? Mu guyew rogon ni ngam nangew gimew nib fel’ rogon. Dabisiy nu m’on ni ngam puruy’nagew be’ e mabgol, ma bay boch ban’en u rarogon ni ga manang. Machane chiney e ke mab e kanawo’ ngom ni ngam nang e n’en bay u ‘laniyan’’ ara bin riyul’ i rarogon. (Mu beeg e 1 Peter 3:4.) Re n’ey e ba muun ngay ni ngkum nang rarogon ko tirok Got ban’en, nge boch ban’en u rarogon, nge rogon ni ma lem. Ra munmun ma susun e rayog ni ngam pi’ e fulweg ko pi deer ni baaray ni be gaar: ‘Ra fel’ ni nggu mabgolgow e cha’ney, fa?’ (Prov. 31:​26, 27, 30; Efe. 5:33; 1 Tim. 5:8) ‘Rayog ni ngaug t’ufegew gamow ma gamow be ayuwegew gamow, fa? Rayog ni ngaug fekew owchemow ko pi meewar romow, fa?’b (Rom. 3:23) Baaray ban’en ndab mu pagtalin u nap’an ni gimew be nangew gimew nib fel’ rogon: Rogon nra i m’agan’mew ngay ni ngam mechamgow ko pi n’en nib thil u rarogomew e aram e n’en nra dugliy ko gimew ra m’ag fa danga’, ma gathi pi n’en nib taareb u rarogomew.

⁶ Ku mang boch ban’en nsusun e ngam nang u rarogon be’ u nap’an ni gimew be puruy’nag e mabgol? U m’on ni ngari gel e adag rom ngak facha’, mab t’uf ni ngam weliyew boch ban’en nib ga’ fan ni bod e n’en be nameg ni nge rin’. Machane uw rogon boch ban’en ni bod ba mit e m’ar ni bay rom, ara magawon rom ko salpiy, ara boch ban’en nib kireb ni i buch rom kafram ni ke par u lanin’um? Gathi gubin ban’en nib t’uf ni ngam weliyew u nap’an ni ka fin mu tababgow i puruy’nag e mabgol. (Mu taarebrogonnag ko John 16:12.) Faanra ga be lemnag ni bay boch e deer u murung’agem nib t’uf ba ngiyal’ mfin mu pi’ e fulweg riy, ma gog ngak nge nang. Machane ra munmun mab t’uf ni nge nang facha’ e pi n’ey u murung’agem ya nge yag ni dugliy e n’en nib fel’ ni nge rin’. Ere bay ba ngiyal’ nra taw ngay mab t’uf ni ngam weliy e pi n’ey.

7. Uw rogon nrayog ni nge nang l’agruw ni’ ni yow be puruy’nag e mabgol rarogorow? (Kum guy fare kahol ni kenggin e “Ra Bigimew Ma Be Par u Bang.”) (Kum guy e sasing.)

⁷ Uw rogon nrayog ni ngam nang e bin riyul’ i rarogon facha’? Reb e kanawo’ nth’abi fel’ ni ngam rin’ew e re n’ey riy e aram e ngam weliyew urngin ban’en u fithik’ e yul’yul’, mi gimew fith boch e deer ngomew, mi gimew motoyil nib fel’ rogon. (Prov. 20:5; Jas. 1:19) Aram fan nib fel’ ni ngaum rin’ew boch ban’en nra bing e kanawo’ ngomew ni ngaum sabethingow, ni bod ni ngam abichgow u taabang, ma gimew be yan ko walk ko gin bay e girdi’ riy, ma gimew be machib u taabang. Ku rayog ni ngam nangew boch ban’en u rarogomew u nap’an ni gimed be rin’ e pi fager romew nge chon e tabinaw romew boch ban’en u taabang. Kum rin’ew boch ban’en nra ayuwegem ni ngam nang rogon e ngongol rok facha’ u nap’an ni be rin’ boch ban’en nib thilthil nge rogon e ngongol rok ko girdi’ nib thilthil. Mu tay fanam i yan ko n’en ni rin’ Aschwin ni be’ nu Netherlands. I weliy murung’agen e ngiyal’ ni ur puruy’nagew Alicia e mabgol ni gaar: “Gamow ma rin’ boch ban’en nra ayuwegmow ni nggu nangew rarogomow. Ba ga’ ni gamow ma lum u taabang ara gu rin’ew boch e maruwel u taabang. Nap’an ni gamow be rin’ e pi n’ey me yag ni ngguyew pi fel’ngimow nge pi meewar romow.”

8. Mang angin nrayog ni nge yib ngak l’agruw ni’ ni yow be puruy’nag e mabgol ni faanra ur filew e Bible u taabang?

⁸ Ku rayog ni ngam nangew rarogomew ni faanra um filew boch ban’en u Bible u taabang. Faanra kam mabgolgow, ma ra t’uf ni ngaum tew e tayim ni fan ko fol Bible ni tabinaw ya nge yag ni ga’ fan Got u lan e mabgol romew. (Ekl. 4:12) Ere mang ndab mu tew e tayim ni fan ko fol Bible e chiney ni gimew be puruy’nag e mabgol? Riyul’ ni l’agruw ni’ ni yow be puruy’nag e mabgol e dawori yag reb e tabinaw ngorow, ma fare walag ni pumoon e dawori mang lolugen fare walag nib pin. Machane faanra um filew e Bible u taabang ni gubin ngiyal’, ma rayog ni ngam nangew rarogomew ko tirok Got ban’en. Ku bay reb i angin e re n’ey ni yib ngak ba wu’ e mabgol u Meriken ni ka nog Max nge Laysa ngorow. I gaar Max: “Nap’an ni ka fin gu tababgow i puruy’nag e mabgol, ma aram mug tababgow i fil boch e babyor rodad ni murung’agen l’agruw ni’ ni yow be puruy’nag e mabgol, nge mabgol, nge tabinaw. Pi babyor nem e bing e kanawo’ ngomow ni nggu weliyew boor ban’en nib ga’ fan nra mo’maw’ ngomow ni nggu tababgow i weliy.”

BOCH BAN’EN NI NGAN LEMNAG

9. Mang boch ban’en nsusun e nge lemnag l’agruw ni’ u nap’an ni yow be dugliy e piin nga rognew ngak ni yow be puruy’nag e mabgol?

⁹ Mini’ e susun e nga mognew ngak ni gimew be puruy’nag e mabgol? Gimew e ngam dugliyew. Ra ka fin mu tababgow i puruy’nag e mabgol, ma rayog ni ngam dugliyew ni kemus ni in e girdi’ e nga mognew ngak. (Prov. 17:27) Gimew ra rin’ e re n’ey, ma aram e rayog ni nge dab un fith boch e deer ngomew nde t’uf ni ngan fith ara ni k’aringmew ni ngam lemnagew nthingar mu dugliyew ban’en e ngiyal’ nem. Machane faanra dab mognew ku be’, ma aram e rayog ni ngaum palognagew gimew ko girdi’ ya nge dabin nang. Re n’ey e bay riy’en. Ere ba fel’ ni nga mognew ngak e piin nrayog ni ngar pied boch e fonow nib manigil ngomew mar ayuweged gimew u boch e kanawo’. (Prov. 15:22) Bod nrayog ni nga mognew ngak boch e girdi’ u lan e tabinaw romew, ara pi fager romew, ara piin piilal.

10. Uw rogon nrayog ni nge par e ngongol rok l’agruw ni’ nib fel’ u nap’an ni yow be puruy’nag e mabgol? (Proverbs 22:3)

¹⁰ Uw rogon ni nge par e ngongol romew nib fel’ u nap’an ni gimew be puruy’nag e mabgol? Ra munmun ma ra gel e adag romew ngomew. Ere mang e rayog ni nge ayuwegmew ni nge par e ngongol romew nib beech? (1 Kor. 6:18) Dab um weliyew murung’agen e ngongol ndarngal, ma dab um marow nga bang ni yigoo gimew, ma dab um unumew e alkul nib pag rogon. (Efe. 5:3) Pi n’ey e rayog ni nge gelnag e ar’ar romew ko par ko pumoon nge ppin me mo’maw’nag ngomew ni ngam rin’ew e tin nib fel’. Ere ba fel’ ni ngaum weliyew rogon ni nga i par e ngongol romew nib fel’ u nap’an ni gimew be puruy’nag e mabgol. (Mu beeg e Proverbs 22:3.) Mu tay fanam i yan ko n’en ni ayuweg Dawit nge Almaz ni yow ma par u Ethiopia. Rognew ni lungurow: “Gamow ma rin’ boch ban’en u bang ni boor e girdi’ riy ara u p’eowchen e pi fager romow. Dariy ba ngiyal’ ni gamow ma par u lan e karrow ara lan e naun ni yigoo gamow. Bochan e re n’ey ma aram me yag ni ngaug siyegew boch ban’en nrayog ni nge waliymow ni nggu rin’ew ban’en nib kireb.”

11. Mang boch ban’en nsusun e nge lemnag l’agruw ni’ u nap’an ni yow be dugliy rogon ni ngaur dagew e adag rorow ngorow u nap’an ni yow be puruy’nag e mabgol?

¹¹ Uw rogon e bin baaray ni ngaum dagew e adag romew ngomew? Nap’an nra gel e t’ufeg u thilmew, ma bay boch e kanawo’ nib puluw nrayog ni ngaum rin’ew e re n’ey riy. Machane faanra gel e ar’ar romew ko par ko pumoon nge ppin, ma ra mo’maw’ ngomew ni ngam dugliyew boch ban’en nib fel’ rogon. (Tang rok Sol. 1:2; 2:6) Ku ra um dagew e adag romew ngomew mab mom nrayog ni nge mo’maw’ ni ngam t’arew lanin’mew mi gimew rin’ ban’en nib kireb. (Prov. 6:27) Ere nap’an ni gimew ra tabab i puruy’nag e mabgol ma ngam weliyew e gin ngaum musgow riy nrogon nib puluw ko pi kenggin e motochiyel u Bible.c (1 Thess. 4:​3-7) Mu fithew gimew ni nge lungumew: ‘Faanra ug dagew e adag romow ngomow ma mang e ra lemnag e girdi’ ko gin gamow ma par riy? Rayog ni nge k’aringmow e pi n’ey ni nggu ar’arnagew e par ko pumoon nge ppin, fa?’

12. Faanra bay yu ngiyal’ nder taareban’ l’agruw ni’ ni yow be puruy’nag e mabgol, ma mang e susun ni ngar lemnagew?

¹² Uw rogon nrayog ni ngam pithigew e magawon ni ke sum u thilmew? Uw rogon ni faanra bay yu ngiyal’ ndabi taareban’mew? Gur, re n’ey e aram e be dag ndab mm’aggow? Gathi gubin ngiyal’ ni aram rogon, ya gubin e piin yad be puruy’nag e mabgol ni bay yu ngiyal’ nder ma taareban’rad. L’agruw ni’ nib fel’ e mabgol rorow e yow ma maruwel u taabang ni ngar pithigew e magawon ni ke sum u thilrow. Ere rogon ni gimew ma pithig e magawon ni ke sum u thilmew e chiney e rayog ni nge m’ug riy ko ra fel’ e mabgol romew fa danga’. Mu fithew gimew ni nge lungumew: ‘Rayog ni nggu weliyew ban’en u fithik’ e gapas nge tayfan, fa? Ba mom ni nggognew e oloboch romow mug guyew rogon ni nggu thilyegew boch ban’en u rarogomow fa danga’? Ba mom ni nggu pagew lanin’mow, ma gamow wenig ngomow, ma gamow n’ag fan e kireb rok bagamow, fa?’ (Efe. 4:​31, 32) Faanra gubin ngiyal’ nder taareban’mew ara gimew ma tugthin u nap’an ni gimew be puruy’nag e mabgol, ma dabisiy ndabi thil e re n’ey u tomuren ni kam mabgolgow. Faanra kam nang ndab mm’aggow facha’, ma n’en nib fel’ ni ngam rin’ew e ngam talgow i puruy’nag e mabgol.d

13. Mang e ra ayuweg l’agruw ni’ ni yow be puruy’nag e mabgol ni ngar dugliyew n’umngin nap’an ni ngar puruy’nagew e mabgol riy?

¹³ Uw n’umngin nap’an nsusun e ngam puruy’nagew e mabgol? Gad ra dugliy ban’en ndab da lemgad nib fel’ rogon u m’on riy, mab ga’ ni ma yib wenegan nib kireb. (Prov. 21:5) Susun e ngam puruy’nagew e mabgol nib fel’ n’umngin nap’an ya nge yag nim nang rarogon facha’ nib fel’ rogon. Machane susun e dabi pag n’umngin nap’an ni ngam rin’ew e re n’ey. Ku be gaar e Bible: “Faanra i l’agan’uy nga ban’en me kireb fare n’em, me mulan’uy.” (Prov. 13:12) Maku reb e faanra n’uw nap’an ni um rin’ew boch ban’en u taabang, ma rayog ni nge mo’maw’ ni ngam siyegew e lumel ni be yib ngomew ni ngam unew ko par ko pumoon nge ppin. (1 Kor. 7:9) Ere gathi n’umngin nap’an ni kam puruy’nagew e mabgol e ngam lemnag ya ngam fithem ni nge lungum, ‘Mang e kab t’uf ni nggu nang u rarogon e cha’ney ya nge yag ni nggu dugliy e n’en ni nggu rin’?’

UW ROGON NI NGAN AYUWEG L’AGRUW NI’ NI YOW BE PURUY’NAG E MABGOL?

14. Mang boch e kanawo’ nrayog ni ngan ayuweg l’agruw ni’ riy ni yow be puruy’nag e mabgol? (Kum guy e sasing.)

¹⁴ Faanra gad manang l’agruw ni’ ni yow be puruy’nag e mabgol, ma uw rogon nrayog ni ngad ayuweged yow? Rayog ni ngad pininged yow ni ngad abichgad u taabang, ara ra unew ko fol Bible ni tabinaw rodad, ara da rin’ed boch ban’en u taabang ni ngad felfelan’gad ngay. (Rom. 12:13) Pi n’ey e ku rayog ni nge ayuwegrow ni ngkur nangew boch ban’en u rarogorow. Ba t’uf be’ ni nge un ngorow, ara ngan ayuwegrow ni ngar thapgow nga bang, ara bang nrayog ni ngar nonow riy ni yigoo yow, fa? Faanra ba t’uf, ma gur, rayog ni ngad ognaged e ayuw ngorow? (Gal. 6:10) Alicia ni faan kan weliy murung’agen e weliy e n’en yow baadag Aschwin ni un rin’ ngorow ni gaar, “Gu felfelan’gow u nap’an ni yog boch e walag nrayog ni ngaug warow nga tabinaw rorad ni faanra ba t’uf bang ni nggu rin’ew boch ban’en riy u taabang ni gathi yigoo gamow.” Faanra yog l’agruw ni’ ni yow be puruy’nag e mabgol ni ngam un ngorow, ma rayog ni ngam sap ngay ni aram reb e kanawo’ nrayog ni ngam ayuwegrow riy. Mu guy rogon ndab mu digeyrow u bang ni yigoo yow, machane kub t’uf ni ngam nang e ngiyal’ ni ngam pagrow ni ngar nonow ni yigoo yow.​—Fil. 2:4.

15. Mang e ku rayog ni ngan rin’ ni ngan ayuweg l’agruw ni’ ni yow be puruy’nag e mabgol? (Proverbs 12:18)

¹⁵ Ku rayog ni ngad ayuweged e piin yad be puruy’nag e mabgol ko n’en gad ma yog ara n’en ndaru dogned. Bay yu ngiyal’ nrayog nib t’uf ni ngad t’ared lanin’dad. (Mu beeg e Proverbs 12:18.) Bod nrayog ni gad baadag ni nga dogned ko girdi’ ni ke tabab l’agruw ni’ i puruy’nag e mabgol, machane rayog ni baadag fagali cha’ ni yow e nga rognew ko girdi’. Susun e dab da gun’gun’naged l’agruw ni’ ni yow be puruy’nag e mabgol ara da gathibthibnaged yow u boch ban’en ni yow e ngar dugliyew rorow. (Prov. 20:19; Rom. 14:10; 1 Thess. 4:11) Maku reb e rayog ndubrow ni nga unog boch ban’en ngorow ara un fith boch e deer ngorow ni be dag nsusun e ngar mabgolgow ara yow ra mabgol. Bay reb e walag nib pin ni ka nog Elise ngak nge figirngin nrognew ni lungurow, “Ug magagawongow u nap’an ni i fith boch e girdi’ ngomow murung’agen e ngiyal’ ni nggu tew e m’agpa’ romow riy ndawor gu weliyew.”

16. Mang e susun ni ngad rin’ed ni faanra ke tal l’agruw ni’ i puruy’nag e mabgol?

¹⁶ Uw rogon ni faanra ke dugliy l’agruw ni’ ni ngar talgow i puruy’nag e mabgol? Susun e dab da fithed boch ban’en ngorow ndariy rogon ni ngad nanged ara da folgad ngak bagayow. (1 Pet. 4:15) I yog reb e walag nib pin ni ka nog Lea ngak ni gaar: “Gu rung’ag ni bay boch e girdi’ ni yad be weliy fan nrayog ni kug talgow reb e walag ni pumoon i puruy’nag e mabgol. Ri kireban’ug ko re n’ey.” Kad weliyed faram nra ke dugliy l’agruw ni’ ni ngar talgow i puruy’nag e mabgol, ma gathi aram e be yip’ fan nib kireb e n’en kar dugliyew. Ya ba ga’ ni be yip’ fan ni kar nangew ko susun e ngar mabgolgow fa danga’. Yugu aram rogon ma rayog ni nge kireban’row ni bochan e re n’ey. Ere rayog ni ngad lemnaged boch e kanawo’ ni ngad ayuweged yow riy.​—Prov. 17:17.

17. Mang e susun ni nge ulul l’agruw ni’ ni yow be puruy’nag e mabgol ni ngar rin’ew?

¹⁷ Kad guyed ni bay boch e magawon nrayog ni nge mada’nag l’agruw ni’ u nap’an ni yow be puruy’nag e mabgol, machane ku aram ba ngiyal’ nrayog ni ngar felfelan’gow riy. I yog Jessica ni gaar: “Bin riyul’ riy e boor ban’en nthingar gu rin’ew u nap’an ni gamow be puruy’nag e mabgol. Machane gub felfelan’ ngay nug fanayew e tayim romow nge gelngimow ni nggu nangew rarogomow nib fel’ rogon.” Faanra gimew be puruy’nag be’ e mabgol mi gimew ulul i guy rogon ni ngam nangew rarogomew nib fel’ rogon. Faan gimew ra rin’ e re n’ey, ma aram e rayog ni ngam dugliyew boch ban’en nib fel’ rogon.