Felfelan’ ni Ma Yib Ngak e Piin ni Kar Momnaged Rogon e Par Rorad
DANIEL NGE MIRIAM e ra mabgolgow ko September ko duw ni 2000, ma ranow ra parew nga Barcelona nreb e mach ni bay u Spain. I yog Daniel ni gaar: “Ba fel’ rogon e par romow. Bochan nib fel’ e maruwel romow, ma aram e rayog ni nggu abichgow u boch e tagil’ e abich nib manigil, ma gamow be milekag nga boch e nam, ma gamow be chuw’iy boch e mad nib tolang puluwon ni nggu fanayew. Ku gamow ma un ko machib ni gubin ngiyal’.” Machane, bay ban’en ni buch ni thilyeg rogon e par romow.
Nap’an reb e convention nni tay ko duw ni 2006, ma aram min pi’ ba welthin ni bay boch ban’en nni weliy riy nri taw nga gum’irchaen Daniel. Re welthin nem e ni fith e re deer ni baaray riy ni be gaar: “Gad be rin’ e tin nrayog rodad ni ngad ayuweged e piin ni yibe n’en ni ‘ngan thang e fan rorad’ ya nge yag nra leked fare pa’ i kanawo’ ni be sor ko yafos ni manemus, fa?” (Prov. 24:11) Kan tamilangnag ko re welthin nem nib milfan ngodad ni ngad weliyed e tin riyul’ u Bible ko girdi’ ya aram e n’en nra ayuweg e yafos rorad. (Acts 20:26, 27) I yog Daniel ni gaar, “Gowa bod ni gag e be non Jehovah ngog.” Kun tamilangnag ko re welthin nem ni faanra yoornag be’ ban’en ni be rin’ ni fan ko pigpig rok ngak Jehovah, mab gel e felfelan’ nra yib riy ngak. Manang Daniel nriyul’ e re n’ey, ya ngiyal’ nem e be pioneer Miriam ma be guy nib gel e felfelan’ ni be tay.
I yog Daniel ni gaar, “Gu dugliy u wan’ug ni nggu thilyeg boor ban’en u rogon e par rog.” Ma aram e n’en ni rin’. I lichnag urngin e awa ni be maruwel riy, me un ko pioneer, ma aram me tabab ni nge lemnag gelngin e felfelan’ ni yow ra tay Miriam ni faan yow ra yan ra piew e ayuw ko gin nib t’uf e ayuw ko machib riy.
SOM’ON E KUG MADA’NAGEW BOCH E MAGAWON—NGEMU’ MI NOG BAN’EN NGOMOW NRIB MANIGIL
Nap’an e May ko duw ni 2007, ma aram me tal Daniel nge Miriam ko maruwel rorow ma aram ma ranow nga Panama nreb e nam ni ka ranow bayay ngay kafram. Nap’an nranow e ngaram ma aram ma ranow nga nochi donguch ko machib ni bay u bangi ban’en ni ka nog yu Bocas del Toro Archipelago ngay ni bay u lan e Day ni Caribbean. Yooren e girdi’ ni yad ma par u rom e ka nog e Ngabe ngorad. Ere, lemnag Daniel nge Miriam ni faan yow ra par u Panama u lan meruk e pul ma yow ra gaman ko salpiy ni bay ni kar chaariyew ni fan ko re milekag nem.
Ba ga’ ni yow ma milekag u reb e pi donguch nem nga reb ni yow be yan u bowoch, maku yow ma yan u rat u reb e binaw nga reb. Keb ngan’row e yay nth’abi som’on nranow u rat u bangi ban’en ni 20 e mayel palogin ni yow be yan u daken yochi burey, ngu taramaen e yal’ nib gel. I chugur ni nge aw Daniel nga but’ ni bochan e kari aw parawon. Yugu aram rogon ma rib gol e girdi’ ko pi tabinaw ni u ranow ngay ni tafen e pi girdi’ nem ni ka nog e Ngabe ngorad, ma bayi n’en mu un ayuwegrow nib ga’ nu tomuren nra nangew rogon i yog in bug e thin rorad. De n’uw nap’an nga tomuren, ma aram mar tababgow i fil e Bible ngak 23 e girdi’.
Machane, nap’an ni m’ay e salpiy rorow ma aram mi ri kireban’row. I yog Daniel ni gaar: “Nap’an ni gamow ra lemnag ni nggu sulow nga Spain, ma ri ma sugsug e lu’ nga owchemow. Kari kireban’mow ni nggu digeyew e piin ni gamow ma fil e Bible ngorad.” Machane, faani reb e pul nga tomuren, ma aram mi nog ban’en ngorow nri felfelan’row ngay. I yog Miriam ni gaar: “I taw e thin ngomow ni yibe yog ni nggu mangew special pioneer. Rib gel e felfelan’ nug tew ni bochan e rayog ni ngkug ululgow ko maruwel romow!”
N’EN NI KARI GELNAG E FELFELAN’ ROROW
Bochan boch ban’en ni thil u lan e ulung u nap’an e duw ni 2015, ma aram mi nog ngak Daniel nge Miriam ndabkiyog ni ngar ululgow ko pigpig ni yow be tay ni yow l’agruw e special pioneer. Ere, mang e rrin’ew? I pagan’row ko fare thin ni kan micheg ni bay ko Psalm 37:5 ni be gaar: “Mu piem ngak Somol; mu pagan’um ngak, me ayuwegem.” I yag ni ngar piriegew e maruwel nrayog ni ngar unew ngay ni nge yag buchuuw e salpiy riy ngorow nra ayuwegrow ni ngkur ululgow ko pioneer, ma chiney e yow be pigpig u reb e ulung ni bay u Veraguas nreb e binaw u Panama.
I yog Daniel ni gaar: “U m’on ni nggu chuwgow u Spain, ma dag nangew ko rayog ni nggu momnagew rogon e par romow, fa dabiyog. Chiney e ke yag ni nggu momnagew e par romow, ma bay gubin ban’en nib t’uf romow.” Mang e n’en ni kari gelnag e felfelan’ rorow? I lungurow, “Dabiyog i weliy gelngin e felfelan’ ni gamow be tay ni be yag ni nggu ayuwegew e piin nib sobut’an’rad ni ngar filed murung’agen Jehovah!”