Dab Mu Pagem—Rogon ni Ngam Rin’ Boch Ban’en ni Yugu Aram Rogon ni Boor Pa’ u Puluwom
1. Mang fan ni bay boch e walag ndubrad ni ngar tababgad i fil e Bible ngak be’?
1 Bay boch e walag ndubrad ni ngar tababgad i fil e Bible ngak be’ ni bochan e boor pa’ u puluwrad. Ba t’uf e tayim ni nge yag nim ayuweg be’ ni be fil e Bible. Ba t’uf e tayim ni ngan fal’eg rogoy ni fan ko fare study, min ayuweg facha’ ni nge gel nga boch e magawon rok. I yog apostal Paul ni ke pi’ ir nga pa’ piyu Thessalonika ni fan e nge ayuwegrad ngar nanged Jehovah. (1 Thess. 2:7, 8) Ere, uw rogon ni ngad filed e Bible ngak be’ ni yugu aram rogon ni boor pa’ u puluwdad?
2. Mang e ma rin’ e t’ufeg rodad ngak Jehovah nga rogon ni gad ma maruwel ko tayim rodad?
2 Ba T’uf e Tayim ni Fan ko Pigpig ni Gad Be Tay: Bin riyul’ riy e ba t’uf e tayim ni fan ko pigpig ni gad ma tay ngak Jehovah. Bod ni, gad ma tay e tayim ni gubin ngiyal’ ni fan e ngad uned ko muulung, nge machib, nge beeg Bible, nge meybil. Be’ nib mabgol ma boor pa’ u puluwon e ma felfelan’ ni nge tay e tayim ni fan ko en mabgol rok. Faanra aram rogon me ere ri kub ga’ fan ni ‘urngin yay nra mab e kanawo’ ngodad’ ma ngad rin’ed e pi n’ey nbochan e ba t’uf Jehovah rodad. (Efe. 5:15-17; 1 John 5:3) Rogon ni yog Jesus e fare maruwel ni ngan yognag boch pi gachalpen e aram ban’en nib ga’ fan ko pigpig ni gad be tay. (Matt. 28:19, 20) Faan gad ra lemnag e re n’ey, ma ra ayuwegdad ni ngad guyed rogon ni ngad tababgad i fil e Bible ngak be’.
3. Uw rogon nrayog ni ngad ayuweged e Bible study rodad ni yugu aram rogon ni boor pa’ u puluwdad ni bochan boch e magawon?
3 Machane, uw rogon ni faanra boor pa’ u puluwdad ni bochan e gad ma maruwel, ara ke yib ba mit e m’ar ngodad, ara bay boch e maruwel nib mil fan ngodad u lan e ulung? Boch e pi walag ney e yad ma fil e Bible ngak be’ u telefon ara computer. Ma piin ni bay ba mit e m’ar rorad e kar yarmiyed ni nge yib e en ni yad ma fil e Bible ngak nga tabinaw rorad ko fol Bible. Maku bay boch e walag ni kar yarmiyed ngak reb e walag ni nge fil e Bible ko en ni yad ma fil e Bible ngak ko ngiyal’ ndabiyog rorad.
4. Mang boch e tow’ath nra yag ngodad ni faan gad ra fil e Bible ngak be’?
4 Ba gel e felfelan’ ni i tay Paul ni i fanay e tayim rok nge gelngin ni nge ayuweg boch e girdi’ ni ngar nanged e tin riyul’. (Acts 20:35) Nap’an ni lemnag angin e maruwel ni i tay u Thessalonika, ma aram me k’aring ni nge pining e magar ngak Jehovah. (1 Thess. 1:2) Rayog ni nge gel e felfelan’ ni gad ma tay ko machib ni gad ma un ngay nfaanra dab da paged boch ban’en ni nge talegdad ndab da filed e Bible ngak be’.