N’en Nra Ayuwegem ni Ngaum Fil e Bible Rom ni Gubin Ngiyal’
BA MO’MAW’ ngom ni ngaum fol Bible ni yigoo gur ni gubin ngiyal’ mu kum felfelan’ ngay, fa? Rayog ni gad gubin ni bay yu ngiyal’ ni aray rogon e lem rodad. Machane am lemnag boch ban’en ni gad ma rin’ ni gubin ngiyal’, ni bod e maluk. Ba t’uf e tayim nge athamgil ni ngad ted ya nge yag nda malukgad, machane nap’an ni gad ra mu’ ko maluk ma gad ma thamiy ni kad baudgad! Ere gad ra fil e Bible rodad ma bod ni kad ‘malukgad ko ran kad beechgad’ u daken e thin rok Got. (Efe. 5:26) Baaray boch ban’en nrayog ni nge ayuwegem:
Mu ngongliy e schedule rom. Fol Bible ni ma tay reb e Kristiano ni goo ir e aram reb e ban’en “nth’abi ga’ fan” nib t’uf ni nge rin’. (Fil. 1:10, NW) Ere mang dab mu yoloy e rofen nge ngiyal’ ni ngam fil e Bible rom nga bang nib mom nrayog ni ngam guy ara mu yoloy nga bang e babyor ngam gabdiy ko icebox rom ya nge yag ni ngaum fol ko schedule rom? Fa reb e rayog ni ngam alarmnag e phone ara tablet rom ya nge puguran ngom ni ke chugur ko ngiyal’ ni ngam fil e Bible rom.
Mmel’eg e ngiyal’ nge rogon ni ngam fol Bible nib puluw ngom. Ba mom ngom ni ngam tiyan’um ko fol Bible u lan ba ngiyal’ nib n’uw nap’an fa ngam rin’ nib ngoch nap’an? Gur e ga manang rarogom nib fel’ rogon. Ere mu dugliy n’umngin nap’an ni ngaum fil e Bible rom nib puluw nga rarogom. Faanra ke taw ko ngiyal’ ni ngam fil e Bible rom ma dabum ni ngam rin’, ma mang ndab mu fil e Bible rom ni kemus ni ragag e minit? Faanra kemus ni kam fil e Bible rom u lan ragag e minit, ma boor ban’en nrayog ni ngam fil riy. Ma nap’an ni ga ra tabab, ma sana rayog ni ga ra adag ni ngam n’uwnag nap’an e fol Bible ni ga be tay.—Fil. 2:13.
Mmel’eg boch ban’en ni ngam fil u m’on riy. Faanra ngiyal’ ni ngam fil e Bible rom riy e ngam lemnag e n’en ngam fil murung’agen, ma rayog nsana damur “maruwel ko tayim rom nib fel’ rogon.” (Efe. 5:16, NW) Mu guy rogon ni ngam yoloy nga but’ boch e article ara boch ban’en ni ga baadag ni ngam fil murung’agen. Ma nap’an nra yib reb e deer ngan’um, mag yoloy nga but’. Tomuren ni kam mu’ ko fol Bible, ma rayog ni ngkum yoloy nga but’ yugu boch ban’en ni ka ga baadag ni ngam fil murung’agen.
Faanra ba t’uf mag thilyeg boch ban’en. N’en th’abi ga’ fan e ngaum fil e Bible rom ni gubin e wik. Ere faanra ba t’uf mag thilyeg e rofen, ara ngiyal’, ara n’umngin nap’an ni ngam fil e Bible rom riy, ara n’en ngam fil, ya nge yag ni um fil e Bible rom ni gubin ngiyal’.
Faanra ud filed e Bible rodad ni gubin ngiyal’, ma ra yib angin ngodad. Ra gel e chugur ko tha’ u thildad Jehovah, ma gad nang rogon ni ngaud ngongolgad u fithik’ e gonop, maku ra pi’ e gel nga lanin’dad.—Josh. 1:8.